Nahibalo Ka Ba?

Pila may kantidad sa duha ka sensilyo sa babayeng balo?

Sa unang siglo K.P., ang tinuig nga bayranan ug buhis sa templo sa mga Hudiyo maoy “duha ka drakma,” nga katumbas sa halos duha ka adlaw nga suhol. (Mateo 17:24) Apan, si Jesus miingon nga ang duha ka goryon mapalit lamang sa “usa ka sensilyo nga gamay ug bili.” Ang maong kantidad maoy katumbas sa suhol sa 45 minutos nga pagtrabaho. Sa pagkatinuod, lima ka goryon ang mapalit sa duha ka sensilyo, nga katumbas sa suhol sa mga usa ka oras ug tunga nga pagtrabaho.—Mateo 10:29; Lucas 12:6.

Ang giamot sa kabos nga babayeng balo nga nakita ni Jesus sa templo mas ubos pa sa kantidad sa lima ka goryon. Ang duha ka sensilyo, o duha ka lepta, mao ang kinagamyan ug bili sa mga sensilyong tumbaga nga gigamit sa Israel niadtong panahona. Kini maoy ¹⁄64 sa tibuok adlaw nga suhol, o ubos pa sa suhol sa 12 minutos nga pagtrabaho kon ibase sa 12 oras nga trabaho sa tibuok adlaw.

Para kang Jesus, mas dako ang gihulog sa babayeng balo kay niadtong gihulog sa uban apan “gikan sa ilang mga sobra.” Ngano man? Ang asoy naghisgot nga siya duna lamay “duha ka gagmayng sensilyo,” busa mahimo unta nga usa lamang ang iyang iamot aron duna pay mabilin kaniya. Apan, iyang gihatag ang “tanan niyang nabatonan, ang iyang tibuok nga panginabuhian.”—Marcos 12:41-44; Lucas 21:2-4.

Kanus-a man gitawag si Saulo ingong Pablo?

Si apostol Pablo natawo ingong usa ka Hebreohanon ug siya lungsoranon usab sa Roma. (Buhat 22:27, 28; Filipos 3:5) Busa posible nga sa bata pa siya, duna siyay Hebreohanong ngalan nga Saulo ug Romanhong ngalan nga Pablo. Sama ra nga ang pipila sa iyang mga paryente may Romanhong ngalan ug ang uban may Gregong ngalan. (Roma 16:7, 21) Dugang pa, komon na para sa mga Hudiyo niadtong panahona ang pagbaton ug duha ka ngalan, ilabina niadtong nagpuyo sa gawas sa Israel.—Buhat 12:12; 13:1.

Kapin sa usa ka dekada human si Pablo mahimong Kristohanon, hayan mas nailhan siya sa iyang Hebreohanong ngalan nga Saulo. (Buhat 13:1, 2) Apan panahon sa iyang unang misyonaryong panaw niadtong mga 47/48 K.P., lagmit mas gipili niya nga gamiton ang iyang Romanhong ngalan nga Pablo. Siya gisugo sa pagsangyaw sa maayong balita ngadto sa mga dili-Hudiyo, ug lagmit nagtuo siya nga mas maayo kon iyang gamiton ang iyang Romanhong ngalan. (Buhat 9:15; 13:9; Galacia 2:7, 8) Tingali gigamit usab niya ang ngalang Pablo tungod kay kon litokon sa Grego ang iyang ngalan nga Saulo, kaamgid gayod kini sa usa ka Gregong pulong nga dili maayog kahulogan. Bisan unsa pay hinungdan sa maong kausaban, gipakita ni Pablo nga andam siyang ‘mahimong tanang butang ngadto sa tanang matang sa katawhan, aron iyang maluwas sa bisan unsang paagi ang pipila.’—1 Corinto 9:22.

[Hulagway sa panid 12]

Aktuwal nga gidak-on sa lepton