Malaglag ba ang Yuta?

NAKAPANGUTANA ka na ba sukad kon unsay dangatan sa yuta? Tungod sa nagakahitabo sa atong matahom nga planeta, daghang tawo ang nagtuo nga kini posibleng malaglag.

Sa pagkatinuod, ang yuta karon nadaot tungod kay giabusohan ang bililhong mga kahinguhaan niini, sama sa tubig, kalasangan, ug atmospera. Gawas pa, ang mga siyentipiko nagpasidaan nga ang yuta ug ang kinabuhi nga anaa niini hayan malaglag tungod sa dakong bulalakaw, pagbuto sa bituon, o pagkahurot sa idroheno sa adlaw nga maoy tinubdan sa enerhiya niini.

Ang mga siyentipiko nagtuo nga sa ngadtongadto—lagmit sa paglabay sa bilyonbilyong katuigan—ang yuta dili na kapuy-an. Ang Encyclopædia Britannica naghubit niini ingong “dili-kalikayan nga pagkadaot.”

Ikalipay, ang Bibliya nagpasalig kanato nga dili itugot ni Jehova nga Diyos nga ang yuta malaglag o dili na unya kapuy-an. Ingong Maglalalang, siya abunda kaayog “dinamikong kusog,” busa siya makahimo sa pagmentinar sa uniberso hangtod sa hangtod. (Isaias 40:26) Busa, makasalig ka niining mga pulonga: “Gitukod [sa Diyos] ang yuta ibabaw sa pihong mga dapit niini; kini dili matarog hangtod sa panahong walay tino, o hangtod sa kahangtoran.” “Dayega ninyo siya, adlaw ug bulan. Dayega ninyo siya, kamong tanang kabituonan sa kahayag. . . . Kay siya nagsugo, ug nalalang sila. Ug siya nagapabarog kanila hangtod sa kahangtoran.”—Salmo 104:5; 148:3-6.

Ang Katuyoan sa Diyos sa Yuta

Dili gayod katuyoan sa Diyos nga abusohan ug hugawan ang yuta sama sa kahimtang niini karon. Hinunoa, gilalang sa Diyos ang unang lalaki ug babaye, si Adan ug Eva, ug gibutang sila sa matahom nga tanaman. Siyempre, ang Paraiso nga ilang gipuy-an dili magpabiling nindot kon kini pasagdan lang. Ang Diyos nagsugo kanila “sa pagtikad niini ug sa pag-atiman niini.” (Genesis 2:8, 9, 15) Makalilipay ug makapatagbaw gayod ang buluhaton nga gihatag sa Diyos sa  atong unang mga ginikanan kinsa hingpit sa sinugdan!

Apan aduna pay laing katuyoan ang Diyos sa yuta gawas sa pag-atiman lamang nianang orihinal nga tanaman. Buot niyang mahimong paraiso ang tibuok yuta. Busa, iyang gisugo si Adan ug Eva: “Magmabungahon ug magdaghan kamo ug pun-a ang yuta ug gamhi kini, ug pagabut-i ang mga isda sa dagat ug ang nagalupad nga mga linalang sa kalangitan ug ang matag buhing linalang nga nagalihok diha sa yuta.”—Genesis 1:28.

Ikasubo, ang katuyoan sa Diyos gibabagan sa usa ka mapahitas-ong manulonda nga sa ulahi nailhang si Satanas. Siya nagtinguha gayod nga simbahon ni Adan ug Eva. Ginamit ang usa ka bitin sa pagpakigsulti kanila, si Satanas milampos sa paghaylo kanila sa pagrebelde sa pagmando sa Diyos. (Genesis 3:1-6; Pinadayag 12:9) Ang atong Maglalalang nasakitan gayod sa ilang kahakog ug pagkaingrato! Apan wala gayod kana makapausab sa katuyoan ni Jehova nga Diyos sa yuta. Siya nag-ingon: “Ang akong pulong nga mogula gikan sa akong baba . . . dili mobalik kanako nga walay sangpotanan, apan kini tinong magbuhat nianang akong gikahimut-an, ug kini tinong magpalampos sa butang nga tungod niana kini akong gipadala.”—Isaias 55:11.

