Sumala sa giasoy ni Max Lloyd

Usa ka gabii niana sa 1955, ako ug ang akong kaubang misyonaryo miduaw sa usa ka hilit nga dapit sa Paraguay, South America. Ang balay nga among gisak-an gilibotag suko nga mga tawo nga nagsigeg singgit: “Uhaw sa dugo ang among diyos, ug gusto niya ang dugo sa mga langyaw.” Nganong nakaabot mi dinhi?

SA AKONG bahin, nagsugod ang tanan sa Australia diin ako nagdako ug gitudloan ni Jehova sa pagbuhat sa iyang kabubut-on. Sa 1938, gidawat ni Papa ang librong Enemies gikan sa usa ka Saksi. Nianang panahona si Papa ug Mama nadismaya sa lider sa ilang relihiyon, kinsa nag-ingon nga tumotumo lang ang ubang bahin sa Bibliya. Mga usa ka tuig sa ulahi, ang akong mga ginikanan nagpabawtismo ingong simbolo sa ilang dedikasyon kang Jehova. Sukad niadto, ang pagbuhat sa kabubut-on ni Jehova mao ang labing importante sa among pamilya. Ang sunod nga nabawtismohan mao ang akong igsoon nga si Lesley, nga magulang nakog lima ka tuig. Pagka-1940, nabawtismohan pod ko sa edad nga nuybe.

Wala madugay human magsugod ang Gubat sa Kalibotan II, gibando sa Australia ang pag-imprenta ug pagpanagtag sa mga basahon sa mga Saksi ni Jehova. Busa bisag bata pa, nakakat-on ko sa pagpatin-aw sa akong pagtuo gamit lang ang Bibliya. Pirme kong magdalag Bibliya sa eskuylahan aron ipakita kon nganong dili ko mosaludo sa bandera o mosuportar sa mga paningkamot sa nasod alang sa gubat.—Ex. 20:4, 5; Mat. 4:10; Juan 17:16; 1 Juan 5:21.

Daghan sa akong eskolmet ang dili makig-uban nako kay espiya kuno ko sa Germany. Niadtong panahona, may mga pelikula nga ipasalida diha sa eskuylahan. Sa dili pa kini magsugod, ang tanan kinahanglang motindog ug mokanta sa nasodnong awit. Dihang wala ko motindog, gibira sa duha o tulo ka lalaki ang akong buhok aron makatindog ko. Sa ulahi, gipalagpot ko sa eskuylahan kay akong gibarogan ang akong pagtuo. Hinuon bisag diha ra sa balay, nakahuman kog eskuyla pinaagig correspondence (sulat).

NATUMAN RA GYOD ANG AKONG TUMONG

Tumong nako nga magpayunir pag-edad ug 14, maong nasubo ko dihang giingnan ko sa akong mga ginikanan nga kinahanglan una kong manarbaho. Ila kong pabayron sa akong pagpuyo sa balay, apan sila misaad nga inig-18 nako, puwede na kong magpayunir. Sukad niadto, pirme ming maglalis sa akong kinitaan. Mangatarongan ko nga  gusto nako ning tigomon para sa akong pagpayunir, apan ila kining ginakuha.

Dihang puwede na kong magpayunir, gitug-anan ko sa akong mga ginikanan nga ilang gideposito sa bangko ang kuwarta nga akong ginabayad kanila. Dayon ila kining gibalik nako aron makapalit kog mga sinina ug uban pang gamit sa pagpayunir. Gitudloan ra diay ko nila nga mahimong responsable ug dili magsalig sa uban. Nakatabang gyod nako ang maong pagbansay!

Sa bata pa mi ni Lesley, daghan nang payunir ang nakapuyo sa among balay, ug ganahan ming mouban nila sa pagsangyaw. Kada Sabado ug Dominggo ang among pamilya mamalaybalay, magsangyaw sa kadalanan, ug magdumalag mga pagtuon sa Bibliya. Kaniadto ang mga magmamantala dunay tumong nga 60 ka oras kada bulan. Halos kanunayng makuha ni Mama ang iyang oras, mao nga maayo kaayo siyang panig-ingnan namo ni Lesley.

