“Kinsa man ang Akong Kalisangan?”
“Kinsa man ang Akong Kalisangan?”
“Bisan pag ang gubat patindogon batok kanako, bisan pa niana ako magmasaligon.”—SAL. 27:3.
SUMALA NIINI NGA MGA TEKSTO, UNSAY MAKATABANG NIMO SA PAGBATOG KAISOG?
1. Unsang mga pangutana ang gitubag sa Salmo 27?
NGANONG nagmauswagon ang atong buluhatong pagsangyaw bisag nagkagrabe ang kahimtang sa kalibotan? Nganong malipayon kitang naggamit sa atong panahon ug kusog bisag lisod ang ekonomiya? Sa unsang paagi kita makapabiling maisogon samtang ang uban nahadlok sa mahitabo sa umaabot? Kining mga pangutanaha gitubag sa inspiradong awit ni Haring David sa Salmo 27.
2. Unsay bation sa usa nga malisang, apan sa unsa kita makasalig?
2 Gisugdan ni David ang maong salmo niining mga pulonga: “Si Jehova mao ang akong kahayag ug ang akong kaluwasan. Kinsa man ang akong kahadlokan? Si Jehova mao ang salipdanan sa akong kinabuhi. Kinsa man ang akong kalisangan?” (Sal. 27:1) Ang kalisang o hilabihang kahadlok makapaluya pag-ayo sa usa nga tungod niana wala na siyay mahimo. Apan kadtong may pagsalig kang Jehova dili angayng malisang. (1 Ped. 3:14) Kon himoon natong salipdanan si Jehova, kita “magapuyo sa kasegurohan ug dili matugaw sa kalisang sa katalagman.” (Prov. 1:33; 3:25) Ngano?
‘SI JEHOVA MAO ANG AKONG KAHAYAG UG KALUWASAN’
3. Sa unsang paagi si Jehova mao ang atong kahayag? Apan unsay kinahanglan natong buhaton?
3 Dihang ang Bibliya miingon nga “si Jehova mao ang akong kahayag,” kini nagpasabot nga si Jehova nagpahigawas kanato gikan sa espirituwal nga kangitngit ug kawalay alamag. (Sal. 27:1) Mahimong ipakita sa literal nga kahayag ang kapeligrohan o babag diha sa dalan, apan dili kini magkuha niana. Kita ang kinahanglang molikay niana. Sa susama, gipakita ni Jehova kanato ang kahulogan sa mga panghitabo sa kalibotan. Siya nagpasidaan kanato sa mga kapeligrohan niining daotang sistema. Pinaagi sa Bibliya, siya nagtaganag praktikal nga mga prinsipyo, apan kinahanglang ipadapat nato kana. Kon ato kanang himoon, mahimo kitang mas maalamon kay sa atong mga “kaaway” o mga “magtutudlo.”—Sal. 119:98, 99, 130.
4. (a) Nganong si David miingon nga ‘si Jehova mao ang akong kaluwasan?’ (b) Kanus-a ilabina nga si Jehova mahimong atong kaluwasan?
4 Ang mga pulong ni David sa Salmo 27:1 nagpakita nga siya nahinumdom sa mga pagluwas ni Jehova kaniya. Pananglitan, giluwas siya ni Jehova ‘gikan sa kuyamas sa leyon ug sa oso.’ Gitabangan usab siya ni Jehova sa pagpildi sa higanteng si Goliat. Sa ulahi, giluwas siya ni Jehova sa matag higayon nga gibangkaw siya ni Haring Saul. (1 Sam. 17:37, 49, 50; 18:11, 12; 19:10) Busa si David nakaingon: ‘Si Jehova mao ang akong kaluwasan’! Maingon nga giluwas ni Jehova si David, siya usab magluwas sa iyang mga alagad. Sa unsang paagi? Pinaagi sa pagluwas kanila sa umaabot nga “dakong kasakitan.”—Pin. 7:14; 2 Ped. 2:9.
HINUMDOMI ANG MGA HIGAYON NGA GITABANGAN KA NI JEHOVA
5, 6. (a) Sa unsang paagi ang paghinumdom sa atong mga kasinatian makatabang sa pagbatog kaisog? (b) Nganong angay natong hinumdoman kon giunsa pagtabang ni Jehova ang iyang mga alagad kanhi?
