Sumala sa giasoy ni Leonard Smith

Sa tin-edyer pa ko, duha ka teksto sa Bibliya ang nakapainteres nako. Paglabayg kapin sa 70 ka tuig, ako gihapong mahinumdoman ang panahon dihang nasabtan nako ang Zacarias 8:23, nga naghisgot sa “napulo ka tawo” nga nagkupot sa ‘sidsid sa usa ka Hudiyo.’ Sila miingon sa Hudiyo: “Mouban kami kaninyo, kay kami nakadungog nga ang Diyos nagauban kaninyo.”

ANG Hudiyo nagtumong sa mga dinihogan, ug ang “napulo ka tawo” nagtumong sa “ubang mga karnero,” o “mga Jonadab,” nga maoy pagtawag kanila kaniadto. * (Juan 10:16) Dihang nasabtan ko kana, naamgohan nako nga ang akong paglaom nga mabuhi sa yuta sa walay kataposan nagdepende sa akong maunongong pagsuportar sa mga dinihogan.

Nainteres sab ko sa ilustrasyon ni Jesus bahin sa “mga karnero” ug “mga kanding” diha sa Mateo 25:31-46. Ang “mga karnero” naghulagway niadtong makadawat ug paborableng hukom panahon sa kataposan kay sila misuportar sa dinihogang mga igsoon ni Kristo nga ania pa sa yuta. Ingong batan-ong Jonadab, ako miingon sa akong kaugalingon, ‘Len, kon buot nimong isipon ni Kristo ingong karnero, angay nimong suportahan ang iyang dinihogang mga igsoon ug magpasakop sa ilang pagpanguna kay ang Diyos nagauban kanila.’ Kini nga pagsabot maoy naggiya kanako sulod sa kapig pito ka dekada.

‘UNSAY AKONG PAPEL?’

Si Mama nabawtismohan niadtong 1925 sa London Tabernacle, usa ka tigomanan sa Bethel nga gigamit sa mga igsoon. Natawo ko sa Oktubre 15, 1926. Pagka-Marso 1940, nabawtismohan ko sa asembliya sa Dover sa kabaybayonan sa England. Milalom ang akong gugma sa kamatuoran sa Bibliya. Kay dinihogan man si Mama, ang unang ‘sidsid sa Hudiyo’ nga akong gikuptan, sa diwa, mao ang sa akong inahan. Niadtong tungora, wala pa moalagad kang Jehova si Papa ug ang akong magulang nga babaye. Sakop mi sa Gillingham Congregation sa habagatan-sidlakang England, diin ang kadaghanan mga dinihogan. Maayong panig-ingnan si Mama sa kasibot sa pagsangyaw.

Sa Septiyembre 1941, sa kombensiyon sa siyudad sa Leicester, gihisgotan sa pakigpulong nga “Integridad” ang isyu bahin sa unibersohanong pagmando. Didto nako nasabtan nga nalangkit kita sa isyu tali ni Jehova ug ni Satanas. Busa, kinahanglan kitang modapig kang Jehova ug huptan ang atong integridad kaniya ingong Soberano sa Uniberso.

 Sa maong kombensiyon, gipasiugda pag-ayo ang pagpayunir, ug gidasig ang mga batan-on nga himoon kining tumong. Ang pakigpulong nga nag-ulohang “Ang Papel sa mga Payunir Diha sa Organisasyon” nakapahunahuna nako, ‘Unsay akong papel?’ Kadto nga kombensiyon nagkombinsir nako nga ingong usa ka Jonadab, obligasyon ko ang pagtabang sa mga dinihogan kutob sa akong maarangan diha sa pagsangyaw. Didto mismo, miaplay ko ingong payunir.

PAGPAYUNIR PANAHON SA GUBAT

Sa Disyembre 1, 1941, nahimo kong espesyal payunir sa edad nga 15. Si Mama ang akong unang partner nga payunir, apan human sa mga usa ka tuig, siya miundang tungod sa problema sa panglawas. Dayon ang sangang buhatan sa London nagpartner nako kang Ron Parkin, nga karon membro sa Branch Committee sa Puerto Rico.

Gipadala mi sa mga lungsod sa Broadstairs ug Ramsgate nga duol sa baybayon sa probinsiya sa Kent, diin nangabang mig kuwarto. Ang binulang alawans sa mga espesyal payunir maoy 40 shillings (niadto mga $8, U.S.). Busa dihang makabayad na mi sa abang, gamay na lang ang mabilin, ug wala mi mahibalo kon asa maggikan ang sunod namong kaonon. Apan si Jehova kanunayng nagtagana sa among panginahanglan.

Kanunay ming magbisikleta dala ang daghang gamit ug sungsongon namo ang kusog nga hangin gikan sa North Sea. Nameligro pod mi sa pagpamomba sa mga eroplano, sama sa V-1 nga mga misil sa Germany nga moagi sa Kent aron bombahan ang London. Kas-a miambak ko gikan sa akong bisikleta ug misalom sa kanal dihang may bomba nga miagi ibabaw nako ug mibuto sa duol nga uma. Bisan pa niana, malipayon gihapon ming nagpayunir sa Kent.