PAGPAYUNIR SA TASMANIA

Ang una nakong asaynment sa pagpayunir mao ang Tasmania, usa ka isla sa Australia, diin miduyog ko kang Lesley ug sa iyang bana. Apan wala madugay gidapit sila sa ika-15 nga klase sa Gilead School. Maulawon kaayo ko ug wala pa sukad mahilayo sa akong pamilya. Nagtuo gani ang uban nga tulo ka bulan ra ko didto. Apan human sa usa ka tuig, sa 1950, natudlo ko ingong company servant, nga karon gitawag ug koordinetor sa lawas sa mga ansiyano. Sa ulahi, nahimo kong espesyal payunir ug gipartner sa usa ka batan-ong brader.

Ang among asaynment maoy usa ka hilit nga lungsod nga minahag tumbaga diin wala pay mga Saksi. Nag-bus mi paingon didto ug hapon na ming nakaabot. Sa unang gabii, natulog mi sa usa ka daang hotel. Pagkaugma samtang nagsangyaw, nangutana mi sa mga tagbalay kon duna ba silay nahibaloang kuwarto nga paabangan. Sa talisalop na ang adlaw, dunay miingon nga bakante ang balay sa ministro nga tapad sa simbahan sa Presbyterian, apan kinahanglang makig-estorya una mi sa diakono. Mahigalaon siya ug misugot nga among abangan ang balay. Morag dili katuohan nga balay sa ministro ang among gipuy-an samtang nagsangyaw sa maong dapit.

Sa maong teritoryo, daghan ang interesado ug nagpa-Bible study. Dihang nahibaloan kini sa mga dakodako sa simbahan ug nga mga Saksi ni Jehova pa gyod ang nagpuyo sa balay sa ministro, ilang gisugo ang diakono nga papahawaon dayon mi. Busa nangita na pod mig kapuy-an.

Pagkaugma sa mga alas tres sa hapon human sa pagsangyaw, nangita mig puwedeng katulgan nianang gabhiona. Ang grandstand lang sa sports stadium ang kinamaayohan nga among nakita. Gitagoan namo ang among mga maleta didto ug mipadayon sa pagsangyaw. Bisag kilumkilom na, gitiwas namo ang nahibiling mga balay sa usa ka kalye. Sa usa ka balay didto, dihay lalaking miingon nga puwede namong abangan ang duhag-kuwarto nga balay sa likod sa iyang gipuy-an!

 SIRKITONG BULUHATON UG GILEAD

Human sa mga walo ka bulan nga pagsangyaw niining dapita, gisulatan ko sa sangang buhatan sa Australia nga mahimo kong magtatan-aw sa sirkito. Nakurat ko kay 20 anyos pa lang ko. Human sa pipila ka semana nga pagbansay, misugod na ko sa pagduaw sa mga kongregasyon. Bisag bata pa ko ug wala pa kaayoy kasinatian, gitahod ko sa mga magulang pa nakog edad ug giapresyar nila ang akong buluhaton.

Lainlain ang akong sakyan paingon sa mga kongregasyon. May semana nga mag-bus ko, sa laing semana mag-tram, usahay mosakayg kotse o moangkas sa motor nga magbalanse sa akong maleta ug bag nga pangsangyaw. Makapalipay ang pag-estar sa balay sa mga igsoon. Gusto kaayo sa usa ka company servant nga didto ko moestar sa ilang balay bisag wala pa ni mahuman. Nianang semanaha ang akong higdaanan mao ang bathtub, apan makapadasig kaayo ang among pag-ubanay.

