‘Buot sa Anak nga Ibutyag ang Amahan’
‘Buot sa Anak nga Ibutyag ang Amahan’
“Kon kinsa ang Amahan, walay usa nga nakaila gawas sa Anak, ug siya nga kaniya buot sa Anak nga ibutyag siya.”—LUC. 10:22.
UNSAON NIMO PAGTUBAG?
Nganong si Jesus ang labing kuwalipikadong mobutyag sa iyang Amahan?
Giunsa pagbutyag ni Jesus ang iyang Amahan ngadto sa uban?
Sa unsang mga paagi imong masundog si Jesus sa pagbutyag sa Amahan?
1, 2. Unsang pangutana ang gikalibgan sa kadaghanan, ug ngano?
‘KINSA ang Diyos?’ Daghan ang nalisdan sa pagtubag niini. Pananglitan, kadaghanan sa nag-angkong mga Kristohanon nagtuo nga ang Diyos maoy Trinidad. Apan daghan ang moingon nga imposibleng masabtan ang maong doktrina. Matod sa usa ka magsusulat bahin sa relihiyon: “Usa kini ka doktrina nga dili matugkad sa limitadong hunahuna sa tawo.” Ang uban nga nagtuo sa ebolusyon miingon nga walay Diyos ug ang tanang butang sa uniberso aksidente rang mitungha. Hinuon, si Charles Darwin wala moingon nga walay Diyos, apan matod niya: “Para nako, kini nga ulohan maoy saylo na sa kinaadman sa tawo.”
2 Bisag lainlain ang gituohan sa mga tawo, duna silay mga pangutana bahin sa Diyos. Apan kay wala man sila makakaplag ug makapatagbawng mga tubag bahin niini, daghan ang mihunong na sa pagsusi. Sa pagkatinuod, si Satanas “nagbuta sa mga hunahuna sa mga dili-magtutuo.” (2 Cor. 4:4) Dili ikatingala nga ang kadaghanan nalibog ug wala mahibalo sa kamatuoran bahin sa Diyos, ang Amahan ug Maglalalang sa uniberso!—Isa. 45:18.
3. (a) Kinsay nagbutyag sa Amahan nganhi kanato? (b) Unsang mga pangutana ang atong hisgotan?
3 Hinungdanon nga makat-onan sa mga tawo ang kamatuoran bahin sa Diyos. Ngano? Kay kadto lamang nagatawag “sa ngalan ni Jehova” ang maluwas. (Roma 10:13) Ang pagtawag sa ngalan sa Diyos nagpasabot nga kinahanglang nakaila kita kang Jehova ingong Persona. Gitudlo ni Jesu-Kristo kining hinungdanong kamatuoran ngadto sa iyang mga tinun-an. Iyang gibutyag ang Amahan ngadto kanila. (Basaha ang Lucas 10:22.) Nganong si Jesus ang labing kuwalipikadong mobutyag sa Amahan? Giunsa niya kini pagbutyag? Ug sa unsang paagi atong masundog si Jesus sa pagbutyag sa Amahan ngadto sa uban? Atong hisgotan kining mga pangutanaha.
SI JESU-KRISTO—ANG LABING KUWALIPIKADONG MOBUTYAG SA AMAHAN
4, 5. Nganong si Jesus ang labing kuwalipikadong mobutyag sa iyang Amahan?
4 Si Jesus ang labing kuwalipikadong mobutyag sa iyang Amahan. Ngano? Kay una pa lalanga ang ubang buhing butang, si Jesus naglungtad na sa langit ingong espirituhanong linalang. Siya ang “bugtong nga Anak sa Diyos.” (Juan 1:14; 3:18) Kay wala pay laing linalang, ang Anak nakapahimulos sa bug-os nga atensiyon sa iyang Amahan ug nakakat-on bahin Kaniya ug sa Iyang mga hiyas. Sulod sa minilyong katuigan, dayag nga pirme silang mag-estoryahay ug milalom ang ilang gugma sa usag usa. (Juan 5:20; 14:31) Seguradong daghan kaayog nakat-onan ang Anak bahin sa personalidad sa iyang Amahan!—Basaha ang Colosas 1:15-17.
5 Gitudlo sa Amahan ang Anak ingong Iyang tigpamaba, “Ang Pulong sa Diyos.” (Pin. 19:13) Busa si Jesus ang labing kuwalipikadong mobutyag sa Amahan ngadto sa uban. Haom gayod nga ang magsusulat sa Ebanghelyo nga si Juan naghubit kang Jesus, “ang Pulong,” ingong “anaa sa sabakan sa Amahan.” (Juan 1:1, 18) Lagmit anaa sa hunahuna ni Juan ang kostumbre sa pagpangaon nga komon sa iyang panahon. Ang usa ka dinapit palingkoron duol sa laing dinapit aron dali silang magkaestoryahay. Sa susama, kay ang Anak “anaa sa sabakan” sa iyang Amahan, suod kaayo sila ug pirmeng magkaestoryahay.
