Hupti ang Bug-os nga Kasingkasing Ngadto Kang Jehova
Hupti ang Bug-os nga Kasingkasing Ngadto Kang Jehova
‘Anak ko, ilha ang Diyos sa imong amahan ug alagara siya uban ang bug-os nga kasingkasing.’—1 CRON. 28:9.
PANGITAA ANG TUBAG NIINING MGA PANGUTANAHA:
Unsa ang mahulagwayong kasingkasing?
Unsa ang usa ka paagi sa pagsusi sa atong kasingkasing?
Sa unsang paagi nato mahuptan ang bug-os nga kasingkasing ngadto kang Jehova?
1, 2. (a) Unsang bahin sa lawas ang sagad gigamit sa Bibliya sa mahulagwayong paagi? (b) Nganong hinungdanon nga atong masabtan ang gihulagwayan sa “kasingkasing”?
ANG Bibliya sagad naghisgot sa mga bahin sa lawas sa mahulagwayong paagi. Pananglitan, ang patriarkang si Job miingon: “Walay kadaotan nga nabuhat sa akong mga kamot.” Si Haring Solomon miingon: “Ang usa ka maayong taho makapatambok sa kabukogan.” Gipasaligan ni Jehova si Ezequiel: ‘Gihimo ko ang imong agtang nga magahi pa kay sa santik.’ Ug si apostol Pablo misulat kang Timoteo: “Ilang ilingiw ang ilang mga dalunggan gikan sa kamatuoran.”—Job 16:17; Prov. 15:30; Ezeq. 3:9; 2 Tim. 4:4.
2 Apan dunay usa ka bahin sa lawas nga mas kanunayng gihisgotan sa Bibliya sa mahulagwayong paagi. Gihisgotan kini sa matinumanong si Ana diha sa iyang pag-ampo: “Ang akong kasingkasing nagsadya tungod kang Jehova.” (1 Sam. 2:1) Gani, ang mga magsusulat sa Bibliya naghisgot sa kasingkasing sa halos usa ka libo ka beses, sagad sa mahulagwayong paagi. Hinungdanon gayod nga atong masabtan ang gihulagwayan sa kasingkasing kay ang Bibliya nag-ingon nga angay nato kining ampingan.—Basaha ang Proverbio 4:23.
UNSA ANG MAHULAGWAYONG KASINGKASING?
3. Sa unsang paagi nato masabtan ang gihulagwayan sa “kasingkasing” diha sa Bibliya? Iilustrar.
3 Bisag ang Bibliya wala maghatag ug kahubitan sa pulong “kasingkasing,” ato gihapong mahibaloan ang gihulagwayan niini. Sa unsang paagi? Sa pag-ilustrar, handurawa ang usa ka dakong hulagway nga hinimo gikan sa usa ka libo ka gagmayng bato. Kon moatras kita ug tan-awon kini sa layo, atong makita nga ang gagmayng mga bato nakapormag nindot nga larawan. Sa susama, kon atong susihon ang daghang teksto sa Bibliya diin gigamit ang pulong “kasingkasing,” atong masabtan ang gihulagwayan niini. Nan unsa kini?
4. (a) Unsay gihulagwayan sa “kasingkasing”? (b) Unsay kahulogan sa mga pulong ni Jesus sa Mateo 22:37?
4 Ang mga magsusulat sa Bibliya naggamit sa pulong “kasingkasing” sa paghubit sa katibuk-ang pangsulod nga pagkatawo. Kini naglangkob sa atong mga tinguha, hunahuna, kinaiya, tinamdan, katakos, motibo, ug tumong. (Basaha ang Deuteronomio 15:7; Proverbio 16:9; Buhat 2:26.) Apan usahay ang pulong “kasingkasing” limitadog kahulogan. Pananglitan, si Jesus miingon: “Higugmaon mo si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong kaisipan.” (Mat. 22:37) Dinhi, ang “kasingkasing” nagtumong sa emosyon, tinguha, ug pagbati sa tawo. Sanglit espesipikong gihisgotan ni Jesus ang kasingkasing, kalag, ug kaisipan, iyang gipasiugda nga angay natong ipahayag ang atong gugma sa Diyos diha sa atong pagbati, pagkinabuhi, ug sa paggamit sa atong kaisipan. (Juan 17:3; Efe. 6:6) Apan kon “kasingkasing” lang ang gihisgotan, kini nagtumong sa katibuk-ang pangsulod nga pagkatawo.
