Ako Nagmalipayon sa Pagbuhat sa Kabubut-on sa Diyos

Sumala sa giasoy ni Bill Yaremchuk

Sa Marso 1947, mga pipila pa lang ka semana human ako migraduwar ingong misyonaryo sa ikawalo nga klase sa Watchtower Bible School of Gilead, nga nahimutang kaniadto sa South Lansing, New York, U.S.A., ako mibiyahe paingon sa halayong dapit diin ako giasayn—sa Singapore.

SI Dave Farmer, nga usa usab ka Canadiano nga migraduwar sa ikapito nga klase sa Gilead, maoy akong kauban. Kami misakay sa Marine Adder, nga kanhi usa ka barkong iggugubat, ug milawig kami gikan sa San Francisco, California.

Pag-abot namo sa Sidlakan, mieskala mi sa Hong Kong. Nakurat gayod kami sa among nakita. Grabe kaayo ang epekto sa Gubat sa Kalibotan II—ang mga tawo nanghigda sa daplin sa karsada nga gigutom ug daw himalatyon na. Dayon, kami misakayg balik sa barko ug mipaingon sa Manila, ang kaulohan sa Pilipinas.

Didto, nakita usab namo ang kadaot nga gipahinabo sa gubat. Nanggimaw diha sa dagat ang palo sa mga barko nga nalunod tungod sa pagpamomba sa mga ayroplano sa Amerika ug ang mga tawo kabos kaayo. Nakahimamat kamig pipila ka Saksi ni Jehova, ug ila kaming gidala sa ilang Kingdom Hall. Sila malipayon bisan pa sa mga problema nga ilang giatubang.

Human niana, mihapit mi sa Batavia (karon Jakarta) sa Indonesia. Dihay giyera-sibil niadtong panahona, ug dihay engkuwentro duol sa pantalan mao nga wala kami pakanaoga sa barko. Samtang naglawig mi paingon sa Singapore, ako naghunahuna kon unsa kahay kahimtang didto. Nadaot na ba gayod ang talagsaong katahom sa Sidlakan sumala sa pagkahubit niini sa brosyur nga among nabasa?

Paglabay sa pipila ka adlaw, nahanaw ang akong pagduhaduha. Ang misunod nga mga panghitabo nagpakita nga gipaluyohan gayod sa Diyos ang among buluhaton ni Dave.

Kon sa Unsang Paagi Nakapuyo Kami Didto

Mga usa ka bulan human kami mobiya sa San Francisco, kami nakaabot ra gayod sa St. John’s Island, ang lugar diin magpondo ang mga barko hangtod nga kini tugotan sa pagdunggo sa pantalan. Ang mga opisyales sa imigrasyon misakay sa barko aron susihon ang mga dokumento sa mga pasahero, ug ilang gimarkahan ang among mga pasaporte ug “Permitted to Land,” nga nagpasabot nga kami gitugotan sa pagsulod sa maong nasod. Pagkabuntag, ang barko midunggo sa pantalan. Kami nanaog human susiha sa usa ka opisyal sa barko ang among mga dokumento.

Pagkasunod adlaw, namalik mi sa barko aron manamilit sa ubang mga misyonaryo nga kauban namo sa biyahe. Paingon sila sa India ug Ceylon (karon Sri Lanka). Sa dihang nakita kami sa kapitan  sa barko, mikanaog siya ug iya kaming gikasab-an. Siya nasuko ug misinghag nga dili kono mi angayng manaog sa barko. Sa naglawig pa ang barko, ang usa ka opisyal sa imigrasyon nga si Mr. Haxworth mimando diay kaniya nga dili kami pakanaogon inigdunggo sa barko. Wala kami mahibalo niana, mao man usab ang opisyal nga nagtugot kanamo sa pagkanaog sa barko.

Puwerteng sukoa ni Mr. Haxworth sa dihang kami miatubang kaniya. Giayo niya kamig kasaba ug matod pa niya gidid-an kono mi sa pagsulod sa Singapore. Kay wala kamiy kalibotan niana, among gipakita kaniya ang among pasaporte nga gimarkahag “Permitted to Land.” Iyang kanang gilabni gikan sa among kamot ug iyang gikaras ang marka. Apan wala na siyay nahimo kay ang barko nakalarga na. Giembargo ni Mr. Haxworth ang among mga pasaporte ug wala niya kana ibalik sulod sa usa ka tuig, apan sa ulahi iya ra kanang gibalik nga gimarkahan nag “Permitted to Land.”

Mabungahong Ministeryo sa Singapore

Pag-abot namo sa Singapore niadtong Abril 1947, diha lamay usa ka Saksi didto, si Joshua. Siya usa ka bug-os-panahong ministro, o payunir, hangtod sa iyang kamatayon sa sayong bahin sa katuigan sa 1970. Sa ngadtongadto, ang pipila nga nakakat-on sa kamatuoran sa Bibliya nagpaambit sa ilang nakat-onan ngadto sa uban. Gitubag gayod ang among mga pag-ampo alang sa dugang mga mamumuo sa espirituwal nga pagpangani.—Mateo 9:37, 38.

