1, 2. Unsay hunahuna sa pipila bahin sa Diyos?

DAGHAN ang naghunahuna nga dili hinungdanon sa Diyos ang ilang ginabuhat. Gani, ang uban nagtuo nga ang Diyos dili kaayo interesado sa nagakahitabo sa mga tawo. Human makapahinabog dakong kadaot ang Super Typhoon Yolanda sa Visayas niadtong Nobyembre 2013, ang mayor sa usa ka dakong siyudad miingon: “Lagmit tua sa laing dapit ang Diyos.”

² Ang uban naghunahuna nga dili makita sa Diyos ang ilang ginabuhat. (Isa. 26:10, 11; 3 Juan 11) Sama sila sa gihubit ni apostol Pablo dihang siya miingon: “Sila wala mouyon nga ilhon ang Diyos.” Ang maong mga tawo “napuno sa tanang pagkadili-matarong, pagkadaotan, hakog nga pangibog, [ug] kangil-ad.”—Roma 1:28, 29.

3. (a) Unsang mga pangutana bahin sa Diyos ang ikasukna nato sa kaugalingon? (b) Sa Bibliya, sagad sa unsa nagtumong ang “kamot” sa Diyos?

³ Komosta sa atong bahin? Dili sama niadtong gihisgotan ganina, nasayod kita nga si Jehova nakakita sa tanan natong gibuhat. Pero, nagtuo ba sab ta nga ang Diyos interesado kanato? Nakita ba nato ang iyang matinabangong kamot? Dugang pa, kita ba nalakip niadtong giingon ni Jesus nga mga tawong “makakita sa Diyos”? (Mat. 5:8) Aron mahibaloan ang kahulogan niana, susihon una nato ang  mga pananglitan sa Bibliya niadtong kinsa nakakita sa paglihok sa kamot sa Diyos ug niadtong wala. Dayon, atong makat-onan kon sa unsang paagi mas tin-aw natong makita ang kamot ni Jehova diha sa atong kinabuhi pinaagi sa atong mga mata sa pagtuo. Samtang atong konsiderahon kining mga puntoha, hinumdomi nga sa Bibliya ang “kamot” sa Diyos sagad nagtumong sa iyang aktibong gahom, nga iyang gigamit sa pagtabang sa iyang mga alagad ug sa pagpildi sa iyang mga kaaway.—Basaha ang Deuteronomio 26:8.

4. Nganong ang mga kaaway sa Israel wala makakita sa kamot sa Diyos?

⁴ Sa sayong bahin sa kasaysayan sa Israel, ang mga tawo may kahigayonan nga makita ug madungog kon giunsa pagtabang sa Diyos ang Israel. Si Jehova milagrosong nagluwas sa iyang katawhan gikan sa Ehipto, ug nagpildi sa daghang hari. (Jos. 9:3, 9, 10) Bisan pa sa nakita ug nadungog sa halos tanang hari sa kasadpang bahin sa Jordan, “sila nagtigom sa tingob nga bug-os nagkauyon sa pagpakiggubat kang Josue ug sa Israel.” (Jos. 9:1, 2) Bisan niadtong nagsugod na sa pagpakig-away ang maong mga hari, may kahigayonan unta silang makita ang kamot sa Diyos. Pinaagi sa gahom ni Jehova, “ang adlaw mihunong, ug ang bulan wala molihok, hangtod nga ang nasod nakapanimalos sa mga kaaway niini.” (Jos. 10:13) Apan gitugotan ni Jehova nga ‘magmatig-a ang kasingkasing [sa ilang mga kaaway] aron sila makiggubat batok sa Israel.’ (Jos. 11:20) Ang mga kaaway sa Israel wala moila nga ang Diyos mao ang nakiggubat alang sa Israel, ug busa napildi sila.

5. Unsay wala ilha sa daotang hari nga si Ahab?

⁵ Sa ulahi, ang daotang hari nga si Ahab may mga kahigayonan unta nga makita ang kamot sa Diyos. Si Elias miingon kaniya: “Walay yamog ni ulan nga moabot, gawas kon imando sa akong pulong!” (1 Hari 17:1) Dayag nga ang maong pamulong naggikan kang Jehova, pero wala motuo si Ahab. Sa ulahi, nakita ni Ahab ang kalayo nga nahulog gikan sa langit dihang miampo si Elias nga lamyon unta ang iyang halad. Dayon, gipaila ni Elias nga taposon ni Jehova ang hulaw, nga miingon kang Ahab: “Lugsong aron dili makahawid kanimo ang pagbundak sa ulan!” (1 Hari 18:22-45) Nakita ni Ahab nga nahitabo kining tanan pero wala gihapon niya ilha nga kadto nagpasundayag sa gahom sa Diyos. Kini ug ang nag-unang mga pananglitan nagtudlo kanatog importanteng leksiyon—kinahanglang makita nato ang paglihok sa kamot ni Jehova.

