Pagkahimong Usa sa mga Anak sa Diyos

MGA 30 ka tuig human sa Gubat sa Korea, ang Korean Broadcasting System nagbukas ug usa ka programa sa pagtabang sa mga tawo sa pagpangita sa nahimulag nga mga membro sa ilang pamilya sukad pa sa gubat. Unsay resulta? Kapin sa 11,000 ka tawo ang naghinilakay ug nagginaksanay tungod kay ilang nakita pag-usab ang ilang mga minahal. Mitaho ang Korea Times: “Wala pa gayod mahitabo sukad sa ilang kasaysayan nga ang mga Koreano dungang nanghilak tungod sa kalipay.”

Sa bata pa si Cézar, siya gipasagop sa iyang inahan sa usa ka magtiayon sa Brazil agig bayad sa utang. Paglabay sa mga napulo ka tuig, siya nalipay kaayo nga nakita ang iyang tinuod nga inahan. Tungod niini, siya mibiya sa sapiang magtiayon nga nagsagop kaniya aron mopuyo uban sa iyang inahan.

Malipay gayod ang mga membro sa pamilya sa dihang mahiusa sila pag-usab human sa taas nga panahong panagbulag! Ang Bibliya nagtug-an kon sa unsang paagi ang mga tawo nahimulag sa pamilya sa Diyos ug nag-antos sa makaluluoyng kahimtang. Kini naghisgot usab kon sa unsang paagi sila malipayong gihiusa pag-usab karon. Sa unsang paagi kini nahitabo? Ug sa unsang paagi masinati usab nimo ang maong kalipay?

Kon sa Unsang Paagi ang Tawo Nahimulag sa Pamilya sa Diyos

Mahitungod kang Jehova nga Diyos, ang Maglalalang, ang salmista nag-ingon: “Anaa kanimo ang tuboran sa kinabuhi.” (Salmo 36:9) Si Jehova mao ang Amahan sa usa ka dako kaayong pamilya sa matinumanon ug intelihenteng mga linalang. Ang langitnong bahin sa iyang pamilya gilangkoban sa mga manulonda ingong iyang espiritung mga anak. Samtang ang yutan-ong bahin gilangkoban sa mga tawo nga mahimo unyang iyang yutan-ong mga anak.

Sa dihang mirebelde ang unang tawhanong anak sa Diyos nga si Adan, sumala sa gibatbat sa nag-unang artikulo, ikasubo nga ang tawo nahimulag sa iyang mahigugmaong Amahan ug Maglalalang. (Lucas 3:38) Sa pagrebelde ni Adan, giwala niya ang pribilehiyo ingong anak sa Diyos ug sa tanan niyang umaabot nga kaliwat. Pinaagi sa iyang alagad nga si Moises, gibatbat sa Diyos ang sangpotanan sa nahitabo: ‘Sila migawi sa ikadaot sa ilang bahin; sila dili mga anak [sa Diyos], ang sayop ilaha.’ Tungod sa “sayop” o sa pagkamakasasala, ang mga tawo nahimulag sa Diyos, kinsa  balaan ug hingpit sa tanang paagi. (Deuteronomio 32:4, 5; Isaias 6:3) Busa, sa usa ka diwa, ang tawo daw nawad-ag amahan.—Efeso 2:12.

Sa pagpasiugda kon unsa ka lay-a ang relasyon sa tawo ug sa Diyos, ang Bibliya naghisgot niadtong anaa sa gawas sa pamilya sa Diyos ingong “mga kaaway.” (Roma 5:8, 10) Kay nahimulag sa Diyos, ang mga tawo nag-antos ilalom sa malupigong pagmando ni Satanas ug sa makamatayng mga epekto sa napanunod nga sala ug pagkadili-hingpit. (Roma 5:12; 1 Juan 5:19) Mahiusa pa kaha ang makasasalang mga tawo ngadto sa pamilya sa Diyos? Mahimo pa kahang mga anak sa Diyos sa bug-os nga diwa ang dili hingpit nga mga tawo, sama kang Adan ug Eva sa wala pa sila makasala?

