“Ako Magauban Kaninyo”
“Ako Magauban Kaninyo”
“Daghan ang magngadto-nganhi, ug ang matuod nga kahibalo modagaya.”—DAN. 12:4.
UNSAON NIMO PAGTUBAG?
Sa modernong panahon, sa unsang paagi nakaplagan sa sinserong mga tawo ang “matuod nga kahibalo”?
Sa unsang paagi ‘midaghan’ ang midawat sa kamatuoran?
Sa unsang mga paagi ‘midagaya’ ang tukmang kahibalo?
1, 2. (a) Giunsa nato pagkahibalo nga si Jesus nagauban sa iyang mga tinun-an karon ug magauban kanila sa umaabot? (b) Sumala sa Daniel 12:4, unsay moresulta sa maampingong pagtuon sa Kasulatan?
HANDURAWA nga Paraiso na. Kada buntag mobangon ka nga gaan ang pamati ug ganahang motrabaho. Dili sakit ang imong kalawasan. Wala ka nay mga balatian. Hingpit na ang imong panan-aw, pandungog, panimhot, panimati, ug panlami. Lagsik ka kaayo, makalingaw ang imong trabaho, daghan kag higala, ug wala na kay gikabalak-an. Kini ang mga panalangin nga imong matagamtam ilalom sa Gingharian sa Diyos. Si Jesu-Kristo, ang tinudlong Hari, magpanalangin sa katawhan ug magtudlo kanila bahin kang Jehova.
2 Nianang panahona, si Jehova magauban sa iyang maunongong mga alagad samtang ilang tudloan ang uban bahin kaniya. Sa pagkatinuod, si Jehova ug si Jesus nagauban sa maunongong mga Kristohanon sukad pa sa unang siglo. Sa wala pa mobalik sa langit, misaad si Jesus sa iyang mga tinun-an nga siya magauban kanila. (Basaha ang Mateo 28:19, 20.) Aron molig-on ang atong pagtuo niini nga saad, atong susihon ang usa ka tagna nga gisulat ni Daniel sa Babilonya kapig 2,500 ka tuig kanhi. Bahin sa “panahon sa kataposan” nga atong gikinabuhian, ang propeta misulat: “Daghan ang magngadto-nganhi, ug ang matuod nga kahibalo modagaya.” (Dan. 12:4) Kon sabton sa mahulagwayong paagi ug ibase sa nagakahitabo karon, ang Hebreohanong pulong nga gihubad ug “magngadto-nganhi” mahimong magkahulogang maampingong pagtuon. Ang maong pagngadto-nganhi moresulta gayod sa dakong panalangin! Kadtong maampingong magtuon sa Kasulatan panalanginan ug matuod, o tukma, nga kahibalo sa Pulong sa Diyos. Gihisgotan usab sa tagna nga daghan ang modawat sa “matuod nga kahibalo.” Dugang pa, ang maong kahibalo modagaya. Kini mokaylap ug daling mabatonan. Samtang atong susihon kon sa unsang paagi natuman kini nga tagna, atong mahibaloan nga si Jesus nagauban karon sa iyang mga tinun-an ug tumanon gayod ni Jehova ang tanan niyang saad.
NAKAPLAGAN ANG “MATUOD NGA KAHIBALO”
3. Unsay nahitabo sa “matuod nga kahibalo” human mamatay ang mga apostoles?
3 Ang gitagnang apostasya nagsugod human mamatay ang mga apostoles, ug sama kinig kalayo nga kusog nga mikaylap. (Buh. 20:28-30; 2 Tes. 2:1-3) Sulod sa daghang siglo, ang “matuod nga kahibalo” wala mabatoni sa mga tawo, bisan niadtong nag-angkong mga Kristohanon. Ang mga lider sa Kakristiyanohan miingon nga nagtuo sila sa Kasulatan, apan sila nagtudlog “mga pagtulon-an sa mga demonyo,” mga kabakakan nga wala magpasidungog sa Diyos. (1 Tim. 4:1) Ingong resulta, kadaghanan sa mga tawo wala mahibalo sa kamatuoran bahin sa Diyos. Sila gitudloan ug bakak nga mga pagtulon-an sama sa doktrina nga ang Diyos maoy Trinidad, ang kalag dili mamatay, ug ang ubang kalag sakiton sa walay kataposan diha sa impiyernong kalayo.