6, 7. Sa unsang paagi mas milig-on ang relasyon sa Amahan ug Anak?
6 Ang Anak “gikahinangpan pag-ayo [sa Diyos] sa matag adlaw.” (Basaha ang Proverbio 8:22, 23, 30, 31.) Busa mas milig-on ang ilang relasyon samtang nagkauban sila sa pagbuhat ug samtang gisundog sa Anak ang mga hiyas sa iyang Amahan. Sa paglalang sa ubang intelihenteng linalang, nakita sa Anak kon sa unsang paagi si Jehova nakiglabot sa matag usa kanila. Seguradong milalom ang iyang gugma ug pagtahod sa iyang Amahan.
7 Bisan sa dihang si Satanas mirebelde sa katungod ni Jehova sa pagmando, ang Anak nakakat-on kon giunsa ni Jehova pagpakitag gugma, hustisya, kaalam, ug gahom sa usa ka komplikadong situwasyon. Kini nag-andam kang Jesus sa pagsagubang sa mga kalisdanan nga iyang masinati sa iyang ministeryo sa yuta.—Juan 5:19.
8. Sa unsang paagi ang mga asoy sa Ebanghelyo makatabang nato sa pagkat-on sa mga hiyas sa Amahan?
8 Tungod sa iyang suod nga relasyon kang Jehova, ang Anak lang ang mas detalyadong nakapadayag sa Amahan. Busa, ang labing maayong paagi nga kita makakat-on bahin sa Amahan mao ang pagtuon sa gitudlo ug gibuhat sa iyang bugtong Anak. Sa pag-ilustrar, bug-os ba natong masabtan ang pulong “gugma” kon mobasa lang tag diksiyonaryo? Dili gayod. Apan kon atong palandongon ang mga asoy sa Ebanghelyo bahin sa ministeryo ni Jesus ug sa iyang pagtratar sa uban, atong masabtan ang kahulogan sa mga pulong “ang Diyos gugma.” (1 Juan 4:8, 16) Gawas pa sa gugma, gibutyag usab ni Jesus sa iyang mga tinun-an ang ubang hiyas sa Diyos.
KON GIUNSA PAGBUTYAG NI JESUS ANG IYANG AMAHAN
9. (a) Unsa ang duha ka paagi nga gibutyag ni Jesus ang iyang Amahan? (b) Paghatag ug ilustrasyon nga gigamit ni Jesus sa pagbutyag sa iyang Amahan.
9 Giunsa pagbutyag ni Jesus ang Amahan ngadto sa iyang mga tinun-an ug sa iyang mga sumusunod sa ulahi? Sa duha ka paagi: pinaagi sa iyang mga pagtulon-an ug panggawi. Tagdon una nato ang iyang mga pagtulon-an. Ang gitudlo ni Jesus sa iyang mga sumusunod nagpakita nga siya nahibalo gayod sa mga pamaagi, panghunahuna, ug pagbati sa iyang Amahan. Pananglitan, gipakasama ni Jesus ang iyang Amahan sa usa ka mapinanggaong tag-iyag mga karnero nga milakaw aron pangitaon ang usa nga nasaag. Si Jesus miingon nga sa dihang nakaplagan kini, ang tag-iya ‘labaw nga nalipay labot niini kay sa kasiyamag-siyam nga wala mahisalaag.’ Unsay kapadapatan sa maong ilustrasyon? Si Jesus nagpatin-aw, “Sa susama dili tilinguhaong butang sa akong Amahan nga anaa sa langit nga malaglag ang usa niining mga gagmay.” (Mat. 18:12-14) Unsay imong makat-onan niini bahin kang Jehova? Lagmit mobati ka usahay nga walay pulos ug gikalimtan. Apan hinumdomi nga ang imong langitnong Amahan interesado ug nagmahal kanimo. Para niya, ikaw usa “niining mga gagmay.”
