Diin Kita Gikan?

NGANONG HINUNGDANON NGA MASAYRAN ANG TUBAG NIINING PANGUTANAHA? Daghang tawo ang gitudloan nga ang kinabuhi sa yuta mitungha nga sulagma lamang. Sila giingnan nga pinaagi sa sunodsunod nga sulagmang mga hitabo, gipatungha sa ebolusyon ang tawo nga may katakos nga mobati, maghunahuna, ug mangita ug mas lalom nga kahulogan sa kinabuhi.

Apan tagda kini: Kon kita mitungha pinaagi sa ebolusyon ug walay Maglalalang, ang tawo mahisamag ilong tuwapos. Wala kitay kaduolan nga may labaw-tawhanong kaalam nga atong kapangayoag tambag—walay motabang kanato sa pagsulbad sa atong mga problema. Magsalig lamang kita sa tawhanong kaalam aron malikayan ang kadaot sa kalikopan, masulbad ang politikal nga mga panagbangi, ug masagubang ang atong personal nga mga suliran.

Makahatag ba kana kanimo ug kalinaw sa hunahuna? Kon dili, hunahunaa kono nga may usa ka persona nga adunay labaw-tawhanong kaalam ug andam nga motabang kanato. Ang maong ideya dili lamang mas maayo kondili mas makataronganon pa.

Kon Unsay Giingon sa Bibliya

Ang Bibliya nagtudlo nga ang tawo gilalang sa Diyos. Kita wala motungha pinaagi sa walay gugma ug walay hunahuna nga ebolusyon. Hinunoa, kita maoy mga anak sa mahigugmaon ug intelihente nga Amahan. Matikdi kon unsay tataw nga gisulti sa Bibliya.

Genesis 1:27. “Gilalang sa Diyos ang tawo sumala sa iyang larawan, sa larawan sa Diyos iyang gilalang siya; lalaki ug babaye iyang gilalang sila.”

Salmo 139:14. “Pagadayegon ko ikaw tungod kay sa makalilisang nga paagi ako katingalahan nga pagkabuhat. Ang imong mga buhat katingalahan, ingon sa nasayran pag-ayo sa akong kalag.”

Mateo 19:4-6. “Wala ba ninyo mabasa nga siya nga naglalang kanila sukad sa sinugdan nagbuhat kanila nga  lalaki ug babaye ug nag-ingon, ‘Tungod niini ang usa ka lalaki mobiya sa iyang amahan ug sa iyang inahan ug moipon sa iyang asawa, ug ang duha mahimong usa ka unod’? Mao nga dili na sila duha, kondili usa ka unod. Busa, kon unsay gihiusa pagyugo sa Diyos ayaw ipabulag ni bisan kinsang tawo.”

Buhat 17:24, 25. “Ang Diyos nga naghimo sa kalibotan ug sa tanang butang diha niini, si kinsa, maingon nga kini Siya, Ginoo sa langit ug sa yuta, wala magpuyo sa hinimog-kamot nga mga templo, ni siya pagaatimanon sa tawhanong mga kamot nga maorag siya nanginahanglan pa ug bisan unsa, tungod kay siya naghatag ngadto sa tanang tawo ug kinabuhi ug gininhawa ug tanang butang.”

Pinadayag 4:11. “Takos ikaw, Jehova, nga among Diyos, nga modawat sa himaya ug sa dungog ug sa gahom, tungod kay imong gilalang ang tanang butang, ug tungod sa imong kabubut-on sila milungtad ug nalalang.”

Kon sa Unsang Paagi ang Tubag sa Bibliya Makahatag ug Tinuod nga Kalinaw sa Hunahuna

Makapausab sa atong panglantaw sa uban ang pagkahibalo nga “utang [ngadto sa Diyos] sa tanang kabanayan sa langit ug sa yuta ang ngalan niini.” (Efeso 3:15) Makaimpluwensiya usab kini sa atong paglantaw sa atong kaugalingon ug sa mga problema nga atong giatubang. Ang atong hunahuna maapektohan sa mosunod nga mga paagi.

Sa dihang kita mohimog hinungdanong mga desisyon, kita dili angayng mabalaka pag-ayo bahin sa nagkasumpaki nga mga hunahuna sa tawo. Hinunoa, kita mosalig gayod sa tambag sa Bibliya. Ngano man? Tungod kay “ang tibuok Kasulatan inspirado sa Diyos ug mapuslanon sa pagpanudlo, sa pagpamadlong, sa pagpanul-id sa mga butang, sa pagdisiplina diha sa pagkamatarong, aron ang tawo sa Diyos mahimong takos gayod, bug-os nga masinangkapan alang sa tanang maayong buhat.”—2 Timoteo 3:16, 17.

Tinuod, ang pagpadapat sa tambag sa Bibliya nagkinahanglag paningkamot ug pagdisiplina sa kaugalingon. Usahay ang tambag niini supak sa atong kabubut-on. (Genesis 8:21) Apan, kon kita motuo nga kita gilalang sa usa ka mahigugmaon nga langitnong Amahan, makataronganon lamang ang pag-ingon nga siya nahibalo kon unsa ang labing maayong dalan nga angay natong subayon. (Isaias 55:9) Busa, ang iyang pulong nagpasalig kanato: “Salig kang Jehova sa bug-os mong kasingkasing ug ayaw pagsalig sa kaugalingon mong pagsabot. Sa tanan mong mga dalan tagda siya, ug siya magatul-id sa imong mga alagianan.” (Proverbio 3:5, 6) Kon atong sundon ang maong tambag, kita dili tantong mabalaka sa dihang mag-atubang ug mga problema o sa dihang mohimog mga desisyon.

Sa dihang kita gipihig, kita dili kaayo maguol, nga maghunahuna nga kita ubos sa mga tawo nga lahi ug rasa o kultura. Hinunoa, atong maugmad ang timbang nga pagtamod sa kaugalingon. Ngano? Tungod kay ang atong Amahan, si Jehova nga Diyos, “dili mapihigon, apan sa matag nasod ang tawo nga mahadlok kaniya ug magabuhat sa pagkamatarong dalawaton kaniya.”—Buhat 10:34, 35.

Ang pagkahibalo niana mopugong usab kanato nga magmapihigon sa uban. Atong masabtan nga walay lig-ong katarongan nga kita mobati nga labaw sa uban, tungod kay “gihimo [sa Diyos] gikan sa usa ka tawo ang tanang nasod sa katawhan, aron magpuyo ibabaw sa tibuok nawong sa yuta.”—Buhat 17:26.

Busa, ang pagkahibalo nga kita gilalang ug nga kita gihigugma sa atong Maglalalang makahatag kanato ug tinuod nga kalinaw sa hunahuna. Apan labaw pa ang gikinahanglan aron padayon natong mahuptan ang kalinaw sa hunahuna.

[Blurb sa panid 4]

Gikan ba sa aliwas ang tawo?

[Hulagway sa panid 5]

Ang pagkahibalo nga kita gihigugma sa atong Maglalalang makahatag kanato ug tinuod nga kalinaw sa hunahuna