Among mga Magbabasa Nangutana

Asa Mahitabo ang Gubat sa Armagedon?

Ang gubat sa Armagedon dili mahitabo sa usa ka espesipikong lugar. Hinunoa, kini mahitabo sa tibuok yuta. Ngano man? Tungod kay ang magkaatbang nga mga puwersa dako kaayo nga sila dili maarang sa usa lamang ka dapit.

Ang Armagedon, o Har–Magedon, nailhan usab ingong “gubat sa dakong adlaw sa Diyos nga Labing Gamhanan.” Gamiton ni Jehova nga Diyos ang iyang Anak, si Kristo Jesus, sa pagtigom sa iyang mga anghel aron makiggubat sa tanang daotang magmamando sa yuta.—Pinadayag 16:14; 19:11-16.

Ang mga nasod daw gihaylo sa mga demonyo sa pag-apil sa gubat. Ang Bibliya naghisgot bahin sa “mga pahayag nga inspirado sa mga demonyo” nga nangadto “sa mga hari sa tibuok gipuy-ang yuta, aron sa pagtigom kanila ngadto sa . . . dapit nga gitawag sa Hebreohanon ug Har–Magedon.”—Pinadayag 16:14-16.

Daghang tawo ang mas naikag sa Pinadayag kay sa ubang mga basahon sa Bibliya. Ang mga magbabasa nga nagtuo nga literal ang kahulogan sa Pinadayag nagtumbok sa espesipikong lugar diin didto kono magsugod ang gubat sa Armagedon, ug gipanid-an nila pag-ayo ang mga panghitabo sa maong dapit. Dugay nang gituohan nga ang Armagedon mahitabo sa usa ka espesipikong dapit sumala sa gipakita sa labing karaan nga Gregong komentaryo sa Pinadayag, nga gisulat ni Oecumenius sa ikaunom nga siglo K.P.

Sama sa gituohan sa daghang Pundamentalistang mga klero, si John F. Walvoord, nga kanhing presidente sa Dallas Theological Seminary, nag-ingon nga ang Armagedon mao “ang pangataposang gubat sa gamhanang mga nasod nga mahitabo sa Tungang Sidlakan, nga mosangpot sa tibuok-yuta nga kalaglagan.” Sumala kang Walvoord, kining umaabot nga dakong gubat mahitabo kono sa “‘Bukid sa Megido,’ nga usa ka bungtod nga anaa sa tumoy sa dakong walog sa amihanang Palestina.”

Apan, ang basahon sa Pinadayag wala magtumong sa literal nga dapit nga gitawag ug Armagedon. Ang pasiunang mga pulong niini nag-ingon nga kini gipadayag pinaagig mga “ilhanan.” (Pinadayag 1:1) Ang mga Saksi ni Jehova miingon kaniadto diha sa ilang basahon nga Studies in the Scriptures, Tomo IV: “Dili kita magdahom nga ang mga tawo literal nga magtigom sa Bungtod sa Megido.”

Ang mga gubat nga gisangka kaniadto sa Megido nagpakita nga ang mga kaaway sa Diyos dili gayod makaikyas. Busa sa Armagedon, tinoon sa Diyos nga ang tanang kahiwian ug pagkadaotan bug-os nga mawagtang sa nawong sa yuta.—Pinadayag 21:8.

Kadtong nahigugma kang Jehova nga Diyos ug sa iyang Anak, si Jesu-Kristo, dili angayng mahadlok sa Armagedon. Ang gubat sa Diyos maoy batok lamang niadtong dili mobiya sa pagkadaotan. Sa maong gubat, pilion lamang kon kinsay laglagon. “Si Jehova mahibalo kon unsaon pagluwas sa katawhan nga may diyosnong pagkamahinalaron,” matod pa sa Bibliya. (2 Pedro 2:9) Ang makapadasig nga saad diha sa Salmo 37:34 nag-ingon: “Laom kang Jehova ug bantayi ang iyang dalan, ug siya magabayaw kanimo aron sa pagpanag-iya sa yuta. Sa dihang pagalaglagon ang mga daotan, ikaw makakita niana.”