Sa 1953, nasorpresa ko kay nakadawat kog aplikasyon sa ika-22 nga klase sa Gilead School. Apan ang akong kalipay may sagol kabalaka. Human man god mograduwar sa Gilead si Lesley ug ang iyang bana sa Hulyo 30, 1950, giasayn sila sa Pakistan. Apan wala ray usa ka tuig, si Lesley nasakit ug namatay didto. Unsa kahay bation sa akong mga ginikanan kon maasayn ko sa laing nasod human sa graduwasyon? Pero sila miingon: “Adto lang ug alagara si Jehova bisan asa ka niya ipadala.” Sukad niadto wala na nako makita pag-usab si Papa. Namatay siya sa 1957.

Wala madugay, unom ming taga-Australia nga misakayg barko paingon sa New York City. Sulod sa unom ka semana nga biyahe, kami nagbasag Bibliya, nagtuon, ug nagsangyaw sa kaubang mga pasahero. Wala una mi moderetso sa among eskuylahan sa South Lansing, New York, kay mitambong mi sa internasyonal nga kombensiyon sa Yankee Stadium sa Hulyo 1953. Dunay 165,829 nga mitambong!

Lainlaing nasod ang gigikanan sa 120 ka estudyante sa among klase sa Gilead. Sa adlaw sa among graduwasyon lang namo nahibaloan ang among asaynment. Nangadto dayon mi sa librarya aron masayod bahin sa nasod nga among adtoan. Ako giasayn sa Paraguay, ug akong nahibaloan nga kining nasora nakasinatig daghang politikanhong rebolusyon. Usa ka buntag niana sa bag-o pa kong abot didto, akong gipangutana ang ubang misyonaryo kon unsa tong kabanha nga akong nadungog kagabii. Mipahiyom sila ug miingon: “Kadto ang unang rebolusyon nga imong nasinatian dinhi. Tan-awa sa gawas.” Ug akong nakita nga daghan kaayog sundalo!

DILI MAKALIMTANG KASINATIAN

Dihay higayon nga akong gikuyogan ang magtatan-aw sa sirkito aron duawon ang usa ka hilit nga kongregasyon ug ipasalida ang The New World Society in Action. Walo o siyam ka oras ang among  biyahe, una pinaagig tren, sunod kalesa, ug dayon karomata. Nagdala mig generator ug projector. Nakaabot ra gyod mi sa among destinasyon, ug nanangyaw dayon pagkaugma sa mga kaumahan ug gidapit ang mga tawo sa pagtan-aw sa among ipasalida nianang gabhiona. Mga 15 ka tawo ang mitambong.

Apan mga 20 minutos pa lang sa among pagtan-aw sa salida, giingnan mi nga mosulod dayon sa balay. Gidalidali namog hipos ang projector ug misulod. Dayon sa gawas may mga lalaki nga nagpabutog mga pusil ug nagsigeg singgit: “Uhaw sa dugo ang among diyos, ug gusto niya ang dugo sa mga langyaw.” Duha ray langyaw didto, ug usa ko niana! Gibabagan sa mga nanambong ang maong mga lalaki sa pagsulod sa balay. Dayon sila namiya ug namalik mga alas tres sa kaadlawon, nagpabuto sa ilang mga pusil ug miingon nga atangan mi nila inig-uli namo sa lungsod.

Gikontak sa mga igsoon ang sheriff, ug miabot siya pagkahapon nga nagdalag duha ka kabayo aron ihatod mi sa lungsod. Kon makaagi mig kasagbotan o kakahoyan, iyang hulboton ang iyang pusil ug mouna namo aron susihon kana. Kay importante man ang kabayo sa pagbiyahe, sa ulahi mipalit pod kog kabayo.

DUGANG MGA MISYONARYO NANGABOT

Nagmabungahon ang among ministeryo bisan pa sa kanunayng pagsupak sa mga lider sa relihiyon. Sa 1955, lima ka bag-ong misyonaryo ang miabot, lakip na ang usa ka batan-ong sister nga taga-Canada, si Elsie Swanson, nga migraduwar sa ika-25 nga klase sa Gilead. Nagkauban mi kadiyot sa Bethel sa Paraguay sa wala pa siya maasayn sa laing lungsod. Bisag dili Saksi ang iyang pamilya ug wala kaayo mosuportar kaniya, siya masibotong nag-alagad kang Jehova. Sa Disyembre 31, 1957, nagminyo mi ug mipuyo sa balay sa mga misyonaryo sa habagatang bahin sa Paraguay.

