Salig Kang Jehova—Ang Dakong Tigtakda sa Panahon

“Siya nagausab sa mga panahon ug sa mga yugto sa panahon, nga nagtangtang sa mga hari ug nagpahimutang sa mga hari.”—DAN. 2:21.

UNSAON NIMO PAGTUBAG?

Sa unsang paagi ang kalalangan ug ang natuman nga mga tagna nagpakita nga si Jehova ang Dakong Tigtakda sa Panahon?

Kay nahibalo kita nga si Jehova ang Diyos sa “mga panahon ug sa mga yugto sa panahon,” unsay angay natong himoon?

Nganong ang gitakdang panahon ni Jehova dili mausab bisag unsa pay panghitabo sa kalibotan ug giplanong buhaton sa mga tawo?

1, 2. Nganong makaingon kita nga si Jehova nahibalo gayod kon unsa ang panahon?

SA WALA pa lalanga ni Jehova ang tawo, naghimo na siyag paagi aron masukod ang panahon. Sa ikaupat nga adlaw sa paglalang, ang Diyos miingon nga ang mga tinubdan sa kahayag motungha sa kalangitan aron “sa pagbahin sa adlaw ug sa gabii; ug kini magsilbing mga ilhanan ug alang sa mga panahon ug alang sa mga adlaw ug sa mga tuig.” (Gen. 1:14, 19, 26) Kana gayod ang nahitabo sumala sa kabubut-on ni Jehova.

² Ang mga siyentista karon dili gihapon makapatin-aw sa kinaiyahan sa panahon. Usa ka ensiklopedia miingon: “Ang panahon maoy usa sa mga kinadak-ang misteryo sa kalibotan. Walay eksaktong makasaysay kon unsa kini.” Apan si Jehova nahibalo gayod kon unsa ang panahon kay siya “ang Maglalalang sa mga langit, . . . ang Mag-uumol sa yuta ug ang Magbubuhat niini.” Siya usab “ang Usa nga nagsulti sa kataposan sukad sa sinugdan, ug sa mga butang nga wala mahimo sukad sa kanhing panahon.” (Isa. 45:18; 46:10) Aron molig-on ang atong pagtuo sa Diyos ug sa Bibliya, atong hisgotan kon sa unsang paagi ang kalalangan ug ang natuman nga mga tagna nagpamatuod nga si Jehova ang Dakong Tigtakda sa Panahon.

ANG KALALANGAN MAGPALIG-ON SA ATONG PAGTUO KANG JEHOVA

3. Unsay mga pananglitan diha sa kalalangan nga untop kaayo sa panahon?

³ Daghang kalalangan ni Jehova, dagko ug gagmay, ang untop kaayo sa panahon. Pananglitan, ang kapaspas sa pagpitik sa mga atomo dili mag-usab-usab. Busa ang espesyal nga mga orasan nga gipaandar pinaagig mga atomo dili gayod mosipyat ug usa ka segundo bisag molabay pa ang 80 milyones ka tuig. Untop usab kaayo  ang paglihok sa mga planeta ug mga bituon mao nga abante kitang mahibalo sa eksakto nilang posisyon diha sa kalangitan. Gigamit kini sa mga tawo sa pagtino sa mga panahon ug ingong giya sa pagbiyahe. Kay si Jehova man ang naghimo sa mga atomo, bituon, ug mga planeta, siya gamhanan gayod ug angayng dayegon.—Basaha  ang Isaias 40:26.

4. Sa unsang paagi ang kaalam sa Diyos makita diha sa pagkauntop sa buhing mga linalang?

⁴ Ang pagkauntop sa panahon makita usab diha sa buhing mga linalang. Pananglitan, daghang tanom ug mananap ang may gisunod nga orasan sulod sa lawas, mao nga daghang langgam ang nahibalo kon kanus-a molalin. (Jer. 8:7) Ang tawo usab dunay gisunod nga orasan sulod sa lawas, nga sagad 24-oras nga siklo sa adlaw ug gabii. Kon mag-eroplano ta paingon sa laing nasod diin lahi na ang oras, ang atong lawas sagad magkinahanglag pipila ka adlaw aron makapasibo sa bag-ong oras. Busa ang daghang kalalangan nagpamatuod sa gahom ug kaalam sa Diyos sa “mga panahon ug sa mga yugto sa panahon.” (Basaha ang Salmo 104:24.) Oo, walay kinutoban ang kaalam ug gahom sa Dakong Tigtakda sa Panahon. Makasalig kita nga iya gayong matuman ang iyang katuyoan!

