Mogawi Kamo Ingong mga Lungsoranon sa Gingharian!
Mogawi Kamo Ingong mga Lungsoranon sa Gingharian!
“Magagawi kamo sa paaging takos sa maayong balita.”—FILIP. 1:27.
UNSAON NIMO PAGTUBAG?
Kinsa ang mahimong lungsoranon sa Gingharian?
Unsay nalangkit sa pagtuon sa pinulongan, kasaysayan, ug mga balaod sa Gingharian?
Sa unsang paagi ikapakita sa mga lungsoranon sa Gingharian nga ilang gihigugma ang mga sukdanan sa Diyos?
1, 2. Nganong ang kongregasyon sa Filipos nakasabot gayod sa tambag ni Pablo kanila?
GIAWHAG ni apostol Pablo ang kongregasyon sa Filipos nga ‘magagawi sa paaging takos sa maayong balita.’ (Basaha ang Filipos 1:27.) Ang Gregong pulong nga gihubad dinhi nga “magagawi” nagkahulogan usab nga “mogawi kamo ingong mga lungsoranon.” Nakasabot gayod niana ang kongregasyon sa Filipos. Ngano? Kay ang mga taga-Filipos gihatagan ug pribilehiyo nga mahimong lungsoranon sa Roma. Sila mapasigarbohon niana kay sila protektado sa balaod sa Roma ug nakabatog mga benepisyo nga wala sa uban.
2 Ang mga membro sa kongregasyon sa Filipos dunay mas dakong rason nga magmapasigarbohon. Ingong mga dinihogan, gipahinumdoman sila ni Pablo nga ang ilang pagkalungsoranon maoy didto “sa mga langit.” (Filip. 3:20) Sila mga lungsoranon sa Gingharian sa Diyos, nga labaw pa kay sa gobyerno sa tawo. Busa duna silay proteksiyon ug mga benepisyo nga dili ikahatag sa tawhanong gobyerno.—Efe. 2:19-22.
3. (a) Kinsay gihatagag pribilehiyo nga mahimong lungsoranon sa Gingharian? (b) Unsay hisgotan niining artikuloha?
3 Ang tambag ni Pablo nga “mogawi kamo ingong mga lungsoranon” pangunang mapadapat niadtong magmando sa langit kauban ni Jesus. (Filip. 3:20) Apan mapadapat usab kini niadtong mopuyo sa yuta ubos sa Gingharian sa Diyos. Ngano? Tungod kay ang tanang dedikadong Kristohanon nag-alagad sa samang Hari, si Jehova, ug angayng mosunod sa samang mga balaod. (Efe. 4:4-6) Karong adlawa, daghan ang naningkamot nga mahimong lungsoranon sa usa ka datong nasod. Apan ang pagkahimong lungsoranon sa Gingharian mas labaw pa niana. Aron molalom pa ang atong pagpabili sa maong pribilehiyo, hisgotan nato ang pipila ka kaamgiran sa mga kinahanglanon tali sa pagkahimong lungsoranon sa tawhanong gobyerno ug sa Gingharian sa Diyos. Dayon atong susihon ang tulo ka butang nga angay natong buhaton aron magpabiling lungsoranon sa Gingharian.
