Ang Kalulot Makahupay sa Kasakit

INIT kaayog ulo ang usa ka tigulang nga babaye nga ginganlag Rie dihang gisangyawan siya ni George ug Manon, magtiayong Saksi nga taga-Netherlands. Ilang nahibaloan nga siya namatyag duha ka bana ug usa ka anak nga lalaki ug may artraytis pang giantos. Bisag mikalma siya samtang nag-estoryahay, siya dili gihapon mahigalaon.

Gisugyotan ni George si Manon nga dad-an nilag bulak si Rie inigbalik nila kay morag magul-anon kaayo kini ug punog kasakit. Sa ilang pagbalik, nasorpresa si Rie. Apan puliki siya niadtong tungora mao nga gipabalik na lang sila sa laing adlaw. Pagbalik ni George ug Manon, walay tawo sa balay. Kadaghan pa silang mibalik, apan wala gihapon sila magkita. Nagtuo pa gani sila nga gilikayan sila ni Rie.

Usa ka adlaw niana, naabtan ra gyod siya ni George sa balay. Nangayog pasaylo si Rie nga wala siya makatuman sa ilang sabot kay naospital siya. Matod niya: “Di tingali mo makatuo sa akong gihimo dihang nakalakaw na mo. Nagbasa kog Bibliya!” Maayo ang ilang panag-estorya, ug nasugdan siyag Bible study.

Sa padayong pag-Bible study ni Rie, anam-anam nga nawala ang iyang kaguol ug kasakit. Siya karon malipayon ug maayo nag tinagdan. Bisag naa ra pirme sa balay, iyang sangyawan si bisan kinsa nga moduaw niya. Panagsa ra siyang makatambong sa tigom tungod sa iyang panglawas, apan malipay kaayo siya dihang duawon sa mga igsoon. Atol sa adlaw nga nag-82 anyos siya, mitambong siya sa sirkitong asembliya ug nagpabawtismo.

Pipila ka bulan sa ulahi, si Rie namatay, ug dunay nakit-ang balak nga iyang gisulat. Gihubit niya ang kaguol nga bation sa usa ka mag-inusarang tigulang ug gipasiugda ang kahinungdanon sa pagpakitag kalulot. “Nakahilak ko sa pagbasa sa maong balak,” matod ni Manon, “ug malipayon kaayo ko nga gitabangan mi ni Jehova sa pagpakitag kalulot kaniya.”

Oo, ang panig-ingnan mismo ni Jehova magdasig kanato sa pagpakitag gugma ug kalulot. (Efe. 5:1, 2) Magmabungahon gayod ang atong ministeryo kon atong ‘ginarekomendar ang atong kaugalingon nga mga ministro sa Diyos pinaagi sa pagpakitag kalulot.’—2 Cor. 6:4, 6.