1. Unsay pagbati ni Jehova sa pagbuhat, ug unsay iyang gihimo aron masinati kini sa iyang intelihenteng mga linalang?

SI Jehova maoy usa ka magbubuhat nga nalipay sa iyang pagbuhat. (Sal. 135:6; Juan 5:17) Aron masinati sa iyang intelihenteng mga linalang ang susamang kalipay ug katagbawan, si Jehova naghatag kanilag makapalipay ug makapatagbawng buluhaton. Pananglitan, iyang gipaapil ang iyang panganay nga Anak sa Iyang pagpanglalang. (Basaha ang Colosas 1:15, 16.) Ang Bibliya nag-ingon nga sa wala pa moanhi si Jesus sa yuta, siya tupad sa Diyos sa langit “ingon nga batid nga magbubuhat.”—Prov. 8:30.

2. Unsay nagpakita nga ang espiritung mga linalang kanunayng may hinungdanon ug makapatagbawng buluhaton?

² Gikan sa Genesis hangtod sa Pinadayag, ang Bibliya nagpatin-aw nga si Jehova kanunayng naghatag ug buluhaton sa iyang espiritung mga anak. Human makasala si Adan ug Eva ug gipagawas sa Paraiso, “gibutang [sa Diyos] sa sidlakan sa tanaman sa Eden ang mga kerubin ug ang nagdilaab nga sulab sa espada nga nagpadayon sa pagtuyok aron sa pagbantay sa dalan paingon sa kahoy sa kinabuhi.” (Gen. 3:24) Ang Pinadayag 22:6 nag-ingon usab nga si Jehova “nagpadala sa iyang manulonda aron ipakita  sa iyang mga ulipon ang mga butang nga kinahanglang mahitabo sa dili-madugay.”

3. Samtang dinhi sa yuta, giunsa pagsundog ni Jesus ang iyang Amahan?

³ Samtang dinhi sa yuta ingong hingpit nga tawo, si Jesus malipayong nagtuman sa buluhaton nga gihatag ni Jehova kaniya. Ingong pagsundog sa iyang Amahan, si Jesus naghatag usab ug hinungdanong buluhaton sa iyang mga tinun-an. Aron maghinamhinam sila niana, siya miingon: “Sa pagkatinuod gayod ako magaingon kaninyo, Siya nga magpasundayag ug pagtuo kanako, siya maghimo usab sa mga buhat nga akong ginahimo; ug pagahimoon niya ang mga buhat nga labaw pa niini, tungod kay ako moadto sa akong Amahan.” (Juan 14:12) Sa pagpasiugda sa pagkadinalian sa maong buluhaton, si Jesus miingon: “Kinahanglan nga atong buhaton ang mga buhat niya nga nagpadala kanako samtang adlaw pa; ang gabii nagsingabot sa dihang wala nay tawo nga makabuhat pa.”—Juan 9:4.

4-6. (a) Nganong mapasalamaton kita nga si Noe ug Moises mituman sa gipabuhat ni Jehova kanila? (b) Unsay kanunayng resulta kon tumanon sa mga tawo ang gipabuhat sa Diyos kanila?

⁴ Sa wala pa moanhi si Jesus sa yuta, ang mga tawo gihatagan nag makapatagbawng buluhaton. Bisag napakyas si Adan ug Eva sa pagtuman sa buluhaton nga gihatag kanila, ang uban nagmatinumanon. (Gen. 1:28) Si Noe gihatagag espesipikong instruksiyon kon unsaon pagtukod ang arka aron siya ug ang iyang pamilya maluwas sa Lunop. Iya gayong gisunod ang gisugo ni Jehova kaniya. Tungod sa iyang pagkamasinugtanon, kita buhi karon!—Gen. 6:14-16, 22; 2 Ped. 2:5.

⁵ Si Moises gihatagag espesipikong instruksiyon sa pagtukod sa tabernakulo ug sa pag-organisar sa mga saserdote, nga iya gayong gisunod. (Ex. 39:32; 40:12-16) Bisan karon, nakabenepisyo kita sa iyang pagkamatinumanon. Sa unsang paagi? Si apostol Pablo nagpatin-aw nga ang mga bahin sa Balaod maoy simbolo sa “maayong mga butang nga moabot.”—Heb. 9:1-5, 9; 10:1.