MGA KINAHANGLANON ARON MAHIMONG LUNGSORANON
4. Unsa ang putli nga pinulongan, ug unsay kahulogan sa pagsulti niini?
4 Tun-i ang pinulongan. Diha sa pipila ka gobyerno, ang usa sa mga kinahanglanon aron mahimong lungsoranon mao ang pagkat-on sa pangunang pinulongan sa nasod. Bisan ganig lungsoranon na, ang uban naningkamot sulod sa daghang tuig aron mahimong larino sa bag-ong pinulongan. Tingali dali ra silang nakakat-on sa grammar niini, apan dugay silang nakakat-on sa hustong paglitok sa mga pulong. Sa susama, aron mahimong lungsoranon sa Gingharian sa Diyos, kinahanglang makakat-on kita sa gitawag sa Bibliya nga “putli nga pinulongan.” (Basaha ang Sofonias 3:9.) Unsa kini nga pinulongan? Kini ang kamatuoran bahin sa Diyos ug sa iyang mga katuyoan. Ang pagsulti sa putli nga pinulongan nagpasabot nga atong ipadapat ang mga balaod ug prinsipyo sa Diyos. Ingong lungsoranon sa Gingharian, tingali dali ra kitang nakakat-on sa pangunang mga pagtulon-an sa Bibliya ug nabawtismohan. Apan bisag bawtismado na, angay kitang maningkamot nga mahimong larino sa pagsulti sa putli nga pinulongan. Sa unsang paagi? Pinaagi sa padayon natong pagpadapat sa mga prinsipyo sa Bibliya.
5. Nganong angay kitang maningkamot sa pagtuon sa kasaysayan sa organisasyon ni Jehova?
5 Tun-i ang kasaysayan. Kon ang usa buot mahimong lungsoranon sa usa ka nasod, tingali kinahanglan niyang tun-an ang kasaysayan niini. Sa susama, kadtong buot mahimong lungsoranon sa Gingharian maningkamot nga magtuon bahin sa Gingharian sa Diyos. Tagda pananglitan ang mga anak ni Kore, nga nag-alagad sa Israel. Gimahal nila ang Jerusalem ug ang dapit sa pagsimba niini. Ganahan silang maghisgot sa kasaysayan sa maong siyudad, dili tungod sa kanindot sa mga tinukod niini kondili tungod kay ang Jerusalem mao “ang lungsod sa Dakong Hari,” si Jehova. Kini ang sentro sa putli nga pagsimba kaniadto, diin gitudlo ang Balaod ni Jehova. Ang katawhan nga gimandoan sa Hari sa Jerusalem mao ang giuyonan ug gimahal ni Jehova. (Basaha ang Salmo 48:1, 2, 9, 12, 13.) Sama kanila, ganahan ka bang magtuon ug maghisgot sa kasaysayan sa yutan-ong bahin sa organisasyon ni Jehova? Kon mas daghan kag nakat-onan bahin sa organisasyon sa Diyos ug sa paagi ni Jehova sa pagpaluyo sa iyang katawhan, mas mahimong tinuod kanimo ang Gingharian sa Diyos. Mosamot ang imong tinguha nga isangyaw ang maayong balita sa Gingharian.—Jer. 9:24; Luc. 4:43.
6. Nganong haom lang nga dahomon ni Jehova nga atong sayron ug sundon ang iyang mga balaod ug prinsipyo?
6 Sayra ang mga balaod. Buot sa tawhanong gobyerno nga ang ilang mga lungsoranon mahibalo ug mosunod sa mga balaod sa nasod. Busa ingong mga lungsoranon sa Gingharian, haom lang nga dahomon ni Jehova nga atong sayron ug sundon ang iyang mga balaod ug prinsipyo. (Isa. 2:3; Juan 15:10; 1 Juan 5:3) Ang balaod sa tawo dili hingpit ug usahay dili makataronganon. Apan “ang balaod ni Jehova hingpit.” (Sal. 19:7) Ganahan ka bang mobasa sa Bibliya matag adlaw ug mokat-on sa mga balaod ug prinsipyo sa Diyos? (Sal. 1:1, 2) Makakat-on lang kita sa balaod sa Diyos kon kita mismo ang magtuon niini. Walay laing makahimo niana para nato.
