1. Unsay panglantaw sa kadaghanan karon sa pagkaulipon?

MGA 2,500 ka tuig kanhi, usa ka Gregong magsusulat ug drama miingon: “Walay tawo nga kinabubut-ong magsangon sa yugo sa pagkaulipon.” Daghan karon ang mouyon niana. Kon maghisgot ug pagkaulipon, atong mahunahunaan ang mga tawong dinaogdaog ug pinig-otan, diin dili sila ang nakabenepisyo sa ilang trabaho ug mga sakripisyo kondili kadtong nanag-iya ug nagdominar kanila.

2, 3. (a) Unsang matanga sa pagkaulipon ang mga alagad ni Kristo? (b) Unsang mga pangutana bahin sa pagkapiniyalan ang atong hisgotan?

² Si Jesus miingon nga ang iyang mga tinun-an maoy mapainubsanong mga alagad, o ulipon. Apan ang pagkaulipon sa matuod nga mga Kristohanon dili makauulaw o pagdaogdaog. Dungganon ang ilang pagkaulipon kay sila sinaligan ug tinahod. Pananglitan, matikdi ang giingon ni Jesus bahin sa usa ka “ulipon” sa hapit na Siyang mamatay. Siya miingon nga iyang hatagag mga buluhaton ang usa ka “matinumanon ug maalamong ulipon.”—Mat. 24:45-47.

³ Makapainteres nga sa laing susamang asoy, ang maong ulipon gitawag nga “piniyalan.” (Basaha ang Lucas 12:42-44.) Kadaghanan sa matinumanong mga Kristohanon nga buhi karon dili membro niining piniyalan nga matang. Apan gipakita sa Bibliya nga ang tanang alagad sa Diyos maoy mga piniyalan. Unsa ang atong mga responsabilidad? Unsay angay natong panglantaw niini? Aron matubag kini, atong susihon ang papel sa mga piniyalan sa karaang panahon.

4, 5. Unsay mga responsabilidad sa mga piniyalan sa karaang panahon? Paghatag ug mga pananglitan.

⁴ Sa karaang panahon, ang piniyalan sagad maoy  sinaligang ulipon. Siya ang nagdumala sa panimalay o negosyo sa iyang agalon. Sagad duna silay dakong awtoridad ug maoy gipadumala sa mga kabtangan, salapi, ug sa ubang sulugoon. Usa ka pananglitan niini si Eliezer, nga nagdumala sa daghang kabtangan ni Abraham. Lagmit siya ang gipaadto ni Abraham sa Mesopotamia aron mangitag asawa para sa anak ni Abraham nga si Isaac. Dako gayod kadto nga responsabilidad!—Gen. 13:2; 15:2; 24:2-4.

⁵ Si Jose, ang apo sa tuhod ni Abraham, maoy nagdumala sa panimalay ni Potipar. (Gen. 39:1, 2) Sa ulahi, si Jose nakabaton usab ug kaugalingong piniyalan, nga maoy nagdumala sa iyang panimalay. Ang piniyalan ni Jose ang nag-abiabi sa iyang napulo ka igsoon. Kini usab ang nagpatuman sa plano ni Jose nga sulayan ang iyang mga igsoon pinaagi sa plata nga kopa. Tin-aw nga dako kaayog pagsalig ang mga agalon sa ilang mga piniyalan.—Gen. 43:19-25; 44:1-12.

6. Unsa ang lainlaing responsabilidad sa mga ansiyano?

⁶ Kasiglohan sa ulahi, si apostol Pablo misulat nga ang Kristohanong mga magtatan-aw maoy mga “piniyalan sa Diyos.” (Tito 1:7) Kay gitudlo ingong magbalantay sa “panon sa Diyos,” ang mga magtatan-aw naggiya ug nanguna sa mga kongregasyon. (1 Ped. 5:1, 2) Siyempre, lainlain ang ilang responsabilidad. Pananglitan, kadaghanan sa mga ansiyano karon nag-alagad sa usa ka kongregasyon. Ang nagapanawng mga magtatan-aw nag-alagad ug daghang kongregasyon. Ug ang mga membro sa Branch Committee nag-atiman sa tanang kongregasyon sa usa ka nasod. Bisag unsa pay ilang buluhaton, gidahom nga matinumanon nila kining atimanon kay silang tanan manubag sa Diyos.—Heb. 13:17.