4. Sa dekada sa 1870, sa unsang paagi ang usa ka grupo nagsugod sa pagpangita sa “matuod nga kahibalo”?
4 Apan sa dekada sa 1870—mga 40 ka tuig una nagsugod ang “kataposang mga adlaw”—usa ka grupo sa sinserong mga Kristohanon sa Pennsylvania, U.S.A., ang makugihong nagtuon sa Bibliya ug nangita sa “matuod nga kahibalo.” (2 Tim. 3:1) Gitawag nila ang ilang kaugalingon nga mga Estudyante sa Bibliya. Dili sila ang ‘mga maalamon ug makinaadmanon’ nga gitumong ni Jesus nga dili makakita sa matuod nga kahibalo. (Mat. 11:25) Hinunoa, sila maoy mapainubsanong mga tawo nga sinserong nagtinguha sa pagbuhat sa kabubut-on sa Diyos. Sila maampingong nagbasa, naghisgot, ug namalandong sa Kasulatan, ug nag-ampo sa giya sa Diyos. Gitandi usab nila ang lainlaing teksto sa Bibliya ug gisusi ang ubang basahon nga gisulat niadtong nangita usab sa kamatuoran. Anam-anam nilang nakat-onan ang mga kamatuoran nga natago sulod sa daghang siglo.
5. Unsay katuyoan sa serye sa mga tract nga The Old Theology?
5 Bisag malipayon kaayo ang mga Estudyante sa Bibliya sa ilang nakat-onan, wala sila manghambog. Wala sila moingon nga nakakaplag silag bag-ong mga pagtulon-an. (1 Cor. 8:1) Gani, nagpatik silag serye sa mga tract nga nag-ulohang The Old Theology. Katuyoan niini nga ang mga magbabasa mahibalo sa mga kamatuoran sa Bibliya. Ang unang tract nagtanyag ug “dugang tabang sa pagtuon sa Bibliya aron ang usa mahigawas sa tanang bakak nga tradisyon sa mga tawo ug aron bug-os mapasig-uli ang tinuod nga mga pagtulon-an sa Ginoo ug sa mga apostoles.”—The Old Theology, Num. 1, Abril 1889, p. 32.
6, 7. (a) Unsang mga kamatuoran ang atong nasabtan sukad sa dekada sa 1870? (b) Unsang mga kamatuoran ang ilabinang nakapalipay kanimo?
6 Sa milabayng kapin sa 100 ka tuig, nakat-onan sa mga Saksi ni Jehova ang daghang maanindot nga kamatuoran. * Kini dili makapuol ug walay pulos nga mga ulohan nga angayng debatehan sa mga teologo. Makapainteres kini nga mga kamatuoran ug makapahigawas sa usa gikan sa kabakakan. Makahatag kinig paglaom ug katuyoan sa kinabuhi. Kini nagtabang kanato nga mailhan si Jehova—ang iyang mahigugmaong personalidad ug mga katuyoan. Gipatin-aw usab niini ang papel ni Jesus, kon nganong siya mianhi sa yuta ug namatay, ug kon unsay iyang ginahimo karon. Gipadayag niining bililhong mga kamatuoran kon nganong gitugotan sa Diyos ang pagkadaotan, kon nganong kita mamatay, kon unsa ang hustong paagi sa pag-ampo, ug kon unsay himoon aron tinuod nga magmalipayon.
7 Ato nang masabtan karon ang mga tagna nga nahimong “tinago” sulod sa libolibo ka tuig apan nagakatuman na niining panahon sa kataposan. (Dan. 12:9) Kadaghanan niini anaa sa mga Ebanghelyo ug sa Pinadayag. Gitabangan pa gani kita ni Jehova nga masabtan ang mga hitabo nga dili makita sa literal nga mata—ang pagkahari ni Jesus, ang gubat sa langit, ug ang pagtambog kang Satanas dinhi sa yuta. (Pin. 12:7-12) Gitabangan usab kita ni Jehova nga masabtan ang kahulogan sa mga hitabo nga atong makita—mga gubat, linog, kamatay, kanihit sa pagkaon, maingon man ang dili diyosnong mga tawo nga nakapasamot niining “makuyaw nga mga panahong lisod sagubangon.”—2 Tim. 3:1-5; Luc. 21:10, 11.
8. Kinsay atong pasalamatan sa mga butang nga atong nasabtan?
8 Gibati gyod nato ang giingon ni Jesus sa iyang mga tinun-an: “Malipayon ang mga mata nga nakakita sa mga butang nga inyong nakita. Kay ako magaingon kaninyo, Daghang manalagna ug mga hari nga nagtinguha sa pagkakita sa mga butang nga inyong nakita apan wala makakita niini, ug sa pagkadungog sa mga butang nga inyong nadungog apan wala makadungog niini.” (Luc. 10:23, 24) Kon wala pa kita tabangi ni Jehova, dili nato makita ug madungog ang maong mga butang. Ug mapasalamaton gayod kita nga gipadala sa Diyos “ang magtatabang,” ang balaang espiritu, aron atong masabtan ang “tibuok nga kamatuoran”! (Basaha ang Juan 16:7, 13.) Hinaot pabilhan nato kanunay ang “matuod nga kahibalo” ug ipaambit kini sa uban!