KON NGANONG ANGAYNG AMPINGAN ANG ATONG KASINGKASING
5. Nganong himoon nato ang atong maarangan sa pag-alagad kang Jehova uban ang bug-os nga kasingkasing?
5 Gipahinumdoman ni Haring David si Solomon: ‘Anak ko, ilha ang Diyos sa imong amahan ug alagara siya uban ang bug-os nga kasingkasing ug uban ang malipayon nga kalag; kay ang tanang kasingkasing ginasusi ni Jehova, ug ang matag kiling sa hunahuna iyang ginaila.’ (1 Cron. 28:9) Sa pagkatinuod, si Jehova ang Tig-usisa sa tanang kasingkasing. (Prov. 17:3; 21:2) Ug ang iyang makaplagan sa atong kasingkasing makaapektar sa atong relasyon kaniya ug sa atong kaugmaon. Busa atong sundon ang tambag ni David pinaagi sa paghimo sa atong maarangan sa pag-alagad kang Jehova uban ang bug-os nga kasingkasing.
6. Unsay angay natong mahibaloan bahin sa atong determinasyon sa pag-alagad kang Jehova?
6 Ang atong kadasig sa ministeryo nagpakita nga buot gayod natong moalagad kang Jehova uban ang bug-os nga kasingkasing. Apan nahibalo kita nga ang daotang kalibotan ni Satanas ug ang atong makasasalang kiling mahimong makapahuyang sa atong determinasyon sa pag-alagad kang Jehova nga bug-os kasingkasing. (Jer. 17:9; Efe. 2:2) Busa aron dili kini mahitabo, kinahanglang kanunay natong susihon ang atong kasingkasing. Sa unsang paagi?
7. Unsay magpadayag sa kahimtang sa atong kasingkasing?
7 Walay tawong makakita kon unsa kita sa sulod, sama nga dili makita ang subok sa kahoy. Apan sama sa gihisgotan ni Jesus sa iyang Wali sa Bukid, ang mga bunga magpadayag sa kahimtang sa kahoy. Busa ipadayag usab sa atong binuhatan ang tinuod nga kahimtang sa atong kasingkasing. (Mat. 7:17-20) Atong hisgotan ang usa niini.
USA KA PAAGI SA PAGSUSI SA ATONG KASINGKASING
8. Sumala sa mga pulong ni Jesus sa Mateo 6:33, sa unsang paagi madayag kon unsay anaa sa atong kasingkasing?
8 Sa iyang Wali sa Bukid, gisultihan usab ni Jesus ang iyang mamiminaw kon unsay angay nilang buhaton aron ikapakita ang ilang tinguha sa pag-alagad kang Jehova nga bug-os kasingkasing. Siya miingon: “Nan, magpadayon sa pagpangita pag-una sa gingharian ug sa iyang pagkamatarong, ug kining tanang ubang mga butang igadugang ra kaninyo.” (Mat. 6:33) Sa pagkatinuod, ang atong giuna sa kinabuhi magpadayag kon unsay gitinguha, gihunahuna, ug giplano sa atong kasingkasing. Busa ang pagsusi sa atong mga prioridad maoy usa ka paagi sa pagtino kon kita ba nag-alagad sa Diyos uban ang bug-os nga kasingkasing.
