Si David miingon nga ‘wala siya makakita ug matarong nga gibiyaan sa bug-os, ni sa kaliwat niini nga nagapangita ug tinapay.’ Gisulti niya kana base sa iyang kasinatian. Nahibalo gayod siya nga ang Diyos kanunayng mag-atiman sa iyang mga alagad. (Sal. 37:25) Apan ang mga pulong ni David wala magpasabot nga walay magsisimba ni Jehova nga makabsan sa mga panginahanglan sa kinabuhi.

May mga panahong si David mismo nakasinatig kalisod. Usa niana maoy sa dihang siya mikalagiw gikan kang Saul. Si David nakabsag pagkaon, ug nangayog tinapay alang sa iyang kaugalingon ug sa iyang mga kauban. (1 Sam. 21:1-6) Busa nianang higayona, siya ‘nangitag tinapay.’ Apan bisan nianang malisod nga panahon, nahibalo siya nga wala siya pasagdi ni Jehova. Ang tinuod, wala kitay mabasa nga si David nagpakilimos ug pagkaon aron mabuhi.

Sa Mateo 6:33, si Jesus nagpasalig nga itagana sa Diyos ang mga panginahanglan sa matinumanong mga alagad nga nag-una sa intereses sa Gingharian. Siya miingon: “Magpadayon sa pagpangita pag-una sa gingharian ug sa iyang pagkamatarong, ug kining tanang ubang mga butang [lakip ang pagkaon, ilimnon, ug besti] igadugang ra kaninyo.” Apan naghisgot usab si Jesus nga tungod sa paglutos, ang iyang “mga igsoon” mahimong makasinatig kagutom. (Mat. 25:35, 37, 40) Nahitabo kana kang apostol Pablo. May mga panahon nga siya nakasinatig kagutom ug kauhaw.—2 Cor. 11:27.

Si Jehova nag-ingon nga kita pagalutoson sa lainlaing paagi. Tingali itugot niya nga makasinati kitag kawalad-on samtang nagatabang kita sa pagtubag sa mga isyu nga gipatungha ni Satanas. (Job 2:3-5) Pananglitan, ang pipila sa atong isigka-Kristohanon, sama niadtong gibilanggo sa mga kampo konsentrasyon sa Nazi, nameligro tungod sa paglutos. Ang paghikaw kanilag igong pagkaon maoy usa ka yawan-ong paagi nga gigamit aron mabungkag ang integridad sa mga Saksi. Ang matinumanong mga Saksi nagmasinugtanon kang Jehova; wala niya sila pasagdi. Gitugot niya nga makasinati sila niini nga pagsulay, sama nga gitugot niya nga ang tanang Kristohanon makasinatig lainlaing pagsulay. Apan, segurado gayod nga si Jehova nagatabang sa tanan nga nag-antos tungod sa iyang ngalan. (1 Cor. 10:13) Mahimo natong hinumdoman ang giingon sa Filipos 1:29: “Gihatag kaninyo ang pribilehiyo alang kang Kristo, dili lamang sa pagbutang sa inyong pagtuo kaniya, kondili usab sa pag-antos alang kaniya.”

Si Jehova nagsaad nga siya magauban sa iyang mga alagad. Pananglitan, ang Isaias 54:17 nag-ingon: “Bisan unsa nga hinagiban nga buhaton batok kanimo dili magmalamposon.” Kini ug ang susamang mga saad nagpasalig nga luwason sa Diyos ang iyang katawhan ingong usa ka grupo. Apan ingong indibiduwal, ang usa ka Kristohanon tingali makasinatig mga pagsulay, bisan hangtod sa kamatayon.