7. Nganong makaingon kita nga ang tanang Kristohanon maoy mga piniyalan?

⁷ Apan komosta ang daghang maunongong Kristohanon nga dili mga ansiyano? Si apostol Pedro misulat sa mga Kristohanon: “Sumala sa nadawat nga gasa sa matag usa, gamita kini sa pag-alagad sa usag usa ingon nga maayong mga piniyalan sa dili-takos nga kalulot sa Diyos nga gipahayag sa nagkadaiyang paagi.” (1 Ped. 1:1; 4:10) Tungod sa iyang dili takos nga kalulot, ang Diyos naghatag kanato ug gasa, hiyas, abilidad, o talento nga magamit alang sa kaayohan sa atong mga isigkamagtutuo. Busa ang tanang nag-alagad sa Diyos maoy mga piniyalan. Dungganon ang ilang papel kay sila sinaligan ug gihatagag responsabilidad.

8. Unsa ang usa ka importanteng prinsipyo nga angay natong hinumdoman?

⁸ Atong hisgotan ang tulo ka prinsipyo nga angay natong hinumdoman ingong mga piniyalan. Una: Kitang tanan iya sa Diyos ug manubag kaniya. Si Pablo misulat: “Kamo dili na [ang nanag-iya] sa inyong kaugalingon, kay kamo gipalit na sa usa ka bili,” ang gihalad nga dugo ni Kristo. (1 Cor. 6:19, 20) Kay kita iya man ni Jehova, obligado kitang motuman sa iyang mga sugo, nga dili ra mabug-at. (Roma 14:8; 1 Juan 5:3) Kita usab maoy mga ulipon ni Kristo. Sama sa mga piniyalan kaniadto, kita gihatagag dakong kagawasan—apan kini dunay mga limitasyon. Angay natong tumanon ang atong mga responsabilidad sumala sa gihatag nga mga instruksiyon. Bisag unsa pay atong pribilehiyo, kitang tanan mga alagad sa Diyos ug ni Kristo.

9. Giunsa pag-ilustrar ni Jesus ang relasyon tali sa agalon ug ulipon?

⁹ Gitabangan kita ni Jesus nga masabtan ang relasyon tali sa agalon ug ulipon. Kas-a, giingnan niya ang iyang mga tinun-an bahin sa usa ka ulipon nga miuli human nagtrabahog tibuok adlaw sa umahan. Ang agalon ba moingon: “Ari dayon diri ug hirag sa lamesa”? Dili. Siya moingon: “Pag-andam ug akong ipanihapon, ug pagsul-ob ug ipron ug alagari ako hangtod makahuman ako sa pagkaon ug pag-inom, ug human niana makakaon  ka na ug makainom.” Unsay leksiyon niini? Si Jesus mipatin-aw: “Busa kamo, usab, sa dihang mabuhat na ninyo ang tanang butang nga gipabuhat kaninyo, isulti ninyo, ‘Kami maoy walay-silbi nga mga ulipon. Ang among nabuhat mao ang angay namong pagabuhaton.’”—Luc. 17:7-10.

10. Unsay nagpakita nga gipabilhan ni Jehova ang atong mga paningkamot sa pag-alagad kaniya?

¹⁰ Siyempre, gipabilhan ni Jehova ang atong mga paningkamot sa pag-alagad kaniya. Ang Bibliya nagpasalig: “Ang Diyos dili kay dili-matarong nga kalimtan ang inyong buhat ug ang gugma nga inyong gipakita alang sa iyang ngalan.” (Heb. 6:10) Si Jehova dili mangayo ug labaw sa atong maarangan. Dugang pa, bisag unsa pay iyang ipabuhat kanato, kana dili mabug-at ug alang sa atong kaayohan. Bisan pa niana, sama sa gipakita sa ilustrasyon ni Jesus, ang usa ka ulipon dili magpahimuot sa iyang kaugalingon ug mag-una sa iyang kaayohan. Kini ang punto: Dihang gipahinungod nato ang atong kaugalingon sa Diyos, gipili nato nga unahon siya sa atong kinabuhi. Mouyon ka ba niini?

11, 12. Ingong mga piniyalan, unsang hiyas ang angay natong ipakita, ug unsay angay natong likayan?

¹¹ Ang ikaduhang prinsipyo mao: Ingong mga piniyalan, kitang tanan nagsunod sa samang mga sukdanan. Tinuod may mga responsabilidad nga pipila lang ang gihatagan diha sa kongregasyon. Apan ang kadaghanang responsabilidad nabatonan sa tanan. Pananglitan, ingong mga tinun-an ni Kristo ug mga Saksi ni Jehova, kita gisugo nga higugmaon ang usag usa. Si Jesus miingon nga ang gugma maoy ilhanan sa matuod nga mga Kristohanon. (Juan 13:35) Apan dili lang mga isigkamagtutuo ang atong gihigugma. Naningkamot usab kita sa pagpakitag gugma ngadto sa mga dili magtutuo. Kitang tanan makahimo ug angayng magpakita niini.