ANG MGA LUNGSORANON SA GINGHARIAN NAHIGUGMA SA MGA SUKDANAN SA DIYOS
7. Nganong lahi ang mga lungsoranon sa Gingharian kon itandi sa kadaghanang tawo karon?
7 Aron magpabiling lungsoranon sa Gingharian, kinahanglang mahibalo kita sa mga sukdanan sa Diyos ug higugmaon kini. Daghan ang moingon nga uyon sila sa mga balaod ug sukdanan sa nasod nga ilang gipuy-an. Apan kon malisdan sila sa pagtuman niini ug kon sa ilang hunahuna walay nagtan-aw, lapason nila kini. Sagad, tumanon lang nila ang balaod aron pahimut-an ang mga tawo. (Col. 3:22) Ang mga lungsoranon sa Gingharian mas taas ug sukdanan. Malipay kitang mosunod sa mga balaod sa Diyos bisag walay nagtan-aw. Ngano? Tungod kay gihigugma nato si Jehova, ang atong Magbabalaod.—Isa. 33:22; basaha ang Lucas 10:27.
8, 9. Unsaon nimo pagkahibalo kon tinuod kang nahigugma sa mga balaod sa Diyos?
8 Unsaon nimo pagkahibalo kon tinuod kang nahigugma sa mga balaod sa Diyos? Tagda ang imong tinamdan. Pananglitan, unsay imong reaksiyon kon tambagan ka bahin sa mga butang nga imong gihunahuna nga personal na—sama sa imong sininaan ug pamostura? Niadtong dili ka pa lungsoranon sa Gingharian, lagmit ang imong sininaan dili hapsay o seksi kaayo. Samtang nagkalalom ang imong gugma sa Diyos, nakakat-on ka sa pagsinina sa paagi nga makapasidungog kaniya. (1 Tim. 2:9, 10; 1 Ped. 3:3, 4) Ug karon para nimo, makasaranganon na ang imong sininaan. Apan komosta kon may ansiyano nga moingon nga dunay mga igsoon nga nakasaway sa imong sininaan? Unsay imong reaksiyon? Ikaw ba mangatarongan, masuko, o dili mosunod sa tambag? Ang usa ka hinungdanong balaod sa Gingharian sa Diyos mao nga ang tanang lungsoranon mosundog kang Kristo. (1 Ped. 2:21) Bahin sa panig-ingnan ni Jesus, si apostol Pablo misulat: “Magpahimuot ang matag usa kanato sa iyang silingan sa kon unsay maayo aron sa paglig-on kaniya. Kay bisan gani si Kristo wala magpahimuot sa iyang kaugalingon.” (Roma 15:2, 3) Alang sa kalinaw sa kongregasyon, ang hamtong nga Kristohanon andam mag-usab aron dili mahasol ang konsensiya sa uban.—Roma 14:19-21.
9 Tagda ang duha ka laing importanteng butang: ang atong tinamdan bahin sa sekso ug kaminyoon. Ang mga dili lungsoranon sa Gingharian lagmit nagkonsentir sa homoseksuwalidad, nagtuo nga dili peligroso ang pornograpiya, ug nga ang pagpanapaw ug diborsiyo maoy personal nga mga butang. Apan ang mga lungsoranon sa Gingharian naghunahuna sa mahimong resulta sa ilang binuhatan ug sa epekto niini sa uban. Bisag daghan sa mga Kristohanon ang imoral ug kinabuhi kaniadto, ilang giisip karon ang sekso ug kaminyoon ingong mga gasa gikan sa Diyos. Ilang gipabilhan ang hataas nga sukdanan ni Jehova ug bug-os miuyon nga kadtong nagpadayon sa imoral nga panggawi dili takos mahimong lungsoranon sa Gingharian. (1 Cor. 6:9-11) Apan nasayod usab sila nga malimbongon ang kasingkasing. (Jer. 17:9) Busa mapasalamaton sila sa espesipikong mga pasidaan nga motabang nila sa paghupot ug hataas nga sukdanan sa moral.
ANG MGA LUNGSORANON SA GINGHARIAN NAGPABILI SA MGA PASIDAAN
10, 11. Unsang nunot sa panahon nga mga pasidaan ang gihatag sa Gingharian sa Diyos, ug unsay imong ikasulti bahin niini?
