Sumala sa giasoy ni Elva Gjerde

Mga 70 ka tuig kanhi, may mibisita sa among balay nga naghatag ug sugyot ni Papa nga nakapausab sa akong kinabuhi. Sukad niadto, daghan pa ang nakatabang nako, ug nakabaton sab kog higala nga gipabilhan nako pag-ayo kay sa uban. Paasoya ko sa akong kaagi.

NATAWO ko sa Sydney, Australia, sa 1932. Ang akong ginikanan nagtuo sa Diyos apan dili hinimba. Matod ni Mama nga ang Diyos kanunayng nagtan-aw ug mosilot dayon kon magpabadlong ko, maong nahadlok ko sa Diyos. Apan interesado kaayo ko sa Bibliya. Dihang mobisita ang akong iyaan kada hinapos sa semana, iya kong suginlan ug nindot nga mga estorya sa Bibliya. Kanunay kong magpaabot niya.

Sa tin-edyer na ko, si Papa nagbasa sa mga libro ni Mama nga gihatag sa usa ka edarang babaye nga Saksi ni Jehova. Giganahan kaayo si Papa sa iyang nabasa ug nagpa-Bible study siya sa mga Saksi. Usa ka gabii samtang nag-Bible study sila, nakit-an ko ni Papa nga naminaw. Pasudlon na unta ko niya sa kuwarto dihang ang bisita misugyot, “Paapilon na lang kaha nato si Elva?” Sukad niadto, nabag-o ang dagan sa akong kinabuhi ug nagsugod ang akong pagpakighigala sa matuod nga Diyos, si Jehova.

Wala madugay, tigtambongan na mi ni Papa sa mga tigom. Tungod sa iyang mga nakat-onan, siya nagbag-o. Gani makontrol na niya ang iyang kasuko. Tungod niini, si Mama ug ang akong magulang nga si Frank mitambong na sa mga tigom. * Wala madugay, kaming upat nabawtismohan. Sukad niadto, daghang edaran ang nakatabang nako sa lainlaing yugto sa akong kinabuhi.

PAGPILIG KARERA

Sa tin-edyer pa ko, nasuod ko sa mga edaran sa kongregasyon. Usa nila mao si Alice Place, ang edarang sister nga unang nakasangyaw sa among pamilya. Mora nako siyag tinuod nga lola. Iya kong gibansay sa pagsangyaw ug gidasig nga magpabawtismo. Pag-edad nakog 15, ako nagpabawtismo.

Nasuod sab ko sa edarang magtiayon nga si Percy ug Madge [Margaret] Dunham. Dako gyod silag impluwensiya sa akong kinabuhi. Ganahan kaayo kog mathematics, ug gusto kong mahimong magtutudlo ug math. Si Percy ug Madge nakaalagad sa Latvia ingong mga misyonaryo sa dekada sa 1930. Apan pagsugod sa Gubat Kalibotan II sa Europe, sila gidapit sa pag-alagad sa Bethel sa  Sydney, Australia. Gipakita ni Percy ug Madge nga interesado sila nako. Ilang gipaambit ang ilang makapalipayng mga kasinatian sa pagmisyonaryo. Nakita nako nga mas magmalipayon ko kon Bibliya ang akong itudlo imbes math. Busa nakadesisyon ko nga magmisyonaryo.

Gidasig ko sa magtiayong Dunham nga magpayunir aron maandam ko sa misyonaryong pag-alagad. Busa sa 1948, sa edad nga 16, nagpayunir ko ug miduyog sa napulo ka batan-ong payunir sa among kongregasyon nga malipayong nagsangyaw sa Hurstville, Sydney.

Sulod sa upat ka tuig, nagpayunir ko sa upat pa ka lungsod sa New South Wales ug Queensland. Usa sa akong unang gitun-an sa Bibliya mao si Betty Law (Remnant nay apelyido karon). Magulang siya nakog duha ka tuig ug buotan kaayo. Sa ulahi nagpartner mi sa lungsod sa Cowra, mga 230 kilometros kasadpan sa Sydney. Bisan kadiyot lang ming nagkauban, amiga gihapon mi hangtod karon.

Nahimo kong espesyal payunir ug naasayn sa lungsod sa Narrandera, 220 kilometros habagatan-kasadpan sa Cowra. Ang akong partner mao si Joy Lennox (Hunter nay apelyido karon), usa ka masibotong payunir ug magulang sab nakog duha ka tuig. Kami ray Saksi sa maong lugar. Nag-abang mig kuwarto sa buotang magtiayon nga si Ray ug Esther Irons. Sila ug ang ilang mga anak, usa ka lalaki ug tulo ka babaye, interesado sa kamatuoran. Si Ray ug ang anak niyang lalaki nagtrabaho sa ranso sa mga karnero ug plantasyon sa trigo, samtang si Esther ug ang tulo ka babaye maoy nag-atiman sa boarding house. Kada Dominggo, daghan mig lutoon ni Joy para sa pamilyang Irons ug sa mga 12 pa ka lalaki nga nangabang sa balay nga mga trabahante sa riles. Kining among pagluto nakatabang sa pagbayad sa among abangan. Human mahipos ang gikan-an, magtuon mi sa Bantayanang Torre uban sa pamilyang Irons. Si Ray, Esther, ug ang upat nila ka anak nabawtismohan ug nahimong unang mga membro sa Narrandera Congregation.

