Sa Among mga Magbabasa

MALIPAY kami sa pagpahibalo kaninyo nga sugod niining gulaa, adunay mga kausaban sa Bantayanang Torre. Sa dili pa namo ipatin-aw ang maong kausaban, hisgotan usa namo kon unsang bahina sa magasin ang wala mausab.

Ang ngalan niining magasina, Ang Bantayanang Torre Nagapahayag sa Gingharian ni Jehova, wala mausab. Busa, ang Bantayanang Torre magpadayon sa pagpasidungog kang Jehova ingong matuod nga Diyos ug sa paghupay sa mga magbabasa niini pinaagi sa maayong balita sa iyang Gingharian. Ang mga artikulo sa panid 5 ngadto sa 9 niining gulaa maghisgot kon unsa kana nga Gingharian ug kanus-a kana moabot. Gawas pa, ang Bantayanang Torre magpadayon sa pagtabang sa mga magbabasa nga molig-on ang ilang pagtuo kang Jesu-Kristo, sa pagtuboy sa kamatuoran nga gitudlo sa Bibliya, ug sa pagpatin-aw sa kahulogan sa mga panghitabo sa kalibotan sumala sa gitagna sa Bibliya, sama sa ginabuhat niining magasina sulod sa daghan nang katuigan.

Nan, unsa man diay ang kalainan? Isaysay namo ang pipila sa makaiikag nga bag-ong mga seksiyon nga mogawas diha sa petsa 1 nga gula. a

Daghang makapukaw-sa-hunahuna nga mga artikulo ang mogawas kada bulan. Ang artikulong “Nahibalo Ka Ba?” maghatag ug impormasyon nga magpatin-aw sa kahulogan sa piniling mga asoy sa Bibliya. Ang artikulong “Pakigsuod sa Diyos” magpasiugda kon unsay atong makat-onan bahin kang Jehova gikan sa espesipikong mga teksto sa Bibliya. Hisgotan sa seksiyon nga “Among mga Magbabasa Nangutana” ang mga tubag sa kasagarang mga pangutana bahin sa Bibliya. Pananglitan, daghang tawo ang nangutana, “Ang Gingharian ba sa Diyos anaa sa imong kasingkasing?” Ang tubag niini inyong makita sa panid 13.

Aduna poy mga seksiyon nga gidisenyo alang sa pamilya. Ang seksiyong “Sekreto sa Kalipay sa Pamilya,” nga mogula kaupat sa usa ka tuig, maghisgot sa aktuwal nga mga problema sa pamilya ug magpatin-aw kon sa unsang paagi ang mga prinsipyo sa Bibliya makatabang sa pagsulbad niana. Adunay duha ka bag-ong seksiyon nga magpulipuli ug gawas. Ang usa mao ang artikulong “Tudloi ang Inyong mga Anak,” nga maayong basahon sa mga ginikanan uban sa ilang mga anak. Ang lain mao ang artikulong “Alang sa Atong mga Batan-on,” nga magamit sa mga batan-on sa pagtuon sa Bibliya.

May pipila pa ka seksiyon nga mogula kaupat sa usa ka tuig. Ang artikulong “Sundoga ang Ilang Pagtuo” magdasig kanato sa pagsundog sa panig-ingnan sa usa ka karakter sa Bibliya. Pananglitan, sa panid 18 ngadto sa 21 niining gulaa, inyong mabasa ang makapatandog nga asoy bahin ni manalagnang Elias ug inyong masayran kon sa unsang paagi atong masundog ang iyang pagtuo. Ang seksiyon nga “Sulat Gikan sa . . . ” maoy mga taho gikan sa mga misyonaryo ug sa uban pa sa lainlaing dapit sa kalibotan. Ang artikulong “Kon Unsay Atong Makat-onan Kang Jesus” maghisgot sa pasukaranang mga pagtulon-an sa Bibliya sa paagi nga daling masabtan.

Masaligon kami nga ang Bantayanang Torre makapaikag gihapon sa mga magbabasa nga nagtamod sa Bibliya ug gustong mahibalo kon unsa gayoy gitudlo niini. Nanghinaot kami nga kining magasina motabang kaninyo sa pagtagbaw sa inyong kauhaw sa kamatuoran sa Bibliya.

MGA MAGPAPATIK

[Footnote]