Nahinumdom Ka Ba?

Nabasa ba nimog maayo ang bag-ong mga gula sa Ang Bantayanang Torre? Sulayi kon makatubag ka sa mosunod nga mga pangutana:

Sa unsang diwa nga si Solomon nahimong pasidaan kanato?

Gipanalanginan ug gigamit sa Diyos si Haring Solomon. Apan sa iyang pagmando, siya mitipas sa balaod sa Diyos. Iyang giminyoan ang paganong anak ni Paraon, nagbaton siyag daghang asawa, ug sila anam-anam nga nagdaldal niya ngadto sa bakak nga pagsimba. Angay kitang mag-amping kay basig anam-anam natong maugmad ang sayop nga mga tinamdan o kiling. (Deut. 7:1-4; 17:17; 1 Hari 11:4-8)—12/15, panid 10-12.

Nganong makaingon kita nga si Sara usa ka diyosnong babaye ug bililhong asawa?

Dihang gisugo sa Diyos si Abraham sa pagbiya sa Ur, kini nagkahulogang biyaan ang pamilya, mga higala, ug paagi sa pagkinabuhi aron moadto sa dapit nga wala nila mahibaloi. Bisan pa niana, si Sara mikooperar ug misalig nga siya panalanginan sa Diyos. Iyang gitahod si Abraham ug nagpakitag maayong mga hiyas.—1/1, panid 8.

Nganong gisugo ni Jehova si Abraham sa paghalad sa iyang hinigugmang anak?

Hinumdomi nga wala gayod tugoti sa Diyos si Abraham sa paghalad kang Isaac. Gipakita lang sa Diyos kon unsa ka dako ang iyang pagahimoong sakripisyo sa paghalad sa iyang Anak, si Jesus.—1/1, panid 23.

Unsay nagpakita nga duna kanunay tinuod nga dinihogang mga Kristohanon sa yuta sukad sa unang siglo?

Sa sambingay ni Jesus bahin sa “trigo” ug “bunglayon,” ang “maayong binhi” nagtumong sa “mga anak sa gingharian.” (Mat. 13:24-30, 38) Ang bunglayon motubo uban sa trigo hangtod sa ting-ani. Busa bisag dili kita makatino kon kinsay nalakip sa trigo nga matang, kanunay gayong may mga dinihogan hangtod sa atong panahon.—1/15, panid 7.

Unsang mga panghitabo ang direktang motultol sa Armagedon?

Ang mga nasod mohimog hinungdanong deklarasyon nga “Kalinaw ug kasegurohan!” (1 Tes. 5:3) Ang mga gobyerno moatake sa bakak nga relihiyon. (Pin. 17:15-18) Atakehon ang matuod nga mga magsisimba. Dayon moabot ang kataposan.—2/1, panid 9.

Unsaon nato pagbuntog ang tendensiya nga masina?

Makatabang kining mosunod: Ugmara ang gugma ug inigsoong pagbati, makig-uban sa mga alagad sa Diyos, buhata ang maayo, ‘magmaya uban niadtong nagmaya.’ (Roma 12:15)—2/15, panid 16-17.

Kinsay nagsulti sa pinulongang Nahuatl, ug unsay ginahimo para kanila?

Kini ang pinulongan sa karaang mga Aztec, ug gigamit gihapon sa 1.5 ka milyong tawo sa Mexico. Ang mga Saksi nagsangyaw gamit ang Nahuatl, ug ang pipila nato ka literatura mabatonan sa maong pinulongan.—3/1, panid 13-14.

Dihang motambag, unsang mga prinsipyo ang angayng hinumdoman?

Sayra ang tinuod nga situwasyon. Ayaw pagdalidalig tubag. Mapaubsanong ipadapat ang Pulong sa Diyos. Kon posible, gamita ang teokratikanhong librarya. Ayaw paghimog desisyon para sa uban.—3/15, panid 7-9.

Giawhag ni Jesus ang iyang mamiminaw sa pag-uban ug duha ka milya. (Mat. 5:41) Unsay iyang gipasabot?

Nianang panahona ang Israel sakop sa Roma. Lagmit gipugos sila sa mga Romano sa pagtrabaho. Dihang giawhag ni Jesus ang iyang mamiminaw sa pag-uban ug duha ka milya, gipasabot niya nga dili sila magbagulbol sa pagsunod sa gipabuhat kanila niadtong anaa sa awtoridad.—4/1, panid 9.