Sa 1951, mitambong kog kombensiyon sa Sydney ug miapil sa linaing miting alang sa mga payunir nga gustong magmisyonaryo. Kapig 300 ang mitambong sa miting nga gihimo diha sa dakong tolda. Si Nathan Knorr nga gikan sa Brooklyn Bethel ang nagdumala sa miting, ug naminaw mi pag-ayo kaniya. Iyang gipasiugda ang dinaliang panginahanglan sa pagsangyaw sa maayong balita sa tibuok yuta. Sa ulahi, daghan sa nanambong ang nagsugod sa pagsangyaw sa South Pacific ug sa ubang dapit. Nalipay kaayo ko nga naapil sa 17 ka Australiano nga gidapit sa ika-19 nga klase sa Tunghaang Gilead sa 1952. Sa edad lang nga 20, matuman na gyod ang akong pangandoy nga mamisyonaryo!

MGA KINAHANGLANG BAG-OHON

Ang Tunghaang Gilead nakapauswag sa akong kahibalo sa Bibliya ug nakapalig-on sa akong pagtuo. Dako sab kinig epekto sa akong personalidad. Batan-on pa ko ug dili realistikog panglantaw. Perpeksiyonista ko sa kaugalingon ug sa uban. Usahay estrikto ra kaayo ang akong panglantaw. Pananglitan, nakurat ko dihang si Brader Knorr nakigdula uban sa mga batan-ong Bethelite.

Namatikdan sa maalamong mga instruktor sa Gilead ang akong personalidad. Sila malulotong nagtabang nako sa pag-usab sa akong panghunahuna. Inanay nakong nakita nga si Jehova maoy mahigugmaong Diyos, dili estrikto, ug nagpabili  sa kon unsay atong mahimo. Nakatabang usab ang uban nakong klasmet. Usa kanila miingon: “Elva, wala man maggunit ug bunal si Jehova. Ayawg sobra ka estrikto sa imong kaugalingon!” Ang iyang prangkang mga pulong nakatandog sa akong kasingkasing.

Human sa Gilead, lima ming giasayn sa Namibia, Africa. Wala madugay nakadumala mig 80 ka Bible study. Ganahan kaayo ko sa Namibia ug sa akong pagmisyonaryo, apan nahigugma sab ko sa akong klasmet sa Gilead nga naasayn sa Switzerland. Human sa usa ka tuig sa Namibia, nagminyo mi ug miduyog ko sa akong bana sa sirkitong buluhaton sa Switzerland.

MAKAPASUBONG HITABO

Human sa lima ka malipayong tuig sa sirkitong buluhaton, gidapit mi nga moalagad sa Bethel sa Switzerland. Sa Bethel, nalipay ko nga makauban ang daghang edarang igsoon nga hamtong sa espirituwal.

Apan wala madugay, nakurat ko sa usa ka panghitabo. Ang akong bana wala magmaunongon kanako ug kang Jehova. Dayon iya kong gibiyaan. Hilabihan nakong guola! Kon wala pa ang akong suod nga edarang mga higala sa Bethel nga nagmahal ug nagpaluyo nako, basin wala nako masagubang ang akong kahimtang. Mamati sila kon gusto kong may kaestorya ug pasagdan ko nilang mag-inusara kon ako kining gikinahanglan. Ang ilang kaayo ug makapahupayng mga pulong nakatabang nako nga makalahutay sa maong grabeng kasakit ug mas masuod kang Jehova.

Nahinumdom sab ko sa gisulti kaniadto sa maalamong mga edaran nga nakasinatig mga pagsulay. Lakip niana ang giingon ni Madge Dunham: “Elva, sa imong pag-alagad kang Jehova, makasinati kag daghang pagsulay, apan ang kinalisdan lagmit maggikan niadtong suod kanimo. Nianang mga panahona, dangop kang Jehova. Hinumdoming siya ang imong gialagaran, dili ang mga tawong dili hingpit!” Ang tambag ni Madge nakatabang nako sa pagsagubang sa grabeng mga pagsulay. Determinado kong dili mobiya kang Jehova bisan pa sa gihimo sa akong bana.

Sa ulahi, miuli ko sa Australia aron magpayunir duol sa akong pamilya. Diha sa barko, gisangyawan nako ang usa ka grupo sa mga pasahero. Usa kanila mao ang hilomong Norwegian nga si Arne Gjerde. Nainteres siya sa iyang nadunggan. Sa ulahi, si Arne miduaw nako ug sa akong pamilya sa Sydney. Kusog ang iyang pag-uswag sa espirituwal ug nabawtismohan. Sa 1963, nagminyo mi ni Arne ug duha ka tuig sa ulahi nanganak ko kang Gary.

