SA Septiyembre 6, 1926, ang usa ka Hapon nga nagapanawng magtatan-aw sa United States mibalik sa Japan ingong misyonaryo. Mitagbo kaniya ang bugtong tigsuskriber sa The Watch Tower, kinsa nag-organisar ug grupo sa pagtuon sa Bibliya sa Kobe. Sa maong siyudad, gipahigayon sa mga Estudyante sa Bibliya ang ilang unang asembliya sa Enero 2, 1927. Trayentay sayis ang nanambong, ug walo ang nabawtismohan. Kadto maoy maayong sinugdanan. Apan sa unsang paagi masangyawan niining gamayng grupo ang 60 ka milyong tawo sa Japan nga kinahanglang madan-agan sa kahayag sa kamatuoran?

Sa Mayo 1927, gisugdan sa masibotong mga Estudyante sa Bibliya ang kampanya sa publikong pagsangyaw aron ipahibalo ang sunodsunod nga diskurso sa Bibliya. Sa unang pakigpulong, nga ipahigayon sa Osaka, ang mga brader nagbutang ug mga karatula diha sa daplin sa dalan ug dagkong billboard sa tibuok siyudad ug nagpadalag 3,000 ka imbitasyon ngadto sa prominenteng mga tawo. Sila nanagtag ug 150,000 ka imbitasyon ug nag-anunsiyo sa pakigpulong diha sa dagkong mantalaan sa Osaka ug sa 400,000 ka tiket sa tren. Sa adlaw sa pakigpulong, duha ka eroplano ang naghulog ug 100,000 ka imbitasyon diha sa siyudad. Mga 2,300 ang miadto sa Osaka Asahi Hall aron maminaw sa pakigpulong, “Ang Gingharian sa Diyos Haduol Na.” Mga 1,000 pa ang gibalibaran kay wala nay kalingkoran. Human sa pakigpulong, kapig 600 sa mitambong ang nagpabilin alang sa pangutanag tubag nga sesyon. Sa misunod nga mga bulan, may gipahigayon nga mga pakigpulong sa Kyoto ug sa ubang siyudad sa kasadpang Japan.

Sa Oktubre 1927, ang mga Estudyante sa Bibliya naghikay ug mga pakigpulong sa Tokyo. Ang mga imbitasyon gipanagtag ngadto sa inilang mga indibiduwal—lakip na sa primer ministro, mga membro sa parliamento, ug mga lider sa relihiyon ug sa militar. Sila migamit ug mga plakard, mantalaan, ug 710,000 ka imbitasyon. Mikabat ug 4,800 ang mitambong sa tulo ka diskurso diha sa kaulohan sa Japan.

Ang mga colporteur (payunir) dakog papel sa pagdala sa mensahe sa Gingharian ngadto sa kabalayan. Si Matsue Ishii, usa sa unang mga colporteur sa Japan, ug ang iyang banang si Jizo, nagsangyaw gikan sa Sapporo, sa halayong amihanan, ngadto sa Sendai, Tokyo, Yokohama, Nagoya, Osaka, Kyoto, Okayama, ug Tokushima—mga 75 porsiyento sa nasod. Si Sister Ishii ug ang edarang sister nga si Sakiko Tanaka, magsul-ob ug pormal nga kimono sa pagbisita sa taas nga mga opisyales sa gobyerno. Usa kanila mihangyo ug 300 ka set sa librong The Harp of God ug Deliverance aron ibutang sa librarya sa mga bilanggoan.

Si Katsuo ug Hagino Miura nakadawat ug mga libro gikan kang Sister Ishii ug nakaamgo dayon nga kini  ang kamatuoran. Sila nabawtismohan sa 1931 ug nahimong colporteur. Si Haruichi ug Tane Yamada, ug daghan sa ilang paryente midawat sa mensahe sa Gingharian sa wala pa ang 1930. Ang magtiayong Yamada nag-colporteur, ug ang ilang anak nga babaye, si Yukiko, nahimong Bethelite sa Tokyo.

Kaniadto, ang mga sakyanan mahal kaayo ug ang mga dalan dili maayo. Busa si Kazumi Minoura ug ang ubang batan-ong colporteur migamit ug mga treyler nga walay makina. Ila kining gianggaag Jehu, nga gikan sa ngalan sa paspas mopadagan nga magkakaro nga nahimong usa sa mga hari sa Israel. (2 Hari 10:15, 16) May tulo ka Dagkong Jehu nga ang matag usa 2.2 metros ang gitas-on, 1.9 metros ang gilapdon, ug 1.9 metros ang gihabogon; ug unom ka payunir ang masigo. Dugang pa, may 11 ka Gagmayng Jehu nga guyoron sa bisikleta. Hinimo kini sa branch sa Japan ug duha ang makasakay. Si Kiichi Iwasaki, kinsa mitabang paghimo sa mga Jehu, miingon: “Ang matag Jehu may tolda ug baterya sa awto nga mosuplay ug koryente sa suga.” Ang mga colporteur nagpadan-ag sa kahayag sa kamatuoran sa tibuok Japan nga nagtulod ug nagguyod sa mga Jehu diha sa kabukiran ug kawalogan, gikan sa Hokkaido, sa amihanan, ngadto sa Kyushu, sa habagatan.

Ang colporteur nga si Ikumatsu Ota miingon: “Inig-abot namo sa usa ka lungsod, ipahimutang namo ang among Jehu sa daplin sa suba o sa kapatagan. Una, among duawon ang prominenteng mga tawo sa lungsod, sama sa mayor, ug dayon moduaw mi sa kabalayan aron itanyag ang among literatura. Human makobrehi ang teritoryo, mobalhin mi sa sunod nga lungsod.”

Dihang gipahigayon sa 36 ka Estudyante sa Bibliya sa Kobe ang ilang unang asembliya, kadto maoy gamayng sinugdanan. (Zac. 4:10) Lima lang ka tuig human niana—sa 1932—may 103 ka colporteur ug magmamantala sa Japan nga nagtaho sa ilang buluhaton, nga nakapahimutang ug kapig 14,000 ka libro. Karon, ang maayong pagkaorganisar nga publikong pagsangyaw ginahimo sa dagkong siyudad sa Japan, ug duolag 220,000 ka magmamantala ang nagapadan-ag sa ilang kahayag sa Land of the Rising Sun.—Gikan sa among archives sa Japan.