10 Ang mga gobyerno sa tawo mahimong magpasidaan bahin sa pagkaon ug tambal. Siyempre, dili tanang pagkaon ug tambal makadaot. Apan kon dunay produkto nga posibleng makadaot, responsabilidad sa gobyerno nga magpasidaan aron mapanalipdan ang mga lungsoranon. Sa susama, ang Gingharian sa Diyos naghatag ug nunot sa panahon nga mga pasidaan bahin sa moral ug espirituwal nga kapeligrohan. Pananglitan, ang Internet mapuslanon alang sa komunikasyon, edukasyon, ug kalingawan. Gigamit kini sa organisasyon sa Diyos ug daghan ang nalampos tungod niini. Apan daghang Web site ang makadaot sa moral ug espirituwal nga kahimsog sa mga lungsoranon sa Gingharian. Ang usa niini mao ang pornograpikong mga Web site. Sulod sa daghang katuigan, ang matinumanong ulipon nagpasidaan kanato bahin niini. Mapasalamaton gayod kita sa maong mga pasidaan!
11 Di pa dugay, misikat pag-ayo ang usa ka matang sa Web site, ang social networking. Bisag daghan kinig benepisyo, makadaot kini kon dili kita mag-amping. Kini magladlad kanato sa daotang panagkauban. (1 Cor. 15:33) Kanay rason nga ang organisasyon sa Diyos naghatag ug balanseng mga pasidaan bahin niini nga mga Web site. Imo na bang nabasa ang bag-ong mga artikulo nga gipatik sa matinumanong ulipon bahin sa social networking? Dili gayod maalamon nga mogamit niini nga mga Web site nga dili una basahon ang maong mga artikulo! * Sama kanag pagtomar ug tambal nga dili una basahon ang pasidaan nga anaa sa sudlanan niini.
12. Nganong dili maalamon nga balewalaon ang mga pasidaan?
12 Kadtong nagbalewala sa mga pasidaan sa matinumanong ulipon masugamak sa kadaot, maingon man ang ilang mga minahal. Ang pipila naadik sa pornograpiya o nakahimog imoralidad, ug sila naghunahuna nga si Jehova wala makakita sa ilang gihimo. Binuang gayod kana kay wala kitay matago kang Jehova! (Prov. 15:3; basaha ang Hebreohanon 4:13.) Gusto sa Diyos nga tabangan kadtong mga nakasala ug gigamit niya ang mga ansiyano sa pagtabang kanila. (Gal. 6:1) Maingon nga kanselahon sa tawhanong gobyerno ang pagkalungsoranon sa usa kon makahimo siyag partikular nga krimen, dili usab tugotan ni Jehova nga magpabiling lungsoranon kadtong padayong naglapas sa iyang mga sukdanan. * (1 Cor. 5:11-13) Apan maluluy-on si Jehova. Kadtong maghinulsol ug magbag-o makabaton pag-usab ug maayong baroganan kang Jehova ug magpabiling lungsoranon sa Gingharian. (2 Cor. 2:5-8) Pagkadakong kadungganan nga mag-alagad sa maong mahigugmaong Hari!
ANG MGA LUNGSORANON SA GINGHARIAN NAGPABILI SA EDUKASYON
13. Sa unsang paagi gipakita sa mga lungsoranon sa Gingharian nga ilang gipabilhan ang edukasyon?
13 Daghang gobyerno sa tawo ang naningkamot sa pag-edukar sa ilang mga lungsoranon. Nagtukod silag mga eskuylahan aron mabatonan sa mga tawo ang pangunang edukasyon. Gipabilhan sa mga lungsoranon sa Gingharian ang maong edukasyon. Sila makugihong nagtuon sa pagbasa ug pagsulat ug sa pagkat-on ug praktikal nga mga kahanas nga magamit sa panarbaho. Apan mas labaw nilang gipabilhan ang edukasyon nga nadawat gikan sa organisasyon ni Jehova. Pananglitan, ang iyang organisasyon nagdasig kanato sa pagbasa. Kini nagdasig sa mga ginikanan nga basahan ang ilang mga anak. Kada bulan, ang matinumanong ulipon nagpatik ug Bantayanang Torre ug Pagmata! Kon mobasa kag pipila ka panid kada adlaw, mahuman nimog basa kining tanan sulod sa usa ka bulan. Sa ingon, padayon kang makabenepisyo sa edukasyon nga gitagana ni Jehova.
