Pagbantay sa mga Lit-ag sa Yawa!
Pagbantay sa mga Lit-ag sa Yawa!
‘Ikyas gikan sa bitik sa Yawa.’—2 TIM. 2:26, Ang Biblia, PBS.
UNSAON NIMO PAGTUBAG?
Unsay angay natong buhaton kon may tendensiya kita nga manaway sa uban?
Unsay imong makat-onan sa kasinatian ni Pilato ug Pedro bahin sa dili pagpadaog sa kahadlok ug pagpit-os?
Sa unsang paagi nimo malikayan ang sobrang pagkahasol sa konsensiya?
1, 2. Unsang mga lit-ag sa Yawa ang hisgotan niining artikuloha?
ANG Yawa naningkamot gayod sa paglit-ag sa mga alagad sa Diyos. Apan lahi sa mga mangangayam, dili niya kanunayng patyon ang iyang biktima. Gusto sa Yawa nga dakpon silang buhi ug gamiton sila sumala sa iyang gusto.—Basaha ang 2 Timoteo 2:24-26.
2 Ang usa ka tiglit-ag mogamit ug lainlaing lit-ag sa pagdakop ug mananap. Tingali iya unang pagawson ang nagtago nga mananap, dayon laangon kini. O kaha maghimo siyag lit-ag ug tabonan kini aron dili makita sa mananap. Ang Yawa naggamit usab ug susamang mga lit-ag aron madakpan ang mga alagad sa Diyos. Aron dili kita madakpan, kinahanglang mamati kita sa mga pasidaan nga magpaalerto kanato nga dunay lit-ag, o bitik, si Satanas sa duol. Hisgotan niining artikuloha kon sa unsang paagi kita makalikay sa tulo ka lit-ag nga malamposong gigamit ni Satanas. Kini ang (1) walay pugong nga sinultihan, (2) kahadlok ug pagpit-os, ug (3) sobrang pagkahasol sa konsensiya. Ang laing duha ka lit-ag ni Satanas hisgotan sa sunod nga artikulo.
LIKAYI ANG KALAYO SA WALAY PUGONG NGA SINULTIHAN
3, 4. Unsay lagmit mahitabo kon dili nato pugngan ang atong dila? Paghatag ug pananglitan.
3 Aron mogawas ang mga mananap sa ilang gitagoan, mahimong sunogon sa mangangayam ang usa ka parte sa lasang ug dayon dakpon ang mananap nga moikyas. Sa mahulagwayong paagi, ang Yawa maghaling ug kalayo sulod sa kongregasyon aron mobiya ang mga igsoon. Busa dali na lang niya silang madakpan. Sa unsang paagi dili kita makabantay nga gigamit na kita ni Satanas ug sa ingon iya na kitang nabitik?
4 Si Santiago miingon nga ang dila samag kalayo. (Basaha ang Santiago 3:6-8.) Kon dili nato pugngan ang atong dila, basin kita ang makapatunghag kalayo sa kongregasyon. Sa unsang paagi? Tagda kini nga situwasyon: Diha sa tigom, gipahibalo nga ang usa ka sister naaprobahan ingong regular payunir. Human sa tigom, dunay duha ka sister nga naghisgot bahin niini. Ang usa nalipay ug nanghinaot nga molampos ang bag-ong payunir. Apan gikuwestiyon sa laing sister ang motibo sa bag-ong payunir ug mikomento nga gusto lang niini nga magpasikat sa kongregasyon. Kinsa sa duha ka sister ang gusto nimong mahigala? Pinaagi sa ilang sinultihan, dali ra natong mailhan kon kinsa sa duha ang makapatunghag kalayo sa kongregasyon.
