Unsa ang Gingharian sa Diyos?

UNSAY tema sa pagsangyaw ni Jesus? Sumala kang Jesus mismo, kana mao ang Gingharian sa Diyos. (Lucas 4:43) Kanunay siyang maghisgot bahin sa Gingharian sa dihang makigsulti siya sa mga tawo. Naglibog ba sila sa dihang nadungog nila kana? Nangutana ba sila kon unsa kana? Wala. Ang mga Ebanghelyo wala maghisgot nga sila nangutana ug sama niana. Nagpasabot ba kini nga sinati na sila sa Gingharian?

Sa pagkatinuod, ang karaang Kasulatan nga giisip sa mga Hudiyo nga balaan tatawng naghubit kon unsa kanang maong Gingharian ug kon unsay buhaton niana. Sa atong adlaw, mas daghan kitag makat-onan bahin sa Gingharian pinaagi sa pagbasa sa Bibliya sama sa gibuhat kaniadto sa mga Hudiyo. Atong hisgotan ang pito ka kamatuoran nga gitudlo kanato sa Bibliya bahin sa Gingharian. Ang unang tulo ka kamatuoran nasayran nang daan sa mga Hudiyo bisan wala pa si Jesus sa yuta. Ang lain pang tulo gipadayag mismo ni Kristo o sa iyang mga apostoles sa unang siglo. Ang ikapito gipadayag sa atong panahon.

1. Ang Gingharian sa Diyos maoy tinuod nga kagamhanan nga magpabilin sa walay kataposan. Ang unang tagna sa Bibliya nagpadayag nga ang Diyos magpadala ug manluluwas ngadto sa matinumanong katawhan. Siya gitawag ug “binhi” nga maoy magwagtang sa tanang suliran nga nahitabo tungod sa pagrebelde nila ni Adan, Eva, ug ni Satanas. (Genesis 3:15) Paglabay sa panahon, ang matinumanong hari nga si David gisultian ug usa ka makapahinam nga butang bahin  niining maong “binhi,” o Mesiyas. Siya magamando sa usa ka Gingharian. Kini nga kagamhanan lahi sa uban. Kini molungtad sa walay kataposan.—2 Samuel 7:12-14.

2. Ang Gingharian sa Diyos magwagtang sa tanang kagamhanan sa tawo. Pinaagi sa usa ka panan-awon, nakita ni manalagnang Daniel ang sunodsunod nga mga kagamhanan nga nagmando sa kalibotan sukad kaniadto hangtod sa atong panahon. Matikdi ang kulbahinam nga sangkoanan sa maong panan-awon: “Sa mga adlaw nianang mga haria [mga kagamhanan nga naglungtad karon] ang Diyos sa langit magatukod ug usa ka gingharian nga dili gayod malumpag. Ug ang maong gingharian dili igapasa ngadto sa lain nga katawhan. Kini magadugmok ug magatapos niining tanang gingharian, ug kini mobarog hangtod sa panahong walay tino.” Busa ang tanang gingharian, o kagamhanan, niining kalibotana ug ang mga gubat, pagdaogdaog, ug kahiwian niini, pagahanawon sa dayon. Ingon sa gipakita sa tagna ni Daniel, ang Gingharian sa Diyos magamando unya sa tibuok yuta. (Daniel 2:44, 45) Gawas nga kini usa ka tinuod nga Gingharian, kini na lamang unya ang bugtong kagamhanan nga maglungtad. a

3. Ang Gingharian sa Diyos magtapos sa mga gubat, sakit, gutom, ug bisan sa kamatayon mismo. Ang makapalipay nga mga tagna sa Bibliya nagpadayag kon unsay buhaton sa Gingharian sa Diyos dinhi sa yuta. Buhaton sa maong kagamhanan ang butang nga wala gayod mahimo o dili gayod mahimo sa kagamhanan sa tawo. Tiaw mo na—ang tanang hinagiban mahanaw na sa dayon! “Gipahunong niya ang mga gubat hangtod sa kinatumyan sa yuta.” (Salmo 46:9) Wala na unyay mga doktor, ospital, o bisan unsang balatian. “Walay pumoluyo nga moingon: ‘Ako masakiton.’” (Isaias 33:24) Wala na unyay gutom, kanihit sa pagkaon, malnutrisyon, o kakuraw. “Aduna unyay dagayang lugas sa ibabaw sa yuta.” (Salmo 72:16) Wala nay haya, pagbilar, sementeryo, morge, o kaguol nga bation tungod sa pagkamatay sa atong minahal. Ang kamatayon, nga mao ang atong mabangis nga kaaway, laglagon na unya. “Lamyon gayod [sa Diyos] ang kamatayon hangtod sa kahangtoran, ug ang Soberanong Ginoong Jehova tinong magpahid sa mga luha gikan sa tanang nawong.”—Isaias 25:8.