5 Ang usa ka hinungdanong butang nga makatabang kanato sa pagbatog kaisog mabasa sa Salmo 27:2, 3. (Basaha.) Gihinumdoman ni David ang mga higayon nga siya giluwas ni Jehova. (1 Sam. 17:34-37) Kadto nakatabang kaniya nga makabatog kaisog sa pagsagubang sa lisod kaayong mga situwasyon. Tinuod ba usab kini sa imong kasinatian? Pananglitan, duna ka bay dakong problema kaniadto nga imong giampo ug dayon imong nakita kon sa unsang paagi si Jehova naghatag kanimog kaalam o kusog sa pagsagubang niana? Nahinumdom ka ba kon sa unsang paagi nabuntog ang mga babag sa imong pag-alagad o kon sa unsang paagi ka nakabatog kahigayonan sa pagpalapad sa imong ministeryo? (1 Cor. 16:9) Dihang imo kanang hinumdoman, unsay epekto niana kanimo? Dili ba kana magkombinsir kanimo nga si Jehova makatabang kanimo sa pagsulbad o sa paglahutay bisan sa lisod kaayong problema o situwasyon?—Roma 5:3-5.
6 Komosta kon may gamhanang gobyerno nga nagplano sa pagwagtang sa organisasyon sa mga Saksi ni Jehova? Daghan ang misulay sa paghimo niana sa modernong panahon, apan napakyas sila. Kon atong hinumdoman kon giunsa pagtabang ni Jehova ang iyang mga alagad kanhi, makabaton kitag kaisog sa pag-atubang sa mahitabo sa umaabot.—Dan. 3:28.
PABILHI ANG MATUOD NGA PAGSIMBA
7, 8. (a) Sumala sa Salmo 27:4, unsay gipangayo ni David kang Jehova? (b) Unsa ang dakong espirituwal nga templo ni Jehova, ug sa unsang paagi kita makasimba diha niana?
7 Makatabang usab sa pagbatog kaisog ang pagpabili sa matuod nga pagsimba. (Basaha ang Salmo 27:4.) Sa panahon ni David, ang “balay ni Jehova” dili templo kondili tabernakulo nga usa ka tolda. Busa si David nangandam alang sa usa ka dako ug nindot nga templo nga pagatukoron sa iyang anak nga si Solomon. Apan kapin sa usa ka libo ka tuig sa ulahi, si Jesus miingon nga moabot ang panahon nga ang mga tawo dili na kinahanglang moadto sa templo aron simbahon si Jehova. (Juan 4:21-23) Sa Hebreohanon kapitulo 8 hangtod 10, gipatin-aw ni apostol Pablo nga ang usa ka dakong espirituwal nga templo nagsugod sa panahon sa bawtismo ni Jesus sa 29 K.P., dihang gitanyag niya ang iyang kaugalingon sa pagbuhat sa kabubut-on ni Jehova. (Heb. 10:10) Kining dakong espirituwal nga templo maoy kahikayan ni Jehova aron kita, pinaagi sa atong pagtuo sa halad lukat ni Jesus, makasimba kaniya sa dalawatong paagi. Sa unsang paagi kita makasimba sa maong templo? Pinaagi sa pag-ampo “uban ang matinuoron nga kasingkasing diha sa bug-os nga pagsalig sa pagtuo”; pinaagi sa pagpahayag sa atong paglaom nga walay pagkatarog; ug pinaagi sa paghunahuna ug pagdasig sa atong mga isigkamagsisimba panahon sa mga tigom ug pamilyahanong pagsimba. (Heb. 10:22-25) Ang pagpabili sa kahikayan alang sa matuod nga pagsimba magpalig-on kanato niining makuyaw nga mga panahon.
8 Sa tibuok kalibotan, ang matinumanong mga alagad ni Jehova naggugol ug mas daghang panahon sa ministeryo, nagtuon ug bag-ong pinulongan, ug mibalhin sa mga dapit nga nagkinahanglag dugang magmamantala. Sama sa salmista, gipakita nila nga usa ra ka butang ang ilang gihangyo kang Jehova. Gusto nilang matagamtam ang kaayo ni Jehova ug mag-alagad kaniya bisan unsa pay mahitabo.—Basaha ang Salmo 27:6.
SALIG SA TABANG SA DIYOS
9, 10. Unsay gipasabot sa Salmo 27:10?
9 Ang mga pulong ni David nagpakita kon unsa ka dako ang iyang pagsalig sa tabang ni Jehova. Siya miingon: “Kon ugaling biyaan ako sa akong amahan ug sa akong inahan, si Jehova mismo magsagop kanako.” (Sal. 27:10) Sa asoy sa 1 Samuel kapitulo 22, nahibalo kita nga si David wala isalikway sa iyang ginikanan. Apan daghan karon ang gisalikway sa ilang pamilya. Bisan pa niana, sila gitabangan ug gipanalipdan sa Kristohanong kongregasyon.