MGA TAGNA NGA NATUMAN SA EKSAKTONG PANAHON MAKAPALIG-ON SA PAGTUO

5. (a) Unsa ang bugtong paagi nga atong mahibaloan ang kaugmaon sa tawo? (b) Nganong si Jehova makabutyag sa umaabot nga panghitabo ug kon kanus-a kana matuman?

⁵ Daghan kitag makat-onan diha sa kalalangan bahin sa “dili-makita nga mga hiyas” ni Jehova, apan wala kini magtubag sa importanteng mga pangutana sama sa, Unsay kaugmaon sa tawo? (Roma 1:20) Aron matubag kana, kinahanglan natong tun-an ang gitudlo sa Diyos diha sa Bibliya. Atong makita nga daghang tagna ang natuman sa eksaktong panahon! Tukmang ikabutyag ni Jehova kon unsay mahitabo kay siya makakita sa umaabot. Dugang pa, ang mga tagna sa Bibliya matuman sa eksaktong panahon kay si Jehova makapahinabo niana sumala sa iyang kabubut-on ug sa iyang gitakdang panahon.

6. Unsay nagpakita nga gusto ni Jehova nga atong masabtan ang katumanan sa mga tagna sa Bibliya?

⁶ Gusto ni Jehova nga masabtan sa iyang mga magsisimba ang mga tagna sa Bibliya ug makabenepisyo niana. Kay limitado lang ang atong pagsabot bahin sa panahon, ang Diyos naggamit ug mga termino nga atong masabtan dihang maghisgot siyag mga butang nga mahitabo sa espesipikong panahon. (Basaha ang Salmo 90:4.) Pananglitan, ang basahon sa Pinadayag naghisgot ug “upat ka manulonda kinsa giandam na alang sa takna ug adlaw ug bulan ug tuig”—mga termino nga pamilyar kanato. (Pin. 9:14, 15) Kay ang mga tagna natuman man sa eksaktong panahon, molig-on gayod ang atong pagtuo kang Jehova, ang Diyos sa “mga panahon ug sa mga yugto sa panahon,” ug sa iyang Pulong. Atong hisgotan ang pipila ka pananglitan.

7. Sa unsang paagi ang katumanan sa tagna ni Jeremias bahin sa Jerusalem ug Juda nagpakita nga si Jehova ang Dakong Tigtakda sa Panahon?

⁷ Una, atong balikan ang nahitabo sa ikapitong siglo W.K.P. “Sa ikaupat ka tuig ni Jehoiakim nga anak nga lalaki ni Josias, ang hari sa Juda,” si Jehova nakigsulti kang Jeremias bahin sa katawhan sa Juda. (Jer. 25:1) Si Jehova miingon nga ang Jerusalem malaglag ug ang mga Hudiyo sa Juda mabihag sa Babilonya. Sila “magaalagad sa hari sa Babilonya sa kapitoan ka tuig.” Sa 607 W.K.P., ang Jerusalem gilaglag sa kasundalohan sa Babilonya ug ang mga Hudiyo sa Juda gidala gayod ngadto sa Babilonya. Apan unsay mahitabo human sa 70 ka tuig? Si Jeremias mitagna: “Kini ang giingon ni Jehova, ‘Sa dihang matuman na ang kapitoan ka tuig sa Babilonya akong iliso ang akong pagtagad nganha kaninyo, ug akong tumanon kaninyo ang akong maayong pulong sa pagdala kaninyo  ug balik niining dapita.’” (Jer. 25:11, 12; 29:10) Kini natuman sa eksaktong panahon—sa 537 W.K.P. dihang gipagawas sa Medo-Persia ang mga Hudiyo gikan sa Babilonya.