⁶ Ang Diyos naghatag sa iyang mga alagad ug lainlaing buluhaton sumala sa kon unsay gikinahanglan aron matuman ang iyang katuyoan. Bisan pa niana, ang buluhaton nga gihatag kanila kanunayng naghimaya kang Jehova ug naghatag ug kaayohan sa mga tawo. Tinuod gayod kini sa mga butang nga nahimo ni Jesus, sa wala pa siya moanhi sa yuta ug sa dihang dinhi na siya sa yuta. (Juan 4:34; 17:4) Sa susama, ang buluhaton nga gihatag kanato karon naghimaya kang Jehova. (Mat. 5:16; basaha ang 1 Corinto 15:58.) Nganong makaingon kita niana?

7, 8. (a) Ang mga Kristohanon karon nakapribilehiyo sa pagpakigbahin sa unsa nga mga buluhaton? (b) Unsay angay natong sanong sa mga instruksiyon ni Jehova?

⁷ Usa gayod ka dakong pribilehiyo nga si Jehova nagdapit sa dili hingpit nga mga tawo nga mahimong iyang isigkamagbubuhat. (1 Cor. 3:9) Kadtong nalangkit sa pagpanukod ug mga Assembly Hall, Kingdom Hall, ug mga pasilidad sa branch nakigbahin sa pisikal nga pagpanukod, sama kang Noe ug Moises. Nakigbahin ka man sa pag-ayo sa inyong Kingdom Hall o sa pagtukod sa atong tibuok kalibotang hedkuwarter sa Warwick, New York, pabilhi ang imong pribilehiyo sa pag-alagad niining paagiha. (Tan-awa ang drowing sa panid 23.) Sagrado kini nga pag-alagad. Apan ang tanang Kristohanon gidapit sa pagpakigbahin sa espirituwal nga pagpanukod—ang buluhatong pagsangyaw. Ang katuyoan usab niini mao ang paghimaya kang Jehova ug paghatag ug kaayohan sa masinugtanong katawhan. (Buh. 13:47-49) Ang organisasyon sa Diyos nagtaganag nahiangayng instruksiyon sa pagtuman niini nga buluhaton. Usahay magkahulogan kini ug kausaban sa  atong asaynment o sa buluhaton nga gihatag kanato.

⁸ Ang matinumanong mga alagad ni Jehova kanunayng nagpasakop sa iyang teokratikanhong instruksiyon. (Basaha ang Hebreohanon 13:7, 17.) Tingali dili dayon nato masabtan kon may kausaban sa atong asaynment. Apan nahibalo gayod kita sa mga kaayohan kon mokooperar kita kang Jehova sa bisan unsang kausaban nga iyang himoon.

9. Unsang maayong panig-ingnan ang gipakita sa mga ansiyano diha sa kongregasyon?

⁹ Ang dakong tinguha sa mga ansiyano sa pagtuman sa kabubut-on ni Jehova makita diha sa ilang paagi sa pagpanguna sa kongregasyon. (2 Cor. 1:24; 1 Tes. 5:12, 13) Sila andam maghago ug mosunod sa mga kausaban. Andam silang mopasibo sa bag-ong mga paagi sa pagsangyaw. Bisag ang pipila tingali sa sinugdan nagpanuko sa pag-organisar sa pagsangyaw pinaagig telepono, pagsangyaw diha sa mga pantalan, o publikong pagsangyaw gamit ang cart o lamesa, ilang nakita sa ulahi ang maayong mga resulta. Pananglitan, upat ka payunir sa Germany ang nakadesidir sa pagsangyaw sa dapit sa negosyo nga dugay nang wala masangyawi. Si Michael miingon: “Pipila na ka tuig nga wala mi makahimo niining paagiha sa pagsangyaw, busa gikulbaan mi. Seguradong nahibalo niini si Jehova, kay gitabangan mi niya nga magmalamposon sa among pagsangyaw nianang buntaga. Maayo na lang nga misunod mi sa instruksiyon diha sa Atong Ministeryo sa Gingharian ug misalig kang Jehova.” Andam ka bang mosulay sa bag-ong mga paagi sa pagsangyaw diha sa inyong teritoryo?