4. Ang Magmamando sa Gingharian gipili mismo sa Diyos. Ang Mesiyas dili maoy nagbuot nga mahimo siyang hari, ni gipili siya sa dili-hingpit nga mga tawo. Siya gipili mismo ni Jehova nga Diyos. Ang mga titulong Mesiyas ug Kristo nagpaila nga siya gitudlo sa Diyos. Kanang mga pulonga nagkahulogang “Usa nga Dinihogan.” Busa kining maong Hari gidihogan, o gitudlo ni Jehova alang niining linain nga katungdanan. Ang Diyos miingon bahin kang Jesus: “Tan-awa! Ang akong alagad, nga kaniya ako hugot nga naghawid! Ang akong pinili, nga giuyonan sa akong kalag! Akong gibutang ang akong espiritu diha kaniya. Siya magdalag hustisya ngadto sa mga nasod.” (Isaias 42:1; Mateo 12:17, 18) May lain pa bang nasayod gawas sa atong Maglalalang kon unsang matanga sa Magmamando ang atong gikinahanglan?

5. Gipamatud-an ni Jesus nga takos siyang mahimong Magmamando sa Gingharian sa Diyos. Napamatud-an nga si Jesus nga taga-Nasaret mao ang gitagnang Mesiyas. Siya natawo sa banay nga gipili sa Diyos. (Genesis 22:18; 1 Cronicas 17:11; Mateo 1:1) Sa dinhi pa sa yuta, iyang gituman ang daghang tagna bahin sa Mesiyas nga gisulat gatosan ka tuig una pa niana. May pamatuod usab gikan sa langit nga siya ang Mesiyas. Giunsa nato pagkahibalo? Aw, ang Diyos mismo misulti gikan sa langit, nga nagpaila kaniya ingong Iyang Anak; ang mga manulonda nagpadayag nga si Jesus mao ang gitagna nga Mesiyas; ug si Jesus naghimog daghang milagro—sagad nasaksihan sa gatosan o linibo pa gani ka tawo—nga tatawng gihimo pinaagi sa gahom sa Diyos. b Sublisubling gipakita ni Jesus kon unsa siyang matanga sa Magmamando. Gawas nga aduna siyay gahom sa pagtabang sa mga tawo, siya may tinguha usab sa pagbuhat niana. (Mateo 8:1-3) Siya manggihatagon, mabination, maisogon, ug mapaubsanon. Ang talaan sa iyang kinabuhi dinhi sa yuta mabasa sa tanan diha sa Bibliya.

6. Ang Gingharian sa Diyos mandoan usab sa 144,000 ka hari kauban ni Kristo. Si Jesus miingon nga ang uban, lakip na ang iyang mga apostoles,  magmando sa langit uban kaniya. Iyang gitawag kining grupoha nga “gamayng panon.” (Lucas 12:32) Sa ulahi, gipadayag kang apostol Juan nga kining gamayng panon mokabat ug 144,000. Sila aduna unyay makaiikag nga buluhaton didto sa langit, nga magmando ingong mga hari ug mag-alagad ingong mga saserdote uban kang Kristo.—Pinadayag 5:9, 10; 14:1, 3.

7. Ang Gingharian sa Diyos, nga nagmando na karon sa langit, hapit nang magmando sa tibuok yuta. Kini maoy usa sa labing makalilipay nga kamatuoran. Ang Bibliya naghatag ug daghang pamatuod nga si Jesus gihatagan nag awtoridad ingong Hari sa langit. Siya nagmando na karon sa langit ug sa dili madugay magmando na usab sa tibuok yuta ug magtuman sa kahibulongang mga tagna nga ato nang nahisgotan. Apan sa unsang paagi kita makaseguro nga nagmando na karon ang Gingharian sa Diyos? Kanus-a kini magsugod sa pagmando ibabaw sa yuta?

[Mga footnote]