Nahinumdom Ka Ba?

Nabasa ba nimog maayo ang bag-ong mga gula sa Ang Bantayanang Torre? Sulayi kon makatubag ka sa mosunod nga mga pangutana:

Buhok ba ni Samson ang naghatag kaniyag kusog?

Ang buhok ni Samson wala maghatag kaniyag kusog. Kini nagsimbolo sa iyang espesyal nga relasyon uban sa Diyos ingong Nazareo. Naputol ang maong relasyon dihang gipaputlan ni Delila ang buhok ni Samson.—4/15, panid 9.

Sama sa atong literal nga kasingkasing, unsa ang tulo ka butang nga makahatag ug kaayohan sa atong mahulagwayong kasingkasing?

(1) Pagkaon. Maingon nga ang atong literal nga kasingkasing nagkinahanglag sustansiyadong pagkaon, kita nagkinahanglag igong espirituwal nga pagkaon. (2) Ehersisyo. Ang masibotong pagpakigbahin sa ministeryo makatabang nga magpabiling himsog ang atong espirituwal nga kasingkasing. (3) Palibot. Ang pagpakig-uban sa mga isigkamagtutuo makatabang nga mamenosan ang stress.—4/15, panid 16.

Kon nakapanapaw ang usa ka kapikas, sa unsang paagi mapasig-uli sa magtiayon ang ilang pagsalig sa usag usa?

Sila angayng (1) magmatinud-anon sa usag usa; (2) magtinabangay; (3) magbag-o o isalikway ang daang mga kinaiya; ug (4) maningkamot nga wad-on ang kayugot aron mabalik sa normal ang ilang relasyon.—5/1, panid 12-15.

Dihang modiskurso para sa patay, nganong dili haom nga ipadapat sa mamumulong ang Salmo 116:15 ngadto sa namatay?

Ang teksto nag-ingon: “Bililhon sa mga mata ni Jehova ang kamatayon sa mga maunongon niya.” Kini nagpasabot nga dili motugot ang Diyos nga mamatay ang tanan niyang maunongong mga alagad tungod kay sila bililhon kaayo kaniya. Dili gayod niya pasagdan nga mahanaw sila sa yuta ingong usa ka grupo.—5/15, panid 22.

Kinsa ang mga colporteur?

Sa wala pa ang 1931, kini ang termino kaniadto alang sa mga payunir karon.—5/15, panid 31.

Unsay nakapalahi sa Bibliya gikan sa ubang libro?

Ang Bibliya naundag daghang tagna nga natuman. Kini nagrekord ug tukma nga kasaysayan, dili sugilambong. Kini nahiuyon sa siyensiya, ug wala magkasumpaki ang mga basahon niini. Kini praktikal gihapon karon.—6/1, panid 4-8.

Kinsa ang naglangkob sa giingon sa Daniel 2:44 nga “niining tanang gingharian”?

Kini nagtumong sa mga kagamhanan, o gobyerno, nga gisimbolohan sa lainlaing bahin sa metal nga larawan nga gipatin-aw ni Daniel.—6/15, panid 17.

Sa tagna sa Bibliya, kanus-a nahimong ikapitong gahom sa kalibotan ang Anglo-Amerika?

Naporma ang maong ikapitong gahom sa kalibotan sa dihang nag-alyansa ang Britanya ug Estados Unidos panahon sa Gubat sa Kalibotan I.—6/15, panid 19.

Sa unsang paagi pasayloon ug kalimtan sa Diyos ang mga sala sa mga mahinulsolon?

Si Jehova miingon labot sa iyang mga giuyonan: “Dili ko na hinumdoman ang ilang sala.” (Jer. 31:34) Siya mopasaylo sa mga sala pinasukad sa halad lukat. Ug sa dihang siya mopasaylo, kalimtan niya ang maong mga sala sa diwa nga dili na niya kini hinumdoman aron silotan pag-usab ang mga nakasala.—7/1, panid 18.

Nganong katuohan ang mga milagro nga narekord sa Bibliya?

Kini sagad gihimo diha sa publiko, dili sa tago. Kini dili komplikado, nga wala maggamit ug linaing mga butang. Ang mga milagro gihimo aron sa paghimaya sa Diyos, dili sa mga tawo. Ang mga magsusupak wala mokuwestiyon nga nahitabo ang daghang milagro. Tungod niini, makasalig kita sa rekord sa Bibliya bahin sa mga milagro.—8/1, panid 7-8.