10. Unsang organisasyonal nga mga kausaban ang gihimo di pa dugay?

¹⁰ Usahay, may organisasyonal nga mga kausaban nga kinahanglang himoon. Di pa dugay, ang pipila ka gagmayng branch office gitapo sa ubang branch. Bisag kinahanglang mohimog kausaban ang mga igsoong nag-alagad sa maong mga branch, wala madugay ilang nakita ang mga kaayohan sa maong kausaban. (Eccl. 7:8) Pagkamalipayon niining sinserong mga magbubuhat kay sila nahimong bahin sa kasaysayan sa mga Saksi ni Jehova sa modernong panahon!

11-13. Unsang mga hagit ang giatubang sa pipila tungod sa organisasyonal nga mga kausaban?

¹¹ Makakat-on tag hinungdanong leksiyon gikan niadtong nag-alagad sa mga branch nga gitapo. Ang uban nag-alagad sa maong mga branch sulod na sa mga dekada. Ang usa ka magtiayon nga nag-alagad sa gamay nga pamilyang Bethel sa Central America gipabalhin ngadto sa pamilyang Bethel sa Mexico nga halos 30 ka pilo ang gidak-on. “Lisod kaayo ang pagbiya sa pamilya ug mga higala,” matod ni Rogelio. Si Juan, laing brader nga gipabalhin sa Mexico, miingon: “Mora kag gipanganak pag-usab; kinahanglan kang mag-ugmad ug bag-ong mga pakighigala. Kinahanglan kang mopasibo sa bag-ong mga kostumbre ug paagi sa paghunahuna.”

¹² Ang mga Bethelite gikan sa pipila ka branch office sa Europe nga gipabalhin ngadto sa branch office sa Germany nag-atubang usab ug mga hagit. Kon ganahan kag talan-awon sa kabukiran, masabtan nimo ang gibati niadtong taga-Switzerland nga mibiya sa ilang nindot nga kabukiran sa Alps. Ug kadtong gikan sa Austria sa sinugdan gimingaw sa mas relaks nga kinabuhi sa ilang branch.

¹³ Ang mga igsoon nga mobalhin sa laing nasod kinahanglang mohimog mga kausaban. Kinahanglang maanad sila sa ilang bag-ong puy-anan, kaubanan, ug lagmit sa bag-ong trabaho. Kinahanglang mopasibo usab sila sa bag-ong kongregasyon, bag-ong teritoryo, ug tingali sa bag-ong pinulongan. Dili tingali sayon ang paghimo niini nga mga kausaban. Apan, daghang Bethelite ang mihimo niana. Ngano?

14, 15. (a) Giunsa pagpakita sa daghan nga ilang gipabilhan ang pribilehiyo sa pagbuhat uban kang Jehova? (b) Nganong nahimo silang maayong panig-ingnan alang kanato?

 ¹⁴ Si Grethel miingon: “Gidawat nako ang imbitasyon kay paagi kini nga ikapakita nako kang Jehova nga ang akong gugma kaniya wala magdepende sa nasod, bilding, o pribilehiyo.” Si Dayska miingon: “Giisip nako nga gikan kang Jehova ang imbitasyon, mao nga gidawat dayon nako kana.” Susama niana ang giingon ni André ug Gabriela: “Nakita namo nga daghan mig kahigayonan sa pag-alagad kang Jehova kon among ihiklin ang among personal nga kagustohan. Giingnan namo ang among kaugalingon, ‘Kon usbon ni Jehova ang huyop sa hangin, mas maayo nga among ipahiuyon ang layag imbes sungsongon ang hangin.’”