9. Unsang pagdapit ang gipaabot ni Jesus sa pipila ka lalaki, ug unsay gipakita sa ilang reaksiyon?
9 Atong tagdon ang usa ka situwasyon nga nahitabo human sultihi ni Jesus ang iyang mga sumusunod sa pag-una sa Gingharian. Gipakita niini nga posibleng mahibaloan ang kahimtang sa kasingkasing sa usa ka tawo pinaagi sa kon unsay giuna niya sa iyang kinabuhi. Si Lucas miingon nga lig-on ang determinasyon ni Jesus nga moadto sa Jerusalem bisag nahibalo siya kon unsay mahitabo kaniya didto. Samtang siya ug ang iyang mga apostoles anaa sa dalan, nahibalag ni Jesus ang pipila ka lalaki ug gidapit sila: “Mahimong akong sumusunod.” Gusto nilang dawaton ang pagdapit ni Jesus, apan duna silay mga kondisyon. Ang usa miingon: “Tugoti una ako sa pagbiya ug ilubong ang akong amahan.” Ang lain miingon: “Mosunod ako kanimo, Ginoo; apan tugoti una ako nga manamilit kanila nga atua sa akong panimalay.” (Luc. 9:51, 57-61) Pagkalahi ni Jesus, kinsa determinadong mobuhat sa kabubut-on sa Diyos kon itandi sa maong mga lalaki nga nangita unag mga pasangil! Ang pag-una sa kaugalingon nilang kaayohan inay ang intereses sa Gingharian nagpakita nga ang ilang kasingkasing dili bug-os ngadto sa Diyos.
10. (a) Unsay atong sanong sa pagdapit ni Jesus nga mahimong iyang sumusunod? (b) Unsang ilustrasyon ang gihatag ni Jesus?
10 Dili sama sa maong mga lalaki, atong gidawat ang pagdapit ni Jesus nga mahimong iyang sumusunod ug kita karon nag-alagad na kang Jehova sa matag adlaw. Pinaagi niini atong gipakita kon unsay atong pagbati bahin kang Jehova. Apan bisan pag aktibo kita sa kongregasyon, angay gihapon natong bantayan ang atong kasingkasing gikan sa usa ka kapeligrohan. Unsa kini? Gisulti kini ni Jesus ngadto sa mga lalaki nga gidapit niya nga mahimong mga tinun-an: “Walay tawo nga nakabutang na sa iyang kamot sa daro ug molingi sa mga butang nga anaa sa luyo ang angayan sa gingharian sa Diyos.” (Luc. 9:62) Unsay atong makat-onan niini nga ilustrasyon?
KITA BA ‘NAGAHAWID SA MAAYO’?
11. Unsay nahitabo sa trabaho sa mamumuo diha sa ilustrasyon ni Jesus, ug ngano?
11 Aniay dugang detalye aron mas masabtan nato ang leksiyon sa ilustrasyon ni Jesus. Ang mamumuo puliki nga nagdaro. Apan samtang nagdaro, sige siyag hunahuna sa iyang balay diin atua ang iyang pamilya ug mga higala, may pagkaon, musika, kinataw-anay, ug kapahulayan. Iya kining gipangandoy pag-ayo. Human sa taudtaod nga pagdaro, misamot ang iyang pagpangandoy niini ug milingi sa “mga butang nga anaa sa luyo.” Bisag daghan pang angayng buhaton una matamnan ang uma, ang mamumuo nabalda ug naapektohan ang iyang trabaho. Siyempre, naguol ang agalon kay wala molahutay ang iyang mamumuo.
12. Sa unsang paagi ang usa ka Kristohanon karon mahisama sa mamumuo sa ilustrasyon ni Jesus?
12 Tagda kon sa unsang paagi kini posibleng mahitabo karon. Ang mamumuo mahimong magtumong sa usa ka Kristohanon nga daw maayo ra ang pag-alagad apan nameligro diay sa espirituwal. Pananglitan, handurawa ang usa ka brader nga regular sa mga tigom ug kanunayng mosangyaw. Apan sa samang higayon, sige siyag hunahuna sa mga butang sa kalibotan nga iyang nagustohan. Sa iyang kasingkasing, iya kining gipangandoy pag-ayo. Human sa daghang tuig nga pag-alagad, misamot ang iyang pagpangandoy sa maong mga butang ug milingi sa “mga butang nga anaa sa luyo.” Bisag daghan pang buluhaton diha sa ministeryo, wala siya magpadayon “sa pagpangupot nga hugot sa pulong sa kinabuhi,” ug ang iyang pag-alagad naapektohan. (Filip. 2:16) Naguol si Jehova, ang “Agalon sa pagpangani,” kay wala molahutay ang usa sa iyang mga alagad.—Luc. 10:2.