Sa 1949, sa dihang si Mr. Haxworth nagbakasyon ug dugay sa Inglaterra, miabot sa Singapore ang unom ka misyonaryo nga migraduwar sa ika-11 nga klase sa Gilead. Apan si Dave, nga maoy akong kauban niadto sulod na sa pipila ka tuig, kinahanglang mobiya sa Singapore tungod sa sakit. Siya mipuyo sa Australia, diin siya matinumanong nag-alagad hangtod sa iyang kamatayon niadtong 1973. Ang usa sa unom ka bag-ong  mga misyonaryo mao si Aileen Franks, nga maoy akong naminyoan niadtong 1956.

Latas sa katuigan, daghan kamig gidumalahan ug pagtuon sa Bibliya nga nahimong mga Saksi uban sa ilang mga anak. Bisan karon, ang pipila kanila maoy bug-os-panahong mga ministro sa ubang mga nasod. Ang usa sa makapadasig nga kasinatian mao ang kang Lester ug Joanie Haynes, usa ka magtiayong Amerikano nga nagpuyo sa Singapore. Gidumalahan namo silag pagtuon sa Bibliya sa katuigan sa 1950. Paspas ang ilang pag-uswag ug sila nabawtismohan pagbalik nila sa Amerika. Sa ulahi, si Lester ug Joanie nagmabungahon sa ministeryo. Daghan silag natabangan nga mahimong mga Saksi, lakip na ang ilang tulo ka anak.

Si Joanie misulat: “Sa dihang mahinumdom ko sa tuig nga kami mipuyo sa Singapore, makaingon ko nga nausab gayod ang dagan sa among kinabuhi niadtong panahona. Kon wala mi ninyo atimana, basin nagsige pa mig balhin-balhin karon sa kon diing nasora. Nalipay ko nga kamo ang nagtudlo kang Lester sa kamatuoran tungod kay sukad sa sinugdan, inyo nang gisilsil diha kaniya ang paghigugma kang Jehova ug sa mga igsoon. Wala gayod niya kana malimti.”

Nag-alagad Ingong Pamilya sa Singapore

Sa 1962, dihay dakong kausaban nga wala namo damha. Mabdos kono si Aileen matod pa sa among doktor. Gusto namong magpadayon sa pag-alagad ingong misyonaryo, apan lisod dunganon ang pagmisyonaryo ug ang pagpadakog anak. Si Nathan H. Knorr, ang tagdumala kaniadto sa buluhaton sa mga Saksi ni Jehova sa tibuok kalibotan, misulat aron dasigon ko nga mangitag trabaho aron makapabilin kami sa Singapore. Dili gayod kadto sayon.

Kadaghanan sa mga langyaw dagkog mga posisyon diha sa mga kompaniya nga langyaw usab ang tag-iya. Apan, wala koy kasinatian sa pagpangempleyo tungod kay misulod dayon ko sa bug-os-panahong ministeryo human sa akong pagtungha mga 23 ka tuig na ang milabay. Busa mibayad ko sa usa ka ahensiya sa London aron silay mangitag trabaho diha sa dagkong mga kompaniya sa Singapore nga mohaom sa akong kuwalipikasyon ingong misyonaryo.

“Gikasubo namo nga walay bakanteng posisyon,” maoy kanunayng balos sa mga kompaniya kanako. Wala konoy posisyon nga mohaom sa akong kuwalipikasyon. Paglabay sa pipila ka bulan, natawo ang among anak nga si Judy. Miduaw niadtong panahona si Brader Knorr sa Singapore, ug iyang giduaw si Aileen ug Judy sa ospital. Iya ming gipasaligan, “Mahimo mong moestar sa balay sa mga misyonaryo hangtod nga makakitag trabaho si Bill.”

Mga pipila ka bulan sa ulahi, ako nadawat ingong ahente sa internasyonal nga kompaniya sa ayroplano. Ang akong suweldo igo ra gayod sa among adlaw-adlaw nga panginahanglan. Duha ka tuig sa ulahi, nakatrabaho ko sa kompaniya sa ayroplano nga gipanag-iya sa mga Amerikano ug gidoble nila ang akong suweldo. Sa ngadtongadto, maayo na ang akong pagpanarbaho, busa nakagugol na ako ug mas daghang panahon sa akong pamilya ug sa Kristohanong ministeryo.

Kami puliki diha sa pag-alagad kang Jehova ug giuna gayod namo ang espirituwal nga mga butang. Tungod niana, nakadawat kog daghang pribilehiyo sulod sa organisasyon. Si Aileen misulod pag-usab sa bug-os-panahong ministeryo. Nianang panahona, miuswag pag-ayo ang buluhaton sa pagsangyaw sa Gingharian sa Singapore. Sa tunga-tunga sa katuigan sa 1960, nakapalit kamig dos andanas nga bilding nga maoy among gihimong Kingdom Hall. Upat ka kongregasyon ang naggamit niini.