¹⁵ Tungod sa pagtapo sa mga branch, ang pipila ka Bethelite giasayn ingong payunir. Mao kini ang nahitabo sa pipila ka Bethelite dihang gitapo ang branch sa Denmark, Norway, ug Sweden ug nahimong branch office sa Scandinavia. Lakip kanila si Florian ug Anja, nga miingon: “Among gilantaw ang among bag-ong asaynment ingong makapahinam nga hagit. Para namo, usa ka pribilehiyo ang pag-alagad kang Jehova bisan asa. Makaingon gyod mi nga dagaya ming gipanalanginan!” Bisag kadaghanan kanato wala makasinati niana, masundog ba nato ang pagkaandam sa maong mga igsoon sa pag-una sa intereses sa Gingharian? (Isa. 6:8) Panalanginan gayod ni Jehova kadtong nagpabili sa ilang pribilehiyo sa pagbuhat uban kaniya, bisan asa man kana.

16. (a) Unsay giawhag kanato sa Galacia 6:4? (b) Unsang kinadak-ang pribilehiyo ang mahimong mabatonan ni bisan kinsa?

¹⁶ Ang dili hingpit nga mga tawo may tendensiya nga itandi ang ilang kaugalingon sa uban. Apan ang Pulong sa Diyos nag-awhag kanato nga magpokus sa kon unsay atong mahimo. (Basaha ang Galacia 6:4.) Dili tanan kanato ang mahimong ansiyano, payunir, misyonaryo, o Bethelite. Tinuod,  maayo kini nga mga pribilehiyo. Apan dili nato kalimtan nga nabatonan natong tanan ang kinadak-ang pribilehiyo. Mao kana ang pagkahimong isigkamagbubuhat ni Jehova diha sa ministeryo. Usa kini ka pribilehiyo nga angay natong pabilhan!

17. Samtang naglungtad ang kalibotan ni Satanas, unsay mahimo nimong masinati, ug nganong dili ka angayng maluya niana?

¹⁷ Samtang naglungtad ang kalibotan ni Satanas, mahimong malimitahan ang atong pag-alagad kang Jehova. Tingali may mga butang nga dili nato makontrolar, sama sa responsabilidad sa pamilya, panglawas, o uban pang sirkumstansiya. Apan dili ta angayng maluya tungod niana. Ayaw pakamenosa ang imong pribilehiyo sa pagbuhat uban sa Diyos pinaagi sa pagpamatuod bahin sa iyang ngalan ug Gingharian. Ang labing hinungdanon mao nga ikaw nagabuhat uban kang Jehova kutob sa imong maarangan ug nagaampo nga tabangan niya kadtong makahimog labaw pa sa imong mahimo. Hinumdomi, ang matag tawo nga nagadayeg sa ngalan ni Jehova maoy bililhon sa iyang mga mata!

18. Unsay andam natong isakripisyo, ug ngano?

¹⁸ Bisan pa sa atong kahuyangan, gigamit gihapon kita ni Jehova ingong iyang isigkamagbubuhat. Angay gayod natong pabilhan ang pribilehiyo sa pagbuhat uban sa atong Diyos niining kataposang mga adlaw! Busa, angay nga andam tang mosakripisyo sa atong kaayohan, kay nahibalo kita nga sa bag-ong kalibotan, ihatag ni Jehova kanato ang “tinuod nga kinabuhi”—kinabuhing walay kataposan sa malipayon ug malinawong kahimtang.—1 Tim. 6:18, 19.

19. Unsay gisaad ni Jehova kanato?

¹⁹ Anaa na kita sa ganghaan sa bag-ong kalibotan! Busa, angay natong hinumdoman ang giingon ni Moises sa mga Israelinhon sa hapit na silang mosulod sa Yutang Saad: “Ipahinabo gayod ni Jehova nga imong Diyos nga makabaton ka ug kadagaya sa matag buhat sa imong kamot.” (Deut. 30:9) Human sa Armagedon, kadtong puliking nagabuhat uban sa Diyos papuy-on sa yuta nga gisaad kanila. Dayon, ang atong bag-ong asaynment mao ang paghimo sa yuta nga usa ka matahom nga paraiso!