Among mga Magbabasa Nangutana

Nganong ang mga Saksi ni Jehova Dili Mogamit ug Krus sa Pagsimba?

Ang mga Saksi ni Jehova nagtuo gayod nga ang kamatayon ni Jesu-Kristo nagtagana ug lukat nga makahatag ug kinabuhing walay kataposan alang niadtong may pagtuo kaniya. (Mateo 20:28; Juan 3:16) Apan, sila dili motuo nga si Jesus namatay sa krus, sama sa sagad nga makita diha sa mga larawan. Sila nagtuo nga si Jesus namatay sa usa ka tul-id nga estaka nga walay balabag.

Ang paggamit ug krus masubay ngadto sa Mesopotamia, duha ka libo ka tuig sa wala pa si Kristo. May mga krus usab nga gikulit diha sa mga bato didto sa mga nasod sa Scandinavia panahon sa Bronze Age, mga 3,000 ka tuig sa wala pa matawo si Jesus. Ang maong dili-Kristohanon nga mga nasod naggamit sa krus “ingong anting-anting . . . sa paghatag kanilag proteksiyon ug suwerte,” matod pa sa usa ka historyano nga taga-Denmark ug eksperto sa mga simbolo nga si Sven Tito Achen, diha sa librong Symbols Around Us. Dili ikatingala nga ang New Catholic Encyclopedia nag-ingon: “Ang krus makita diha sa una-Kristohanon ug dili-Kristohanon nga mga kultura, diin kini kasagarang nagsimbolo sa mga butang sa langit.” Nan, nganong gigamit man sa mga simbahan ang krus ingong ilang labing sagradong simbolo?

Si W. E. Vine, nga usa ka tinamod nga eskolar sa Britanya, nagbutyag niining kasaligang pamatuod: “Sa tunga-tunga sa ika-3 nga siglo A.D. . . . ang mga pagano gidawat diha sa mga simbahan . . . ug gitugotan sa paggamit sa ilang paganong mga simbolo. Busa, gisagop sa mga simbahan ang pormang krus nga gisundog gikan sa Tau o T.”—Vine’s Expository Dictionary of Old and New Testament Words.

Si Vine nag-ingon usab nga ang pulong “krus” nagtumong sa “usa ka estaka o usok . . . nga lahi sa gigamit diha sa mga simbahan.” Susama usab niini ang giingon sa Oxford University’s Companion Bible: “Ang ebidensiya nagpamatuod . . . nga ang Ginoo namatay diha sa usa ka tul-id nga estaka, ug dili sa nagkuros nga kahoy.” Klaro nga gisagop sa mga simbahan ang tradisyon nga wala itudlo sa Bibliya.

Ang historyanong si Achen, nga gikutlo sa ibabaw, nagkomento: “Duha ka siglo human sa kamatayon ni Jesus, imposible gayod nga ang mga Kristohanon naggamit ug krus ingong simbolo.” Siya usab nag-ingon nga para sa mga Kristohanon sa unang siglo, ang krus “maoy tataw nga simbolo sa kamatayon ug pagkadaotan, sama sa gilotina ug silya elektrika sa modernong panahon.”

Bisan unsa pang butanga ang gigamit sa pagsakit ug pagpatay kang Jesus, ang labing hinungdanon mao nga walay larawan o simbolo niana ang angayng gamiton sa mga Kristohanon sa ilang pagsimba. Ang Bibliya nagsugo: “Kalagiw gikan sa idolatriya.” (1 Corinto 10:14) Gisulti mismo ni Jesus kon sa unsang paagi mailhan ang iyang matuod nga mga sumusunod. Siya nag-ingon: “Pinaagi niini ang tanan makaila nga kamo akong mga tinun-an, kon kamo adunay gugma sa inyong taliwala.”—Juan 13:35.

Sama sa mga Kristohanon sa unang siglo, ang mga Saksi ni Jehova naningkamot sa pagsunod sa Bibliya inay sa tradisyon diha sa tanang bahin sa ilang pagsimba. (Roma 3:4; Colosas 2:8) Tungod niini, dili sila mogamit ug krus sa pagsimba.

[Hulagway sa panid 22]

Larawan sa usa ka paganong hari sa asirya nga nagkulentas ug krus, sa mga 800 w.k.p.

[Credit Line]

Photograph taken by courtesy of the British Museum