10. Giunsa pagbutyag ni Jesus ang Amahan pinaagi sa iyang panggawi?
10 Ang ikaduhang paagi nga gibutyag ni Jesus ang Amahan ngadto sa iyang mga tinun-an maoy pinaagi sa iyang panggawi. Busa sa dihang mihangyo si apostol Felipe kang Jesus: “Ipakita kanamo ang Amahan,” si Jesus haom nga miingon: “Siya nga nakakita kanako nakakita usab sa Amahan.” (Juan 14:8, 9) Tagda ang pipila ka pananglitan kon giunsa pagpasundayag ni Jesus ang mga hiyas sa iyang Amahan. Dihang may tawong “punog sanla” nga nagpakiluoy kang Jesus nga ayohon siya, si Jesus mihikap kaniya ug miingon: “Buot ko. Mamahinlo ka.” Sa naayo na, ang sanlahon nahibalo gayod nga si Jehova ang naghatag ug gahom kang Jesus sa pag-ayo kaniya. (Luc. 5:12, 13) Dugang pa, pagkamatay ni Lazaro, nakita sa mga tinun-an ang pagkamabination sa Amahan dihang si Jesus “miagulo diha sa espiritu ug naguol” ug “mihilak.” Bisag nahibalo si Jesus nga iyang banhawon si Lazaro, gibati niya ang kasakit nga gibati sa pamilya ug mga higala ni Lazaro. (Juan 11:32-35, 40-43) Seguradong duna kay paboritong asoy sa Bibliya bahin kang Jesus diin imong nakita ang pagkamaluluy-on sa Amahan.
11. (a) Dihang gihinloan ni Jesus ang templo, unsay iyang gibutyag bahin sa Amahan? (b) Nganong makapahupay kini kanato?
11 Apan unsay imong makat-onan sa paghinlo ni Jesus sa templo? Handurawa ang esena: Si Jesus mihimog latigo nga pisi, ug iyang giabog ang mga nanindag baka ug karnero. Iyang giyabo ang mga sensilyo sa mga tig-ilis ug salapi ug gipanglintuwad ang ilang mga lamesa. (Juan 2:13-17) Ang maong maisogong buhat nagpahinumdom sa mga tinun-an sa tagna nga gisulat ni Haring David: “Ang tumang kasibot alang sa imong balay naglamoy kanako.” (Sal. 69:9) Ang gihimo ni Jesus nagpakita nga buot gayod niyang depensahan ang matuod nga pagsimba. Nakita ba nimo ang personalidad sa Amahan sa maong asoy? Kini nagpahinumdom kanato nga buot gayong wagtangon sa Diyos ang pagkadaotan dinhi sa yuta ug siya adunay gahom sa paghimo niana. Ang maisogong reaksiyon ni Jesus batok sa daotang buhat nagbutyag kon unsay gibati sa Amahan samtang Iyang nakita ang pagkadaotan nga kaylap karon sa yuta. Makapahupay gayod kana dihang makaatubang kitag inhustisya!
12, 13. Unsay imong makat-onan bahin kang Jehova diha sa pagtratar ni Jesus sa iyang mga tinun-an?
12 Hisgotan nato ang laing pananglitan—ang pagtratar ni Jesus sa iyang mga tinun-an. Sila naglalis kanunay kon kinsay labaw. (Mar. 9:33-35; 10:43; Luc. 9:46) Kay si Jesus dugay nang nakig-uban sa iyang Amahan, nahibalo siya kon unsay hunahuna ni Jehova bahin sa garbo. (2 Sam. 22:28; Sal. 138:6) Nakita usab ni Jesus ang maong kinaiya diha kang Satanas, kinsa interesado lang sa iyang dungog ug posisyon. Busa naguol pag-ayo si Jesus dihang ang iya mismong gibansay nga mga tinun-an padayong nagpakitag ambisyosong tinamdan. Gani, gipakita gihapon kini sa mga apostoles bisan hangtod sa kataposang adlaw ni Jesus sa yuta. (Luc. 22:24-27) Apan si Jesus maluloton gihapong nagbadlong kanila ug wala mawad-ig paglaom nga ila rang masundog ang iyang pagkamapainubsanon.—Filip. 2:5-8.
13 Nakita ba nimo ang personalidad sa Amahan diha sa mapailobong pagbadlong ni Jesus sa iyang mga tinun-an? Unsay imong makat-onan bahin sa Amahan gikan sa mga pulong ug buhat ni Jesus? Wala biyai ni Jehova ang Iyang katawhan bisag kanunay silang masayop. Ang kahibalo bahin sa mga hiyas sa Diyos magdasig kanato sa paghinulsol ug sa pag-ampo kang Jehova alang sa kapasayloan dihang kita makasala.
BUOT SA ANAK NGA IBUTYAG ANG IYANG AMAHAN
14. Giunsa pagpakita ni Jesus nga buot niyang ibutyag ang iyang Amahan?
14 Daghang magmamando ang nagkontrolar sa mga tawo pinaagi sa paglilong ug impormasyon kanila. Sa kasukwahi, buot ni Jesus nga ipaambit ang impormasyon bahin sa Amahan. Busa bug-os niyang gibutyag si Jehova ngadto sa uban. (Basaha ang Mateo 11:27.) Gihatagan usab ni Jesus ang iyang mga tinun-an ug “katakos sa pagsabot aron [sila] makabaton ug kahibalo sa usa nga matuod,” si Jehova nga Diyos. (1 Juan 5:20) Unsay gipasabot niana? Gitabangan ni Jesus ang iyang mga sumusunod nga masabtan ang iyang gitudlo bahin sa Amahan. Wala niya ililong ang iyang Amahan pinaagi sa pagtudlog dili masabtang doktrina sama sa Trinidad.
