Gibanaag Mo ba ang Himaya ni Jehova?
Gibanaag Mo ba ang Himaya ni Jehova?
“Atong ginasumbalik-silaw samag mga salamin ang himaya ni Jehova.”—2 COR. 3:18.
UNSAON NIMO PAGTUBAG?
Bisag kita makasasala, nganong makabanaag kita sa himaya sa Diyos?
Sa unsang paagi ang pag-ampo ug pagtambong sa mga tigom motabang kanato sa pagbanaag sa himaya sa Diyos?
Unsay makatabang kanato nga padayong mahimaya si Jehova?
1, 2. Nganong makasundog kita sa mga hiyas ni Jehova?
KITANG tanan dunay kaamgiran sa atong mga ginikanan. Mao nga usahay makadungog kita nga may moingon, ‘Dong, liwat kaayo ka sa imong Papa’ o kaha ‘Day, mora gyod kag si Mama nimo.’ Ug sagad sundogon sa mga bata ang ilang mga ginikanan. Apan komosta kita? Ato bang masundog ang atong langitnong Amahan, si Jehova? Bisag wala kita makakita kaniya, makakat-on kita sa iyang mga hiyas pinaagi sa pag-obserbar sa iyang kalalangan, ug pinaagi sa pagtuon ug pagpamalandong sa Bibliya, ilabina sa gisulti ug gibuhat sa iyang Anak, si Jesu-Kristo. (Juan 1:18; Roma 1:20) Busa mahimo natong mabanaag ang himaya ni Jehova.
2 Sa wala pa lalanga si Adan ug Eva, nahibalo ang Diyos nga ang tawo makatuman sa iyang kabubut-on, makasundog sa iyang mga hiyas, ug makahimaya kaniya. (Basaha ang Genesis 1:26, 27.) Ingong mga Kristohanon, angay natong sundogon ang mga hiyas sa atong Maglalalang. Kon ato kanang himoon, makapribilehiyo kita sa pagbanaag sa himaya sa Diyos bisag unsa pay atong kultura, edukasyon, o kagikan. Ngano? Kay “ang Diyos dili mapihigon, apan sa matag nasod ang tawo nga mahadlok kaniya ug magabuhat sa pagkamatarong dalawaton kaniya.”—Buh. 10:34, 35.
3. Unsay atong bation samtang nag-alagad kang Jehova?
3 Ang dinihogang mga Kristohanon nagbanaag sa himaya ni Jehova. Si apostol Pablo, nga dinihogan usab, misulat: “Kitang tanan, samtang uban ang dili-tinaptapan nga mga nawong atong ginasumbalik-silaw samag mga salamin ang himaya ni Jehova, ginausab ngadto sa samang larawan gikan sa himaya ngadto sa himaya.” (2 Cor. 3:18) Dihang si Moises mikanaog sa Bukid sa Sinai dala ang mga papan nga gisulatan sa Napulo ka Sugo, ang iyang nawong misilaw tungod sa pagpakigsulti ni Jehova kaniya. (Ex. 34:29, 30) Bisag wala makasinati niana ang mga Kristohanon ug dili mosilaw ang ilang mga nawong, makita sa uban ang ilang kalipay sa dihang sila magsangyaw bahin kang Jehova, sa iyang mga hiyas, ug sa iyang kahibulongang katuyoan alang sa katawhan. Sama sa gipasinawng metal nga salamin sa karaang panahon, ang mga dinihogan ug ang ubang mga karnero nagbanaag sa himaya ni Jehova diha sa ilang kinabuhi ug ministeryo. (2 Cor. 4:1) Imo bang gibanaag ang himaya ni Jehova pinaagi sa imong diyosnong panggawi ug sa imong regular nga pagpakigbahin sa pagsangyaw?
BUOT NATONG IBANAAG ANG HIMAYA NI JEHOVA
4, 5. (a) Sama kang Pablo, sa unsa kita nakigbisog? (b) Sa unsang paagi ang sala nakaapektar kanato?
4 Ingong mga alagad ni Jehova, buot gayod natong pasidunggan ug himayaon ang atong Maglalalang sa tanan natong buhaton. Apan sagad ang atong gustong buhaton sukwahi sa atong ginahimo. Bisan si apostol Pablo nakigbisog niini nga problema. (Basaha ang Roma 7:21-25.) Sa pagpatin-aw kon nganong kita makigbisog, si Pablo misulat: “Kay ang tanan nakasala ug wala makaabot sa himaya sa Diyos.” (Roma 3:23) Tungod sa sala ni Adan, ang mga tawo naulipon sa sala, nga samag mapintas nga hari nga nagmando kanila.—Roma 5:12; 6:12.
