Mga Biktima sa Kapintasan Nabayaw

SA Mayo 3, 2007, ang European Court of Human Rights sa Strasbourg, Pransiya, mipakanaog ug hiniusang desisyon pabor sa mga Saksi ni Jehova sa Republika sa Georgia. Napamatud-an sa Korte nga ang mga Saksi didto mapintas nga giatake ug giyatakan ang ilang kagawasan sa pagsimba. Gikastigo usab sa Korte ang kanhing administrasyon sa Georgia tungod kay wala niini pasakaig sumbong ang mga responsable sa krimen. Nganong mipakanaog man ang Korte ug ingon niini nga desisyon?

Niadtong Oktubre 17, 1999, ang 120 ka Saksi ni Jehova sa Kongregasyon sa Gldani sa kaulohan sa Tbilisi malinawong nagkatigom aron sa pagsimba. Sa kalit lang, mibutho sa tigomanan ang magubtanong panon nga gipangunahan ni Vasili Mkalavishvili, usa ka Ortodoksong pari nga gitangtangan sa iyang katungdanan. Sila armadog garote ug puthawng mga krus ug ilang gipamunalan ang nanambong. Tungod niini, daghan ang nangabun-og ug ang uban grabeng nangaangol. Duna pa ganiy usa ka babaye nga nabuta ang usa ka mata tungod sa pagpuspos kaniya. Labing menos 16 ka tawo ang kinahanglang dad-on sa ospital. Sa dihang gireport sa mga Saksi sa estasyon sa mga polis ang maong pag-atake, giingnan sila sa hepe nga kon didto pa siya labaw pa niadto ang iyang buhaton kanila! Ang maong panghitabo givideohan sa usa sa mga miatake ug sa ulahi gipasalida kini sa mga estasyon sa TV ug nakita kon kinsa gayod kadtong miatake. a

Mipasakag kriminal nga kaso ang biktima nga mga Saksi, apan walay gihimong aksiyon ang mga awtoridad batok niadtong miatake. Ang polis nga nag-imbestigar sa maong kaso miingon nga siya Ortodokso ug natural nga siya modapig kanila. Ang kawalay pagpakabana sa kagamhanan maoy hinungdan kon nganong migara ang maong mga panatiko sa paghimog kapin pa sa usa ka gatos ka susamang pag-atake.

Busa niadtong Hunyo 29, 2001, mipetisyon ang mga Saksi ni Jehova sa European Court of Human Rights. b Ang Korte mipakanaog ug ultimang desisyon niadtong Mayo 3, 2007, diin tin-aw kaayo ang paghubit niini sa gihimong pag-atake ug gikondenar niini ang pagkawalay aksiyon sa mga awtoridad sa Georgia. Ang Korte miingon: “Katungdanan sa mga awtoridad . . . ang paghimog dihadihang imbestigasyon” bahin sa maong pag-atake. Kini nagpadayon: “Ang kawalay aksiyon sa mga awtoridad sa mga panghitabo nga sama niini makapawala sa pagsalig sa mga tawo sa balaod maingon man usab sa Estado nga maoy nagpatuman niana.”

Ang Korte mihinapos: “Ang kawalay pagpakabana sa mga awtoridad sa unang higayon nga giatake ang mga Saksi ni Jehova niadtong Oktubre 17, 1999 mao ang hinungdan kon nganong nanganad ang maong grupo sa paghimo ug daghan pang pag-atake sa Georgia.”

Busa, nabayaw gayod ang mga biktima sa kapintasan, ug ingong resulta, gimando sa Korte nga bayran sa gobyerno sa Georgia ug danyos ug nagasto sa kaso ang mga membro sa kongregasyon sa Gldani. Ang mga Saksi ni Jehova sa Georgia nagmalipayon dili lamang kay halos nahunong na ang maong pagpangatake kondili malipayon usab sila kay ang maong desisyon nagbayaw sa ilang katungod sa pagtigom nga malinawon aron sa pagsimba. Tungod niini, mapasalamaton gayod sila sa ilang langitnong Amahan, si Jehova nga Diyos, nga padayong naggiya ug nanalipod kanila.—Salmo 23:4.

[Mga footnote]