5. Aron malikayan ang kalayo sa walay pugong nga sinultihan, unsay angay natong buhaton?
5 Sa unsang paagi nato malikayan ang kalayo sa walay pugong nga sinultihan? Si Jesus miingon: “Gikan sa kadagaya sa kasingkasing ang baba mosulti.” (Mat. 12:34) Busa ang unang lakang mao ang pagsusi sa atong kasingkasing. Gilikayan ba nato ang negatibong mga pagbati nga makasugnod sa makadaot nga sinultihan? Pananglitan, kon makadungog kita nga ang usa ka brader nangab-ot ug pribilehiyo sa kongregasyon, hunahunaon ba nato nga maayo ang iyang motibo, o dudahan nato siya? Kon may tendensiya kitang magduda sa uban, angay natong hinumdoman nga gikuwestiyon sa Yawa ang motibo sa matinumanong alagad sa Diyos nga si Job. (Job 1:9-11) Imbes dudahan ang motibo sa atong igsoon, mas maayo nga atong susihon kon nganong nakasaway kita kaniya. Duna ba gyod kitay maayong rason nga magduda kaniya? O basig naimpluwensiyahan na ang atong kasingkasing sa dili mahigugmaong tinamdan sa kalibotan nga kaylap kaayo niining kataposang mga adlaw?—2 Tim. 3:1-4.
6, 7. (a) Unsa ang pipila ka rason kon nganong manaway tingali kita sa uban? (b) Unsay atong buhaton kon nasakitan kita sa gisulti sa uban?
6 Tagda ang laing mga rason kon nganong manaway tingali kita sa uban. Lagmit gusto nato nga mas dayegon sa mga igsoon ang atong mga nahimo. Pinaagi sa pagpanaway sa uban, atong gipakita nga mas maayo kita kay kanila. O kaha gusto natong ipasumangil sa uban kon nganong wala nato mahimo ang usa ka butang. Bisag unsa pay hinungdan—garbo, kasina, o aron tabonan ang atong mga kapakyasan—ang pagpanaway makadaot gayod.
7 Lagmit bation nato nga may katarongan kita nga manaway sa usa ka tawo. Tingali kay nasakitan kita sa iyang gisulti bahin kanato. Kon mao, dili solusyon ang pagbalos. Makasugnod lang kini sa kalayo ug mahimo na hinuon nato ang gusto sa Yawa, dili ang gusto sa Diyos. (2 Tim. 2:26) Mas maayong atong sundogon si Jesus niining bahina. Dihang gipasipad-an, “wala siya mobalos sa pagsultig pasipala.” Hinuon, siya “nagpadayon sa pagpiyal sa iyang kaugalingon ngadto sa usa nga nagahukom sa pagkamatarong.” (1 Ped. 2:21-23) Masaligon si Jesus nga sulbaron ni Jehova ang maong situwasyon sumala sa Iyang paagi ug gitakdang panahon. Kita usab kinahanglang mosalig sa Diyos. Kon mosulti kitag makapadasig nga mga pulong ngadto sa uban, makatabang kita sa paghupot “sa nagahiusang bugkos sa pakigdait” sa kongregasyon.—Basaha ang Efeso 4:1-3.
IKYAS SA BITIK SA KAHADLOK UG PAGPIT-OS
8, 9. Nganong gihukman ni Pilato si Jesus ug kamatayon?
8 Kon ang usa ka mananap mabitik, dili na niya kontrolado ang iyang lihok. Sa susama, kon ang usa magpadaog sa kahadlok ug pagpit-os, dili na niya kaayo kontrolado ang iyang kinabuhi. (Basaha ang Proverbio 29:25.) Atong hisgotan ang duha ka lalaki nga nagpadaog sa pagpit-os ug kahadlok. Dayon atong tagdon kon unsay atong makat-onan sa ilang kasinatian.