5 Unsa ang sala? Kini maoy bisan unsa nga sukwahi sa personalidad, paagi, sukdanan, ug kabubut-on ni Jehova. Ang sala makadaot sa relasyon sa tawo ngadto sa Diyos. Tungod sa sala masipyat kita sa atong tumong, sama sa magpapana nga wala makaigo sa iyang target. Usahay, tinuyo man o dili, kita makasala. (Num. 15:27-31) Nakagamot na pag-ayo sa tawo ang sala mao nga ang tawo nahimulag sa Maglalalang. (Sal. 51:5; Isa. 59:2; Col. 1:21) Tungod niini ang kadaghanan karon bug-os nahimulag sa Diyos ug nawad-ag kahigayonan sa pagbanaag sa iyang himaya. Ang sala mao gayod ang kinagrabehang balatian nga naghampak sa katawhan.
6. Bisag kita makasasala, nganong makabanaag kita sa himaya sa Diyos?
6 Bisag kita makasasala, si Jehova naghatag kanato ug paglaom. (Roma 15:13) Iyang gitagana ang paagi nga magwagtang sa sala—ang halad lukat ni Jesu-Kristo. Pinaagi sa pagpakitag pagtuo sa maong halad, kita dili na “maulipon sa sala” apan makabanaag na sa himaya ni Jehova. (Roma 5:19; 6:6; Juan 3:16) Kon mahuptan nato ang maayong relasyon uban sa Diyos, seguradong panalanginan kita ni Jehova karon. Ug sa umaabot, hatagan niya kitag hingpit ug walay kataposang kinabuhi. Bisag makasasala pa kita karon, nakabaton kitag dakong pribilehiyo nga mabanaag ang himaya sa Diyos.
PAGBANAAG SA HIMAYA SA DIYOS
7. Unsay angay natong ilhon aron mabanaag ang himaya sa Diyos?
7 Aron makabanaag sa himaya sa Diyos, angay natong dawaton nga kita makasasala. (2 Cron. 6:36) Angay usab natong ilhon ang atong mga kahuyangan ug kontrolahon kini. Pananglitan, kon nakasala kita tungod sa pagtan-awg pornograpiya, angay natong dawaton nga gikinahanglan nato ang tabang sa mga ansiyano ug moduol kanila. (Sant. 5:14, 15) Kini ang unang lakang aron bug-os natong mahimaya ang Diyos. Ingong mga magsisimba ni Jehova, kinahanglang susihon nato kanunay ang kaugalingon kon kita ba nagkinabuhi sumala sa iyang matarong nga mga sukdanan. (Prov. 28:18; 1 Cor. 10:12) Bisag unsa pay atong kahuyangan, kinahanglang padayon nato kining suklan aron mabanaag ang himaya sa Diyos.
8. Bisag dili kita hingpit, unsay angay natong paningkamotan?
8 Si Jesus lang ang tawo nga kanunayng nagbuhat sa kabubut-on sa Diyos ug hingpit nga nagbanaag sa Iyang himaya. Bisag kita dili hingpit, kita makasundog sa panig-ingnan ni Jesus ug angay kitang maningkamot sa pagbuhat niana. (1 Ped. 2:21) Pabilhan ni Jehova ang atong pag-uswag ug mga paningkamot sa paghimaya kaniya, ug iya kanang panalanginan.
9. Sa unsang paagi ang Bibliya makatabang kanato nga mas mabanaag ang himaya sa Diyos?
9 Ang Bibliya makatabang kanato nga mas mabanaag ang himaya sa Diyos. Kinahanglan nato kining tun-an ug pamalandongon pag-ayo. (Sal. 1:1-3) Mouswag kita kon atong basahon ang Kasulatan adlaw-adlaw. (Basaha ang Santiago 1:22-25.) Ang atong makat-onan sa Bibliya makapalig-on sa atong pagtuo ug determinasyon nga likayan ang grabeng sala ug pahimut-an si Jehova.—Sal. 119:11, 47, 48.
