Armagedon—Gubat sa Diyos nga Magtapos sa Tanang Gubat

“Sila nagtuo nga daotan ang pagpatay sa ilang isigkatawo; busa, para kanila ang gubat lisod sabton ug ngil-ad. Gani, wala silay pulong para niana.”—PAGHUBIT SA NORWEGONG EKSPLORADOR NGA SI FRIDTJOF NANSEN SA MGA TAWONG INUIT SA GREENLAND NIADTONG 1888.

KINSA may dili malipay nga mopuyo sa usa ka kalibotan nga walay gubat? Morag imposible kanang mahitabo, ilabina kon sa tawo kita mosalig.

Hinunoa, sa tagna ni Isaias, ang Diyos mismo nagsaad nga ipatungha niya ang ingon niana nga kalibotan: “Ilang pagasalsalon ang ilang mga espada nga mga punta sa daro ug ang ilang mga bangkaw nga mga galab. Usa ka nasod dili mobakyaw sa espada batok sa usa ka nasod, ni makakat-on pa sila sa gubat.”—Isaias 2:4.

Tataw nga aron matuman ang maong saad, kinahanglan gayong bag-ohon ang kalibotan karon nga may 20 milyones ka sundalo ug mga 20 ka gubat nga padayong ginasangka. Dili ikatingala nga ang labing-gamhanang Diyos nga si Jehova kinahanglang mangilabot sa mga kalihokan sa tawo. Kini mosangko sa gitawag sa Bibliya ug Armagedon.—Pinadayag 16:14, 16.

Niining di pa dugayng katuigan, ang pulong “Armagedon” gigamit sa pagtumong sa tibuok yuta nga nukleyar nga kalaglagan, apan ang usa ka diksiyonaryo nag-ingon nga sa panguna kini nagtumong sa: “Dapit diin mahitabo ang dako ug kataposang panagsangka tali sa mga puwersa sa maayo ug sa daotan.” Mabuntog ba gayod sa maayo ang daotan, o ang mao bang gubat hinanduraw lamang?

Mahupayan kita sa pagkahibalo nga ang Bibliya sublisubling naghisgot bahin kataposan sa pagkadaotan. “Ang mga makasasala matibawas gikan sa yuta,” nagtagna ang salmista. “Kon bahin sa mga daotan, sila mawala na.” (Salmo 104:35) “Ang mga matul-id mao ang magapuyo sa yuta, ug ang walay-ikasaway mao ang magpabilin diha niana,” nag-ingon ang Proverbio. “Kon mahitungod sa mga daotan, sila pagaputlon gikan sa yuta; ug kon bahin sa mga maluibon, sila pagalukahon gikan niini.”—Proverbio 2:21, 22.

Tataw usab nga gisulti sa Bibliya nga ang mga daotan dili gayod mosurender; busa gikinahanglan ang gubat sa Diyos nga motapos sa tanang pagkadaotan, lakip na sa gubat. (Salmo 2:2) Ang pulong Armagedon nga maoy gingalan sa Bibliya niining talagsaong gubat makahuloganon kaayo.

 Mga Gubat nga Gisangka Kaniadto Duol sa Megido

Ang pulong “Armagedon” nagkahulogan ug “Bukid sa Megido.” Sa karaang siyudad sa Megido ug sa kasikbit niini nga Walog sa Jezreel, gisangka ang daghang mahukmanong mga gubat. “Sa tibuok kasaysayan, ang Megido ug ang Walog sa Jezreel maoy mga dapit diin gisangka ang mga gubat nga nakapausab sa dagan sa kasaysayan,” misulat ang historyano nga si Eric H. Cline diha sa librong The Battles of Armageddon.

Sumala sa giingon ni Cline, sagad nga mahukmanon ang mga gubat nga gisangka duol sa Megido. Ang kasundalohan sa Mongolia, nga misakop sa dakong bahin sa Asia sa ika-13ng siglo nakaagom sa ilang unang kaparotan niining waloga. Sa dapit nga dili layo sa Megido, giparot sa mga kasundalohan sa Britanya nga gipangunahan ni Heneral Edmund Allenby ang mga Turko sa unang gubat sa kalibotan. Ang usa ka historyano sa militar naghubit sa kadaogan ni Allenby ingong “usa sa labing dali nahuman nga pag-atake ug labing mahukmanong gubat sa tibuok kasaysayan.”