Gidili ang Among Buluhaton!

Sa ngadtongadto, mitungha ang pagsupak sa among buluhaton. Sa Enero 14, 1972, kami miadto sa Kingdom Hall sumala sa naandan aron motambong ug tigom. Apan gikandadohan ang ganghaan niini. Dihay gipaskin nga pahibalo nga ang Kongregasyon sa mga Saksi sa Singapore dili na rehistrado. Gidili ang among buluhaton! a

Wala kami moundang sa pagsimba kang Jehova bisag gikandadohan na ang Kingdom Hall,  apan misantop diha sa akong hunahuna kining pangutanaha, ‘Unsa may kabubut-on sa Diyos alang sa akong pamilya?’ Kon imando sa gobyerno nga papahawaon kami sa Singapore, kami dili na gayod makabalik didto ug dili na usab namo maduaw ang among mga higala. Busa akong gihangyo ang manedyer sa kompaniya nga kon mahimo, iasayn ako sa Kuala Lumpur, Malaysia. Pinaagi niana, sayon ra ang pagbalikbalik sa Singapore. Dili ko makatuo kay iya kong gitanyagan nga mahimong manedyer sa among opisina sa Kuala Lumpur, ug madoble pa gayod ang akong suweldo gawas pa sa ubang mga benepisyo.

Apan naghunahuna ko, ‘Kabubut-on ba gayod sa Diyos nga mobiya mi sa Singapore ug sa mga igsoon?’ Ingong pamilya, amo kining giampo kang Jehova. Among naamgohan nga si Jehova mismo ang nagdala kanamo didto. Busa mihimo kog desisyon—dili mi mobiya. Nahibulong ang manedyer sa dihang gibalibaran nako ang iyang tanyag.

Ubos sa maong kahimtang, lisod kaayo ang pagkinabuhi ug pagtrabaho tungod kay anaa kanunay ang kapeligrohan nga kami madakpan ug mapriso. Dihay mga higayon nga amo gayong napabilhan ang mga pulong sa Salmo 34:7: “Ang manulonda ni Jehova nagkampo libot niadtong nangahadlok kaniya, ug siya nagluwas kanila.”

Bag-ong Asaynment

Sa kataposan, sa 1993, human makaalagad ug kapin sa 46 ka tuig sa Singapore, kami giasayn sa New Zealand, diin mas sayon ang kahimtang sa pag-alagad. Sakit kaayo sa among buot nga biyaan ang among mga higala sa Singapore, nga among gimahal pag-ayo. Apan, kami nadasig kay ang ilang pagtuo lig-on nga samag usa ka balay nga natukod sa lig-ong pundasyon ug gama sa materyales nga dili masunog. Tungod niini, sila nakabarog nga malig-on ug nakalahutay sa mga pagsulay nga ilang giatubang.—1 Corinto 3:12-14.

Kapin na mig 14 ka tuig ni Aileen dinhi sa New Zealand ug kami malipayon gihapon sa among ministeryo ingong mga espesyal payunir bisag mga tigulang na. Duha sa akong mga igsoon buhi pa—si Mike, nga nag-edad ug 94, ug si Peter, nga nag-edad ug 90. Sila matinumanong nag-alagad kang Jehova sa Canada.

Sa 1998 ang among anak nga babaye, si Judy, mibalik sa Sidlakan ug nag-alagad didto sulod sa pipila ka tuig. Diha sa usa sa iyang mga sulat, siya miingon: “Sa adlaw-adlaw, ako mapasalamaton kang Jehova tungod sa pribilehiyo sa pag-alagad dinhi! Ako nagpasalamat usab kaninyo tungod sa inyong mahigugmaong pagbansay kanako ug sa inyong mga pagsakripisyo nga nagpaposible niining maong mga pribilehiyo.” Sa 2003, siya mibalik sa New Zealand aron sa pagtabang kanamo ni Aileen. b

Kami mapasalamaton kang Jehova tungod kay gihatagan niya kamig kahigayonan nga makaambit sa espirituwal nga pagpangani, ingong sanong sa pagtawag sa Agalon alang sa dugang mamumuo. Dili mahubit ang among kalipay tungod niana. Ug sa dihang ‘mahanaw na ang kalibotan,’ sumala sa giingon sa Bibliya, among matagamtam ang kahibulongang saad sa Diyos: “Siya nga nagabuhat sa kabubut-on sa Diyos magpabilin hangtod sa kahangtoran.”—1 Juan 2:17.

[Mga footnote]

[Hulagway sa panid 29]

Si Joshua ang bugtong Saksi sa Singapore pag-abot namo didto niadtong 1947

[Hulagway sa panid 29]

Kami ni Dave Farmer sa Hong Kong, sa dihang kami mibiyahe paingon sa Singapore, sa 1947

[Hulagway sa panid 29]

Kami ni Aileen, sa 1958

[Hulagway sa panid 31]

Uban sa among anak nga babaye, si Judy

[Credit Line]

Kimroy Photography

[Picture Credit Line sa panid 28]

Kimroy Photography