10. Sa unsang paagi ang pag-ampo makatabang kanato nga mouswag pa sa pag-alagad kang Jehova?
10 Aron mabanaag ang himaya sa Diyos, kinahanglan usab kitang ‘molahutay sa pag-ampo.’ (Roma 12:12) Angay kitang moampo kang Jehova nga tabangan kitang makaalagad kaniya sa dalawatong paagi. Makahangyo kita kaniya alang sa balaang espiritu, sa dugang pagtuo, sa kalig-on sa pagsukol sa tentasyon, ug sa katakos sa ‘paggamit sa pulong sa kamatuoran sa hustong paagi.’ (2 Tim. 2:15; Mat. 6:13; Luc. 11:13; 17:5) Sama sa usa ka bata nga may pagsalig sa iyang amahan, kinahanglan usab kitang mosalig sa atong langitnong Amahan, si Jehova. Kon moampo kita kaniya nga tabangang mouswag pa sa pag-alagad, makasalig kita nga iya kanang himoon. Dili gayod nato hunahunaon nga nagsamoksamok lang kita kaniya! Hinunoa, mag-ampo kita aron dayegon ug pasalamatan si Jehova, ug mangayog giya ilabina panahon sa pagsulay. Makaampo usab kita sa Diyos nga tabangan kitang makaalagad sa paagi nga makahimaya sa iyang balaang ngalan.—Sal. 86:12; Sant. 1:5-7.
11. Sa unsang paagi ang atong mga tigom motabang nato sa pagbanaag sa himaya sa Diyos?
11 Gitugyan sa Diyos sa “matinumanon ug maalamong ulipon” ang pag-atiman sa iyang bililhong mga karnero. (Mat. 24:45-47; Sal. 100:3) Buot gayod kitang tabangan sa ulipon nga matang nga mabanaag ang himaya ni Jehova. Ang atong mga tigom motabang nato sa paghimog mga kausaban sa atong kinabuhi ug sa pagpauswag sa atong Kristohanong mga hiyas, sama nga ang usa ka mananahi mohimog kausaban sa atong sinina aron mas nindot kitang tan-awon. (Heb. 10:24, 25) Busa, kinahanglang sayo kitang moabot sa mga tigom. Kon pirme kitang ma-late, dili kita bug-os makabenepisyo sa maong mga tigom.
SUNDOGON NATO ANG DIYOS
12. Sa unsang paagi nato masundog ang Diyos?
12 Aron mabanaag ang himaya ni Jehova, kinahanglan kitang “mahimong mga tigsundog sa Diyos.” (Efe. 5:1) Ang usa ka paagi sa pagsundog kang Jehova mao ang pagbaton sa iyang panglantaw. Kon mogawi kita nga sukwahi niana, kana makadaot kanato ug dili makahimaya sa Diyos. Kay nagkinabuhi kita sa kalibotan ni Satanas, dumtan gayod nato ang gidumtan ni Jehova ug higugmaon ang iyang gihigugma. (Sal. 97:10; 1 Juan 5:19) Kinahanglang kombinsido kita nga makaalagad lang kita sa Diyos sa hustong paagi kon buhaton nato ang tanang butang alang sa iyang kahimayaan.—Basaha ang 1 Corinto 10:31.
13. Nganong angay natong dumtan ang sala, ug unsay atong himoon?
13 Gidumtan ni Jehova ang sala, busa dumtan usab nato kini. Kutob sa mahimo likayan nato ang bisan unsa nga magtental kanato sa pagpakasala. Pananglitan, maglikay kita sa apostasya kay kadtong magpadala niini dili na makahimaya sa Diyos. (Deut. 13:6-9) Busa dili kita makiglabot sa mga apostata o kang bisan kinsa nga nag-angkong Saksi apan nagapasipala sa Diyos, bisag membro pa siya sa pamilya. (1 Cor. 5:11) Wala kitay makuhang kaayohan sa pagpakiglalis sa mga apostata o sa mga nagdaot sa organisasyon ni Jehova. Sa pagkatinuod, sayop ug makadaot sa atong espirituwalidad ang pagsusi sa ilang mga pagtulon-an, sa mga basahon man o sa Internet.—Basaha ang Isaias 5:20; Mateo 7:6.
14. Unsa ang labing maayong paagi sa pagsundog kang Jehova, ug ngano?
14 Ang labing maayong paagi sa pagsundog sa atong langitnong Amahan mao ang pagpakitag gugma. (1 Juan 4:16-19) Sa pagkatinuod, ang atong gugma sa usag usa magpaila nga kita maoy mga tinun-an ni Jesus ug mga alagad ni Jehova. (Juan 13:34, 35) Bisag malisdan ta usahay sa pagpakitag gugma tungod sa pagkadili-hingpit, angay natong paningkamotan nga magpakitag gugma ug Kristohanong mga hiyas sa tanang panahon. Kini motabang nato nga dili makapasakit sa uban ug makasala.—2 Ped. 1:5-7.