¹² Kinahanglan usab kitang magpakitag maayong panggawi. Angay natong likayan ang panggawi ug pagkinabuhi nga gihukman sa Pulong sa Diyos. Si Pablo misulat: “Walay mga makihilawason, ni mga tigsimbag idolo, ni mga mananapaw, ni mga lalaking gihuptan alang sa dili-kinaiyanhong mga katuyoan, ni mga lalaking makigdulog sa mga lalaki, ni mga kawatan, ni mga tawong dalo, ni mga palahubog, ni mga tigsultig pasipala, ni mga mangingilkil nga makapanunod sa gingharian sa Diyos.” (1 Cor. 6:9, 10) Tinuod, gikinahanglan ang paningkamot aron atong masunod ang matarong nga mga sukdanan sa Diyos. Apan dili gayod kita magmahay kay makabenepisyo kita niini sa daghang paagi. Pananglitan, kita makabatog maayong panglawas, maayong relasyon sa uban, ug maayong baroganan atubangan sa Diyos.—Basaha ang Isaias 48:17, 18.

13, 14. Unsang responsabilidad ang gihatag ngadto sa tanang Kristohanon, ug unsay angay natong panglantaw niini?

¹³ Hinumdomi nga ang mga piniyalan dunay buluhaton. Mao man usab kita. Gihatagan kitag bililhong gasa—ang kahibalo sa kamatuoran. Gidahom sa Diyos nga ato kining ipaambit sa uban. (Mat. 28:19, 20) Si Pablo misulat nga ang mga Kristohanon maoy mga alagad ni Kristo ug “mga piniyalan sa sagradong mga tinago sa Diyos.” (1 Cor. 4:1) Nahibalo si Pablo nga ang iyang pagkapiniyalan nagpasabot nga angay niyang atimanon pag-ayo ang “sagradong mga tinago” ug matinumanong ipaambit kini sa uban ingon sa gisugo sa Agalon, si Jesu-Kristo.—1 Cor. 9:16.

¹⁴ Sa pagkatinuod, ang pagpaambit sa kamatuoran maoy pagpakitag gugma. Siyempre, lainlain ang kahimtang sa matag Kristohanon maong dili parehas ang mahimo sa tanan diha sa ministeryo. Ug nakasabot niana si Jehova. Ang importante nga atong buhaton ang tanan natong maarangan. Sa ingon, kita nagpakitag dili mahakogong gugma ngadto sa Diyos ug sa isigkatawo.

15-17. (a) Nganong angayng magmatinumanon ang usa ka piniyalan? (b) Giunsa pag-ilustrar ni Jesus ang resulta kon ang usa dili magmatinumanon?

¹⁵ Ang ikatulong prinsipyo nga angay natong hinumdoman mao: Angay nga kita matinumanon ug kasaligan. Ang usa ka piniyalan lagmit daghag maayong hiyas ug abilidad, apan wala kanay pulos kon siya iresponsable o dili maunongon sa iyang agalon. Kinahanglan kitang magmatinumanon aron mahimong epektibo ug malamposong piniyalan. Hinumdomi nga si Pablo misulat: “Ang gipangita diha sa mga piniyalan mao nga [sila] makaplagang matinumanon.”—1 Cor. 4:2.

¹⁶ Kini ang segurado: Kon kita magmatinumanon, kita gantihan. Apan kon dili kita magmatinumanon, dili na kita uyonan sa Diyos. Gipasiugda kini nga prinsipyo diha sa ilustrasyon ni Jesus sa mga talanton. Ang mga ulipon nga matinumanong “nagpatigayon” sa salapi sa agalon gidayeg ug dagayang gigantihan. Apan ang ulipon nga iresponsable sa talanton nga gisalig kaniya sa agalon gihukmang “daotan,” “tapolan,” ug “walay-silbi.” Gikuha kaniya ang talanton, ug siya gisalibay sa gawas.—Basaha ang Mateo 25:14-18, 23, 26, 28-30.

¹⁷ Sa laing okasyon, gipasiugda ni Jesus ang resulta kon ang usa dili magmatinumanon. Siya miingon: “Dihay usa ka tawo nga dato ug siya may piniyalan, ug kini siya gisumbong kaniya nga nag-usik-usik sa iyang mga kabtangan. Busa iyang gitawag siya ug giingnan siya, ‘Unsa kining akong nadungog bahin kanimo? Ihatag ang kuwenta sa imong pagkapiniyalan, kay dili ka na makadumala sa balay.’” (Luc. 16:1, 2) Kay giusik-usikan man sa piniyalan ang kabtangan sa iyang agalon, ang piniyalan gipapahawa. Pagkahinungdanong leksiyon niini alang kanato!  Buot gayod natong magmatinumanon kanunay sa kon unsay gipangayo sa Diyos kanato.