14. (a) Unsang pagbansay ang atong nadawat? (b) Unsang mga sugyot alang sa pamilyahanong pagsimba ang imong gipadapat?
14 Kada semana, ang mga lungsoranon sa Gingharian gibansay diha sa mga tigom sa kongregasyon. Pananglitan, sa kapig 60 ka tuig, ang Teokratikanhong Tunghaan sa Ministeryo nagtabang sa mga estudyante nga mahimong epektibong magtutudlo sa Pulong sa Diyos. Usa ka ba sa mga estudyante niini? Di pa dugay, gipasiugda sa matinumanong ulipon ang kahinungdanon sa senemanang pamilyahanong pagsimba. Kini nga kahikayan magpalig-on sa pamilya. Gipadapat ba nimo ang mga sugyot sa atong mga publikasyon? *
15. Unsang dakong pribilehiyo ang atong nabatonan?
15 Ang mga lungsoranon sa tawhanong gobyerno mangampanya ug mamalaybalay pa gani aron suportahan sa mga tawo ang ilang partido. Sa susama, ang mga lungsoranon sa Gingharian sa tibuok kalibotan madasigong nagpaluyo sa Gingharian sa Diyos pinaagi sa pagsangyaw diha sa kadalanan ug kabalayan. Gani sumala sa miaging tun-anang artikulo, ang Watchtower o Bantayanang Torre, nga nagapahayag sa Gingharian ni Jehova, mao karon ang labing kaylap nga napanagtag nga basahon sa tibuok kalibotan! Usa gayod ka dakong pribilehiyo nga tudloan ang uban bahin sa Gingharian sa Diyos. Ikaw ba masibotong nakigbahin sa pagsangyaw?—Mat. 28:19, 20.
16. Unsaon nimo pagpamatuod nga ikaw maayong lungsoranon sa Gingharian sa Diyos?
16 Sa dili madugay, ang Gingharian sa Diyos mao na unya ang bugtong gobyerno nga magmando sa yuta. Ang mga balaod niini mao lamang ang maggiya sa katawhan. Maayo kaha kang lungsoranon nianang panahona? Karon na ang panahon nga imong pamatud-an kana. Sa tanang desisyon nga imong himoon kada adlaw, buhata ang tanan alang sa kahimayaan ni Jehova. Sa ingon, imong mapamatud-an nga ikaw nagagawi ingong maayong lungsoranon sa Gingharian sa Diyos.—1 Cor. 10:31.
[Mga footnote]
^ par. 11 Pananglitan, tan-awa ang Pagmata! sa Hulyo 2011, panid 24-27; Agosto 2011, panid 10-13; ug Pebrero 2012, panid 3-9.
^ par. 14 Tan-awa ang Bantayanang Torre, Agosto 15, 2011, panid 6-7 ug Atong Ministeryo sa Gingharian, Enero 2011, panid 3-6.
[Mga Pangutana sa Pagtuon]
[Blurb sa panid 14]
Namati ka ba sa binase sa Bibliya nga mga pasidaan bahin sa Internet?
[Hulagway sa panid 12]
Sama sa mga anak ni Kore, gimahal mo ba ang putli nga pagsimba ug ang kasaysayan niini?
[Hulagway sa panid 15]
Ang pamilyahanong pagsimba makatabang gayod kanimo ug sa imong pamilya nga mahimong maayong lungsoranon sa Gingharian