Si Jehova adunay maayong katarongan kon nganong iyang gitugotan nga magpadayon ang pagrebelde ni Satanas hangtod sa atong adlaw. Nianang panahona, gisulayan sa tawo ang lainlaing matang sa pagmando, ug ang sangpotanan niana nagpamatuod nga kon ang tawo mobulag sa Diyos sama sa gipasiugda ni Satanas, siya mapakyas gayod. a—Jeremias 10:23.

Sa laing bahin, sa milabay nga linibo ka katuigan, gipanalanginan sa Diyos ang matarong nga mga tawo. Gipasulat usab niya diha sa Bibliya ang sangpotanan kon tumanon ang Diyos o kon isalikway ang iyang pagmando. Dugang pa, si Jehova naghimog kahibulongang mga butang nga makahatag kanatog kaayohan. Sa kamahigugmaon, siya nagtagana sa katawhan ug Manluluwas pinaagi sa pagpadala sa iyang hinigugmang Anak, si Jesu-Kristo, aron tudloan kita sa labing maayong paagi sa pagkinabuhi ug aron ihatag ang iyang kinabuhi alang kanato. (Juan 3:16) Tungod kay si Jesus dili takos mamatay, ang iyang kamatayon gigamit sa Diyos, aron sa legal nga paagi, iyang mapasig-uli ang butang nga giwala ni Adan ug Eva—ang paglaom nga mabuhi sa walay kataposan diha sa paraisong yuta. b Sa pagtuman niana, si Jehova nga Diyos nagtukod ug usa ka langitnong gingharian nga magmando sa tanang katawhan, ug iyang gitudlo ang iyang Anak, ang nabanhawng si Jesu-Kristo, ingong Hari sa maong Gingharian. Pinaagi niining kahibulongang kahikayan, segurado gayong matuman ang katuyoan sa Diyos sa yuta.—Mateo 6:9, 10.

Busa, makasalig ka gayod niining kahibulongang mga saad sa Bibliya: “Ang mga mamumuhat ug daotan pagaputlon, apan ang mga nagalaom kang Jehova mao ang magapanag-iya sa yuta. Ang mga matarong magapanag-iya sa yuta, ug sila magapuyo sa ibabaw niini hangtod sa kahangtoran.” “‘Tan-awa! Ang tolda sa Diyos anaa uban sa mga tawo, ug siya mopuyo uban kanila, ug sila mahimong iyang mga katawhan. Ug ang Diyos makig-uban kanila. Ug iyang pagapahiran ang tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa. Ang unang mga butang nangagi na.’ Ug ang Usa nga naglingkod sa trono miingon: ‘Tan-awa! Ginabag-o ko ang tanang butang.’”—Salmo 37:9, 29; Pinadayag 21:3-5.

Ang Bibliya Wala Magkasumpaki

Apan ang pipila mangutana tingali, ‘Dili ba mosumpaki ang mga teksto sa Bibliya nga gikutlo sa ibabaw sa ubang mga teksto nga morag naghisgot sa pagkalaglag sa yuta?’ Tagdon nato ang pipila ka pananglitan. Ang pagsusi niana magpakita nga wala magkasumpaki ang Bibliya.

Sa wala pa madiskobrehi sa mga siyentipiko  nga ang materyal nga mga butang modangat gayod sa “dili-kalikayan nga pagkadaot,” ang usa ka salmista sa Bibliya misulat: “Imong [ang Diyos] gipahimutang ang mga patukoranan sa yuta, ug ang mga langit maoy buhat sa imong mga kamot. Sila mangahanaw, apan ikaw magapabilin; ug sama gayod sa usa ka besti silang tanan madunot. Sama gayod sa besti sila imong ilisdan, ug wala na silay silbi. Apan ikaw mao sa gihapon, ug ang imong katuigan walay kataposan.”—Salmo 102:25-27.

Sa dihang gisulat sa salmista kanang mga pulonga, wala niya supaka ang katuyoan sa Diyos sa yuta. Hinunoa, iyang gitandi ang walay kataposang paglungtad sa Diyos ug ang pagkatemporaryo sa mga butang nga iyang gilalang. Kon dili pa tungod sa gahom sa Diyos, magkaguliyang ug madaot gayod ang uniberso—lakip na ang solar nga sistema nga maoy gisaligan sa yuta alang sa kalig-on, kahayag, ug enerhiya. Busa, kon pasagdan ang yuta, kini “madunot,” o malaglag sa dayon.

