ANG atong Maglalalang nagpasidungog sa mga tawo pinaagi sa paghatag kanilag bililhong gasa—ang kagawasan sa pagpili. Dugang pa, siya dagayang nagpanalangin niadtong kinabubut-ong naggamit sa ilang kagawasan sa pagpili alang sa matuod nga pagsimba ug naghimo sa ilang maarangan sa paghimaya sa iyang balaang ngalan ug pagpaluyo sa iyang katuyoan. Dili gusto ni Jehova nga mosunod ta niya tungod lang sa kahadlok o kay napugos. Hinunoa, gipabilhan gayod niya ang kinasingkasing nga debosyon nga gipalihok sa tiunayng gugma ug halalom nga pagpabili.

Pananglitan, dihang ang mga Israelinhon didto sa kamingawan sa Sinai, si Jehova nagsugo kanila sa pagtukod ug dapit sa pagsimba. Siya miingon: “Gikan sa inyong taliwala pagkuha ug amot alang kang Jehova. Ang matag tawo nga andam ug kasingkasing padad-a niini ingong amot alang kang Jehova.” (Ex. 35:5) Ang matag Israelinhon makahatag sa bisan unsa nga ilang maarangan, ug ang matag kinabubut-ong halad—bisan unsa man kini o pila may kantidad niini—magamit sa hustong paagi sa pagtuman sa katuyoan sa Diyos. Unsay ilang sanong?

“Ang matag usa kansang kasingkasing nagtukmod kaniya,” “ang matag usa kansang espiritu nagdasig kaniya,” ug “ang matag usa nga andam ug kasingkasing” mihimog kinabubut-ong halad. Ang mga lalaki ug babaye kinabubut-ong nagdalag mga butang alang kang Jehova: mga barpin, ariyos, singsing, bulawan, plata, tumbaga, asul nga hilo, balhibo sa karnero nga tininag morado, hilo nga sanag-pula gikan sa coccus, pino nga lino, balhibo sa kanding, panit sa laking karnero nga tininag pula, panit sa poka, akasya, mga mutya, balsamo, ug lana. Sa ulahi, “ang mga butang nga giamot igo na alang sa tanang buluhaton nga pagabuhaton, ug gani nagsobra pa.”—Ex. 35:21-24, 27-29; 36:7.

Ang labing nakapalipay kang Jehova mao ang andam nga kasingkasing niadtong misuportar sa putling pagsimba, dili ang materyal nga mga halad. Natukmod usab sila sa paghatag sa ilang panahon ug kusog. “Ang tanang babaye nga maalamon sa kasingkasing nagkalinyas pinaagi sa ilang mga kamot,” miingon ang asoy. Gani, “ang tanang babaye kansang mga kasingkasing nagtukmod kanila uban ang kaalam nagkalinyas sa balhibo sa kanding.” Dugang pa, si Jehova naghatag kang Bezalel ug ‘kaalam, pagsabot, ug kahibalo sa tanang matang sa pagkahanas sa pagbuhat.’ Gani, ang Diyos nagpuno kang Bezalel ug Oholiab ug kaalam sa kasingkasing sa pagbuhat sa tanan nga gisugo kanila.—Ex. 35:25, 26, 30-35.

Dihang giawhag ni Jehova ang Israel sa paghatag ug amot, masaligon siya nga “ang matag tawo nga andam ug kasingkasing” magpaluyo sa matuod nga pagsimba. Sa baylo, siya dagayang nagpanalangin kanila—naggiya ug naghatag kanilag kalipay. Busa gipakita ni Jehova nga dihang panalanginan niya ang iyang mga alagad nga andam ug kasingkasing, itagana gayod niya ang materyal o katakos nga gikinahanglan aron matuman ang iyang kabubut-on. (Sal. 34:9) Kon kinabubut-on kang mag-alagad kang Jehova, seguradong panalanginan niya ang imong andam nga kasingkasing.