“DAGHAN” ANG MIDAWAT SA “MATUOD NGA KAHIBALO”
9. Unsang panawagan ang anaa sa Abril 1881 nga isyu sa Watch Tower?
9 Sa Abril 1881 nga isyu sa Watch Tower, wala pay duha ka tuig human sa pagpatik sa unang isyu niini, dunay artikulo nga nanawagan ug 1,000 ka magwawali. Ang artikulo nagdapit niadtong makaarang sa paggugol ug katunga sa ilang panahon o kapin pa sa pagsangyaw ingong mga colporteur, o payunir. Sila gihangyo sa pag-adto sa dagko ug gagmayng mga siyudad aron pangitaon ang sinserong mga Kristohanon nga nahigugma sa Diyos apan walay tukmang kahibalo ug sa pagtudlo kanila sa kamatuoran bahin sa Diyos ug sa Bibliya.
10. Unsay sanong sa mga tawo sa panawagan alang sa bug-os panahong magwawali?
10 Gipakita sa maong panawagan nga nasabtan sa mga Estudyante sa Bibliya nga ang matuod nga mga Kristohanon angayng mosangyaw sa maayong balita. Positibo kaayo ang panawagan alang sa 1,000 ka magwawali kay gamay pa lang sila niadtong panahona. Apan daghan sa nakabasag tract o magasin ang nakaamgo nga nakaplagan na nila ang kamatuoran ug misanong dayon sa maong panawagan. Pananglitan, sa 1882, usa ka tawo nga taga-London, England nga nakabasa sa usa ka isyu sa Watch Tower ug sa pulyeto sa mga Estudyante sa Bibliya ang misulat: “Palihog tudloi ko kon unsaon pagsangyaw ug kon unsay akong isangyaw aron matuman nako ang buluhaton nga gisugo sa Diyos.”
11, 12. (a) Unsay tumong sa mga colporteur? (b) Sa unsang paagi ang mga colporteur nagpormag mga “klase,” o kongregasyon?
11 Sa 1885, dihay mga 300 ka colporteur, o payunir. Ang ilang tumong pareho sa atoa karon—ang paghimog mga tinun-an ni Jesu-Kristo. Apan lahi ang pamaagi kaniadto kay sa karon. Kita sagad magtuon sa Bibliya uban sa usa lang ka estudyante. Dayon ato siyang dapiton nga motambong sa kongregasyon. Apan kaniadto, ang mga colporteur managtag ug mga libro ug modapit sa tanang interesado aron magtuon sa Bibliya ingong grupo. Imbes magtuon uban sa usa lang ka indibiduwal, sila nagpormag mga “klase,” o kongregasyon.
12 Pananglitan, sa 1907, dihay grupo sa mga colporteur nga miadto sa usa ka siyudad aron pangitaon kadtong dunay mga kopya sa librong Millennial Dawn (gitawag usab ug Studies in the Scriptures). Ang Watch Tower miingon: “Sila [mga interesado] gitigom ingong usa ka gamayng grupo diha sa usa ka balay.” Sa tibuok adlaw sa Dominggo, hisgotan sa colporteur ang bahin sa katuyoan sa Diyos alang sa katawhan, ug pagkasunod Dominggo iyang dasigon sila nga himoong regular ang panagkatigom. Sa 1911, giusab nila ang maong pamaagi. Dihay 58 ka brader nga moduaw sa lainlaing dapit sa United States ug Canada aron mohatag ug mga pakigpulong. Ilang ilista ang ngalan ug adres sa mga interesado nga mitambong sa tigom. Dayon ilang organisahon sila aron maporma ang bag-ong mga “klase” nga magtigom diha sa pribadong mga balay. Pagka-1914, miabot nag 1,200 ka kongregasyon ang mga Estudyante sa Bibliya sa tibuok kalibotan.
13. Unsay imong ikasulti bahin sa pag-uswag sa buluhatong pagsangyaw?
13 Karon, duna nay mga 109,400 ka kongregasyon sa tibuok kalibotan, ug mga 895,800 ka payunir. Duolan sa walo ka milyon ang midawat sa “matuod nga kahibalo,” ug nagpadapat niana. (Basaha ang Isaias 60:22.) * Katingalahan kini nga pag-uswag kay si Jesus mitagna nga ang iyang mga tinun-an “pagadumtan sa tanang katawhan” tungod sa iyang ngalan. (Luc. 21:12-17) Bisan pa sa mga pagbabag ni Satanas, sa mga demonyo, ug sa mga magsusupak, ang katawhan ni Jehova dakog nalampos sa paghimog mga tinun-an. Karon sila nagsangyaw sa “tibuok gipuy-ang yuta”—sa init ug bugnawng mga dapit, kabukiran, desyerto, mga siyudad, ug sa hilit kaayong mga lugar. (Mat. 24:14) Kini milampos tungod sa tabang ni Jehova.