6, 7. Unsay tin-awng nakita sa pipila sa panahon ni Josue?

⁶ Kasukwahi niadtong daotang mga hari, ang uban nakakita sa kamot sa Diyos, bisan pag diha sila sa situwasyon nga gihisgotan ganina. Pananglitan, dili sama sa kadaghanang nasod nga nakiggubat batok sa Israel sa panahon ni Josue, ang mga Gabaonhon nakigdait sa mga Israelinhon. Ngano? Sila miingon: “Ang imong mga sulugoon nanganhi maylabot sa ngalan ni Jehova nga imong Diyos, kay kami nakadungog sa iyang kabantog ug sa tanan nga iyang gihimo.” (Jos. 9:3, 9, 10) Maalamon nilang giila nga ang Israel gipaluyohan sa matuod nga Diyos.

⁷ Si Rahab usab nakakita sa kamot sa Diyos. Human mahibaloi kon giunsa pagluwas ni Jehova ang iyang katawhan, iyang giingnan ang duha ka Israelinhong espiya: “Nahibalo ako nga ihatag gayod ni Jehova kaninyo ang yuta.” Bisag mameligro ang iyang kinabuhi, siya nagpakitag pagtuo nga luwason siya ni Jehova ug ang iyang pamilya.—Jos. 2:9-13; 4:23, 24.

8. Sa unsang paagi nakita sa pipila ka Israelinhon ang kamot sa Diyos?

⁸ Dili sama sa daotang hari sa Israel nga si  Ahab, ang pipila ka Israelinhon nga nakakita sa kalayo gikan sa langit agig tubag sa pag-ampo ni Elias miila nga kadto gipahinabo sa kamot sa Diyos. Sila miingon: “Si Jehova mao ang matuod nga Diyos!” (1 Hari 18:39) Para nila, klaro nga kadto maoy gahom sa Diyos!

9. Sa unsang paagi kita makakita kang Jehova ug sa iyang kamot karon?

⁹ Ang maayo ug dili maayong mga pananglitan nga atong nahisgotan makatabang nato sa pagsabot sa kahulogan sa pagkakita sa Diyos o sa iyang kamot. Samtang kita makaila kaniya, kita usab makakita sa iyang kamot kay atong makita ang iyang mga hiyas ug gibuhat pinaagi sa “mga mata sa [atong] kasingkasing.” (Efe. 1:18) Seguradong gusto natong mahisama niadtong klarong nakakita kaniadto ug karon sa pagpaluyo ni Jehova sa iyang katawhan. Apan, duna ba gyod tay pamatuod nga ang Diyos nagtabang sa iyang katawhan karon?

10. Unsay pamatuod nga si Jehova nagtabang sa mga tawo karon? (Tan-awa ang hulagway sa sinugdan sa artikulo.)

¹⁰ Daghan kitag rason sa pagtuo nga si Jehova nagpadayon sa pagtabang sa mga tawo. Kanunay natong madunggan ang mga eksperyensiya bahin sa mga indibiduwal nga nag-ampo alang sa espirituwal nga tabang ug dayon nakadawat niana. (Sal. 53:2) Samtang namalaybalay sa usa ka gamayng isla sa Pilipinas, nahibalag ni Allan ang usa ka babaye kinsa misugod paghilak. Si Allan miingon: “Nianang buntaga, miampo siya kang Jehova nga unta makaplagan siya sa mga Saksi. Sa tin-edyer pa, nakatuon siyag Bibliya uban sa mga Saksi pero wala na siyay kontak nila dihang siya naminyo ug mibalhin sa maong isla. Dali ra kaayong gitubag sa Diyos ang iyang pag-ampo maong siya mihilak.” Wala pay usa ka tuig, siya nagpahinungod sa iyang kinabuhi kang Jehova.

