1. Unsa ka importante kang Jesus ang pagsangyaw? Ipatin-aw.

SI Jesus ganahan kaayong maghisgot bahin sa Gingharian sa Diyos. Sumala sa Bibliya, mas daghang beses siyang naghisgot sa Gingharian kay sa bisan unsang topiko. Kapig 100 ka beses niya kining gihisgotan panahon sa iyang ministeryo. Ang Gingharian importante gayod kaniya.—Basaha ang Mateo 12:34.

2. Pilay lagmit presente dihang gihatag ang sugo sa Mateo 28:19, 20, ug nganong makaingon ta niana?

² Wala madugay human sa iyang pagkabanhaw, si Jesus nakigkita sa kapig 500 ka potensiyal nga magmamantala sa Gingharian. (1 Cor. 15:6) Lagmit sa maong okasyon nga iyang gihatag ang sugo nga isangyaw ang mensahe sa Gingharian sa “katawhan sa tanang kanasoran”—usa ka lisod nga buluhaton kaniadto! * Gitagna ni Jesus nga kining dakong buluhaton magpadayon hangtod sa “kataposan sa sistema sa mga butang,” ug natuman gayod kana. Lagmit  nakatampo ka sa katumanan sa maong sugo ug tagna.—Mat. 28:19, 20.

3. Sa unsang tulo ka natad nga kita nasangkapan sa pagtuman sa sugo sa pagsangyaw sa maayong balita?

³ Human ihatag ang sugo nga mosangyaw, si Jesus nagsaad sa iyang mga sumusunod: “Ako magauban kaninyo.” (Mat. 28:20) Busa, kining dakong buluhatong pagsangyaw pagahimoon ubos sa iyang pagdumala. Ug ang atong Diyos nagsangkap kanato sa “matag maayong butang” aron tabangan kitang matuman ang maong sugo. (Heb. 13:20, 21) Niining artikuloha, atong konsiderahon ang tulo sa maong maayong mga butang: (1) mga himan nga gihatag kanato, (2) bag-ong mga pamaagi nga gigamit, ug (3) pagbansay nga atong nadawat. Ato unang hisgotan ang pipila sa mga himan nga atong gigamit sa milabayng 100 ka tuig.

4. Nganong naggamit kitag lainlaing himan sa atong pagsangyaw?

⁴ Gipakasama ni Jesus ang “pulong sa gingharian” ngadto sa binhi nga gipugas sa lainlaing matang sa yuta. (Mat. 13:18, 19) Ang usa ka hardinero mogamit tingalig lainlaing himan sa pag-andam sa iyang hardin aron katamnan kini. Sa susama, latas sa katuigan ang atong Hari naghatag kanatog mga himan nga magamit aron maandam ang kasingkasing sa milyonmilyong katawhan sa pagdawat sa mensahe sa Gingharian. Ang pipila ka himan nahimong mapuslanon sulod sa mubong panahon, samtang ang uban gigamit gihapon karon. Pero kining tanang himan nagtabang kanato sa pagpauswag sa atong kahanas sa pagsangyaw.

5. Unsa ang testimony card, ug giunsa kini paggamit?

⁵ Ang usa ka himan nga nakatabang sa mga magmamantala sa pagsugod ug sangyaw mao ang testimony card, nga gigamit sukad sa 1933. Ang card may gilapdong tulo ka pulgada ug gitas-ong lima ka pulgada. Duna kiniy mubong mensahe sa Bibliya. Matag karon ug unya, luwatan ang usa ka bag-ong card nga may bag-ong mensahe. Simple ra ang presentasyon! Si C. W. Erlenmeyer mga diyes anyos dihang unang nakigbahin sa maong pamaagi sa pagsangyaw. Siya miingon: “Kini ang introduksiyon, ‘Puwede ba nimong basahon ni nga card?’ Human mabasa sa tagbalay ang card, among itanyag ang literatura ug dayon mobiya mi.”

6. Unsay praktikal nga katuyoan sa testimony card?

⁶ Nakatabang ang testimony card sa lainlaing paagi. Bisag gusto kaayong mosangyaw, ang pipila ka magmamantala maulawon ug wala mahibalo kon unsay isulti. Ang uban daghan kaayog isulti. Ilang isulti sa tagbalay ang tanan nilang nahibaloan sulod sa pipila ka minutos, pero ang ilang presentasyon dili kanunayng mataktikanhon! Sa kasukwahi, sa pipila lang ka maayong pagkapili nga mga pulong, ang testimony card “maoy mosulti” para sa magmamantala.

