“Natuman ang Akong Pangandoy”

Kinse ka tuig kanhi, si Emilia nag-alagad ingong regular payunir. Apan kinahanglan siyang moundang. Di pa dugay, kanunay siyang maghandom sa maong malipayon kaayong panahon sa iyang kinabuhi, ug gusto siyang mobalik sa pagpayunir.

Apan daghan kaayong oras ang gipangayo sa trabaho ni Emilia, mao nga dili siya malipayon. Kas-a siya miingon sa iyang mga katrabaho: “Maayo untag mamenosan ang akong oras sa trabaho!” Nadunggan kini sa iyang boss ug gipangutana siya kon tinuod ba kini. Miingon si Emilia nga tinuod kana. Apan aron matuman ang gihangyo ni Emilia, kinahanglan siyang makig-estorya sa direktor kay patakaran sa kompaniya nga full-time motrabaho ang tanang empleyado niini. Busa nangandam si Emilia sa pagpakigkita sa direktor ug nag-ampo nga makabatog kaisog ug magpabiling kalmado.

Sa ilang panag-estorya, si Emilia matinahorong mihangyo nga menosan ang iyang oras sa trabaho. Iyang gipatin-aw nga gigamit niya ang uban niyang panahon sa pagtabang sa uban. Siya miingon: “Usa ko sa mga Saksi ni Jehova ug nagtabang ko sa mga tawo nga makakat-on sa Bibliya. Mius-os na ang moralidad sa kadaghanan karon. Nagkinahanglan silag tin-awng mga prinsipyo ug mga sukdanan, ug makatabang gayod ang kaalam sa Bibliya nga akong ipaambit kanila. Mao nga gusto unta nakong mamenosan ang akong oras sa trabaho aron mas daghan kog panahon sa pagtabang sa uban. Makalaom ka nga dili kini makaapektar sa akong trabaho dinhi.”

Naminaw pag-ayo ang direktor ug miingon nga nakahunahuna pod siya niadto nga moapil ug charity work. Dayon siya miingon: “Tungod sa imong mga rason, tugotan ti ka. Apan nahibalo ka ba nga mogamay pod ang imong suweldo?” Mitubag si Emilia nga nahibalo siya niana ug iya rang pasimplehon ang iyang kinabuhi. Siya midugang: “Ang labing importante kanako mao ang pagtabang sa mga tawo.” Giingnan siya sa direktor: “Nakadayeg gyod ko sa mga tawo nga naggamit sa ilang panahon alang sa uban.”

Wala pay empleyado sukad sa maong kompaniya ang gihatagag pabor nga sama niana. Karon si Emilia motrabaho na lag upat ka adlaw kada semana. Wala siya magdahom nga gipatas-an ang iyang suweldo, mao nga ang iyang kinitaan pareho ra sa nangagi! Matod niya: “Natuman ang akong pangandoy, ug makaregular payunir na ko pag-usab!”

Mapasibo ba nimo ang imong kahimtang aron makapayunir o makabalik sa pagpayunir?

[Blurb sa panid 32]

Giingnan siya sa direktor: “Nakadayeg gyod ko sa mga tawo nga naggamit sa ilang panahon alang sa uban”