11, 12. (a) Sa unsang mga paagi nga si Jehova nagtabang sa iyang mga alagad? (b) Iasoy ang eksperyensiya sa usa ka sister nga nakadawat ug tabang sa Diyos.

¹¹ Daghang alagad sa Diyos ang nakakita sa iyang tabang dihang gihunong nila ang mga bisyo sama sa pagpanigarilyo, pag-abuso sa droga, o pagtan-awg pornograpiya. Ang pipila miingon nga kadaghan nilang gisulayan ang paghunong niana sa kaugalingong paningkamot pero napakyas sila. Apan, dihang midangop sila kang Jehova alang sa tabang, siya naghatag kanilag “gahom nga labaw sa kasarangan,” ug nabuntog ra nila ang ilang kahuyangan.—2 Cor. 4:7; Sal. 37:23, 24.

¹² Si Jehova nagtabang sa iyang mga alagad sa pagsagubang sa personal nga mga problema. Pananglitan, si Amy nalisdan dihang naasayn siya nga motabang sa pagtukod ug Kingdom Hall ug puy-anan sa mga misyonaryo sa usa ka gamayng isla sa Pacific. Siya miingon: “Nagpuyo mi sa usa ka gamayng hotel, ug kada buntag moagi mi sa gibahaang karsada paingon sa dapit nga gitukoran.” Kinahanglan usab niyang mopasibo sa lokal nga mga kostumbre, ug sagad walay koryente o tubig didto. Si Amy midugang: “Misamot pa ang kahimtang kay nakasulti kog sakit sa usa sa mga sister nga kauban namo sa pagtukod. Mipauli ko sa hotel nga mibating pakyas. Sa ngitngit nakong kuwarto sa hotel, tim-os kong miampo kang Jehova, nga nangayog tabang.” Dihang mibalik na ang koryente, gibasa ni Amy ang usa ka artikulo sa Bantayanang Torre bahin sa graduwasyon sa Gilead nga naghisgot sa mga kalisdanan nga iyang naatubang: bag-ong kultura, kamingaw, pagpakiglabot sa uban. Siya miingon: “Akong gibati nga nakigsulti si Jehova nako niadtong gabhiona. Nagdasig to nako sa pagpadayon sa akong asaynment.”—Sal. 44:25, 26; Isa. 41:10, 13.

13. Unsay pamatuod nga si Jehova nagpaluyo sa iyang katawhan sa “pagdepensa ug sa pagtukod sa legal nga paagi” sa maayong balita?

¹³ Ang kamatuoran nga ang mga Saksi ni Jehova  nagmalamposon sa “pagdepensa ug sa pagtukod sa legal nga paagi” sa maayong balita maoy laing pamatuod sa gamhanang kamot ni Jehova. (Filip. 1:7) Ang pipila ka gobyerno misulay sa pagpahunong sa bug-os sa buluhaton sa katawhan sa Diyos. Apan ang mga Saksi ni Jehova nakadawat ug labing menos 268 ka kadaogan sa korte suprema, lakip na ang 24 nga nadaog diha sa European Court of Human Rights sukad lang sa tuig 2000. Klaro nga walay makapugong sa kamot sa Diyos.—Isa. 54:17; basaha ang Isaias 59:1.

14. Sa unsang paagi nato makita ang kamot sa Diyos diha sa atong pagsangyaw ug sa atong panaghiusa?

¹⁴ Ang tibuok kalibotang pagsangyaw sa maayong balita milampos tungod sa tabang sa Diyos. (Mat. 24:14; Buh. 1:8) Lakip niana ang panaghiusa karon sa katawhan ni Jehova gikan sa lainlaing kanasoran—butang nga dili masundog sa kalibotan—ug bisan ang wala mag-alagad kang Jehova nakaingon: “Ang Diyos anaa gayod sa inyong taliwala.” (1 Cor. 14:25) Busa, daghan kitag pamatuod nga ang Diyos nagatabang sa iyang katawhan. (Basaha ang Isaias 66:14.) Pero komosta sa imong bahin? Klaro ba nimong nakita ang kamot ni Jehova diha sa imong kinabuhi?