13. Unsay nalangkit sa pag-alagad kang Jehova nga bug-os kasingkasing?
13 Tin-aw ang leksiyon. Ang pag-alagad kang Jehova nga bug-os kasingkasing naglangkit ug labaw pa kay sa regular nga pagsangyaw ug pagtambong sa mga tigom. (2 Cron. 25:1, 2, 27) Kon ang kasingkasing sa usa ka Kristohanon padayong nahigugma sa “mga butang nga anaa sa luyo”—ang mga butang sa kalibotan—siya nameligrong mawad-an sa pabor sa Diyos. (Luc. 17:32) Mahimo lang kitang “angayan sa gingharian sa Diyos” kon atong ‘kasilagan ang daotan ug hawiran ang maayo.’ (Luc. 9:62; Roma 12:9) Bisag may mga butang sa kalibotan ni Satanas nga daw mapuslanon o maanindot, angay natong paneguroon nga walay makababag sa atong pag-alagad sa Diyos nga bug-os kasingkasing.—2 Cor. 11:14; basaha ang Filipos 3:13, 14.
PADAYONG MAGBANTAY!
14, 15. (a) Sa unsang paagi si Satanas naningkamot sa pagpaluya sa atong kasibot sa pag-alagad? (b) Iilustrar kon nganong peligroso kaayo ang paagi ni Satanas.
14 Ang gugma kang Jehova maoy nagdasig kanato sa pag-alagad kaniya. Sulod sa daghang katuigan sukad niadto, gipamatud-an sa daghan kanato nga determinado kitang moalagad kang Jehova nga bug-os kasingkasing. Apan si Satanas padayong naningkamot sa pag-impluwensiya kanato. Gipuntirya gihapon niya ang atong kasingkasing. (Efe. 6:12) Siyempre, nahibalo siya nga dili kita mohunong dayon sa pag-alagad kang Jehova. Busa malinglahon niyang gigamit kining “sistema sa mga butang” aron anam-anam kitang mawad-ag kasibot sa pag-alagad. (Basaha ang Marcos 4:18, 19.) Nganong epektibo kaayo kini?
15 Buweno, handurawa nga nagbasa kag libro ug ang imong suga maoy 100-watts nga bombilya, apan napundir kini. Kay mingitngit man, imo dayong giilisan ang bombilya. Mihayag pag-usab ang kuwarto. Pagkasunod gabii, nagbasa na pod ka. Apan wala ka mahibalo nga giilisan ang suga ug 95-watts nga bombilya. Makamatikod ka ba sa kalainan? Lagmit dili. Ug komosta kon pagkaugma giilisan na pod kinig 90-watts nga bombilya? Lagmit dili gihapon ka makamatikod niini. Ngano? Kay anam-anam lang nga gimenosan ang kahayag sa suga. Sa susama, ang impluwensiya sa kalibotan ni Satanas mahimong anam-anam lang nga magpaluya sa atong kasibot. Kon mahitabo kana, sama rag milampos si Satanas sa pagpamenos sa atong 100-watts nga kasibot sa pag-alagad kang Jehova. Kon dili magbantay ang usa ka Kristohanon, dili siya makamatikod niining anam-anam nga kausaban.—Mat. 24:42; 1 Ped. 5:8.
HINUNGDANON ANG PAG-AMPO
16. Sa unsang paagi nato mapanalipdan ang kaugalingon batok sa mga taktika ni Satanas?
16 Sa unsang paagi nato mapanalipdan ang kaugalingon batok sa mga taktika ni Satanas ug mahuptan ang bug-os nga kasingkasing ngadto kang Jehova? (2 Cor. 2:11) Hinungdanon ang pag-ampo. Gidasig ni Pablo ang iyang mga isigkamagtutuo sa ‘pagbarog nga malig-on batok sa malipatlipatong mga kaugdahan sa Yawa.’ Dayon iyang giawhag sila: “Uban ang tanang matang sa pag-ampo ug pangamuyo magpadayon kamo sa pag-ampo sa tanang higayon.”—Efe. 6:11, 18; 1 Ped. 4:7.
