KARONG tuiga ang ika-100 nga anibersaryo sa “Photo-Drama of Creation,” pelikula nga gidisenyo aron palig-onon ang pagtuo diha sa Bibliya ingong Pulong sa Diyos. Sa panahong daghan ang nawad-ag pagtuo tungod sa ebolusyon, mga kritiko sa Bibliya, ug mga pagduhaduha, ang “Photo-Drama” nagpasiugda kang Jehova ingong Maglalalang.

Si Charles T. Russell, nga maoy nanguna sa mga Estudyante sa Bibliya, kanunayng nangitag labing epektibo ug paspas nga paagi sa pagpakaylap sa kamatuoran sa Bibliya. Kapin na sa 30 ka tuig silang nag-imprentag mga basahon. Karon usa ka bag-ong paagi ang nakapainteres kanila—ang pelikula.

Sa dekada sa 1890, unang gipailaila diha sa publiko ang way tingog nga pelikula. Sa 1903, usa ka relihiyosong pelikula ang gipasalida sa usa ka simbahan sa New York City. Busa bag-o pa lang ang industriya sa pelikula dihang maisogong gisugdan ni Russell ang mga preparasyon alang sa “Photo-Drama” niadtong 1912. Iyang nakita nga mapakaylap niini ang kamatuoran sa Bibliya sa paaging dili mahimo sa giimprentang mga basahon.

Ang walo ka oras nga “Photo-Drama” sagad ipasalida sa upat ka bahin. Kini dunay 96 ka mugbong girekord nga diskurso sa Bibliya nga gihatag sa usa ka mamumulong nga ilado ang tingog niadtong panahona. Ang daghang esena giduyogan ug klasikal nga musika. Gipatokar sa hanas nga mga operitor ang mga rekording sa tingog ug musika diha sa mga ponograpo, nga gidungan sa dekolor nga mga slide ug sa gidramang mga popular nga estorya sa Bibliya.

Kadaghanan sa esena sa pelikula ug sa glass slide gihimo diha sa mga commercial studio. Ang matag slide ug film gimanomano pagdibuho sa propesyonal nga mga pintor nga gikan sa Philadelphia, New York, Paris, ug London. Mitabang usab sa pagdibuho ang mga igsoon sa Art Room sa Bethel, nga sagad mag-ilis sa naguba nga mga slide. Gawas pa sa  gipalit nga mga film, ang mga Bethelite nag-shooting sa Yonkers, New York, nga nagdula sa papel ni Abraham, Isaac, ug sa manulonda nga nagpugong kang Abraham sa paghalad sa iyang anak.—Gen. 22:9-12.

Usa ka kauban ni Brader Russell miingon sa media nga pinaagi niini “linibo ang mainteres sa Kasulatan, nga labaw pa sa bisan unsang nahimo alang sa pagpakaylap ug relihiyosong mga mensahe.” Makadayeg kaha ang mga ministro sa Kakristiyanohan niining bag-ong paagi sa pagtabang sa mga tawong gigutom sa espirituwal? Sa kasukwahi, ilang gisaway ang “Photo-Drama,” nga ang uban migamit pa ganig dayag o dili dayag nga mga taktika aron dili kini matan-aw sa mga tawo. Sa usa ka teatro, gipaputol sa grupo sa mga ministro ang koryente.

Bisan pa niana, gidugok gihapon ang mga teatro diin libreng gipasalida ang “Photo-Drama.” Sa United States, mga 80 ka siyudad kada adlaw ang nagpasalida niana. Daghang tumatan-aw ang nahingangha kay mao pay pagkakita nilag ‘pelikula nga may tingog sa tawo.’ Pinaagig time-lapse photography, ilang nakita ang usa ka piso nga inanayng migawas sa iyang kabhang ug ang nindot nga pagbukhad sa usa ka bulak. Gipasiugda sa mga esena bahin sa siyensiya ang makapahinganghang kaalam ni Jehova. Sumala sa gihisgotan sa sinugdan, pagkakita sa usa ka tumatan-aw kang Brader Russell diha sa “Photo-Drama,” siya naghunahuna nga ang mamumulong ‘mora gyod ug si Brader Russell tan-awon kay kang Brader Russell mismo!’

Ang awtor ug film historian nga si Tim Dirks naghubit sa “Photo-Drama” ingong “ang unang dakong pelikula nga may tingog (girekord nga tingog sa tawo), naglihok nga esena, ug dekolor nga magic lantern slide.” Ang mga pelikula nga nag-una sa “Photo-Drama” nakagamit na sa pipila niini nga mga teknik apan kanang tanan wala pa nila gamita sa usa lang ka salida, ilabina kon bahin sa Bibliya. Ug walay ingon niana ka daghang tumatan-aw—nga mitotal ug mga siyam ka milyon sa North America, Europe, Australia, ug New Zealand sulod lang sa unang tuig!

Ang “Photo-Drama” unang gipasalida sa Enero 11, 1914, sa New York City. Pito ka bulan sa ulahi, mibuto ang Gubat sa Kalibotan I. Apan ang mga tawo sa tibuok kalibotan padayong mitan-aw sa “Photo-Drama,” diin ang mga esena sa umaabot nga mga panalangin sa Gingharian naghatag ug kahupayan kanila. Niadtong 1914, ang “Photo-Drama” maoy usa gayod ka nindot ug talagsaong salida.