8, 9. Sa unsang paagi ang mga tagna ni Daniel nagpamatuod nga si Jehova ang Diyos sa “mga panahon ug sa mga yugto sa panahon”?

⁸ Tagda ang laing tagna nga naglangkit sa katawhan sa Diyos sa karaang panahon. Mga duha ka tuig una nakagawas ang mga Hudiyo sa Babilonya, ang Diyos miingon pinaagi ni propeta Daniel nga ang Mesiyas motungha 483 ka tuig human ipagula ang sugo nga tukoron pag-usab ang Jerusalem. Ang hari sa Medo-Persia maoy naghatag nianang sugoa sa 455 W.K.P. Paglabay gayod sa 483 ka tuig, sa 29 K.P., si Jesus nga taga-Nasaret gidihogan sa balaang espiritu panahon sa iyang bawtismo ug nahimong Mesiyas. *—Neh. 2:1, 5-8; Dan. 9:24, 25; Luc. 3:1, 2, 21, 22.

⁹ Karon matikdi ang giingon sa Kasulatan bahin sa Gingharian. Ang tagna sa Bibliya nagpaila nga ang Mesiyanikong Gingharian matukod sa langit sa 1914. Pananglitan, ang Bibliya naghatag sa “ilhanan” sa presensiya ni Jesus ug miingon nga nianang panahona si Satanas itambog gikan sa langit, nga moresultag dakong kaalaotan sa yuta. (Mat. 24:3-14; Pin. 12:9, 12) Dugang pa, ang ubang tagna sa Bibliya nagpunting sa 1914, ang eksaktong panahon nga matapos “ang tinudlong mga panahon sa mga nasod” ug magsugod ang pagmando sa Gingharian didto sa langit.—Luc. 21:24; Dan. 4:10-17. *

10. Unsang mga hitabo ang matuman gayod sa eksaktong panahon?

¹⁰ Sa di madugay, moabot ang gitagna ni Jesus nga “dakong kasakitan.” Human niini, siya magmando sulod sa 1,000 ka tuig. Kini matuman gayod sa eksaktong panahon. Sa dinhi pa si Jesus sa yuta, gitakda na daan ni Jehova ang ‘adlaw ug takna’ kon kanus-a kini mahitabo.—Mat. 24:21, 36; Pin. 20:6.

‘PALITA ANG NAHIANGAY NGA PANAHON’

11. Kay nahibalo nga ania na kita sa panahon sa kataposan, unsay angay natong himoon?

¹¹ Kay nahibalo nga nagmando na ang Gingharian ug ania na kita sa “panahon sa kataposan,” unsay angay natong himoon? (Dan. 12:4) Daghan ang nakamatikod nga nagkagrabe ang kahimtang sa kalibotan, apan wala sila mahibalo nga kini maoy katumanan sa tagna sa Bibliya bahin sa kataposang mga adlaw. Ang pipila naghunahuna nga mosamot pa kini, ug ang uban nagtuo nga makab-ot gihapon sa tawo ang “kalinaw ug kasegurohan.” (1 Tes. 5:3) Apan komosta kita? Kon nagtuo kita nga duol na kaayo ang kataposan sa kalibotan ni Satanas, dili ba angay natong gamiton ang nahibiling panahon sa pag-alagad kang Jehova ug tabangan ang uban nga mailhan siya? (2 Tim. 3:1) Magmaalamon gayod kita sa paggamit  sa atong panahon.—Basaha ang Efeso 5:15-17.

