Mga Pangutana Gikan sa mga Magbabasa

Sa unsang paagi ang kamatayon sa mga maunongon “bililhon sa mga mata ni Jehova”?

▪ Usa ka salmista miawit: “Bililhon sa mga mata ni Jehova ang kamatayon sa mga maunongon niya.” (Sal. 116:15) Bililhon kaayo kang Jehova ang kinabuhi sa matag usa niya ka magsisimba. Apan dili lang ang kamatayon sa usa ka tawo ang gitumong sa mga pulong sa Salmo 116.

Dihang mohatag ug pakigpulong para sa namatay nga Kristohanon, dili haom nga ipadapat kaniya ang Salmo 116:15, bisag namatay siyang maunongon kang Jehova. Ngano? Kay ang gipamulong sa salmista mas lapad ug kahulogan. Kini nagpasabot nga dili motugot ang Diyos nga mamatay ang tibuok grupo sa mga maunongon kaniya kay bililhon kaayo sila alang kaniya.—Tan-awa ang Salmo 72:14; 116:8.

Ang Salmo 116:15 nagpasalig kanato nga dili tugotan sa Diyos nga mahanaw sa yuta ang iyang maunongong mga alagad ingong usa ka grupo. Gani, gipakita sa atong modernong kasaysayan nga kita nakalahutay sa grabeng mga pagsulay ug paglutos. Kini klarong nagpamatuod nga dili gayod tugotan sa Diyos nga kita mapuo.

Tungod kay si Jehova ang labing gamhanan ug seguradong matuman ang iyang katuyoan, dili niya tugotan nga kita mahanaw ingong usa ka grupo. Kon itugot kana sa Diyos, mogawas nga mas gamhanan ang iyang mga kaaway kay kaniya, ug ang iyang katuyoan nga ang yuta puy-an sa mga maunongon kaniya dili na matuman. Imposible gayod kana! (Isa. 45:18; 55:10, 11) Lain pa, mahunong ang paghatag ug sagradong pag-alagad kang Jehova dinhi sa yuta kon wala nay mahibiling tawo nga moalagad sa yutan-ong mga sawang sa iyang dakong espirituwal nga templo! Wala unyay mga tawo nga maglangkob sa “bag-ong yuta”—ang matarong nga katilingban sa mga tawo nga magkinabuhi sa yuta ilalom sa “bag-ong langit.” (Pin. 21:1) Ang Usa ka Libo ka Tuig nga Pagmando ni Kristo dili usab mahitabo kon walay mandoan dinhi sa yuta.—Pin. 20:4, 5.

Makuwestiyon usab ang posisyon ug reputasyon sa Diyos kon tugotan niya ang iyang mga kaaway sa pagpuo sa tanan niyang mga alagad sa yuta. Dakong kaulawan kana kang Jehova ingong Soberano sa Uniberso. Dugang pa, agig pagtahod sa iyang kaugalingon ug sa iyang balaang ngalan, dili gayod tugotan ni Jehova nga mamatay ang mga maunongon kaniya ingong usa ka grupo. Tagda usab kini: Sanglit “walay inhustisya” sa Diyos, iya gayong ipreserbar ang grupo sa mga tawo nga maunongong nag-alagad kaniya. (Deut. 32:4; Gen. 18:25) Gawas pa, kon tugotan sa Diyos nga mapuo ang tanan niyang mga alagad, sukwahi kana sa giingon sa Bibliya: “Si Jehova dili motalikod sa iyang katawhan tungod sa iyang dakong ngalan.” (1 Sam. 12:22) Oo, “si Jehova dili motalikod sa iyang katawhan, ni mobiya siya sa iyang panulondon.”—Sal. 94:14.

Pagkamakapahupay ang pagkasayod nga ang katawhan ni Jehova dili gayod mahanaw sa yuta! Nan kutob sa mahimo, magmaunongon kita sa Diyos ug mosalig sa iyang saad: “Bisan unsa nga hinagiban nga buhaton batok kanimo dili magmalamposon, ug ang matag dila nga mosulti batok kanimo sa paghukom imong pagahukman. Mao kini ang panulondon sa mga alagad ni Jehova, ug ang ilang pagkamatarong maoy gikan kanako.”—Isa. 54:17.

[Blurb sa panid 22]

Dili gayod tugotan sa Diyos nga mapuo ang iyang katawhan