9 Ang Romanong gobernador nga si Poncio Pilato nahibalo nga inosente si Jesus, maong dili niya gustong ipapatay siya. Gani miingon si Pilato nga si Jesus ‘walay nahimo nga bisan unsa nga takos sa kamatayon.’ Apan iya gihapong gihukman siya sa kamatayon. Ngano? Tungod kay nagpadaog si Pilato sa pagpit-os sa mga tawo. (Luc. 23:15, 21-25) Aron masunod ang ilang gusto, ilang gipresyur si Pilato pinaagi sa pagsinggit: “Kon imong buhian kining tawhana, dili ka higala ni Cesar”! (Juan 19:12) Lagmit nahadlok si Pilato nga matangtang sa iyang posisyon o basin patyon pa gani kon modapig siya kang Jesus. Busa nagpadaog siya sa pagpit-os ug nahimong instrumento sa Yawa.
10. Unsay hinungdan nga gilimod ni Pedro si Jesus?
10 Si apostol Pedro maoy usa sa mga suod nga higala ni Jesus. Maisogon niyang gipahayag nga si Jesus mao ang Mesiyas. (Mat. 16:16) Dihang ang ubang tinun-an wala makasabot sa gisulti ni Jesus ug mibiya kaniya, si Pedro nagpabiling maunongon. (Juan 6:66-69) Ug sa dihang dakpon na sa mga kaaway si Jesus, migamit siyag espada aron depensahan ang iyang Agalon. (Juan 18:10, 11) Apan sa ulahi, si Pedro nagpadaog sa kahadlok ug gilimod pa gani si Jesus. Sulod sa mubong panahon, ang apostol nabitik sa kahadlok sa tawo. Nawad-an siyag kaisog sa pagbuhat kon unsay husto ug sa pagpabiling maunongon kang Jesus.—Mat. 26:74, 75.
11. Unsang mga pagpit-os ang atong suklan?
11 Ingong mga Kristohanon, kinahanglan natong suklan ang pagpit-os sa pagbuhat ug mga butang nga dili makapahimuot sa Diyos. Basin pugson kita sa atong amo o sa uban sa pagpanglimbong o sa paghimog seksuwal nga imoralidad. Ang mga estudyante mahimong pit-oson sa ilang mga klasmet sa pagpangopya, pagtan-awg pornograpiya, pagpanigarilyo, pagdroga, pag-inom-inom, o sa pagbuhat ug seksuwal nga kahilayan. Busa unsay makatabang kanato aron makaikyas sa bitik sa kahadlok ug pagpit-os sa pagbuhat kon unsay dili makapahimuot kang Jehova?
12. Unsay atong makat-onan bahin kang Pilato ug Pedro?
12 Unsang mga leksiyon ang atong makat-onan kang Pilato ug Pedro? Diyutay rag nahibaloan si Pilato bahin kang Kristo. Bisan pa niana, siya nahibalo nga inosente ug dili ordinaryong tawo si Jesus. Apan si Pilato dili mapainubsanon ug walay gugma sa matuod nga Diyos, maong dali ra siyang nabitik sa Yawa. Si Pedro dunay dakong kahibalo ug gugma sa Diyos. Apan dihay mga higayon nga siya dili makasaranganon, nahadlok sa tawo, ug nagpadaog sa pagpit-os. Sa wala pa dakpa si Jesus, si Pedro nanghambog: “Bisan pag ang tanan mangapandol, apan ako dili gayod.” (Mar. 14:29) Mas andam unta ang apostol sa pag-atubang sa mga pagsulay kon misalig pa siya sa Diyos sama sa gihimo sa salmista, kinsa miawit: “Si Jehova dapig kanako; dili ako mahadlok. Unsay arang mabuhat sa yutan-ong tawo kanako?” (Sal. 118:6) Sa kataposang gabii ni Jesus sa yuta, iyang giuban si Pedro ug ang duha pa ka apostol ngadto sa tanaman sa Getsemane. Imbes magpabiling alerto, si Pedro ug ang iyang mga kauban nangatulog. Gipukaw sila ni Jesus ug miingon: “Magpadayon kamo sa pagbantay ug sa pag-ampo, aron dili kamo mahidangat sa tentasyon.” (Mar. 14:38) Apan si Pedro nakatulog pag-usab ug sa ulahi nagpadaog sa kahadlok ug pagpit-os.