‘ANG MATUOD NGA KAHIBALO MIDAGAYA’
14. Sa unsang paagi midagaya ang “matuod nga kahibalo” pinaagig pinatik nga mga basahon?
14 Ang “matuod nga kahibalo” midagaya kay daghan ang nagsangyaw sa maayong balita. Midagaya usab kini pinaagi sa pinatik nga mga basahon. Sa Hulyo 1879, migula ang unang isyu niining magasina, nga gitawag kanhi ug Zion’s Watch Tower and Herald of Christ’s Presence. Gipaimprenta sa mga Estudyante sa Bibliya ang maong isyu sa usa ka kompaniya. Dihay 6,000 ka kopya sa Iningles ang naimprenta. Ang 27 anyos nga si Charles Taze Russell ang napili nga editor, ug may lima pa ka hamtong nga brader nga regular nga mosulat ug mga artikulo para sa magasin. Ang Watchtower karon gipatik sa 195 ka pinulongan. Kini ang labing kaylap nga napanagtag nga magasin sa tibuok kalibotan, nga dunay 42,182,000 ka kopya sa matag isyu. Gisundan kini sa magasing Awake!, nga dunay 41,042,000 ka kopya sa 84 ka pinulongan. Dugang pa, mga 100 ka milyong kopya sa mga libro ug Bibliya ang ginaimprenta kada tuig.
15. Sa unsang paagi gisuportahan sa pinansiyal ang atong pag-imprenta?
15 Kining dako nga buluhaton gisuportahan pinaagig boluntaryong mga donasyon. (Basaha ang Mateo 10:8.) Nahibulong niini ang ubang kompaniya nga tig-imprenta kay nahibalo sila nga mahal kaayo ang mga makina, papel, tinta, ug ubang materyales. Ang usa ka brader nga tigpamalit ug mga materyales para sa mga imprentahanan sa Bethel miingon: “Nahingangha ang mga negosyante nga miduaw sa atong mga imprentahanan kay nakapalit kitag modernong mga makina pinaagi lag boluntaryong mga donasyon. Mibilib sab sila kay malipayon ug mga batan-on ang nagtrabaho sa Bethel.”
ANG YUTA MAPUNO SA KAHIBALO SA DIYOS
16. Nganong gipadagaya ni Jehova ang “matuod nga kahibalo”?
16 Ang “matuod nga kahibalo” midagaya kay kabubut-on sa Diyos nga ‘ang tanang matang sa tawo maluwas ug makadangat sa tukmang kahibalo sa kamatuoran.’ (1 Tim. 2:3, 4) Buot ni Jehova nga ang mga tawo mahibalo sa kamatuoran aron sila makaalagad kaniya sa hustong paagi ug makadawat sa iyang panalangin. Pinaagi sa pagbutyag sa “matuod nga kahibalo,” gitigom ni Jehova ang matinumanong nanghibilin sa mga dinihogan. Gitigom usab niya gikan sa “tanang kanasoran ug mga tribo ug katawhan ug mga pinulongan,” ang “usa ka dakong panon” nga mopuyo sa yuta sa walay kataposan.—Pin. 7:9.
17. Unsay gipakita sa dakong pag-uswag sa matuod nga pagsimba?
17 Dako gayod ang pag-uswag sa matuod nga pagsimba sa milabayng 130 ka tuig. Kini nagpakita nga ang Diyos ug ang iyang tinudlong Hari, si Jesu-Kristo, nagauban sa mga alagad ni Jehova sa yuta—nga naggiya, nagpanalipod, nag-organisar, ug nagtudlo kanila. Kini usab nagpakita nga tumanon gayod ni Jehova ang iyang mga saad bahin sa umaabot. “Ang yuta mapuno sa kahibalo kang Jehova ingon sa katubigan nga nagtabon sa dagat mismo.” (Isa. 11:9) Pagkadaghan unya sa panalangin nga matagamtam sa katawhan!
[Mga footnote]
^ par. 6 Daghan ka pag makat-onan kon imong tan-awon ang mga DVD nga Jehovah’s Witnesses—Faith in Action, Part 1: Out of Darkness ug Jehovah’s Witnesses—Faith in Action, Part 2: Let the Light Shine.
[Mga Pangutana sa Pagtuon]
[Hulagway sa panid 6]
Ang mga Estudyante sa Bibliya maoy mapainubsanong mga tawo nga sinserong nagtinguha sa pagbuhat sa kabubut-on sa Diyos
[Hulagway sa panid 7]
Gipabilhan ni Jehova ang imong mga paningkamot sa pagpakaylap sa “matuod nga kahibalo”