10 Sanglit si Jehova andam man motabang sa iyang mga alagad nga gisalikway sa uban, makaseguro kita nga siya mag-atiman kanila kon sila makasinatig ubang kalisdanan. Pananglitan, kon nabalaka kita kon unsaon sa pagtagana sa materyal nga panginahanglan sa atong pamilya, dili ba kita makasalig nga si Jehova motabang kanato? (Heb. 13:5, 6) Nasayod siya sa situwasyon ug mga panginahanglan sa tanan niyang maunongong alagad.
11. Unsay epekto sa atong pagsalig kang Jehova ngadto sa uban? Iilustrar.
11 Tagda si Victoria, usa ka Bible study nga taga-Liberia. Samtang miuswag sa iyang pagtuon, siya ug ang tulo niya ka anak gibiyaan sa iyang puyopuyo. Bisag walay trabaho ug kapuy-an, wala siya mohunong sa pagtuon. Human mabawtismohi si Victoria, ang iyang 13 anyos nga anak nga babaye nakakitag clutch bag nga punog kuwarta. Aron dili matental, wala na lang nila ipha ang kuwarta. Ila dayong gikontak ang tag-iya niini nga sundalo. Kini miingon nga kon ang tanang tawo sama ka matinud-anon sa mga Saksi ni Jehova, mas maayo ug malinawon ang tibuok kalibotan. Gamit ang Bibliya, gisaysay ni Victoria sa sundalo ang gisaad ni Jehova nga bag-ong kalibotan. Kay nakadayeg sa iyang pagtuo ug pagkamatinud-anon, gihatagan siya sa sundalo ug dakong kantidad. Oo, ang mga Saksi ni Jehova nailhang matinud-anon tungod sa ilang bug-os nga pagsalig nga si Jehova motagana kanila.
12. Unsay atong gipakita kon padayon kitang moalagad kang Jehova bisag mawad-ag panginabuhian? Iilustrar.
12 Hunahunaa usab kon unsay gibati ni Thomas, usa ka dili-bawtismadong magmamantala sa Sierra Leone. Halos usa ka tuig na siyang nagtudlo sa hayskul, apan dili niya madawat ang iyang suweldo kay duna pay gikinahanglan sa iyang papeles. Kinahanglan una siyang mainterbiyo sa administrador sa eskuylahan, nga usa ka pari. Ang pari miingon nga supak ang eskuylahan sa mga pagtulon-an sa mga Saksi ni Jehova. Iyang gipapili si Thomas tali sa iyang trabaho ug relihiyon. Si Thomas miundang sa iyang trabaho bisag dili na niya makuha ang iyang halos usa ka tuig nga suweldo. Hinuon nakakita siyag trabaho ingong tig-ayog radyo ug cellphone. Daghang kasinatian nga sama niini ang nagpakita nga kon mosalig kita kang Jehova, dili kita angayng mabalaka bahin sa atong mga panginahanglan. Kay si Jehova man ang Maglalalang ug Tigpanalipod sa iyang katawhan, makaseguro kita nga siya moatiman kanato.
13. Nganong nagmauswagon ang pagsangyaw diha sa pobreng mga nasod?
13 Sa daghang pobreng nasod, sagad ang mga magmamantala sa Gingharian aktibo kaayo. Ngano? Ang usa ka sangang buhatan misulat: “Daghan sa nagpa-Bible study walay trabaho, mao nga naa ra sila sa balay ug mas daghag panahon sa pagtuon. Ang mga igsoon usab daghag panahon sa pagsangyaw. Ang mga tawo, ilabina diha sa mas lisod nga mga dapit, dili na kinahanglang kombinsihon nga ania na kita sa kataposang mga adlaw; nakita nila mismo ang daotang mga kahimtang sa ilang palibot.” Sa laing nasod, daghang magmamantala ang dunay kapin sa tulo ka Bible study. Usa ka misyonaryo nga nag-alagad nag kapin sa 12 ka tuig didto ang misulat: “Kay simple man ang kinabuhi sa daghang magmamantala dinhi ug gamay lang ang kabaldahan, sagad mas daghan silag panahon sa pagsangyaw ug sa pag-Bible study.”
14. Sa unsang mga paagi panalipdan sa Diyos ang dakong panon?
14 Si Jehova misaad nga iyang tabangan, panalipdan, ug luwason ang iyang katawhan ingong usa ka grupo, sa pisikal ug espirituwal nga paagi. Ug makasalig kita nga iya kanang tumanon. (Sal. 37:28; 91:1-3) Duna unyay dakong panon nga maluwas sa “dakong kasakitan.” (Pin. 7:9, 14) Busa ingong usa ka grupo, ang maong panon panalipdan niining kataposang mga adlaw. Tagan-an sila sa ilang tanang panginahanglan aron makalahutay sa mga pagsulay ug mapanalipdan ang ilang relasyon kang Jehova. Ug hangtod sa kataposang yugto sa dakong kasakitan, si Jehova manalipod sa iyang katawhan.