15. Sa unsang paagi ang gugma makaapektar sa atong relasyon sa uban?
15 Ang gugma magtukmod nato sa pagbuhat ug maayo para sa uban. (Roma 13:8-10) Pananglitan, kon naghigugmaay ang magtiayon, sila magmaunongon sa usag usa. Kon gimahal nato ang mga ansiyano ug gipabilhan ang ilang buluhaton, kita magmasinugtanon ug magpasakop kanila. Ang mga anak nga nahigugma sa ilang mga ginikanan mosunod ug motahod kanila, ug dili mosultig daotan bahin kanila. Kon gihigugma nato ang atong isigkatawo, dili nato sila isipong ubos o kaha dili matinahorong makigsulti kanila. (Sant. 3:9) Ug ang mga ansiyano nga nahigugma sa mga karnero sa Diyos magtratar kanila sa malulotong paagi.—Buh. 20:28, 29.
16. Sa unsang paagi ang gugma motabang kanato diha sa ministeryo?
16 Ang gugma angayng madayag usab diha sa atong ministeryo. Tungod sa atong dakong gugma kang Jehova, dili kita maluya kon ang mga tawo dili interesado o dili mamati kanato. Hinunoa, padayon kitang mosangyaw sa maayong balita, mangandam pag-ayo, ug maningkamot nga mahimong epektibo sa ministeryo. Kon tinuod kitang nahigugma sa Diyos ug sa atong isigkatawo, dili nato isipong kabug-at o obligasyon lang ang pagsangyaw. Kondili, isipon nato kini nga usa ka dakong pribilehiyo ug malipayon kining tumanon.—Mat. 10:7.
PADAYONG HIMAYAA SI JEHOVA
17. Unsay kaayohan kon atong ilhon ang atong pagkamakasasala?
17 Para sa kadaghanan, dili seryoso ang sala. Apan kita nahibalo kon unsa kini kaseryoso. Tungod niini, nahibalo kita nga angay natong suklan ang atong makasasalang kiling. Kon atong ilhon nga kita makasasala, mapalihok kita sa pagbansay sa atong konsensiya aron matabangan kita niini sa pagbuhat kon unsay husto sa dihang matental kita sa pagbuhat ug sayop. (Roma 7:22, 23) Bisag kita may mga kahuyangan, ang Diyos makapalig-on kanato sa pagbuhat kon unsay matarong sa bisan unsang situwasyon.—2 Cor. 12:10.
18, 19. (a) Unsay makatabang kanato nga makadaog batok kang Satanas ug sa mga demonyo? (b) Unsay determinado natong himoon?
18 Kon gusto natong himayaon si Jehova, kinahanglan natong suklan si Satanas ug ang mga demonyo. Kita makadaog batok kanila kon atong isul-ob “ang kompletong armadura gikan sa Diyos.” (Efe. 6:11-13) Si Satanas naningkamot sa pag-ilog sa himaya nga iya lang ni Jehova. Naningkamot usab ang Yawa sa pagdaot sa atong relasyon kang Jehova. Pagkadakong kaulawan kang Satanas sa dihang kita ug ang milyonmilyong dili-hingpit nga mga lalaki, babaye, ug mga bata magmaunongon ug maghimaya sa Diyos! Busa, padayon natong dayegon si Jehova, sama sa langitnong mga linalang nga mipatugbaw: “Takos ikaw, Jehova, nga among Diyos, nga modawat sa himaya ug sa dungog ug sa gahom, tungod kay imong gilalang ang tanang butang, ug tungod sa imong kabubut-on sila milungtad ug nalalang.”—Pin. 4:11.
19 Magmadeterminado kita nga padayong himayaon si Jehova, bisag unsa pay mahitabo. Malipay gayod siyang magtan-aw sa daghan niyang mga alagad nga naghimo sa ilang maarangan sa pagsundog kaniya ug sa pagbanaag sa iyang himaya. (Prov. 27:11) Hinaot kinasingkasing natong dayegon si Jehova sama kang David, kinsa miawit: “Pagahimayaon ko ang imong ngalan hangtod sa panahong walay tino.” (Sal. 86:12) Sa dili madugay, hingpit na natong mabanaag ang himaya ni Jehova ug madayeg siya sa walay kataposan. Pagkanindot nga magkinabuhi nianang panahona! Gibanaag mo ba karon ang himaya ni Jehova nga Diyos, nga naglaom sa pagbuhat niana hangtod sa hangtod?
[Mga Pangutana sa Pagtuon]
[Mga hulagway sa panid 27]
Gibanaag mo ba ang himaya ni Jehova niining mga paagiha?
