Unsay Katuyoan sa Kinabuhi?

NGANONG HINUNGDANON NGA MASAYRAN ANG TUBAG NIINING PANGUTANAHA? Usa sa mga butang nga makapaguol kaayo sa tawo mao ang pagbati nga ang kinabuhi walay kahulogan ug walay katuyoan. Sa laing bahin, ang usa ka tawo nga adunay espesipikong katuyoan sa kinabuhi mapailin-ilinon ug agwantador. Si Viktor E. Frankl, nga usa ka neurologist ug usa sa naluwas sa Holocaust, misulat: “Makaingon ko nga walay laing butang nga makatabang gayod sa usa nga makalahutay bisan pa sa malisod nga mga kahimtang, gawas sa kahibalo nga adunay kahulogan ang iyang kinabuhi.”

Apan, nagkalainlain ang mga opinyon bahin niini. Daghan ang naghunahuna nga ang matag usa mao ray mag-igo kon unsay katuyoan sa kinabuhi. Sa kasukwahi, ang mga tawo nga nagtuo sa ebolusyon nagtudlo nga wala gayoy kahulogan ang kinabuhi.

Apan, ang labing maayong paagi nga masayran kon unsay katuyoan sa kinabuhi mao ang pagsusi kon unsay giingon sa Maghahatag-ug-Kinabuhi, si Jehova nga Diyos. Tagda kon unsay giingon sa iyang Pulong bahin niini.

Kon Unsay Giingon sa Bibliya

Ang Bibliya nagtudlo nga si Jehova nga Diyos adunay espesipikong katuyoan alang sa lalaki ug babaye sa dihang sila iyang gilalang. Gihatag ni Jehova sa atong unang mga ginikanan ang mosunod nga sugo.

Genesis 1:28. “Magmabungahon ug magdaghan kamo ug pun-a ang yuta ug gamhi kini, ug pagabut-i ang mga isda sa dagat ug ang nagalupad nga mga linalang sa kalangitan ug ang matag buhing linalang nga nagalihok diha sa yuta.”

Katuyoan sa Diyos nga tikaron ni Adan ug Eva ug sa ilang mga anak ang tibuok yuta ug himoon kining paraiso. Dili niya katuyoan nga ang mga tawo matigulang ug mamatay; ni kabubut-on niya nga daoton sa tawo ang kalikopan. Apan, tungod sa dili maalamong pagpili nga gihimo sa atong unang mga ginikanan, atong napanunod ang sala ug kamatayon. (Genesis 3:2-6; Roma 5:12) Bisan pa niana, wala mausab ang katuyoan ni Jehova. Sa dili madugay ang yuta mahimo na unyang paraiso.—Isaias 55:10, 11.

Gilalang kita ni Jehova nga may pisikal ug mental nga katakos nga magamit sa pagtuman sa iyang katuyoan. Wala niya kita lalanga nga magkinabuhing independente kaniya. Matikdi kon unsay gisulti sa mosunod nga mga teksto sa Bibliya bahin sa katuyoan sa Diyos.

Ecclesiastes 12:13. “Kini ang kataposan sa butang, ang tanan nadungog na: Kahadloki ang matuod nga Diyos ug tumana ang iyang mga sugo. Kay kini mao ang tibuok nga obligasyon sa tawo.”

Miqueas 6:8. “Unsa ba ang gipangayo ni Jehova kanimo kondili ang pagbuhat sa hustisya ug ang paghigugma sa kalulot ug ang paglakaw nga makasaranganon uban sa imong Diyos?”

Mateo 22:37-39. “‘Higugmaon mo si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong kaisipan.’ Kini mao ang kinadak-an ug unang sugo. Ang ikaduha, nga susama niini, mao kini, ‘Higugmaon mo ang imong silingan sama sa imong kaugalingon.’”

Kon sa Unsang Paagi ang Tubag sa Bibliya Makahatag ug Tinuod nga Kalinaw sa Hunahuna

Aron maayong moandar ang usa ka komplikadong makina, kini kinahanglang gamiton sumala sa katuyoan ug sa mga instruksiyon sa nagbuhat niini. Sa samang paagi, aron dili madaot ang atong kaugalingon—sa espirituwal, mental, emosyonal, o  sa pisikal man—kinahanglan nga atong gamiton ang atong kinabuhi uyon sa kabubut-on sa atong Maglalalang. Tagda kon sa unsang paagi ang pagkahibalo sa katuyoan sa Diyos makahatag kanato ug kalinaw sa hunahuna diha sa mosunod nga mga kahimtang.