13. Sa unsang paagi kita makasukol sa pagpit-os sa pagbuhat ug daotan?
13 Ang panig-ingnan ni Pilato ug Pedro nagtudlo kanato nga gikinahanglan nato ang tukmang kahibalo, pagkamapainubsanon, pagkamakasaranganon, gugma sa Diyos, ug kahadlok kang Jehova, dili sa tawo. Kon ang atong pagtuo gipasukad sa tukmang kahibalo, may kaisog kitang mosulti bahin sa atong tinuohan. Kini motabang kanato sa pagsukol sa pagpit-os ug sa pagbuntog sa kahadlok sa tawo. Siyempre dili kita angayng mosalig pag-ayo sa atong kaugalingon. Hinunoa, mapainubsanon natong ilhon nga gikinahanglan nato ang gahom sa Diyos aron masuklan ang pagpit-os. Kinahanglang moampo kita alang sa espiritu ni Jehova. Angay usab nga ang atong gugma kaniya maoy magpalihok kanato sa pagbayaw sa iyang ngalan ug mga sukdanan. Dugang pa, kinahanglang mangandam kita sa dili pa makaatubang ug mga pagpit-os. Pananglitan, angay kitang mag-ampo uban sa atong mga anak ug tudloan sila kon unsay himoon kon pugson sila sa ilang mga eskolmet sa pagbuhat ug daotan.—2 Cor. 13:7. *
LIKAYI ANG LIT-AG NGA MAKAHUGNO—SOBRANG PAGKAHASOL SA KONSENSIYA
14. Unsay gusto sa Yawa nga atong hunahunaon bahin sa atong nangaging mga sala?
14 Ang laing matang sa lit-ag mao ang bug-at nga kahoy o bato nga ibitay diha sa agianan sa mananap. Sa dihang matarog sa mananap ang natago nga pisi, ang kahoy o bato mohagsa ug maangol ang mananap. Ang sobrang pagkahasol sa konsensiya nahisamag bug-at nga bato o kahoy nga makaangol o makahugno kanato. Dihang maghunahuna sa nangaging sala, kita tingali ‘mahugno sa hilabihan gayod.’ (Basaha ang Salmo 38:3-5, 8.) Gusto ni Satanas nga atong hunahunaon nga dili na kita kaluy-an ni Jehova ug dili nato masunod ang Iyang mga sukdanan.
15, 16. Unsaon nimo paglikay sa lit-ag sa sobrang pagkahasol sa konsensiya?
15 Unsaon nimo paglikay sa lit-ag nga makahugno? Kon nakahimo kag seryosong sala, lihok na karon aron mapasig-uli ang imong relasyon kang Jehova. Duol sa mga ansiyano, ug hangyoa sila nga tabangan ka. (Sant. 5:14-16) Buhata ang tanan aron tul-iron ang imong kasaypanan. (2 Cor. 7:11) Kon madisiplina ka, ayawg kaluya. Ang disiplina maoy timailhan nga gihigugma ka ni Jehova. (Heb. 12:6) Magmadeterminado nga dili na buhaton ang mga butang nga mitultol sa maong sala. Human nga maghinulsol ug magbag-o, kinahanglang hugot ang imong pagtuo nga ang halad lukat ni Jesus makatabon gayod sa imong mga sala.—1 Juan 4:9, 14.
16 Ang uban gitulisok gihapon sa ilang konsensiya bisag napasaylo na. Kon kanay imong gibati, hinumdomi nga gipasaylo ni Jehova si Pedro ug ang ubang apostoles tungod sa ilang pagbiya sa Iyang hinigugmang Anak dihang gikinahanglan sila pag-ayo ni Jesus. Gipasaylo pa gani ni Jehova ang tawong gipalagpot sa kongregasyon sa Corinto tungod sa makauulaw nga imoralidad apan sa ulahi naghinulsol. (1 Cor. 5:1-5; 2 Cor. 2:6-8) Gihisgotan sa Bibliya ang mga tawo nga nakahimog grabeng sala apan gipasaylo sa Diyos kay naghinulsol.—2 Cron. 33:2, 10-13; 1 Cor. 6:9-11.