17. Unsay atong makat-onan sa mga pag-ampo ni Jesus?
17 Aron makabarog nga malig-on batok kang Satanas, angay natong sundogon si Jesus ug ang iyang dakong tinguha nga moalagad kang Jehova uban ang bug-os nga kasingkasing. Pananglitan, matikdi ang gisulat ni Lucas bahin sa paagi sa pag-ampo ni Jesus sa gabii una pa siya mamatay: ‘Kay nag-antos sa labihang kasakit siya nagpadayon sa pag-ampo nga labi pang matinuoron.’ (Luc. 22:44) Si Jesus matinuoron nang nag-ampo kanhi. Apan niining higayona, kay nag-atubang sa kinalisdang pagsulay sa iyang kinabuhi sa yuta, siya nag-ampo nga “labi pang matinuoron,” ug gitubag ang iyang pag-ampo. Gipakita sa panig-ingnan ni Jesus nga may mga pag-ampo nga mas tim-os kay sa ubang mga pag-ampo. Busa, samtang magkagrabe ang mga pagsulay ug mas malinglahon ang mga taktika ni Satanas, angay kitang moampo nga “labi pang matinuoron” alang sa panalipod ni Jehova.
18. (a) Unsay angayng ipangutana sa kaugalingon bahin sa pag-ampo, ug ngano? (b) Unsang mga butang ang makaapektar sa atong kasingkasing, ug sa unsang paagi? (Tan-awa ang kahon sa panid 16.)
18 Unsay epekto kanato sa maong mga pag-ampo? Si Pablo miingon: “Sa tanang butang pinaagi sa pag-ampo ug pangamuyo uban ang pagpasalamat ipahibalo ang inyong mga pangaliya sa Diyos; ug ang kalinaw sa Diyos nga labaw sa tanang panghunahuna magbantay sa inyong mga kasingkasing.” (Filip. 4:6, 7) Oo, kinahanglang tim-os ug makanunayon kitang mag-ampo aron mahuptan ang bug-os nga kasingkasing ngadto kang Jehova. (Luc. 6:12) Busa pangutan-a ang kaugalingon, ‘Unsa ka tim-os ug ka makanunayon ang akong mga pag-ampo?’ (Mat. 7:7; Roma 12:12) Ang imong tubag magpadayag kon unsa ka dako ang imong tinguha sa pag-alagad sa Diyos.
19. Unsay imong buhaton aron mahuptan ang bug-os nga kasingkasing ngadto kang Jehova?
19 Sa nahisgotan na, ang atong mga prioridad magpadayag sa kahimtang sa atong kasingkasing. Atong paneguroon nga ang mga butang nga atong gibiyaan ug ang mga taktika ni Satanas dili magpahuyang sa atong determinasyon sa pag-alagad kang Jehova uban ang bug-os nga kasingkasing. (Basaha ang Lucas 21:19, 34-36.) Busa, sama kang David, padayon kitang mangamuyo kang Jehova: “Bug-osa ang akong kasingkasing.”—Sal. 86:11.
[Mga Pangutana sa Pagtuon]
[Kahon sa panid 16]
TULO KA BUTANG NGA MAKAAPEKTAR SA ATONG KASINGKASING
Maingon nga duna kitay mahimo aron mahuptang himsog ang atong literal nga kasingkasing, duna sab kitay mahimo aron mahuptang himsog ang atong mahulagwayong kasingkasing. Tagda kining tulo ka hinungdanong butang:
1 Pagkaon: Ang atong literal nga kasingkasing nagkinahanglag igong sustansiyadong pagkaon. Sa susama, paneguroon nato nga makakuha kitag igong espirituwal nga pagkaon pinaagi sa regular nga personal nga pagtuon, pagpamalandong, ug pagtambong sa mga tigom.—Sal. 1:1, 2; Prov. 15:28; Heb. 10:24, 25.
2 Ehersisyo: Aron magpabiling himsog ang atong literal nga kasingkasing, usahay kinahanglang mas paspas kining mopitik kay sa naandan. Sa susama, pinaagi sa dugang nga pagpakigbahin sa ministeryo, atong mahuptang himsog ang atong mahulagwayong kasingkasing.—Luc. 13:24; Filip. 3:12.
3 Palibot: Ang dili diyosnong palibot diin kita nagtrabaho ug nagkinabuhi maka-stress pag-ayo sa atong literal ug mahulagwayong kasingkasing. Apan mamenosan kini kon kanunay kitang makig-uban sa atong mga isigkamagtutuo, kinsa tinuod nga nahangawa kanato ug may bug-os nga kasingkasing ngadto sa Diyos.—Sal. 119:63; Prov. 13:20.