Sa dihang mopili kon unsay angayng unahon sa ilang kinabuhi, daghan karon ang naghunahuna nga ang pagtigom ug bahandi mao ang labing hinungdanon. Hinunoa, “sila nga determinadong madato mangahulog sa tentasyon ug sa lit-ag ug sa daghang binuang ug makadaot nga mga tinguha,” nagpasidaan ang Bibliya.—1 Timoteo 6:9, 10.

Sa laing bahin, kadtong nakakat-on sa paghigugma sa Diyos inay sa salapi mibatig dakong katagbawan. (1 Timoteo 6:7, 8) Ilang nasabtan nga hinungdanon nga magmakugihon ug ilang obligasyon nga tagan-an ang ilang pisikal nga mga panginahanglan. (Efeso 4:28) Bisan pa niana, sila nagpatalinghog usab sa pasidaan ni Jesus: “Walay usa nga mahimong ulipon sa duha ka agalon; kay mahimong dumtan niya ang usa ug higugmaon ang lain, o unongan niya ang usa ug tamayon ang lain. Dili kamo mahimong ulipon sa Diyos ug sa Bahandi.”—Mateo 6:24.

Busa, inay unahon ang sekular nga trabaho o ang pagpangagpas ug bahandi, kadtong nahigugma sa Diyos naghimo sa iyang kabubut-on nga panguna sa ilang kinabuhi. Nahibalo sila nga kon unahon nila ang pagbuhat sa kabubut-on sa Diyos, si Jehova nga Diyos mag-atiman kanila. Sa pagkatinuod, giisip ni Jehova nga iyang obligasyon ang pagbuhat niana.—Mateo 6:25-33.

Sa dihang makiglabot sa ubang mga tawo, daghan ang maghunahuna lamang sa ilang kaugalingong kaayohan. Sa atong adlaw, ang kalibotan dili gayod malinawon tungod kay daghan kaayo ang ‘mahigugmaon sa kaugalingon ug walay kinaiyanhong pagbati.’ (2 Timoteo 3:2, 3) Sa dihang dunay makapahigawad kanila o mosupak sa ilang hunahuna, sila masuko, maningka, ug manginsulto. (Efeso 4:31) Imbes mohatag ug kalinaw sa hunahuna, ang maong kakulang sa pagpugong sa kaugalingon ‘magasugnib lamang sa panaglalis.’—Proverbio 15:18.

Sa kasukwahi, kadtong nagtuman sa sugo sa Diyos nga higugmaon ang ilang silingan sama sa ilang kaugalingon nagpakitag kaayo ug kalumo uban ang pagkamabination, ug kinabubut-ong nagpasaylo sa usag usa. (Efeso 4:32; Colosas 3:13) Bisan sa dihang sila wala pakitaig kaayo, sila naningkamot sa pagsundog kang Jesus, kinsa sa dihang gipasipad-an ‘wala mobalos sa pagsultig pasipala.’ (1 Pedro 2:23) Sama kang Jesus, ilang nasabtan nga makahatag ug tinuod nga katagbawan ang pag-alagad sa uban, bisan niadtong walay pagpabili sa kaayo nga gibuhat kanila. (Mateo 20:25-28; Juan 13:14, 15; Buhat 20:35) Si Jehova nga Diyos naghatag sa iyang espiritu niadtong naningkamot sa pagsundog sa iyang Anak, ug kini nga espiritu makahatag kanila ug tinuod nga kalinaw sa hunahuna.—Galacia 5:22.

Apan, sa unsang paagi ang imong panglantaw sa umaabot makaapektar sa imong kalinaw sa hunahuna?

[Blurb sa panid 6]

Ang usa ka tawo kinahanglan nga adunay espesipikong katuyoan

[Hulagway sa panid 7]

Si Jesus nagtudlo kanato kon sa unsang paagi makabaton ug kalinaw sa hunahuna