NAHIMO KONG BETHELITE

Kanunayng gidayeg ni Mama ang Bethel. “Gipangandoy gyod nakong ma-Bethelite ka,” matod niya. Busa pwerte nakong lipaya kay sa Enero 1946 giimbitar kong moboluntaryo ug tulo ka semana sa Bethel sa London. Human sa tulo ka semana, giingnan ko ni Pryce Hughes, ang branch overseer, nga magpabilin sa Bethel. Nakabenepisyo gyod ko sa pagbansay nga akong nadawat didto.

Mga 30 lang niadto ang membro sa Bethel sa London, kadaghanan mga batan-on ug tagsaanong brader apan may pipila pod ka dinihogan, lakip kang Pryce Hughes, Edgar Clay, ug Jack Barr, nga namembro sa Nagamandong Lawas. Pagkadakong pribilehiyo nga suportahan ang mga igsoon ni Kristo pinaagi sa pagtrabaho ubos sa pagdumala niini nga “mga haligi”!—Gal. 2:9.

Usa ka adlaw niana didto sa Bethel, giingnan ko sa usa ka brader nga dunay sister nga nangita nako sa gawas. Nakurat ko kay si Mama diay to nga nagdalag regalo. Siya miingon nga dili na siya mosulod aron dili madisturbo ang akong trabaho. Gibilin na lang niya ang iyang regalo, nga usa ka bagang coat. Kini nagpahinumdom nako kang Ana nga nagdalag kupo para sa iyang anak nga si Samuel samtang nag-alagad sa tabernakulo.—1 Sam. 2:18, 19.

GILEAD—DILI MALIMTANG KASINATIAN

Sa 1947, lima mi sa Bethel ang gidapit nga moeskuyla sa Tunghaang Gilead sa Amerika, ug pagkasunod tuig mitungha mi sa ika-11 nga klase. Sa among pag-abot,  tugnaw kaayo sa amihanang bahin sa New York, diin nahimutang ang tunghaan. Maayo gani kay dala nako ang bagang coat nga gihatag ni Mama!

Dili nako malimtan ang akong unom ka bulan sa Gilead. Daghan kog nakat-onan sa akong pagpakig-uban sa akong mga klasmet nga gikan sa 16 ka nasod. Gawas sa espirituwal nga pagbansay, nakabenepisyo pod ko sa pagpakig-uban sa hamtong nga mga Kristohanon. Ang usa sa akong mga klasmet, si Lloyd Barry; usa sa mga instruktor, si Albert Schroeder; ug si John Booth, nagdumala sa Kingdom Farm (diin nahimutang ang Tunghaang Gilead) nahimong mga membro sa Nagamandong Lawas. Gipabilhan ko gayod ang ilang mahigugmaong tambag ug ang ilang maayong panig-ingnan sa pagkamaunongon kang Jehova ug sa iyang organisasyon.

SIRKITONG BULUHATON UG BALIK SA BETHEL

Human sa Gilead, giasayn ko ingong magtatan-aw sa sirkito sa Ohio, U.S.A. Ako 21 anyos lang niadto, apan mainiton kong gidawat sa mga igsoon. Sa maong sirkito, daghan kog nakat-onan gikan sa eksperyensiyadong mga brader.

Human sa pipila ka bulan, gipabalik ko sa Bethel sa Brooklyn alang sa dugang pagbansay. Nianang panahona, akong nakaila ang mga haligi sama ni Milton Henschel, Karl Klein, Nathan Knorr, T. J. (Bud) Sullivan, ug Lyman Swingle, nga nahimong mga membro sa Nagamandong Lawas. Makapadasig kaayo nga makauban sila sa trabaho ug makita ang ilang Kristohanong pagkinabuhi. Midako pag-ayo ang akong pagsalig sa organisasyon ni Jehova. Dayon gipadala kog balik sa Europe aron ipadayon ang akong pag-alagad didto.

Namatay si Mama sa Pebrero 1950. Human sa paglubong, seryoso nakong gipangutana si Papa ug si Ate Dora kon unsa karoy ilang buhaton nga wala na si Mama ug wala na pod ko sa balay. May kaila ug gitahod silang edaran nga dinihogang brader, si Harry Browning. Misugot silang magtuon sa Bibliya uban niya. Wala ray usa ka tuig, si Papa ug si Ate Dora nabawtismohan. Sa ulahi, si Papa gitudlo ingong alagad sa Gillingham Congregation. Human mamatay si Papa, si Ate Dora naminyo sa usa ka matinumanong ansiyano, si Roy Moreton, ug maunongong nag-alagad kang Jehova hangtod sa iyang kamatayon sa 2010.

GIPATABANG DIDTO SA FRANCE

Sa publikong eskuylahan, nagtuon kog French, German, ug Latin. Niining tulo, nalisdan gyod ko sa French, mao nga nagpanuko ko dihang gihangyo nga motabang sa Bethel sa Paris, France. Didto, akong nakauban ang branch overseer nga si Henri Geiger, usa ka edaran nga dinihogan. Dili sayon ang akong asaynment ug kadaghan ko nasayop, apan daghan kog nakat-onan bahin sa pagpakiglabot sa uban.

