1. Unsang mga sakripisyo ang gihimo sa daghan, ug ngano?

ANG mga tawo andam mosakripisyo para sa mga butang nga importante kanila. Ang mga ginikanan mohatag ug panahon, salapi, ug kusog alang sa kaayohan sa ilang mga anak. Ang batan-ong mga atleta nga gustong morepresentar sa ilang nasod sa Olympics nagpraktis ug nagbansay pag-ayo sulod sa daghang oras kada adlaw samtang ang ilang mga higala naglingawlingaw. Si Jesus usab nagsakripisyo alang sa mga butang nga importante kaniya. Siya wala mangagpas nga madato ni magpamilya. Hinunoa, nagpokus siya sa pagpauswag sa intereses sa Gingharian. (Mat. 4:17; Luc. 9:58) Ang iyang mga sumusunod usab daghag gisakripisyo alang sa Gingharian sa Diyos. Ang labing importante kanila mao ang pagpauswag sa Gingharian, ug nagsakripisyo sila aron bug-os makasuportar sa Gingharian kutob sa ilang maarangan. (Mat. 4:18-22; 19:27) Busa pangutan-a ang kaugalingon, ‘Unsay importante sa akong kinabuhi?’

2. (a) Unsang mga sakripisyo ang kinahanglang himoon sa tanang matuod nga mga Kristohanon? (b) Unsang dugang sakripisyo ang gihimo sa uban?

² May mga sakripisyo nga kinahanglang himoon sa tanang matuod nga mga Kristohanon. Importante kana sa pag-ugmad ug paghupot ug maayong relasyon kang Jehova. Lakip sa maong mga sakripisyo ang paggahig panahon ug kusog para sa pag-ampo, pagbasag Bibliya, pamilyahanong pagsimba, pagtambong sa mga tigom, ug pagsangyaw. * (Jos. 1:8; Mat. 28:19, 20; Heb. 10:24, 25) Tungod sa atong mga paningkamot ug sa panalangin ni Jehova, ang buluhatong pagsangyaw kusog nga miuswag, ug nagkadaghan ang nangadto sa “bukid sa balay ni Jehova.” (Isa. 2:2) Sa pagsuportar sa mga kalihokan  sa Gingharian, daghan ang nagsakripisyo aron makaalagad sa Bethel, motabang sa pagtukod ug mga Kingdom Hall ug Assembly Hall, mag-organisar ug mga kombensiyon, o motabang sa mga naapektohan sa mga kalamidad. Bisag dili kini kinahanglanon sa pagbatog kinabuhing dayon, importante kini sa pagsuportar sa intereses sa Gingharian.

3. (a) Sa unsang paagi kita makabenepisyo dihang magsakripisyo alang sa Gingharian? (b) Unsang mga pangutana ang angay natong tagdon?

³ Karon na ang panahon nga ilabina kitang mosuportar sa Gingharian. Makapalipay nga daghan ang kinabubut-ong nagsakripisyo alang kang Jehova. (Basaha ang Salmo 54:6.) Kon himoon nato kana, kita mas magmalipayon samtang naghulat sa pag-abot sa Gingharian sa Diyos. (Deut. 16:15; Buh. 20:35) Apan angay natong susihon pag-ayo ang atong kaugalingon. Makahimo pa ba kitag dugang mga sakripisyo alang sa Gingharian? Giunsa nato paggamit ang atong panahon, salapi, kusog, ug mga abilidad? Unsay angay natong bantayan? Atong repasohon ang usa ka sumbanan sa paghimog boluntaryong mga halad. Kon atong sundogon, makadugang kini sa atong kalipay.

4. Sa unsang paagi nakabenepisyo ang mga Israelinhon sa pagtanyag ug mga halad?

⁴ Sa karaang Israel, ang pagtanyag ug mga halad maoy basehanan sa kapasayloan sa mga sala. Gikinahanglan kini aron mabatonan sa katawhan ang pag-uyon ni Jehova. Ang pipila ka halad gisugo; ang uban kinabubut-on, o boluntaryo. (Lev. 23:37, 38) Ang tibuok nga mga halad nga sinunog puwedeng itanyag ingong boluntaryong mga halad, o gasa, kang Jehova. Ang usa ka talagsaong pananglitan sa pagtanyag ug mga halad maoy sa inagurasyon sa templo ni Solomon.—2 Cron. 7:4-6.