Aduna pay laing mga teksto sa Kasulatan nga morag mosumpaki usab sa gisulti sa Diyos bahin sa iyang katuyoan sa yuta. Pananglitan, ang Bibliya naghisgot nga ‘mahanaw’ ang langit ug yuta. (Pinadayag 21:1) Segurado gayod nga kini dili mosumpaki sa saad ni Jesus: “Malipayon ang mga malumog-buot, sanglit sila magapanunod sa yuta.” (Mateo 5:5) Nan, unsay gipasabot sa Bibliya sa pag-ingon niini nga ang langit ug yuta ‘mahanaw’?

Ang pulong “yuta” sagad gigamit sa Bibliya sa masambingayong paagi sa pagtumong sa mga tawo. Pananglitan, tagda ang mosunod nga bersikulo: “Ang tibuok yuta nagpadayon nga may usa ka pinulongan ug usa ka hugpong sa mga pulong.” (Genesis 11:1) Tataw kaayo nga ang “yuta” dinhi nagtumong sa mga tawo nga nabuhi kaniadto. Ang laing pananglitan mao ang Salmo 96:1, nga gihubad sa King James Version niining mga pulonga: “Pag-awit ngadto sa GINOO, tibuok yuta.” Klaro kaayo niining mga tekstoha ug sa uban pa nga ang gipasabot sa pulong “yuta” mao ang mga tawo.—Salmo 96:13.

Usahay, ipakasama sa Bibliya ang mga magmamando sa yuta ngadto sa langit o sa mga butang sa langit. Pananglitan, ang madaogdaogong mga hari sa Babilonya gihubit nga samag bituon tungod kay gituboy nila ang ilang kaugalingon ibabaw sa ubang mga tawo. (Isaias 14:12-14) Sumala sa gitagna, ang simbolikong “kalangitan” sa Babilonya, o mga magmamando, ug ang “yuta,” ang mga tawo ilalom sa maong pagmando, nalaglag niadtong 539 W.K.P. (Isaias 51:6) Tungod niini, ang mahinulsolong mga Hudiyo nakabalik sa Jerusalem, diin ang “bag-ong mga langit,” ang bag-ong kagamhanan, nagmando ibabaw sa “usa ka bag-ong yuta,” ang katilingban sa matarong nga mga tawo.—Isaias 65:17.

Ang giingon sa Bibliya bahin sa ‘pagkahanaw’ sa langit ug yuta dayag nga nagtumong sa kalaglagan sa dunot nga gobyerno sa tawo ug sa dili-diyosnong mga tigsuportar niini. (2 Pedro 3:7) Human niana, ang bag-ong langitnong kagamhanan sa Diyos magapanalangin sa matarong nga mga tawo, tungod kay ‘adunay bag-ong mga langit ug usa ka bag-ong yuta nga atong ginapaabot sumala sa saad sa Diyos, ug niini magpuyo ang pagkamatarong.’—2 Pedro 3:13.

Busa, makasalig ka sa saad sa Diyos nga ang yuta molungtad hangtod sa hangtod. Dugang pa, ang Bibliya nagpakita kon unsay kinahanglan nimong buhaton aron presente ka unya sa dihang ang yuta mahimo nang usa ka paraiso. Si Jesus miingon: “Kini nagkahulogan ug kinabuhing walay kataposan, ang ilang pagkuha ug kahibalo bahin kanimo, ang bugtong matuod nga Diyos, ug sa usa nga imong gipadala, si Jesu-Kristo.” (Juan 17:3) Nganong dili nimo himoong tumong nga susihon kon unsay gitudlo sa Bibliya bahin sa umaabot sa yuta ug sa tanang tawo? Ang mga Saksi ni Jehova sa inyong lugar malipay sa pagtabang kanimo niining bahina.

[Mga footnote]

[Blurb sa panid 12]

Ang Bibliya nagsaad nga ang yuta molungtad hangtod sa hangtod

[Picture Credit Lines sa panid 10]

Background globe: NASA/The Visible Earth (http://visibleearth.nasa.gov/); polar bear: © Bryan and Cherry Alexander Photography