17. Unsay mahimo sa lukat alang kanato?
17 Pasayloon ka ni Jehova ug kalimtan ang imong mga sala kon tinuod kang maghinulsol ug motuo nga iya gayod kang kaluy-an. Ayawg hunahunaa nga ang halad lukat ni Jesus dili makatabon sa imong mga sala aron dili ka mabiktima sa usa sa mga lit-ag ni Satanas. Bisag kanay gusto sa Yawa nga imong hunahunaon, ang lukat makatabon sa sala sa tanang mahinulsolon. (Prov. 24:16) Ang pagtuo sa lukat makatabang nimo nga dili na sobrang mahasol ug makapalig-on nimo sa pag-alagad sa Diyos uban ang bug-os nga kasingkasing, hunahuna, ug kalag.—Mat. 22:37.
NAHIBALO KITA SA MGA LIT-AG NI SATANAS
18. Unsaon nato paglikay sa mga lit-ag sa Yawa?
18 Dili importante kang Satanas kon unsang lit-ag ang makabitik kanato. Ang importante kaniya nga iya kitang madakpan. Kay nahibalo man kita sa mga lit-ag ni Satanas, makalikay kita niini. (2 Cor. 2:10, 11) Dili kita mabitik sa iyang mga lit-ag kon mangayo kitag kaalam sa pagsagubang sa mga pagsulay. Si Santiago misulat: “Busa, kon aduna man kaninyoy nakulangan ug kaalam, magpadayon siya sa pagpangayo sa Diyos, kay siya nagahatag nga madagayaon ngadto sa tanan ug dili mamuyboy; ug kini igahatag kaniya.” (Sant. 1:5) Kinahanglang molihok kita uyon sa atong mga pag-ampo pinaagi sa regular nga personal nga pagtuon ug pagpadapat sa Pulong sa Diyos. Ang mga basahon nga gitagana sa matinumanon ug maalamong ulipon nagtudlo kanato bahin sa mga lit-ag sa Yawa ug nagtabang kanato sa paglikay niini.
19, 20. Nganong angay natong dumtan kon unsay daotan?
19 Ang pag-ampo ug pagtuon sa Bibliya magpalalom sa atong gugma sa kon unsay maayo. Apan hinungdanon usab nga atong dumtan kon unsay daotan. (Sal. 97:10) Atong malikayan ang hakog nga mga tinguha kon palandongon nato ang daotang epekto niini. (Sant. 1:14, 15) Kon makakat-on kita sa pagdumot sa daotan ug sa paghigugma sa maayo, dili kita madani sa paon nga gamiton ni Satanas sa paglit-ag kanato.
20 Pagkamapasalamaton nato nga gitabangan kita sa Diyos nga dili mabitik ni Satanas! Pinaagi sa Iyang espiritu, Pulong, ug organisasyon, si Jehova ‘nagaluwas kanato gikan sa usa nga daotan.’ (Mat. 6:13) Sa sunod nga artikulo, atong hisgotan ang duha pa ka lit-ag nga malamposong gigamit sa Yawa sa pagbitik sa mga alagad sa Diyos.
[Footnote]
^ par. 13 Maayong hisgotan sa mga ginikanan uban sa ilang mga anak ang “Kon Unsay Himoon Kon Pit-oson,” sa librong Gisukna sa mga Batan-on, Tomo 2, panid 132-133. Puwede kining gamiton sa pamilyahanong pagsimba.
[Mga Pangutana sa Pagtuon]
[Hulagway sa panid 21]
Ang walay pugong nga sinultihan makapatunghag samag kalayo nga mga problema sa kongregasyon
[Hulagway sa panid 24]
Matangtang nimo ang kabug-at sa sobrang pagkahasol sa konsensiya