5. Unsay probisyon ni Jehova sa mga kabos?

⁵ Mahigugmaong nasabtan ni Jehova nga dili pareho ang mahatag sa matag usa, maong gipangayo lang niya kon unsay ilang maarangan. Ang balaod ni Jehova nagsugo nga ang dugo sa hayop ibubo, nga maoy ‘landong sa maayong mga butang nga moabot’ pinaagi sa iyang Anak, si Jesus. (Heb. 10:1-4) Apan, si Jehova dili sobra ka estrikto sa pagpadapat sa maong balaod. Pananglitan, dawaton sa Diyos ang mga tukmo ingong halad kon ang usa dili makaarang sa pagtanyag ug laking karnero o kanding. Busa bisan ang mga kabos malipayong makahalad  kang Jehova. (Lev. 1:3, 10, 14; 5:7) Bisag managlahi ang hayop nga puwedeng ihalad, may duha ka butang nga kinahanglang himoon sa motanyag ug boluntaryong mga halad.

6. Unsa ang duha ka butang nga kinahanglang himoon niadtong mohatag ug mga halad, ug nganong importante kana?

⁶ Una, angayng ihatag sa usa ang iyang kinamaayohan. Giingnan ni Jehova ang nasod nga kinahanglang walay depekto ang ihalad aron sila “makabaton ug pag-uyon.” (Lev. 22:18-20) Kon may depekto ang hayop, kana dili dalawaton kang Jehova. Ikaduha, ang maghalad kinahanglang hinlo ug wala mahugawi. Kon ang usa dili hinlo, kinahanglan siyang motanyag ug halad sa sala o halad sa pagkasad-an aron mahibalik ang pag-uyon ni Jehova kaniya sa dili pa mohimog boluntaryong halad. (Lev. 5:5, 6, 15) Seryoso kini nga butang. Gisugo ni Jehova nga kon ang usa samtang dili hinlo mokaon sa halad sa panag-ambit, nga naglakip sa boluntaryong mga halad, siya patyon. (Lev. 7:20, 21) Sa laing bahin, kon ang usa may maayong baroganan kang Jehova ug walay depekto ang iyang halad, siya magmaya uban ang hinlong konsensiya.—Basaha ang 1 Cronicas 29:9.

7, 8. (a) Unsang kalipay ang gibati sa daghang igsoon nga nagsakripisyo alang sa Gingharian? (b) Unsay atong nabatonan nga atong ikahatag kang Jehova?

⁷ Daghan usab karon ang andam maghago sa pag-alagad kang Jehova, ug nalipay gayod si Jehova niana. Makapalipay ang paghago alang sa atong mga igsoon. Usa ka brader miingon nga dili mahubit ang iyang kalipay dihang makatabang siya sa pagtukod ug mga Kingdom Hall ug sa mga naapektohan sa kalamidad. Matod niya, “Dihang makita nako ang kalipay ug apresasyon sa lokal nga mga igsoon sa ilang bag-ong Kingdom Hall o dihang makadawat silag tabang human sa kalamidad, makaingon gyod ko nga wala makawang ang tanan nakong paghago ug paningkamot.”

⁸ Ang mga alagad ni Jehova karon nangita kanunay ug mga kahigayonan nga makasuportar sa buluhaton ni Jehova. Sa 1904, si Brader C. T. Russell misulat: “Angayng isipon sa matag usa nga ang Ginoo nagtudlo kaniya ingong piniyalan sa iyang kaugalingong panahon, impluwensiya, salapi, ug uban pa, ug ang matag usa magtinguha sa paggamit niini kutob sa iyang maarangan, alang sa himaya sa Agalon.” Bisag may mga  gisakripisyo kita alang kang Jehova, kana miresulta sa daghang panalangin. (2 Sam. 24:21-24) Mahimo ba natong gamiton sa mas maayong paagi ang atong mga nabatonan?

9. Bahin sa paggamit sa atong panahon, unsang prinsipyo diha sa instruksiyon ni Jesus sa Lucas 10:2-4 ang atong mapadapat?