7. Unsang mga problema ang nasinati sa pipila sa paggamit sa testimony card?

⁷ Siyempre, dihay mga problema. Si Grace A. Estep, usa ka dugay nang Saksi, nahinumdom: “Usahay, pangutan-on mi, ‘Aw unsa may giingon diha? Sultii na lang ko.’” Dugang pa, ang pipila ka tagbalay dili makabasa sa nasulat sa card. Ug ang uban naghunahuna nga ilaha na ang card, busa dawaton nila kini ug isira ang pultahan. Kon ang tagbalay supak kaayo, iyang gisigision ang card. Bisan pa niana, ang atong mga igsoon nakakat-on sa pag-atubang sa mga tawo ug sa pagpaila nga sila mga magsasangyaw sa Gingharian.

8. Isaysay kon giunsa paggamit ang mabitbit nga ponograpo. (Tan-awa ang hulagway sa sinugdan sa artikulo.)

⁸ Ang laing himan nga gigamit sa katuigan  sa 1930 ug sa sayong bahin sa katuigan sa 1940 mao ang mabitbit nga ponograpo, nga gitawag sa pipila ka igsoon ug Aaron kay mao niy mosulti para nila. (Basaha ang Exodo 4:14-16.) Kon mosugot ang tagbalay, ang magmamantala magpatokar ug upat ka minuto ug tunga nga diskurso sa Bibliya, ug dayon motanyag siyag basahon. Usahay, tibuok pamilya ang maminaw sa girekord nga mensahe sa Bibliya! Niadtong 1934, ang Watch Tower Society nagsugod sa paghimog mabitbit nga mga ponograpo nga gidisenyo alang sa pagsangyaw. Ngadtongadto, nabatonan ang mga rekording nga may 92 ka lainlaing topiko.

9. Unsa ka epektibo ang paggamit sa ponograpo?

⁹ Sa pagkadungog ug usa ka girekord nga pakigpulong sa Bibliya, ang tagbalay nga si Hillary Goslin nananghid sa magmamantala nga hulamon ang ponograpo sulod sa usa ka semana aron ipadungog sa iyang mga silingan ang mensahe sa Gingharian. Pagbalik sa magmamantala, daghan nang interesado ang nagpaabot niya. Ngadtongadto, daghan kanila ang nagpahinungod kang Jehova lakip na si Brader Goslin. Sa ulahi, ang iyang duha ka anak nga babaye nakatungha sa Gilead School ug nahimong mga misyonarya. Sama sa testimony card, ang ponograpo nakatabang sa daghan sa pagsugod ug sangyaw. Sa ulahi, pinaagi sa Teokratikanhong Tunghaan sa Ministeryo, tudloan sila sa Hari kon unsay isulti dihang magsangyaw.

10, 11. Sa unsang paagi gigamit ang mga mantalaan ug radyo sa pagpakaylap sa kamatuoran, ug nganong epektibo kini?

¹⁰ Ubos sa pagdumala sa Hari, ang katawhan sa Diyos naggamit ug lainlaing pamaagi aron makaabot ang maayong balita sa daghang tawo kutob sa mahimo. Importante kaayo kini dihang “diyutay ra ang mga mamumuo.” (Basaha ang Mateo 9:37.) Sa sayong bahin sa ika-20ng siglo, ang mga mantalaan gigamit aron masangyawan ang daghang tawo sa mga lugar diin diyutay ra ang Saksi. Kada semana, magtelegramag sermon si Charles Taze Russell sa usa ka news agency. Dayon, itelegrama sa news agency ang sermon ngadto sa mga mantalaan sa United States, Canada, ug Europe. Gibanabana nga pagka-1913, ang mga sermon ni Brader Russell nabasa sa 15,000,000 ka tawo pinaagig 2,000 ka mantalaan!

¹¹ Human sa kamatayon ni Brader Russell, laing epektibong pamaagi sa pagpakaylap sa maayong balita ang gisugdan paggamit. Niadtong Abril 16, 1922, si Joseph F. Rutherford mihimo sa usa sa iyang unang mga sibya sa radyo, nga nadunggan sa mga 50,000 ka tawo. Dayon, niadtong Pebrero 24, 1924, ang unang estasyon sa radyo sa organisasyon, ang WBBR, nagsugod pagsibya. Bahin niining bag-ong pamaagi sa pagsangyaw, ang The Watch Tower sa Disyembre 1, 1924, nag-ingon: “Nagtuo ming ang radyo mao ang labing barato ug epektibong paagi sa pagpakaylap sa mensahe sa kamatuoran nga gigamit sukad.” Sama sa mantalaan, ang radyo nakatabang nga masangyawan ang daghang tawo diha sa mga lugar nga diyutay ra ang magmamantala sa Gingharian.