Pagtigom sa Nahimulag nga mga Anak

Sa kamahigugmaon, si Jehova mihimog mga kahikayan aron makabenepisyo ang dili-hingpit nga mga tawo nga nahigugma kaniya. (1 Corinto 2:9) Si apostol Pablo nagpatin-aw: “Ang Diyos pinaagi kang Kristo nagpasig-uli sa usa ka kalibotan ngadto sa iyang kaugalingon, nga wala magaisip ngadto kanila sa ilang mga kalapasan.” (2 Corinto 5:19) Sumala sa gipatin-aw sa nag-unang artikulo, gihatag ni Jehova nga Diyos si Jesu-Kristo ingong lukat alang sa atong mga sala. (Mateo 20:28; Juan 3:16) Mapasalamatong misulat si apostol Juan: “Tan-awa kon unsang matanga sa gugma ang gihatag kanato sa Amahan, aron kita pagatawgon nga mga anak sa Diyos.” (1 Juan 3:1) Busa, ang dalan gibuksan aron ang masinugtanong mga tawo makabalik pag-usab sa pamilya ni Jehova.

Bisan tuod ang tanang tawo nga ginatigom ngadto sa pamilya sa Diyos makatagamtam ug kahibulongang panaghiusa ilalom sa pag-atiman sa ilang langitnong Amahan, matikdi kon giunsa pagbatbat sa Bibliya ang pagtigom kanila ngadto sa duha ka grupo. Atong mabasa: “Sumala sa . . . gikahimut-an [sa Diyos] nga gilaraw niya sa iyang kaugalingon ang usa ka pagdumala inig-abot sa kinutoban sa tinudlong kapanahonan, nga mao, aron tigomon pag-usab ang tanang butang diha kang Kristo, ang mga butang sa mga langit ug ang mga butang sa yuta.” (Efeso 1:9, 10) Nganong gidumala man sa Diyos ang mga butang nianang paagiha?

Sa pagkatinuod, ang pag-organisar ni Jehova sa iyang mga anak ngadto sa duha ka grupo makatabang aron magkahiusa ang iyang pamilya. Dili kini lisod sabton. Dako kaayo ang pamilya sa Diyos nga mahimo kining ipakasama sa usa ka nasod. Sa matag nasod, ang pipila gipili ingong mga magmamando aron motunhay ang kalinaw. Siyempre, wala pay gobyerno sa tawo nga nakapatunghag tinuod nga kalinaw, apan ang Diyos nagtukod ug usa ka hingpit nga gobyerno alang sa iyang pamilya. Ang unang grupo, “ang mga butang sa mga langit,” gilangkoban sa mga anak sa Diyos nga gipili ni Jehova nga maoy magmando sa gobyerno, o Gingharian, sa langit. Gikan didto, “sila magamando ingong mga hari ibabaw sa yuta.”—Pinadayag 5:10.

Mga Anak sa Diyos Dinhi sa Yuta

Gitigom usab ni Jehova “ang mga butang sa yuta,” nga mao ang milyonmilyong tawo sa tibuok yuta aron sila mahimo unyang iyang yutan-ong mga anak. Ingong usa ka buotang Amahan, iyang gitudloan sila sa pagpakitag gugma aron nga bisag gikan sila sa nagkalainlaing mga nasod, sila magkahiusa gayod. Bisan ang mga tawo nga mapintas, hakog, imoral, ug masinupakon sa Diyos gidapit nga ‘magpasig-uli ngadto sa Diyos.’—2 Corinto 5:20.

Komosta kadtong dili modawat sa pagdapit sa Diyos nga mobalik kaniya ingong iyang mga anak? Si Jehova molihok gayod batok kanila aron motunhay ang kalinaw ug panaghiusa sa iyang pamilya. Aduna unyay usa ka “adlaw sa paghukom ug sa kalaglagan sa mga tawong dili-diyosnon.” (2 Pedro 3:7) Hanawon sa Diyos ang rebelyosong mga tawo gikan sa yuta. Pagkamakapahupay unya niana alang niadtong mga masinugtanon!—Salmo 37:10, 11.