LAING PAGSULAY

Malipayon kaayo ang among pamilya. Dayon gipadak-an ni Arne ang among balay aron adto na mopuyo ang akong tigulang nang mga ginikanan. Apan human sa unom ka tuig nga kaminyoon, daw nahugno ang among kalibotan. Si Arne nadayagnos nga may kanser sa utok. Sa taas-taas nga panahon nga siya nagpatambal pinaagig radiation, adlaw-adlaw nako siyang giatiman sa ospital. Miarang-arang siya kadali, apan migrabe na pod ug naestrok. Gisultihan ko nga pipila na lang ka semana siyang mabuhi. Apan si  Arne milahutay. Siya nakauli sa balay diin ako siyang giatiman. Sa ngadtongadto, siya nakalakaw-lakaw na ug nakaatiman pag-usab sa iyang buluhaton ingong ansiyano sa kongregasyon. Ang iyang malipayong tinamdan ug pagkasiaw nakatabang niya nga maulian. Kini nakapasayon sab nako sa pag-atiman kaniya.

Paglabay sa mga tuig, niadtong 1986, migrabe na pod ang kahimtang ni Arne. Patay na niadto ang akong ginikanan maong mipahawa mi sa Sydney ug mipuyo sa maanindot nga Blue Mountains, nga duol ra sa among mga higala. Sa ulahi, si Gary naminyog usa ka maanyag nga sister, si Karin, ug misugyot sila nga mag-ipon mig puyo. Wala madugay, kaming upat mibalhin ug balay nga duol ra sa among gipuy-an niadto ni Arne.

Sa kataposang 18 ka bulan ni Arne, dili na siya makabangon ug kinahanglang atimanon kanunay. Kay pirme ra ko sa balay, makagugol kog duha ka oras kada adlaw sa pagtuon sa Bibliya ug sa atong mga publikasyon. Sa akong pagtuon, nabasahan nako ang daghang maalamong tambag kon unsaon pagsagubang sa akong kahimtang. Nalipay sab ko nga ginaduaw mi sa mahigugmaong mga edaran sa among kongregasyon. Ang pipila kanila nakasinati sab ug susamang mga pagsulay, ug nadasig gyod ko sa ilang pagkamalahutayon! Namatay si Arne sa Abril 2003, nga naglaom sa pagkabanhaw.

KINADAK-ANG TABANG NGA AKONG NADAWAT

Sa batan-on pa, perpeksiyonista ko. Apan akong nakita nga dili kanunayng mahitabo ang atong gidahom sa kinabuhi. Daghan kog panalangin apan nakaagom sab kog duha ka dagkong trahedya—nagluib ang akong unang bana ug ang lain namatay tungod sa sakit. Niining tanan, ako gigiyahan ug gihupay sa lainlaing paagi. Apan ang kinadak-ang tabang nga akong nadawat naggikan gihapon kang Jehova nga Diyos, “ang Karaan sa mga Adlaw.” (Dan. 7:9) Ang iyang tambag nakapausab sa akong personalidad, ug tungod niini daghan kog malipayong kasinatian sa pagmisyonaryo. Dihang mitungha ang mga problema, ‘ang mahigugmaong-kalulot ni Jehova nagpalig-on kanako ug ang iyang mga paghupay mihapohap sa akong kalag.’ (Sal. 94:18, 19) Nabati usab nako ang gugma ug pagpaluyo sa akong pamilya ug mga higala, ilabina panahon sa kasakit. (Prov. 17:17) Kadaghanan nila maoy maalamong mga edaran.

Si Job nangutana: “Dili ba ang kaalam anaa sa mga tigulang ug ang pagsabot anaa sa kataas sa mga adlaw?” (Job 12:12) Sumala sa akong kasinatian, ang tubag maoy oo. Ang tambag, paghupay, ug pagpakig-uban sa maalamong mga edaran nakapalig-on ug nakatabang kanako. Mapasalamaton kaayo ko nga nasuod kanila.

Ako 80 anyos na karon. Tungod sa akong kasinatian, nakasabot ko ilabina sa panginahanglan sa mga tigulang nga sama nako. Ganahan gihapon kong moduaw ug motabang nila. Pero malipay pod kong makig-uban sa mga batan-on. Makapadasig kaayo ang ilang kalagsik ug kasibot. Dihang ang mga batan-on moduol nako aron magpatambag, malipay kaayo kong motabang nila.

[Footnote]

[Hulagway sa panid 14]

Nagpayunir uban ni Joy Lennox sa Narrandera

[Hulagway sa panid 15]

Si Elva uban sa pipila ka membro pamilyang Bethel sa Switzerland sa 1960

[Hulagway sa panid 16]

Nag-atiman kang Arne dihang siya nasakit