12. (a) Unsang mga bahin sa publikong pagsangyaw ang gusto kaayo nimo? (b) Unsay makatabang nato sa pagbuntog sa kahadlok sa pagpakigbahin sa publikong pagsangyaw?

¹² Karon, gihatagag dakong pagtagad ang publikong pagsangyaw: diha sa mga hunonganag bus, estasyon sa tren, parkinganan, plasa, ug merkado. Kon mahadlok kang makigbahin niini nga pamaagi sa pagsangyaw, iampo kini ug palandonga ang giingon sa dugay nang nagapanawng magtatan-aw nga si Angelo Manera, Jr.: “Among giisip ang matag bag-ong pamaagi sa pagsangyaw ingong laing paagi sa pag-alagad kang Jehova, laing  paagi sa pagpamatuod sa among pagkamaunongon kaniya, laing pagsulay sa among integridad, ug mahinamon namong gipamatud-an nga andam ming moalagad kaniya sa bisan unsang paagi nga gusto niya.” Ang pagpakigbahin sa usa ka bag-ong pamaagi sa pagsangyaw, nga tingali lahi sa atong naandan, makatabang nato sa pagbatog pagtuo ug pagsalig kang Jehova, nga makapauswag sa atong espirituwalidad.—Basaha ang 2 Corinto 12:9, 10.

13. Nganong epektibong pamaagi sa pagsangyaw ang paggamit sa atong website nga jw.org, ug unsay imong mga eksperyensiya sa paggamit niini?

¹³ Daghang magmamantala ang malipayng mopahibalo sa mga tawo sa atong website nga jw.org, diin ilang mabasa ug ma-download ang binase sa Bibliyang mga basahon diha sa kapig 700 ka pinulongan. Kada adlaw, kapig 1.6 ka milyon ang moabli sa atong website. Sama sa radyo, ang atong website nakatabang aron masangyawan ang mga tawo sa maayong balita, bisan sa hilit nga mga dapit.

14. Unsang pagbansay ang gikinahanglan sa mga magmamantala, ug unsang tunghaan ang nakatabang nila nga mahimong epektibong mga magtutudlo?

¹⁴ Atong nahisgotan ang pipila sa mga himan ug pamaagi nga gigamit sa pagpakaylap sa maayong balita. Apan, komosta ang pagbansay nga atong nadawat? Ibutang ta nga ang tagbalay supak sa iyang nadungog sa ponograpo o interesado sa iyang nabasa sa testimony card. Kinahanglang mahibalo ang mga magmamantala kon unsaon pagtubag ang mga pagsupak sa mataktikanhong paagi ug kon unsaon pagtudlo ang matinud-anog kasingkasing nga mga tawo sa mahanasong paagi. Walay duhaduha nga sa tabang sa espiritu sa Diyos, nakita ni Nathan H. Knorr nga kinahanglang bansayon ang mga magmamantala sa paggamit sa gasa sa pagsulti diha sa ministeryo. Unsay solusyon? Ang Teokratikanhong Tunghaan sa Ministeryo, nga unang giorganisar diha sa mga kongregasyon niadtong 1943. Ang maong tunghaan nakatabang nato nga mahimong epektibong mga magtutudlo.

15. (a) Unsay nasinati sa pipila dihang naghatag ug bahin sa Teokratikanhong Tunghaan sa Ministeryo? (b) Sa unsang paagi nahimong tinuod kanimo ang saad ni Jehova sa Salmo 32:8?

