Usa ka Butang nga Gipangayo sa Milyonmilyong Tawo

HANDURAWA ang gatosan ka milyong tawo, binilyon pa gani, nga nangayo sa usa ra ka butang. Sila naghangyo sa labing gamhanang persona sa uniberso nga ihatag unta kanila ang ilang gipangayo. Apan, pipila lang kanila ang nakasabot kon unsa ang ilang gipangayo. Posible ba kana? Oo, gani nahitabo kana adlaw-adlaw. Unsa man diay gipangayo niining mga tawhana? Ang pag-abot sa Gingharian sa Diyos!

Sumala sa usa ka kalkulasyon, duolan sa 37,000 ka relihiyon ang nag-angkon nga mga Kristiyano ug nag-isip kang Jesu-Kristo nga ilang Lider. Kapin sa duha ka bilyon ang membro nianang mga relihiyona. Ang kinabag-an kanila nag-ampo sa Amahan Namo o Pag-ampo sa Ginoo. Nahibalo ka ba niining pangadyeona? Sumala sa gitudlo ni Jesus sa iyang mga sumusunod, kini nag-ingon: “Amahan namo nga anaa sa mga langit, pagabalaanon unta ang imong ngalan. Paanhia ang imong gingharian. Matuman unta ang imong kabubut-on, maingon sa langit, mao man usab sa yuta.”—Mateo 6:9, 10.

Sulod sa gatosan na ka tuig, ang mga tawo nagsubli-subli niining mga pulonga diha sa ilang mga simbahan. Gilitok usab nila kini ingong pamilya ug ingong indibiduwal, sa bisan unsang panahon. Kinasingkasing pa gani nilang gisulti kining mga pulonga. Daghan ang nakamemorya niini ug nagyamyam niini nga wala ra sa buot o wala maghunahuna sa kahulogan niini. Apan dili kay sila ra ang naglaom ug nag-ampo nga moabot ang Gingharian sa Diyos.

Gipangayo Usab sa mga Dili-Kristiyano

Ang usa ka ilado nga pag-ampo sa mga Hudiyo mao ang Kaddish. Bisan tuod dili kini direktang naghisgot ug kamatayon o kasub-anan, kini kasagarang litokon panahon sa pagbangotan. Kini nga pag-ampo nag-ingon: “Hinaot tukoron niya [ang Diyos] ang iyang Gingharian sa imong panahon . . .  sa labing madali.” a Ang laing karaang pag-ampo diha sa sinagoga naghisgot sa pag-abot sa Gingharian sa Mesiyas nga maggikan sa balay ni David.

 Nakapadani usab sa ubang mga relihiyon nga dili-Kristiyano ang ideya bahin sa Gingharian sa Diyos. Ang The Times of India naghisgot bahin sa usa ka inilang relihiyosong lider sa India sa ika-19ng siglo, kinsa interesado nga magkaharmonya ang pagtuo sa mga Hindu, Muslim, ug mga Kristiyano. Kini nga lider nag-ingon: “Ang matuod nga gingharian sa Diyos dili matukod gawas kon magkahiusa ang tanan.” Dugang pa, ang prinsipal sa Islam nga kolehiyo sa Strathfield, Australia, di pa dugayng misulat sa usa ka mantalaan: “Sama sa tanang Muslim, ako nagtuo [nga] si Jesus mobalik aron tukoron ang tinuod nga Gingharian sa Diyos.”

Sa walay duhaduha, bilyonbilyong tawo ang nanghinaot nga moabot na unta ang Gingharian sa Diyos. Apan tagda kining makaiikag nga kamatuoran.

Lagmit nahibalo ka nga kaming mga Saksi ni Jehova, nga nagpatik niining magasina, moduaw sa kabalayan sa inyong dapit aron makig-estorya sa mga tawo bahin sa Bibliya. Sa pagkakaron, amo kining gibuhat sa tibuok kalibotan, diha sa 236 ka kayutaan ug sa kapin sa 400 ka pinulongan. Ang pangunang tema sa among pagsangyaw mao ang Gingharian sa Diyos. Gani, kon imong namatikdan, ang bug-os nga ulohan niining magasina maoy Ang Bantayanang Torre Nagapahayag sa Gingharian ni Jehova. Sagad among pangutan-on ang mga tawo kon nag-ampo ba sila nga moabot kanang maong Gingharian. Daghan ang moingon ug oo. Apan, sa dihang pangutan-on na sila kon unsa kana, kadaghanan kanila motubag nga wala sila mahibalo,” o ang ilang tubag dili tin-aw ug dili segurado.

Nganong daghan kaayo ang nangayo sa usa ka butang nga wala nila masabti? Tungod ba kay komplikado ug lisod sabton ang pagtulon-an bahin sa Gingharian sa Diyos? Dili. Ang Gingharian klaro kaayong gipatin-aw diha sa Bibliya. Gawas pa, ang mensahe sa Bibliya bahin sa Gingharian makahatag kanimo ug tinuod nga paglaom niining mangiob nga panahon. Sa sunod nga artikulo, atong masayran kon sa unsang paagi gipatin-aw sa Bibliya kanang maong paglaom. Atong mahibaloan usab kon kanus-a tubagon sa Diyos ang pag-ampo ni Jesus nga moabot unta ang Gingharian.

[Footnote]