“TUDLOI AKO SA IMONG DALAN, OH JEHOVA”
15, 16. Sa unsang paagi kita makabenepisyo kon atong sundon ang instruksiyon sa Diyos? Iilustrar.
15 Aron makapabiling maisogon, kinahanglang padayon kitang magpatudlo sa Diyos. Kini ang gihangyo ni David: “Tudloi ako sa imong dalan, Oh Jehova, ug tultoli ako sa alagianan sa katul-id tungod sa akong mga kaaway.” (Sal. 27:11) Aron matudloan kita ni Jehova, kinahanglang mamati kita sa tanang binase sa Bibliya nga mga instruksiyon sa iyang organisasyon ug ipadapat dayon kana. Pananglitan, daghan ang nagpadapat sa tambag nga pasimplehon ang kinabuhi. Gibayran nila ang ilang mga utang ug gibaligya ang wala kinahanglanang mga butang. Busa dihang nagkrisis ang ekonomiya, mas gamay ra ang ilang problema sa panalapi. Dili na sila kinahanglang magtrabahog daghang oras aron mabayran ang mga butang nga wala kinahanglana. Ug daghan na silag panahon sa ministeryo. Pangutan-on nato ang atong kaugalingon, ‘Gipadapat ba dayon nako ang akong nabasa sa Bibliya ug sa mga publikasyon sa matinumanon ug maalamong ulipon, bisag nagkinahanglan kinig pagsakripisyo?’—Mat. 24:45.
16 Kon magpatudlo ug magpagiya kita kang Jehova, wala kitay angayng kahadlokan. Usa ka regular payunir sa Amerika ang miaplay sa bakanteng posisyon nga makatabang kaniya ug sa iyang tibuok pamilya nga makapabiling payunir. Apan giingnan siya sa superbisor nga dili niya kana makuha kay wala siyay nahuman sa kolehiyo. Kon mahitabo kini kanimo, magmahay ka ba nga nagpayunir ka imbes nga nag-eskuyla sa kolehiyo? Duha ka semana sa ulahi, natangtang sa trabaho ang superbisor ug gipangutana sa usa ka manedyer ang brader bahin sa iyang mga tumong. Gisulti dayon sa brader nga siya ug ang iyang asawa maoy bug-os panahong mga ministro sa mga Saksi ni Jehova ug gusto nilang magpabilin niana. Sa wala pa makahuman ug sulti ang brader, miingon ang manedyer: “Daan pa lagi ko, lahi ka sa uban! Sa hapit nang mamatay ang akong amahan, dihay duha ka pareho nimog relihiyon nga tigduawan kada adlaw sa akong Papa ug basahan nila siyag Bibliya. Misaad ko sa akong kaugalingon nga kon duna koy kahigayonan nga makatabang sa usa sa mga Saksi ni Jehova, ako gyod nang buhaton.” Pagkaugma, gihatag niya sa brader ang posisyon nga dili gustong ihatag sa kanhing superbisor. Busa kon atong unahon ang intereses sa Gingharian, tumanon gyod ni Jehova ang iyang saad nga dili kita pasagdan sa atong materyal nga panginahanglan.—Mat. 6:33.
GIKINAHANGLAN ANG PAGTUO UG PAGLAOM
17. Unsay makatabang kanato nga dili mahadlok bahin sa umaabot?
17 Gipasiugda ni David ang kahinungdanon sa pagtuo ug paglaom. Siya miingon nga wala na unta siyay paglaom kon wala pa siyay “pagtuo nga makakita sa pagkamaayo ni Jehova.” (Sal. 27:13) Mag-unsa na lang kaha kita kon si Jehova wala pa maghatag ug paglaom ug kon wala kita mahibalo sa mga gihisgotan sa Salmo 27? Busa padayon kitang mag-ampo nga si Jehova maghatag kanatog kusog ug magluwas kanato hangtod sa Armagedon.—Basaha ang Salmo 27:14.
[Mga Pangutana sa Pagtuon]
[Hulagway sa panid 23]
Si David nakabatog kaisog pinaagi sa paghinumdom sa mga pagluwas ni Jehova kaniya
[Hulagway sa panid 25]
Ato bang giisip ang krisis sa ekonomiya ingong kahigayonan sa pagpalapad sa atong ministeryo?