15. Nganong wala ibutyag ni Jesus ang tanan niyang nahibaloan bahin sa iyang Amahan?
15 Gibutyag ba ni Jesus ang tanan niyang nahibaloan bahin sa iyang Amahan? Wala. Siya nagpakitag kaalam sa dili pagtug-an sa tanang butang ngadto sa iyang mga tinun-an. (Basaha ang Juan 16:12.) Ngano? Kay niadtong tungora dili pa kadto masabtan sa iyang mga tinun-an. Apan sumala sa gipatin-aw ni Jesus, ang dugang kahibalo ibutyag pag-abot sa “magtatabang,” ang balaang espiritu, nga magatultol kanila “ngadto sa tibuok nga kamatuoran.” (Juan 16:7, 13) Ang maalamong mga ginikanan lagmit dili mohatag sa tanang impormasyon ngadto sa ilang mga anak hangtod nga sila mohamtong na. Sa susama, si Jesus naghulat hangtod nga ang iyang mga tinun-an mohamtong ug makasabot na sa ubang kamatuoran bahin sa Amahan. Malulotong gikonsiderar ni Jesus ang ilang limitasyon.
SUNDOGA SI JESUS PINAAGI SA PAGTABANG SA UBAN NGA MAKAILA KANG JEHOVA
16, 17. Nganong makahimo kita sa pagbutyag sa Amahan ngadto sa uban?
16 Dihang mailhan nimo ang usa ka tawo ug makita ang iyang mahigugmaong personalidad, dili ba ganahan kang mosulti sa uban bahin kaniya? Sa dinhi pa si Jesus sa yuta, siya naghisgot bahin sa iyang Amahan. (Juan 17:25, 26) Ato ba siyang masundog sa pagbutyag kang Jehova ngadto sa uban?
17 Sa ato nang nahisgotan, mas daghag nahibaloan si Jesus bahin sa iyang Amahan kay sa uban. Apan buot niyang ipaambit ang pipila niini, ug iya pa ganing gitabangan ang iyang mga sumusunod nga makasabot sa lawom nga mga bahin sa personalidad sa Diyos. Sa tabang ni Jesus, dili ba atong nailhan ang Amahan sa paagi nga wala masayri sa kadaghanan karon? Mapasalamaton gayod kita nga gibutyag ni Jesus kanato ang iyang Amahan pinaagi sa iyang mga pagtulon-an ug panggawi! Gani, mahimo natong ikapasigarbo nga atong nailhan ang Amahan. (Jer. 9:24; 1 Cor. 1:31) Samtang maningkamot kita nga masuod kang Jehova, siya makigsuod kanato. (Sant. 4:8) Busa atong ikapaambit usab karon ang atong nahibaloan ngadto sa uban. Unsaon nato kana paghimo?
18, 19. Sa unsang mga paagi imong ikabutyag ang Amahan ngadto sa uban? Ipatin-aw.
18 Angay natong sundogon si Jesus sa pulong ug sa buhat aron atong ikabutyag ang Amahan ngadto sa uban. Hinumdomi nga daghan sa atong mahibalag sa ministeryo wala makaila sa Diyos. Ang ilang panglantaw sa Diyos lagmit natuis sa bakak nga mga doktrina. Atong ikatudlo kanila gikan sa Bibliya ang ngalan sa Diyos, ang iyang katuyoan alang sa katawhan, ug ang iyang personalidad. Dugang pa, tingali may bag-ong mga impormasyon kitang nahibaloan bahin sa Diyos gikan sa pipila ka asoy sa Bibliya. Mahimo nato kining hisgotan uban sa atong mga isigkamagtutuo aron makabenepisyo usab sila.
19 Angay natong sundogon si Jesus ug ibutyag ang Amahan pinaagi sa atong panggawi. Kon makita sa mga tawo ang gugma ni Kristo diha sa atong binuhatan, sila usab madasig sa pagpakigsuod sa Amahan ug kang Jesus. (Efe. 5:1, 2) Si apostol Pablo nagdasig kanato: “Mahimong mga tigsundog kanako, ingon nga ako nagsundog kang Kristo.” (1 Cor. 11:1) Pagkadako sa atong pribilehiyo nga makatabang sa mga tawo nga mailhan si Jehova pinaagi sa atong panggawi! Hinaot nga padayon natong sundogon si Jesus pinaagi sa pagbutyag sa Amahan ngadto sa uban.
[Mga Pangutana sa Pagtuon]