18. Nganong dili nato angayng itandi ang atong kaugalingon sa uban?

¹⁸ Pangutan-a ang kaugalingon, ‘Unsay panglantaw nako sa akong pagkapiniyalan?’ Mahimong motungha ang problema kon itandi nato ang atong kaugalingon sa uban. Gitambagan kita sa Bibliya: “Pasulaya ang matag usa sa iyang kaugalingong binuhatan, ug niana siya may hinungdan sa pagsadya labot sa iyang kaugalingon lamang, ug dili sa pagtandi sa laing tawo.” (Gal. 6:4) Imbes itandi ang atong nahimo nianang sa uban, angay kitang magpokus sa kon unsay atong maarangan. Sa ingon, dili kita maluya o mahimong hambogiro. Dihang susihon ang atong kaugalingon, angay natong ilhon nga mahimong mausab ang kahimtang. Lagmit tungod sa problema sa panglawas, katigulangon, o ubang responsabilidad, dili na nato mahimo ang atong ginabuhat kaniadto. Sa laing bahin, basin makahimo pa kitag mas labaw kay sa atong ginahimo karon. Kon mao, nganong dili nato kana sulayan?

19. Nganong dili kita angayng madismaya kon dili nato madawat ang usa ka pribilehiyo?

¹⁹ Ang laing butang nga atong konsiderahon mao ang bahin sa mga responsabilidad nga atong nabatonan o gipangandoy. Pananglitan, ang usa ka brader basin nangandoy nga mahimong ansiyano o mahatagag bahin sa mga asembliya ug kombensiyon. Maayong maningkamot aron mokuwalipikar sa maong mga pribilehiyo, apan dili kita angayng madismaya kon dili nato kini madawat sa panahon nga atong gidahom. Tungod sa mga rason nga dili tingali nato dayon masabtan, ang ubang pribilehiyo lagmit ihatag nga dugaydugay pa kay sa atong gidahom. Hinumdomi si Moises. Siya lagmit naghunahuna nga andam na siyang manguna sa mga Israelinhon sa paggawas sa Ehipto, apan kinahanglan pa siyang maghulat ug 40 ka tuig una kana mahitabo. Kini naghatag kaniyag igong panahon nga maugmad ang mga hiyas nga gikinahanglan sa paggiya sa gahig ulo ug rebelyosong katawhan.—Buh. 7:22-25, 30-34.

20. Unsay atong makat-onan kang Jonatan?

²⁰ Usahay, dili gayod nato mabatonan ang usa ka pribilehiyo. Kanay nahitabo kang Jonatan. Siya ang anak ni Saul ug ang mosunod unta nga hari sa Israel. Apan gipili sa Diyos si David, nga mas manghod kang Jonatan, aron mahimong hari. Unsay reaksiyon ni Jonatan? Iya kining gidawat ug gipameligro pa gani ang iyang kinabuhi aron suportahan si David. Siya miingon kang David: “Ikaw mahimong hari sa Israel, ug ako mahimong ikaduha kanimo.” (1 Sam. 23:17) Unsay atong makat-onan kang Jonatan? Gidawat niya ang iyang kahimtang, ug dili sama sa iyang amahan, siya wala masina kang David. Imbes masina kita sa uban tungod sa ilang pribilehiyo, mas maayong magpokus kita sa pagtuman sa atong mga responsabilidad. Makaseguro kita nga sa bag-ong kalibotan, tagbawon ni Jehova ang hustong mga tinguha sa tanan niyang alagad.

21. Unsay angay natong panglantaw sa atong pagkapiniyalan?

²¹ Atong hinumdoman nga ingong sinaligang mga piniyalan, dili kita mga ulipong dinaogdaog. Hinunoa, dungganon ang atong papel kay gisalig kanato ang buluhaton nga dili na pagahimoon pag-usab—ang pagsangyaw sa maayong balita niining panahon sa kataposan. Samtang ginahimo kini, duna kitay dakong kagawasan kon unsaon pagtuman ang atong mga responsabilidad. Busa hinaot nga mahimo kitang matinumanong mga piniyalan ug pabilhan ang pribilehiyo nga mag-alagad sa labing gamhanang Persona sa uniberso.