Nabasa ba nimog maayo ang bag-ong mga gula sa Ang Bantayanang Torre? Sulayi kon makatubag ka sa mosunod nga mga pangutana:

Dihang moabot ang kataposan, unsa ang pipila ka butang nga matapos?

Ang pipila niini mao ang pakyas nga gobyerno sa tawo, gubat ug inhustisya, mga relihiyon nga nagsupak sa Diyos ug wala magtagad sa tawo, ug mga tawong dili diyosnon.—5/1, p. 3-5.

Kinsa si Gog sa Magog nga gihisgotan sa basahon sa Ezequiel?

Imbes nagtumong kang Satanas, mopatim-aw nga si Gog sa Magog nagtumong sa alyansa sa kanasoran nga mosulay sa paglaglag sa katawhan sa Diyos human magsugod ang dakong kasakitan.—5/15, p. 29-30.

Unsang unom ka butang ang makatabang sa usa nga magmalipayon bisag tigulang na?

Ang Bibliya nagsugyot nga kita angayng (1) magmakasaranganon, (2) magpabiling timbang, (3) magmapositibo, (4) magmahinatagon, (5) magmahigalaon, ug (6) magmapasalamaton. Ang pagpakita nianang mga hiyasa makatabang sa usa nga magmalipayon bisag tigulang na.—6/1, p. 8-10.

Sa unsang paagi ang mga milagro ni Jesus nagpakita nga siya mahinatagon?

Sa kasal sa Cana, gihimo ni Jesus nga bino ang 380 ka litrong tubig. Sa laing higayon, milagroso niyang gipakaon ang kapig 5,000 ka tawo. (Mat. 14:14-21; Juan 2:6-11) Nianang duha ka higayon, gisundog niya ang pagkamahinatagon sa iyang Amahan.—6/15, p. 4-5.

Nganong makaseguro kita nga bisag dili ta hingpit, atong mapahimut-an ang Diyos?

Si Job, Lot, ug David nakahimog mga sayop. Pero sila gustong moalagad sa Diyos, nagbasol, ug nagbag-o. Nabatonan nila ang pabor sa Diyos, ug mao man usab kita.—7/1, p. 12-13.

Ang kalaglagan ba sa Dakong Babilonya nagpasabot nga mamatay ang tanang kanhing membro sa bakak nga mga relihiyon?

Dayag nga dili. Gipakita sa Zacarias 13:4-6 nga ang pipila ka klero mobiya sa ilang relihiyon ug molimod nga bahin sila niana kaniadto.—7/15, p. 15-16.

Nganong mosugot lang si Barak sa pagpakiggubat kon ubanan siya ni Debora?

Si Barak dunay lig-ong pagtuo. Imbes mangayo kang Jehova ug dugang hinagiban, gusto niyang makauban ang representante sa Diyos—si Debora—aron sa pagpalig-on kaniya ug sa iyang kasundalohan. (Maghu. 4:6-8; 5:7)—8/1, p. 13.

Unsang pipila ka butang ang puwedeng pamalandongon sa usa ka Kristohanon?

Puwede natong pamalandongon ang kalalangan ni Jehova, ang kabililhon sa iyang inspiradong Pulong, ang atong pribilehiyo sa pag-ampo, ug ang iyang mahigugmaong tagana nga lukat.—8/15, p. 10-13.

Sa unsang paagi ang paglikay sa daotang panagkauban makaapektar sa atong panglantaw sa pagpakigdeyt?

Bisag angay natong pakitaag kaayo ang mga dili magtutuo, supak gayod sa sugo sa Diyos ang pagpakigdeyt sa usa nga dili dedikado kaniya ug wala magsunod sa iyang mga sukdanan. (1 Cor. 15:33)—8/15, p. 25.

Nganong mihuyang ang pagtuo ni Pedro, ug sa unsang paagi napalig-on kana pag-usab?

Tungod sa pagtuo, si apostol Pedro nakalakaw sa tubig paingon kang Jesus. (Mat. 14:24-32) Apan pagtan-aw ni Pedro sa unos, siya nahadlok. Dayon, siya mitan-aw pag-usab kang Jesus ug midawat sa iyang tabang.—9/15, p. 16-17.

Ang Buhat 28:4 nag-ingon nga ang mga taga-Malta nagtuong si apostol Pablo usa ka mamumuno. Ngano?

Dihang napaakag bitin si Pablo, lagmit nagtuo sila nga si Dike, ang diyosa sa hustisya, nagsilot kaniya.—10/1, p. 9.

Unsay atong makat-onan sa asoy diin si Marta nalinga sa daghang buluhaton?

Dihay higayon nga si Marta nalinga tungod sa pagpangandam ug daghang pagkaon. Giingnan siya ni Jesus nga si Maria mipili sa maayong bahin pinaagi sa pagpaminaw sa iyang gitudlo. Kinahanglan tang mag-amping nga dili mababagan sa dili hinungdanong mga butang ang atong espirituwal nga mga kalihokan.—10/15, p. 18-20.