12. Unsay atong makat-onan sa giingon ni Jesus bahin sa adlaw ni Noe?

¹² Dili sayon ang ‘pagpalit sa nahiangay nga panahon’ diha sa kalibotan nga punog kabaldahan. Si Jesus nagpasidaan: “Maingon kaniadto sa mga adlaw ni Noe, mao man usab unya ang presensiya sa Anak sa tawo.” Unsay nahitabo sa adlaw ni Noe? Giingnan sa Diyos si Noe nga ang kalibotan nianang panahona matapos. Ang mga daotan mangamatay pinaagi sa tibuok kalibotang lunop. Ingong “magwawali sa pagkamatarong,” si Noe matinumanong nagpahayag sa mensahe sa Diyos ngadto sa mga tawo. (Mat. 24:37; 2 Ped. 2:5) Apan sila ‘nangaon ug nanginom, ang mga lalaki nagminyo ug ang mga babaye gihatag sa kaminyoon, ug wala sila magtagad hangtod nga miabot ang baha ug gibanlas silang tanan.’ Busa si Jesus nagpasidaan: “Pamatud-i usab ninyo nga kamo andam, tungod kay sa takna nga wala ninyo hunahunaa, ang Anak sa tawo moabot.” (Mat. 24:38, 39, 44) Angay natong sundogon si Noe, dili ang mga tawo sa iyang panahon. Unsay makatabang nato nga magpabiling andam?

13, 14. Unsay atong hinumdoman bahin kang Jehova aron matinumanon kitang makaalagad kaniya samtang nagpaabot sa Anak sa tawo?

¹³ Bisag ang Anak sa tawo moabot sa takna nga wala nato damha, angay natong hinumdoman nga si Jehova ang Dakong Tigtakda sa Panahon. Ang gitakdang panahon ni Jehova dili mausab bisag unsa pay panghitabo sa kalibotan ug giplanong buhaton sa mga tawo. Way makapugong kon kanus-a niya ipahinabo ang mga butang aron matuman ang iyang kabubut-on. (Basaha ang Daniel 2:21.) Ang Proverbio 21:1 nag-ingon: “Ang kasingkasing sa usa ka hari sama sa mga sapa sa tubig diha sa kamot ni Jehova. Iyang iliso kini sa bisan diin nga iyang kahimut-an.”

¹⁴ Makontrolar ni Jehova ang mga hitabo aron matuman ang iyang kabubut-on sa eksaktong panahon. Daghang panghitabo sa kalibotan ang nagtuman sa mga tagna sa Bibliya, ilabina bahin sa pagsangyaw sa maayong balita sa Gingharian sa Diyos sa tibuok yuta. Usa ka pananglitan mao ang pagkahugno sa Soviet Union ug ang mga resulta niini. Wala damha sa uban nga kalit kaayong mahitabo ang dakong kausaban sa politika. Apan ingong resulta, ang maayong balita gisangyaw na karon diha sa daghang nasod diin gidili kanhi ang atong buluhaton. Busa magmaalamon kita sa paggamit sa atong panahon aron matinumanon kitang makaalagad sa Diyos sa “mga panahon ug sa mga yugto sa panahon.”

MAGPAKITAG PAGTUO NGA TUMANON NI JEHOVA ANG IYANG KATUYOAN SA EKSAKTONG PANAHON

15. Sa unsang paagi kita makapakitag pagtuo kon may kausaban nga himoon ang organisasyon?

¹⁵ Aron makapadayon sa pagsangyaw niining panahon sa kataposan, angay kitang magpakitag pagtuo nga tumanon ni Jehova ang iyang katuyoan sa eksaktong panahon. Kay nagakausab ang kahimtang sa kalibotan, usahay kinahanglan natong usbon ang atong paagi sa pagsangyaw. Ang organisasyon mahimong mohimog kausaban aron atong ikasangyaw ang maayong balita sa mas epektibong paagi. Kon bug-os kitang mosunod sa maong kausaban ug maunongong moalagad ilalom sa pagpanguna sa iyang Anak, ang “ulo sa kongregasyon,” kita nagpakitag pagtuo sa Diyos sa “mga panahon ug sa mga yugto sa panahon.”—Efe. 5:23.