⁹ Atong panahon. Daghang panahon ug paningkamot ang gikinahanglan sa paghubad ug pag-imprenta sa atong mga literatura, pagtukod ug mga dapit sa pagsimba, pag-organisar ug mga kombensiyon, pagtabang sa mga naapektohan sa kalamidad, ug uban pang importanteng mga kalihokan. Apan duna lang kitay 24 oras kada adlaw. Busa si Jesus may gihatag nga prinsipyo nga makatabang kanato. Dihang gipadala niya ang iyang mga tinun-an sa kanataran, giingnan niya sila nga “ayaw panggakos sa pagpangomosta kang bisan kinsa diha sa dalan.” (Luc. 10:2-4) Nganong gihatag ni Jesus kini nga instruksiyon? Usa ka eskolar sa Bibliya miingon: “Ang pagtimbaya sa mga taga-Sidlakan dili sama sa atoa nga moduko o molamano, kondili sila kadaghan mogakos, moyukbo, ug mohapa pa gani. Kining tanan nagkinahanglag dakong panahon.” Si Jesus wala magdasig sa iyang mga sumusunod nga dili magmatinahoron. Hinunoa, iyang gipakita kanila nga limitado lang ang ilang panahon ug kinahanglang gamiton nila kana sa mas importanteng mga butang. (Efe. 5:16) Mapadapat ba nato kini nga prinsipyo aron mas daghan kitag panahon sa pagsuportar sa buluhaton sa Gingharian?

10, 11. (a) Sa unsang mga paagi gigamit ang atong mga donasyon alang sa tibuok kalibotang buluhaton? (b) Unsang prinsipyo sa 1 Corinto 16:1, 2 ang makatabang kanato?

¹⁰ Atong salapi. Daghang salapi ang gikinahanglan sa pagsuportar sa mga kalihokan sa Gingharian. Kada tuig, minilyong dolyares ang magasto sa pag-atiman sa mga nagapanawng magtatan-aw, espesyal payunir, ug misyonaryo. Sukad sa 1999, kapin sa 24,500 ka Kingdom Hall ang natukod diha sa mga dapit nga limitadog panalapi. Apan halos 6,400 ka Kingdom Hall pa ang gikinahanglan. Kada bulan, mga 100 ka milyong kopya sa Ang Bantayanang Torre ug Pagmata! ang ginaimprenta. Kining tanan gisuportahan pinaagi sa inyong boluntaryong mga donasyon.

¹¹ Si apostol Pablo naghatag ug prinsipyo bahin sa paghatag ug donasyon. (Basaha ang 1 Corinto 16:1, 2.) Giinspirar ni Jehova ang apostol nga dasigon ang mga igsoon sa Corinto nga sa sugod pa lang sa semana, maggahin nag salapi nga ilang ikadonar imbes mag-agad kon pilay mahibiling salapi pagkatapos sa semana. Sama sa unang siglo, ang mga igsoon karon abanteng nagplano aron dagayang makaamot sumala sa ilang kahimtang. (Luc. 21:1-4; Buh. 4:32-35) Pabilhan gayod ni Jehova ang maong pagkamahinatagon.

12, 13. Unsay nakapugong sa uban sa paghatag sa ilang kusog ug mga abilidad? Sa unsang paagi sila tabangan ni Jehova?

¹² Atong kusog ug mga abilidad. Gipaluyohan ni Jehova ang atong mga paningkamot sa paggamit sa atong kusog ug mga abilidad alang sa Gingharian. Siya nagsaad nga iya kitang tabangan dihang kapoyon. (Isa. 40:29-31) Gibati ba nato nga kulang kitag kahanas sa pagsuportar sa buluhaton? Moingon ba kita nga mas kuwalipikado ang uban? Hinumdomi nga mapauswag ni Jehova ang mga abilidad ni bisan kinsa, sama sa iyang gihimo kang Bezalel ug Oholiab.—Ex. 31:1-6; tan-awa ang hulagway sa panid 11.

¹³ Gidasig kita ni Jehova nga ihatag ang atong kinamaayohan ug dili kana ihikaw. (Prov. 3:27) Samtang gitukod pag-usab ang templo, giingnan ni Jehova ang mga Hudiyo sa Jerusalem nga palandongon kon unsay ilang ginahimo sa pagsuportar sa maong pagpanukod. (Hag. 1:2-5) Tungod kana kay sila nabalda ug wala na magpokus sa buluhaton. Busa maayong susihon kon ang atong mga prayoridad nahiuyon sa mga prayoridad ni Jehova. Mahimo ba natong seryosong  susihon ang atong kinabuhi aron mas makasuportar sa buluhaton sa Gingharian niining kataposang mga adlaw?

