“ANG pulong sa Diyos buhi ug gamhanan.” (Heb. 4:12) Gipasiugda dinhi ni apostol Pablo ang gahom sa pulong sa Diyos sa pagtandog sa kasingkasing ug sa pagbag-o sa kinabuhi.

Apan dihang mitungha ang apostasya pagkamatay sa mga apostoles, ang pagsabot sa mga tawo bahin sa gahom sa mensahe sa Bibliya dili na tin-aw. (2 Ped. 2:1-3) Ngadtongadto, gitudlo sa mga lider sa simbahan nga dunay birtud ang Pulong sa Diyos. Si Propesor Harry Y. Gamble misulat bahin sa “paggamit sa Kristohanong mga teksto alang sa mahika.” Siya miingon nga sa ikatulong siglo, ang Amahan sa Simbahan nga si Origen nagtudlo nga “ang pagkadungog pa lang sa sagradong mga pulong duna nay kaayohan: kon ang mga pulong nga gigamit sa mahika dunay gahom, labaw na gyod ang balaang mga pulong sa kasulatan.” Si John Chrysostom, nga nabuhi sa ulahing bahin sa ikaupat nga siglo, misulat nga “ang yawa dili moduol ug balay nga may Ebanghelyo.” Miingon usab siya nga ang uban nagkuwentas ug mga teksto sa Ebanghelyo ingong anting-anting. Si Propesor Gamble midugang nga ang Katolikong teologo nga si Augustine nagtudlo nga “dili sayop kon ang usa magbutang ug kopya sa Ebanghelyo ni Juan ilalom sa iyang unlan aron mawala ang labad sa ulo”! Tungod niini nga mga pagtulon-an, ang mga teksto sa Bibliya gigamit alang sa mahika. Para nimo, ang Bibliya ba anting-anting nga makapanalipod nimo sa daotan?

Lagmit ang mas komong sayop nga paggamit sa Bibliya mao ang bibliomancy. Unsa kini? Mao kini ang basta na lang pagbukas ug libro (sagad Bibliya), ug dayon basahon ang unang teksto nga makita kay nagtuo nga ang maong mga pulong maghatag sa gikinahanglang giya. Pananglitan, sumala kang Propesor Gamble, kas-a nadunggan ni Augustine ang usa ka bata diha sa silingang balay nga nag-ingon: “Kuhaa ug basaha, kuhaa ug basaha.” Giisip ni Augustine nga sugo kadto sa Diyos kaniya nga buksan ang Bibliya ug basahon ang unang teksto nga makita.

Nakadungog ka na bag mga tawo nga dihang may problema mag-ampo sa Diyos, dayon basta na lang moablig Bibliya, ug magdahom nga ang unang teksto nga ilang makita makatabang kanila? Bisag maayo tingali ang ilang motibo, dili kana ang hustong paagi alang sa mga Kristohanon sa pagpangitag giya diha sa Kasulatan.

Si Jesus nagpasalig sa iyang mga tinun-an nga siya magpadala kanilag “magtatabang, ang balaang espiritu.” Siya mipadayon: “Siya magtudlo kaninyo sa tanang butang ug magpahinumdom kaninyo sa tanang butang nga akong gisulti kaninyo.” (Juan 14:26) Ang bibliomancy sukwahi niini kay wala kini magkinahanglag kahibalo sa Kasulatan.

Komon ang bibliomancy ug ang ubang matuotuohong paggamit sa Bibliya. Apan gihukman sa Pulong sa Diyos kadtong ‘nagapangitag tilimad-on.’ (Lev. 19:26; Deut. 18:9-12; Buh. 19:19) “Ang pulong sa Diyos buhi ug gamhanan,” apan kinahanglang gamiton kini sa hustong paagi. Ang tukmang kahibalo sa Bibliya, dili ang matuotuohong paggamit niini, mao ang makapabag-o sa kinabuhi sa tawo. Tungod sa pagkuha sa maong kahibalo, daghan ang natabangan sa pag-ugmad ug maayong moralidad, pagbiya sa ilang daotang pagkinabuhi, pagpalig-on sa ilang pamilya, ug sa pagpakighigala sa Awtor sa Bibliya.