16. Nganong makasalig kita nga si Jehova motabang kanato sa hustong panahon?

¹⁶ Buot ni Jehova nga kita moampo kaniya ug bug-os mosalig nga iyang itagana ang “tabang sa hustong panahon.” (Heb. 4:16) Dili ba nagpakita kana nga siya nahigugma ug nahangawa sa matag usa kanato? (Mat. 6:8; 10:29-31) Atong ikapakita ang atong pagtuo kang Jehova nga Diyos pinaagi sa pag-ampo  kanunay sa iyang tabang ug dayon molihok uyon sa atong mga pag-ampo ug sa iyang direksiyon. Angay usab natong iampo ang atong mga isigkamagtutuo.

17, 18. (a) Sa di madugay, unsay himoon ni Jehova sa iyang mga kaaway? (b) Unsang kapeligrohan ang angay natong likayan?

¹⁷ Dili karon ang panahon nga magmaluya sa pagtuo, kondili panahon karon nga magmalig-on sa pagtuo. (Roma 4:20) Si Satanas ug kadtong nailalom sa iyang impluwensiya naningkamot sa pagpahunong sa buluhaton nga gisugo ni Jesus kanato. (Mat. 28:19, 20) Bisan pa sa mga pag-atake sa Yawa, nahibalo kita nga si Jehova ‘usa ka buhing Diyos ug Manluluwas sa tanang matang sa mga tawo, ilabina sa mga matinumanon.’ Siya ‘nahibalo kon unsaon pagluwas sa katawhan nga may diyosnong pagkamahinalaron gikan sa pagsulay.’—1 Tim. 4:10; 2 Ped. 2:9.

¹⁸ Sa di madugay, laglagon na ni Jehova kining daotang sistema. Bisag wala kita masayod sa tanang detalye ug kon kanus-a kini mahitabo, kita nahibalo nga sa eksaktong panahon, hanawon ni Kristo ang tanang kaaway sa Diyos, ug mabindikar ang pagkasoberano ni Jehova. Busa peligroso gayod nga malimot sa kahulogan sa “mga panahon ug sa mga yugto sa panahon” nga atong gikinabuhian karon! Dili gayod nato hunahunaon nga “ang tanang butang nagpadayon nga mao ra gayod sukad sa sinugdan sa kalalangan.”—1 Tes. 5:1; 2 Ped. 3:3, 4.

‘MAGPAKITAG MAHULATONG TINAMDAN’

19, 20. Nganong angay kitang maghulat kang Jehova?

¹⁹ Dihang gilalang ni Jehova ang tawo, gusto niya nga sila mabuhi sa walay kataposan aron padayong makakat-on bahin kaniya ug sa iyang matahom nga kalalangan. Ang Ecclesiastes 3:11 nag-ingon: ‘Ang tanang butang gihimo [ni Jehova] nga matahom sa panahon niini. Bisan ang panahong walay tino iyang gibutang sa ilang kasingkasing, aron ang tawo dili makatugkad sa buhat nga nahimo sa matuod nga Diyos sukad sa sinugdan hangtod sa kataposan.’

²⁰ Pagkamalipayon nato nga wala mausab ang katuyoan ni Jehova alang sa tawo! (Mal. 3:6) Sa Diyos “walay pagkausab sa pagbalhin sa landong.” (Sant. 1:17) Ang landong mag-usab-usab tungod sa pagtuyok sa yuta, apan ang gitakdang panahon ni Jehova wala mag-agad niini. Siya ang “Hari nga walay kataposan.” (1 Tim. 1:17) Busa, ‘magpakita kitag mahulatong tinamdan sa Diyos sa atong kaluwasan.’ (Miq. 7:7) Oo, ‘magmaisogon kita, ug magmalig-on unta ang atong kasingkasing, kitang tanan nga nagahulat kang Jehova.’—Sal. 31:24.

[Mga footnote]

[Mga Pangutana sa Pagtuon]

[Hulagway sa panid 19]

Nagtuo gayod si Daniel nga matuman ang tagna nga gihatag sa Diyos

[Hulagway sa panid 21]

Maalamon ba nimong gigamit ang panahon pinaagi sa pagbuhat sa kabubut-on ni Jehova?