14, 15. (a) Sa unsang paagi kita madasig sa gihimo sa atong mga igsoon nga limitadog panalapi? (b) Unsay angay natong tinguha?

¹⁴ Daghan ang nagpuyo sa mga nasod diin kaylap ang kalisdanan o kakabos. Gipaningkamotan sa atong organisasyon nga ‘mahulipan’ ang kakulangan sa mga igsoon sa maong mga nasod. (2 Cor. 8:14) Apan, bisan ang atong mga igsoon nga limitadog panalapi nagpabili sa pribilehiyo sa paghatag. Si Jehova malipay dihang ang mga kabos malipayong mohatag kutob sa ilang maarangan.—2 Cor. 9:7.

¹⁵ Sa usa ka pobreng nasod sa Africa, gigahin sa pipila ka igsoon ang usa ka gamayng luna sa ilang uma aron gamiton ang halin sa abot niini alang sa pagsuportar sa buluhaton sa Gingharian. Sa mao gihapong nasod, usa ka gikinahanglan kaayong Kingdom Hall ang gieskedyul nga tukoron. Ang lokal nga mga igsoon gustong motabang pero ang proyekto naatol sa ilang tingtanom. Kay desididong motabang, sila miboluntaryo sa pagtukod sa Kingdom Hall sa maadlaw ug dayon mitrabaho sa ilang uma sa magabii aron matapos pod nila ang ilang pagpananom. Dalayegon gayod ang ilang pagsakripisyo! Sama sila sa mga igsoon sa Macedonia sa unang siglo. Bisan sa “hilabihang kakabos,” sila mihangyo nga moamot alang sa ilang mga igsoon. (2 Cor. 8:1-4) Sa susama, hinaot ang matag usa kanato ‘mohatag sumala sa panalangin nga gihatag ni Jehova kanato.’—Basaha ang Deuteronomio 16:17.

16. Sa unsang paagi nato maseguro nga dalawaton kang Jehova ang atong mga sakripisyo?

¹⁶ Apan duna kitay angayng bantayan. Sama sa karaang mga Israelinhon, angay natong paneguroon nga dalawaton sa Diyos ang atong boluntaryong mga halad. Angay kitang magpabiling balanse aron maatiman nato ang atong pangunang mga responsabilidad sa atong pamilya ug sa pagsimba kang Jehova. Dihang mohatag sa atong panahon ug materyal nga mga butang ngadto sa uban, angay kitang magbantay nga dili mapasagdan ang espirituwal o pisikal nga panginahanglan sa atong pamilya. Kay kon dili, sama rag naghatag kitag butang nga wala kanato. (Basaha ang 2 Corinto 8:12.) Dugang pa, angay natong padayong palig-onon ang atong espirituwalidad. (1 Cor. 9:26, 27) Apan makasalig kita nga kon magkinabuhi kita uyon sa mga sukdanan sa Bibliya, ang atong mga sakripisyo maghatag kanatog dakong kalipay ug katagbawan. Ug kini “ilabinang dalawaton” kang Jehova.

17, 18. Unsay atong pagbati sa tanang nagsakripisyo alang sa Gingharian, ug unsay angay natong konsiderahon?

¹⁷ Daghan sa atong mga igsoon ang ‘nagbubo sa ilang kaugalingon nga samag halad nga ilimnon’ pinaagi sa pagsuportar sa importanteng mga buluhaton sa Gingharian. (Filip. 2:17) Gipabilhan gayod nato kadtong nagpakitag mahinatagong tinamdan. Angay usab komendahan ang pagkamahinatagon ug pagsakripisyo sa mga asawa ug mga anak sa mga brader nga nanguna sa buluhaton sa Gingharian.

¹⁸ Aron makasuportar sa intereses sa Gingharian, gikinahanglan nato ang dakong paningkamot. Hinaot mainampoon natong konsiderahon kon sa unsang paagi kita dugang makasuportar niana kutob sa maarangan. Makalaom ka nga dako ang ganti karon ug mas dako pa sa “umaabot nga sistema sa mga butang.”—Mar. 10:28-30.