Dugang pa, human sa gubat giplano ang unang internasyonal nga kombensiyon sa Paris nga himoon sa 1951, ug apil ko sa nag-organisar niini. Dayon si Léopold Jontès, usa ka batan-ong nagapanawng magtatan-aw, ang miadto sa Bethel aron sa pagtabang nako. Sa ulahi, si Léopold gitudlo nga branch overseer. Ang kombensiyon gipahigayon sa Palais des sports, duol sa Eiffel Tower. Ang mga delegado naggikan sa 28 ka nasod. Sa kataposang adlaw, hilabihang lipaya sa 6,000 ka Saksi sa France nga 10,456 ang mitambong!

Sa akong pag-abot sa France, dili kaayo ko makasultig French. Ang sayop pa gyod nako kay mosulti  lang kog French kon segurado kong husto ang akong paglitok. Apan kon dili ka masayop, dili ka makoreksiyonan ug dili ka mouswag.

Busa, nagpaenrol ko sa usa ka eskuylahan nga nagtudlog French. Motungha ko sa klase sa mga gabii nga walay tigom. Nagustohan na nako ang pinulongang French, ug misamot pa kini paglabay sa katuigan. Napuslan nako ni kay nakatabang ko sa sangang buhatan sa France labot sa paghubad. Ngadtongadto nahimo kong maghuhubad, nga naghubad sa English ngadto sa French. Dako gayong pribilehiyo nga makatabang sa pagpasa sa dagayang espirituwal nga pagkaon nga gitagana sa ulipon nga matang ngadto sa nagsultig French nga mga igsoon sa tibuok kalibotan.—Mat. 24:45-47.

KAMINYOON UG DUGANG MGA PRIBILEHIYO

Sa 1956, naminyo ko kang Esther, usa ka payunir nga taga-Switzerland nga akong nakaila pipila ka tuig kanhi. Gikasal mi sa Kingdom Hall tapad sa Bethel sa London (ang London Tabernacle kaniadto, diin nabawtismohan si Mama). Si Brader Hughes ang mipakigpulong sa kasal. Mitambong ang inahan ni Esther, nga dinihogan usab. Wala lang ko makabatog matahom ug maunongong asawa, apan nakabaton sab kog buotang ugangan nga kanunay nakong makaestorya bahin sa espirituwal nga mga butang. Natapos ang iyang yutan-ong kinabuhi niadtong 2000.

Human sa among kasal ni Esther, mipuyo mi gawas sa Bethel. Padayon kong naghubad para sa Bethel, samtang si Esther nag-alagad ingong espesyal payunir dili layo sa sentro sa Paris. Daghan siyag natabangan nga mahimong alagad ni Jehova. Sa 1964 kami gidapit sa Bethel. Dayon sa 1976, dihang unang naporma ang mga Branch Committee, ako namembro niini. Latas sa katuigan, si Esther mahigugmaong nagpaluyo kanako.

“AKO DILI KANUNAY NGA ANIA KANINYO”

Sa popanahon, nakapribilehiyo ko sa pagduaw sa hedkuwarter sa New York. Sa maong mga pagduaw, nakadawat kog maayong mga tambag gikan sa lainlaing membro sa Nagamandong Lawas. Pananglitan, dihay higayon nga nabalaka ko nga dili nako mahuman ang trabaho sulod sa gitagal nga panahon. Si Brader Knorr mipahiyom ug miingon: “Ayawg kabalaka. Trabaho lang!” Sukad niadto, dihang magtipun-og ang trabaho, inay matarantar, usa-usahon nako kini paghuman, ug sagad untop ra sa panahon.

Una pa mamatay si Jesus, giingnan niya ang iyang mga tinun-an: “Ako dili kanunay nga ania kaninyo.” (Mat. 26:11) Kita nga sakop sa ubang karnero nahibalo nga dili nato kanunayng makauban ang dinihogang mga igsoon ni Kristo dinhi sa yuta. Busa, giisip ko gayod nga dakong pribilehiyo ang pagpakig-uban sa daghang dinihogan sulod sa kapig 70 ka tuig—nga mapasalamatong nagkupot sa sidsid sa usa ka Hudiyo.

[Footnote]

[Blurb sa panid 21]

Si Brader Knorr mipahiyom ug miingon: “Ayawg kabalaka. Trabaho lang!”

[Mga hulagway sa panid 19]

(Wala) Si Mama ug Papa

(Tuo) Sa Gilead sa 1948, nga nagsul-ob sa coat nga gihatag ni Mama

[Hulagway sa panid 20]

Naghubad kang Brader Lloyd Barry panahon sa dedikasyon sa sangang buhatan sa France, 1997

[Mga hulagway sa panid 21]

(Wala) Sa kasal namo ni Esther

(Tuo) Magkauban sa pagsangyaw