Among mga Magbabasa Nangutana

Ang Gingharian ba sa Diyos Anaa sa Imong Kasingkasing?

Daghan karon ang motubag ug oo. Pananglitan, ang Catholic Encyclopedia nag-ingon: “Ang gingharian sa Diyos nagkahulogang . . . ang Diyos naghari sa atong mga kasingkasing. Kini nga ideya kaylap kaayong gitudlo sa mga klero. Gitudlo ba gayod sa Bibliya nga ang Gingharian sa Diyos anaa sa kasingkasing sa tawo?

Daghan ang nagtuo nga gitudlo mismo ni Jesus ang ideya nga ang Gingharian sa Diyos anaa sa kasingkasing sa tawo. Kay siya nag-ingon: “Tan-awa! Ang gingharian sa Diyos anaa sa inyong taliwala.” (Lucas 17:21) Sa ubang Bibliya, kini gihubad nga: “Ang gingharian sa Diyos anaa kaninyo” o “sa sulod ninyo.” Tukma ba ang maong mga hubad sa giingon ni Jesus? Gipasabot ba gayod ni Jesus nga ang Gingharian sa Diyos anaa sa kasingkasing sa tawo?

Una, tagda ang kasingkasing sa tawo. Sa dihang ang Bibliya maghisgot bahin niini, ang masambingayong kasingkasing nagtumong sa sulod nga pagkatawo, ang tinubdan sa hunahuna, tinamdan, ug pagbati sa usa ka tawo. Ang ideya nga may hamiling butang sama sa Gingharian sa Diyos diha sa kasingkasing sa tawo—sa paagi nga kini makapausab sa tawo ug makahimo kaniya nga maayo—daw maayong paminawon, apan husto kaha kining ideyaha?

Ang Bibliya nagtug-an kanato: “Ang kasingkasing labaw nga malimbongon kay sa bisan unsa pa ug desperado.” (Jeremias 17:9) Si Jesus mismo nag-ingon: “Gikan sa sulod, gikan sa kasingkasing sa mga tawo, ang makadaot nga mga pangatarongan mogula: mga pakighilawas, mga pagpangawat, mga pagbuno, mga pagpanapaw, mga hakog nga pangibog, mga buhat sa pagkadaotan.” (Marcos 7:20-22) Hunahunaa kini: Dili ba ang grabeng pag-antos nga atong makita sa kalibotan karon maoy epekto sa makasasalang kasingkasing sa tawo? Nan, makataronganon ba ang pagtuo nga gikan usab niana ang hingpit nga Gingharian sa Diyos? Sa pagkatinuod, ang kasingkasing sa tawo dili makapatungha ug Gingharian sa Diyos sama nga ang kudyapa dili makapamunga ug igos.—Mateo 7:16.

Ikaduha, tagda kon kinsa ang mga mamiminaw ni Jesus sa dihang gisulti niya ang mga pulong sa Lucas 17:21. Ang nag-unang bersikulo mabasa: “Sa dihang gisukna sa mga Pariseo kon kanus-a moabot ang gingharian sa Diyos, siya mitubag kanila.” (Lucas 17:20) Ang mga Pariseo maoy mga kaaway ni Jesus. Siya nag-ingon nga ang maong mga salingkapaw dili makasulod sa Gingharian sa Diyos. (Mateo 23:13) Karon kon ang mga Pariseo dili makasulod sa Gingharian sa Diyos, mahimo ba nga ang Gingharian anaa sa ilang kasingkasing? Imposible gayod! Nan, unsa may gipasabot ni Jesus?

Sa paghubad niining mga pulonga ni Jesus, daghan sa maayong pagkahubad nga Bibliya ang naggamit ug mga pulong nga susama sa gigamit diha Bag-ong Kalibotang Hubad. Ang pipila ka hubad nag-ingon nga ang Gingharian “anaa sa inyong taliwala.” Sa unsang paagi nga ang Gingharian sa Diyos anaa sa taliwala sa mga tawo nianang panahona, nga naglakip sa mga Pariseo? Buweno, si Jesus mao ang gitudlo ni Jehova nga mahimong Hari sa Gingharian. Ingong Umaabot nga Hari, si Jesus diha mismo sa taliwala sa maong mga tawo. Siya nagtudlo bahin sa Gingharian sa Diyos ug naghimo pa gani ug mga milagro, nga nagpakita kanila kon unsa unyay buhaton sa Gingharian. Nan, sa literal nga diwa, ang Gingharian anaa sa ilang taliwala.

Tin-aw kaayo nga ang Kasulatan wala magtudlo nga ang Gingharian sa Diyos anaa sa kasingkasing sa tawo. Hinunoa, kini usa ka tinuod nga kagamhanan, usa nga magdala ug dagkong mga kausaban sa yuta, sumala sa gitagna sa mga propeta.—Isaias 9:6, 7; Daniel 2:44.