Ang mahukmanong mga gubat nga natala sa Bibliya gisangka usab duol sa Megido. Didto, giparot ni Maghuhukom Barak ang kasundalohan sa Canaan ilalom ni Sisera. (Maghuhukom 4:14-16; 5:19-21) Nianang dapita usab giparot ni Gideon ug sa iyang 300 ka sundalo ang daghan kaayong kasundalohan sa Midian. (Maghuhukom 7:19-22) Si Haring Saul ug ang iyang anak nga si Jonathan namatay sa Bukid sa Gilboa, nga dili layo sa Megido, sa dihang giparot sa Filistehanong kasundalohan ang Israel.—1 Samuel 31:1-7.

Tungod kay ang Megido ug ang kanait nga mga walog maoy maayong mga natad sa panggubatan, daghang gubat ang gisangka diha niana sulod sa milabayng 4,000 ka tuig. Sumala sa usa ka historyano miabot pa gani kinig 34 ka buok!

Sa walay duhaduha ang kasaysayan ug ang kahimtang sa yuta sa Megido adunay kalambigitan sa paggamit sa pulong “Armagedon” sa simbolikong paagi. Bisan tuod ang maong pulong kas-a lang makita diha sa Bibliya, tataw nga gipakita sa palibot nga mga teksto nga ang Armagedon makaapektar sa kinabuhi sa tanang tawo sa kalibotan.

Ang Armagedon Sumala sa Bibliya

Bisan tuod daghang gubat nga gisangka kaniadto duol sa Megido ang napamatud-ang mahukmanon,  walay usa niana ang nakawagtang sa pagkadaotan. Wala usab mahitabo nga nagsangka ang mga puwersa sa maayo ug sa daotan. Makataronganon nga kanang matanga sa gubat maggikan gayod sa Diyos. Sumala pa sa giingon ni Jesus, “walay bisan kinsa nga maayo, gawas sa usa, ang Diyos.” (Lucas 18:19) Dugang pa, ang Bibliya espesipikong nagtawag sa Armagedon ingong gubat sa Diyos.

Diha sa Bibliya, ang basahon sa Pinadayag nag-ingon nga ang “mga hari sa tibuok gipuy-ang yuta” pagatigomon “ngadto sa gubat sa dakong adlaw sa Diyos nga Labing Gamhanan.” (Pinadayag 16:14) Dayon ang maong tagna midugang: “Ug ilang gitigom sila sa dapit nga gitawag sa Hebreohanon ug Har–Magedon,” o Armagedon. a (Pinadayag 16:16) Sa ulahi, gipatin-aw sa Pinadayag nga “ang mga hari sa yuta ug ang ilang kasundalohan” magtigom “aron makiggubat sa usa nga nagsakay sa kabayo ug uban sa iyang kasundalohan.” (Pinadayag 19:19) Kini nga mangangabayo walay lain kondili si Jesu-Kristo.—1 Timoteo 6:14, 15; Pinadayag 19:11, 12, 16.

Unsa may atong ikahinapos niini nga mga bersikulo? Makahinapos kita nga ang Armagedon maoy gubat tali sa Diyos ug sa masinupakong katawhan. Nganong kinahanglan mang ipahinabo ni Jehova ug sa iyang Anak, si Jesu-Kristo, ang maong gubat? Ang usa ka hinungdan mao nga ang Armagedon ‘magalaglag sa mga nagalaglag sa yuta.’ (Pinadayag 11:18) Gawas pa, kini magpatungha ug usa ka malinawong kalibotan, “usa ka bag-ong yuta nga atong ginapaabot sumala sa . . . saad [sa Diyos],” diin “magpuyo ang pagkamatarong.”—2 Pedro 3:13.

 Nganong Kinahanglan Mang Mahitabo ang Armagedon?