15. Ipatin-aw kon nganong usahay dili nato klarong makita ang kamot ni Jehova diha sa atong kinabuhi.

¹⁵ Unsa ang pipila ka rason kon nganong dili nato klarong makita ang kamot sa Diyos diha sa atong kinabuhi? Mahimong mabug-atan kita sa mga problema. Kon mahitabo kini, mahimong makalimot kita nga kadaghan na tang gitabangan ni Jehova. Dihang gihulga si Elias ni Raynang Jezebel, siya nakalimot sa makadiyot nga gitabangan na siya sa Diyos kaniadto. Maylabot kang Elias, ang Bibliya nag-ingon: “Siya mihangyo nga ang iyang kalag mamatay unta.” (1 Hari 19:1-4) Unsay solusyon sa problema ni Elias? Kinahanglan siyang modangop kang Jehova alang sa pagdasig.—1 Hari 19:14-18.

16. Unsay atong mahimo aron makita ang kamot sa Diyos sama kang Job?

¹⁶ Si Job naghunahuna pag-ayo sa iyang mga problema mao nga wala niya makita ang  mga butang sumala sa panglantaw sa Diyos. (Job 42:3-6) Sama ni Job, kinahanglan tingali kitang maningkamot aron makita ang Diyos. Unsaon nato kana paghimo? Kinahanglan natong pamalandongon ang giingon sa Kasulatan bahin sa atong mga problema. Samtang makita nato kon giunsa ta pagtabang ni Jehova, siya mahimong mas tinuod kanato. Dayon, sama kang Job, kita makaingon: “Sa hulungihong nakadungog ako bahin kanimo, apan karon ang akong mata nakakita kanimo.”

17, 18. (a) Sa unsang mga paagi tingali nga atong makita nga si Jehova nagtabang kanato? (b) Pag-asoy ug eksperyensiya nga nagpakita kon giunsa ta pagtabang sa Diyos karon.

¹⁷ Sa unsang paagi tingali nato makita ang kamot ni Jehova? Niay pipila ka pananglitan: Tingali mibati kang gitabangan ka sa Diyos aron makaplagan ang kamatuoran. May higayon bang mitambong kag tigom, nakapaminawg pakigpulong, ug miingon: “Mao gyod nay akong gikinahanglan”? O tingali gitubag ang imong pag-ampo. Lagmit midesisyon ka sa pagpalapad sa imong ministeryo ug imong nakita kon giunsa ka pagtabang ni Jehova sa pagkab-ot sa imong tumong. O nakasulay ka ba nga gibiyaan nimo ang imong trabaho kay makaapektar sa imong pag-alagad ug dayon nakita nimo nga natuman ang saad sa Diyos: “Dili ko gayod ikaw . . . pagatalikdan”? (Heb. 13:5) Pinaagi sa pagpabiling nagtukaw sa espirituwal, atong makita nga si Jehova nagtabang kanato sa daghang paagi.

¹⁸ Si Sarah nga taga-Kenya miasoy sa iyang eksperyensiya: “Miampo ko bahin sa usa ka Bible study nga morag walay pagpabili sa iyang pagtuon. Nangutana ko kang Jehova kon angay ba nakong hunongon ang pagtuon. Human nakog ingon ug ‘Amen,’ mikiring ang telepono. Ang Bible study mitawag ug nangutana kon puwede ba siyang motambong sa tigom uban nako! Morag dili ko makatuo!” Kon atong hunahunaon kon giunsa ta pagtabang sa Diyos, atong makita ang iyang matinabangong kamot. Si Rhonna, usa ka sister nga taga-Asia, miingon nga kinahanglan natong tun-an nga makita kon giunsa ta pagtabang ni Jehova. Siya midugang: “Dihang nahimo na nimo kini, imong mahibaloan nga interesado gyod siya kanato.”

19. Unsa pay kinahanglang buhaton aron mahiapil niadtong makakita sa Diyos?

¹⁹ Si Jesus miingon: “Malipayon ang mga putli sa kasingkasing, sanglit sila makakita sa Diyos.” (Mat. 5:8) Sa unsang paagi kita mahimong “putli sa kasingkasing”? Kinahanglan kitang magmahinlo sa hunahuna ug hunongon ang sayop nga panggawi. (Basaha ang 2 Corinto 4:2.) Samtang atong pauswagon ang atong espirituwalidad ug ipakita ang maayong panggawi, kita mahiapil niadtong makakita sa Diyos. Hisgotan sa sunod nga artikulo kon sa unsang paagi ang atong pagtuo makatabang kanato nga mas tin-awng makita ang kamot ni Jehova diha sa atong kinabuhi.