Walay gripo ang among balay, apan duna miy atabay sa likod. Busa walay kaligoanan o kasilyas sa sulod sa balay, walay washing machine, ug wala ganiy refrigerator. Ginagmay rang pagkaon ang among paliton aron dili madaot. Apan ang simpleng kinabuhi ug ang gugma sa mga igsoon sa kongregasyon maoy nakapalipay pag-ayo namong magtiayon.

Sa 1963, miuli mi sa Australia aron duawon si Mama. Apan giatake siya sa kasingkasing, tingali tungod sa kalipay nga nakita niya pag-usab ang iyang anak human sa napulo ka tuig. Sa hapit na  ming mobalik sa Paraguay, kinahanglan ming mohimog desisyon. Biyaan ba namo si Mama sa ospital ug maglaom nga dunay moatiman niya, ug mobalik sa among gimahal nga asaynment sa Paraguay? Human sa daghang pag-ampo, nakadesisyon mi ni Elsie nga magpabilin aron atimanon si Mama. Hinuon, nakapadayon gihapon mi sa bug-os panahong pag-alagad hangtod namatay si Mama sa 1966.

Nakapribilehiyo ko sa pag-alagad ingong magtatan-aw sa sirkito ug distrito sa Australia sa taas nga panahon ug ingong magtutudlo sa Kingdom Ministry School para sa mga ansiyano. Apan may bag-o na pong kausaban sa among kinabuhi. Gitudlo ko ingong membro sa unang Branch Committee sa Australia. Dayon dihang giplano nga magtukod ug bag-ong sangang buhatan, natudlo kong tsirman sa building committee. Sa tabang sa daghang hanas ug mapinasakopong mga boluntaryo, natukod ang usa ka nindot nga sangang buhatan.

Sunod naasayn ko sa Service Department, nga nagdumala sa buluhatong pagsangyaw sa nasod. Nakapribilehiyo sab ko nga mahimong magtatan-aw sa sona, nga moduaw sa ubang sangang buhatan sa kalibotan aron sa pagtabang ug pagdasig sa mga igsoon. Ilabina gyong milig-on ang akong pagtuo dihang miduaw ko sa mga igsoon sa ubang nasod nga napriso sulod sa daghang katuigan tungod sa ilang pagkamasinugtanon kang Jehova.

AMONG PRESENTENG ASAYNMENT

Sa among pag-uli human sa taas nga biyahe ingong magtatan-aw sa sona sa 2001, nakadawat kog imbitasyon nga mahimong membro sa bag-ong napormang Branch Committee sa United States. Giampo ug gipamalandong pag-ayo namo ni Elsie ang maong imbitasyon, ug malipayon namo kining gidawat. Human sa kapig 11 ka tuig, nia gihapon mi sa Brooklyn, New York.

Mapasalamaton kaayo ko nga nakabatog asawa nga andam mopaluyo kanako sa bisan unsang asaynment nga ihatag ni Jehova. Karon 81 anyos na mi ni Elsie ug maayo gihapon ug panglawas. Kami naghinamhinam nga matudloan ni Jehova sa walay kataposan ug matagamtam ang dagayang panalangin nga iyang ihatag niadtong padayong nagbuhat sa iyang kabubut-on.

[Blurb sa panid 19]

May semana nga mag-bus ko, sa laing semana mag-tram, usahay mosakayg kotse o moangkas sa motor nga magbalanse sa akong maleta ug bag nga pangsangyaw

[Blurb sa panid 21]

Kami naghinamhinam nga matudloan ni Jehova sa walay kataposan

[Mga hulagway sa panid 18]

Wala: Samtang nag-alagad ingong magtatan-aw sa sirkito sa Australia

Tuo: Uban sa akong mga ginikanan

[Hulagway sa panid 20]

Sa among kasal niadtong Disyembre 31, 1957