Lisod bang handurawon nga si Jehova, ang “Diyos sa gugma,” magtudlo sa iyang Anak, ang “Prinsipe sa Pakigdait,” aron makiggubat? (2 Corinto 13:11; Isaias 9:6) Kon imong masabtan ang ilang motibo, sa walay duhaduha, masabtan usab nimo kon nganong buhaton nila kana. Ang basahon sa mga Salmo naghubit kang Jesus ingong manggugubat nga nagsakay sa kabayo. Nganong makig-away man siya? Gipatin-aw sa salmista nga si Kristo, makig-away “sa kawsa sa kamatuoran ug sa pagkamapainubsanon ug sa pagkamatarong.” Siya makiggubat tungod kay siya nahigugma sa pagkamatarong ug nagdumot sa pagkadaotan.—Salmo 45:4, 7.

Sa samang paagi, ang Bibliya naghubit sa reaksiyon ni Jehova sa inhustisya nga iyang nakita karon sa kalibotan. “Nakita kini sa GINOO, ug nasuko siya nga wala nay hustisya,” misulat ang manalagnang si Isaias. “Gisul-ob niya ang katarong ingon nga salipod sa dughan, ug gikalo niya ang kaluwasan; gibisti niya ang kadasig sa pagpanimalos.”—Isaias 59:15, 17, Maayong Balita Biblia.

Samtang ang mga daotan pa ang magmando, ang mga matarong dili makatagamtam ug kalinaw ug kasegurohan. (Proverbio 29:2; Ecclesiastes 8:9) Sa pagkatinuod, ang kahiwian ug pagkadaotan maoy bahin na sa kinabuhi sa mga tawo nga nagbuhat niana. Busa, mabatonan lamang ang dumalayong kalinaw ug hustisya kon malaglag na ang mga daotan. “Ang daotan maoy lukat alang sa matarong,” misulat si Solomon.—Proverbio 21:18.

Sanglit ang Diyos mao man ang Maghuhukom, makaseguro kita nga sa tanang higayon ang iyang paghukom batok sa mga daotan maoy matarong. “Dili ba mobuhat ang Maghuhukom sa tibuok yuta sa kon unsay matarong?” nangutana si Abraham. Nasayran ni Abraham nga si Jehova kanunayng husto! (Genesis 18:25) Dugang pa, ang Bibliya nagpasalig kanato nga si Jehova dili malipay sa kalaglagan sa mga daotan; buhaton lamang niya kana kon dili gayod sila maghinulsol.—Ezequiel 18:32; 2 Pedro 3:9.

Magmakombinsido nga Tinuod Gayod nga Gubat ang Armagedon

Kang kinsa man kita dapig niining gubata? Kadaghanan kanato maghunahuna tingali dayon nga kita dapig sa mga puwersa sa maayo. Apan unsaon nato pagseguro? “Pangitaa ang pagkamatarong, pangitaa ang pagkamaaghop,” nag-awhag ang manalagnang si Sofonias. (Sofonias 2:3) Kabubut-on sa Diyos nga “ang tanang matang sa mga tawo mangaluwas unta ug makadangat sa tukmang kahibalo sa kamatuoran.”—1 Timoteo 2:4.

Ang pagkakat-on sa kamatuoran bahin kang Jehova ug sa iyang katuyoan nga wagtangon sa yuta ang pagkadaotan mao ang unang tikang ngadto sa kaluwasan. Ang ikaduha mao ang pagbuhat sa pagkamatarong aron maangkon ang pag-uyon ug proteksiyon sa Diyos.

Kon buhaton nato kana, kita mahinamong makapaabot sa Armagedon, ang gubat nga magtapos gayod sa gubat sa tawo. Pagkatapos niana, ang mga tawo sa tibuok kalibotan mag-isip na unya sa gubat ingong lisod sabton ug ngil-ad. “Dili na sila magbansay sa pagpakiggubat.”—Isaias 2:4, New American Standard Bible.

[Footnote]

[Blurb sa panid 5]

Ang pagpangilabot sa Diyos sa kalihokan sa tawo gitawag ug Armagedon

[Hulagway sa panid 6]

Megido

[Hulagway sa panid 6]

Si Gideon ug ang iyang kasundalohan nagmadaogon sa gubat nga nahitabo duol sa Megido

[Hulagway sa panid 6, 7]

Sa dihang matapos na ang Armagedon, ang mga tawo sa tibuok kalibotan mag-isip na unya sa gubat ingong lisod sabton ug ngil-ad

[Hulagway sa panid 8]

Ang pagkat-on sa kamatuoran bahin kang Jehova ug sa iyang katuyoan mao ang unang tikang ngadto sa kaluwasan