Human niana, mosunod ang usa ka libo ka tuig nga kalinaw, diin nianang panahona ang tanang mosanong sa gugma sa Diyos anam-anam nga ipasig-uli ngadto sa kahingpitan nga giwala ni Adan. Pagabanhawon usab ang mga patay. (Juan 5:28, 29; Pinadayag 20:6; 21:3, 4) Sa ingon, matuman ang gisaad sa Diyos: “Ang [mga tawo] usab ipagawas gikan sa pagkaulipon sa pagkadunot ug makabaton sa mahimayaong kagawasan sa mga anak sa Diyos.”—Roma 8:21.

 Kon Unsay Buhaton Aron Mahiusa Pag-usab sa Imong Amahan

Si Cézar ug ang libolibo pang mga Koreano nga gihisgotan sa sinugdan kinahanglang molihok aron mahiusa pag-usab sa ilang mga pamilya. Ang maong mga Koreano miapil sa programa, ug si Cézar mibiya sa mga tawong nagsagop kaniya. Sa susama, kinahanglan tingaling mohimo dayon kag aksiyon aron mahiusa sa imong langitnong Amahan, si Jehova nga Diyos, ug mahimong bahin sa iyang pamilya. Unsay angay nimong buhaton?

Aron masuod sa Diyos nga imong Amahan, kinahanglang motuon ka sa iyang Pulong, ang Bibliya, kay pinaagi niana imong maugmad ang lig-ong pagtuo kaniya ug sa iyang mga saad. Kinahanglang motuo ka nga ang gisugo sa Diyos kanimo maoy alang sa imong kaayohan. Kinahanglan usab nimong dawaton ang pagtul-id ug pagdisiplina sa Diyos, kay ang Bibliya nag-ingon ngadto sa mga Kristohanon: “Ang Diyos nagatagad kaninyo ingon nga mga anak. Kay kinsa ba ang anak nga wala disiplinaha sa usa ka amahan?”—Hebreohanon 12:7.

Ang paghimo niana makapausab sa tibuok nimong kinabuhi. Ang Bibliya nag-ingon: “Magbag-o kamo diha sa puwersa nga nagpalihok sa inyong kaisipan, ug magsul-ob sa bag-ong pagkatawo nga gilalang sumala sa kabubut-on sa Diyos sa matuod nga pagkamatarong ug pagkamaunongon.” (Efeso 4:23, 24) Dayon, sunda ang tambag ni apostol Pedro: “Ingong masinugtanong mga anak, hunong na sa pagpaumol sumala sa mga tinguha nga inyong nabatonan kanhi sa inyong kawalay-alamag.”—1 Pedro 1:14.

Pagpangita sa Tinuod Nimong Pamilya

Sa dihang nakita ni Cézar ang iyang inahan, nalipay kaayo siya sa pagkasayod nga aduna diay siyay magulang nga lalaki ug babaye. Sa samang paagi, sa dihang masuod ka sa imong langitnong Amahan, imong masayran nga duna sab kay daghang igsoong lalaki ug babaye diha sa Kristohanong kongregasyon. Samtang makig-uban ka kanila, lagmit mas masuod ka kanila kay sa imong pamilya sa unod.—Buhat 28:14, 15; Hebreohanon 10:24, 25.

Gidapit ka sa pagbalik ngadto sa imong tinuod nga Amahan ug sa imong tinuod nga mga igsoong lalaki ug babaye. Magmalipayon ka gayod sama kang Cézar ug sa libolibo pang mga tawo sa Korea sa dihang sila nahiusa pag-usab sa ilang mga pamilya.

[Hulagway sa panid 8]

Si Cézar sa edad nga 19 uban sa iyang inahan

[Hulagway sa panid 10]

Paningkamot nga masuod sa Diyos