¹⁵ Daghang igsoon ang nalisdan sa pagsulti atubangan sa mga mamiminaw. Si Julio S. Ramu nahinumdom sa iyang unang bahin sa tunghaan niadtong 1944. Unsay iyang topiko? Si Doeg, usa ka tawo nga gihisgotan sa upat lang ka teksto sa Bibliya! “Nangurog ang  akong tuhod ug kamot, ug nagkagot ang akong ngipon,” miingon si Julio, ug siya midugang nga kinahanglan niyang tagikon ang iyang pakigpulong base lang nianang upat ka teksto. “Nahuman ang akong pakigpulong sulod sa tulo ka minutos. Mao to ang akong unang kasinatian sa pagpakigpulong sa plataporma, pero wala ko moundang.” Ang mga bata naenrol usab sa maong tunghaan, bisag nalisdan ang pipila sa paghatag ug bahin. Si Angelo Manera, nga gihisgotan ganina, nahinumdom sa unang bahin sa usa ka bata nga mao pay pagsugod sa elementarya. “Gikulbaan kaayo siya maong pagsugod niya, nakahilak siya. Pero kay determinado man siyang ihatag ang iyang bahin, nahuman ra niya kana bisag naghilak.” Nalisdan ka ba sa pagkomento o pagpakigbahin sa mga tigom kay maulawon ka o morag dili nimo kini mahimo? Pangayog tabang kang Jehova nga mabuntog ang imong kahadlok. Tabangan ka niya sama sa iyang pagtabang sa unang mga estudyante sa Teokratikanhong Tunghaan sa Ministeryo.—Basaha ang Salmo 32:8.

16. Unsay tumong sa Gilead School (a) kaniadto ug (b) sukad niadtong 2011?

¹⁶ Ang katawhan ni Jehova gibansay dili lang diha sa Teokratikanhong Tunghaan sa Ministeryo. Ang mga misyonaryo ug ang uban nakabenepisyo gayod sa pag-eskuyla sa Gilead School. Ang usa ka instruktor nag-ingon nga ang tumong sa tunghaan mao ang “pagtabang sa mga estudyante nga mahimong mas madasigon sa pagsangyaw.” Ang Gilead nagsugod niadtong 1943, ug sukad niadto kapig 8,500 ang nabansay niini. Ang mga misyonaryo nga nabansay sa Gilead nakaalagad sa mga 170 ka nasod. Sukad sa 2011, ang gidapit nga moeskuyla mao na lang kadtong anaa sa espesyal nga bug-os panahong pag-alagad—mga espesyal payunir, nagapanawng magtatan-aw, Bethelite, o mga misyonaryo nga wala pa makatungha sa Gilead.

17. Unsa ka epektibo ang pagbansay sa Gilead?

¹⁷ Unsa ka epektibo kining dugang nga pagbansay? Tagda ang usa ka pananglitan. Niadtong Agosto 1949, wala ray napulo ang magmamantala sa Japan. Sa hinapos sa maong tuig, 13 ka misyonaryo nga nabansay sa Gilead ang madasigong nagsangyaw didto. Karon, may mga 216,000 ka magmamantala sa Japan, ug halos katunga nila mga payunir!

18. Nganli ang ubang tunghaan nga nakatabang sa kuwalipikadong mga Saksi nga mouswag sa espirituwal.

¹⁸ Ang ubang tunghaan, sama sa Kingdom Ministry School, Pioneer Service School, School for Kingdom Evangelizers, School for Circuit Overseers and Their Wives, ug ang School for Branch Committee Members and Their Wives, nakatabag dako sa pagpauswag sa espirituwalidad ug kahanas sa katawhan ni Jehova. Klaro nga ang Hari nagpadayon sa pagbansay sa iyang mga sakop!

19. Unsay nalantawng daan ni Charles Taze Russell bahin sa buluhatong pagsangyaw, ug sa unsang paagi kadto natinuod?

¹⁹ Kapig 100 ka tuig na ang milabay sukad sa pagkatukod sa Gingharian sa Diyos. Ang atong Hari nga si Jesu-Kristo nagpadayon sa pagbansay kanato. Una mamatay si Charles Taze Russell niadtong 1916, nalantaw na niyang daan nga ang maayong balita masangyaw sa tibuok kalibotan. Siya miingon sa iyang suod nga kauban: “Ang buluhaton kusog nga nag-uswag, ug magpadayon kini sa pag-uswag, kay ang ‘maayong balita sa gingharian’ igasangyaw sa tibuok kalibotan.” (Faith on the March, ni A. H. Macmillan, p. 69) Husto gayod siya! Ug mapasalamaton gayod kita nga ang Diyos sa kalinaw nagpadayon sa pagsangkap kanato niining makapalipay kaayong buluhaton! Oo, gihatagan ta niya sa “matag maayong butang” nga atong gikinahanglan sa pagtuman sa iyang kabubut-on!