Sulat Gikan sa Australia

“Ako Ning Lingkorag Basa Karong Gabii Duol sa Daob”

KON hisgotan ang hilit nga mga dapit sa Australia, mosantop sa hunahuna sa daghang tawo ang ugang mga desyerto, makapagba nga kainit, ug hawan kaayo nga mga luna. Apan, kining dapita maoy puy-anan sa mga 180,000 ka tawo, mga usa ka porsiyento sa populasyon sa nasod.

Sa bata pa ako, ang akong mga ginikanan nga mga Saksi ni Jehova nagdala kanako sa pagsangyaw sa hilit nga mga dapit. Nakadayeg gayod ako niining halapad ug matahom nga batoong dapit. Nakaangay ko didto kay ang mga tawo baskog ug daw walay kabalaka sa kinabuhi. Karon nga duna na koy pamilya, gusto sab nakong maeksperyensiyahan sa akong asawa ug duha ka anak, nga nag-edad ug 10 ug 12, ang pagsangyaw sa hilit nga mga dapit.

Pagpangandam Alang sa Biyahe

Una, among gitimbangtimbang ang nalangkit nga sakripisyo. Unsa ka layo ang among biyaheon? Unsa ka dugay ming mobakasyon? Usa ka magtiayon ug duha ka bug-os-panahong ministro sa among kongregasyon ang buot mokuyog namo. Nagkasabot mi nga mobiyahe panahon sa bakasyon sa eskuylahan. Dayon misulat mi sa sangang buhatan sa mga Saksi ni Jehova sa Sydney, Australia, sa paghangyog teritoryo nga among sangyawan. Giawhag kami sa pagsangyaw sa usa ka hilit nga dapit duol sa Goondiwindi, usa ka gamayng lungsod nga mga 400 kilometros sa kasadpang bahin sa Brisbane, diin kami nagpuyo.

Nalipay kami sa pagkahibalo nga may usa diay ka gamayng kongregasyon sa mga Saksi ni Jehova sa Goondiwindi. Ang paghimamat sa among mga igsoon sa pagtuo mao ang usa sa labing makaiikag nga bahin sa among biyahe. Among gikontak ang kongregasyon aron pahibaloon sila sa among pagduaw ug naghinahinam sila sa among pag-abot.

Sa wala pa kami mogikan, amo unang gihisgotan kon unsaon pagpresentar ang maayong balita sa Gingharian sa Diyos ngadto sa mga tawo sa hilit nga dapit. Buot gayod namong tahoron ang kultura ug mga kostumbre sa mga nitibo nga among masangyawan. Pananglitan, ang pipila ka tribo nag-isip sa ilang lugar nga ilang teritoryo. Alang kanila, kawalay pagtahod ang pagsulod sa ilang lugar nga dili mananghid.

Pagpaingon sa Goondiwindi

Sa kataposan, miabot na ang gikahinamang adlaw sa pagbiyahe. Ang tagsa ka awto sa duha ka pamilya, nga kargadog tawo ug mga gamit, mipaingon na sa Goondiwindi. Nalabyan una namo ang kaumahan, dayon ang kasagbotan nga may panagsang mga kahoyng eucalyptus. Hayag kaayo ang adlaw diha sa kalangitan. Pipila ka oras sa ulahi nakaabot mi sa Goondiwindi ug mipahulay sa  giabangang mga balaybalay diha sa trailer park aron mopalabay sa kagabhion.

Pagkaugma, adlawng Dominggo, maayo ang panahon alang sa pagsangyaw kay hayag ang adlaw ug presko ang hangin. Ang temperatura dinhi sa ting-init sagad moabot ug 40 grado Celsius! Giuna namo pag-adto ang baryo sa mga nitibo nga mga 30 kilometros ang gilay-on. Gitultolan kami ngadto kang Jenny, usa ka tigulang nga ubanong babaye, ang kapitan sa maong dapit. Namati siya pag-ayo sa among gisangyaw ug malipayong midawat sa librong Pagkakat-on Gikan sa Dakong Magtutudlo. a Dayon iya kaming giawhag sa pagsangyaw sa iyang mga katagibaryo.

Giunhan mi sa nanagan nga kabataan aron ipahibalo ang among pagduaw. Ang matag tagbalay nga among gisangyawan matinahorong namati sa among mensahe ug midawat ug mga basahon sa Bibliya. Wala madugay nahurot ang dala namong mga basahon, ug namalik mi sa lungsod aron motambong ug tigom. Sa wala pa kami mobiya, misaad mi nga mobalik aron sa pagduaw niadtong wala namo masangyawi.

Nianang hapona puno kaayo ang Kingdom Hall sa malipayong mga tawo nga naghimamatay ug dali rang nagkasuod. Ang 25 ka Saksi nianang dapita matinumanong nagsangyaw sa mensahe sa Gingharian ngadto sa mga 11,000 ka tawo nga nakatag diha sa 30,000 ka kilometro kuwadrado nga kabanikahan. “Salamat sa inyong pag-anhi ug pagtabang kanamo,” matod pa sa usa ka mapasalamatong Saksi. Human sa makapadasig nga tigom, nangaon ming tanan. Niadtong gabhiona, una mi natulog, amo usang gipakaon ang mga mananap nga possum nga nagsuroysuroy sa among dapit nga gikatulgan.

“Karong Gabii Duol sa Daob”

Sa misunod nga duha ka adlaw, among giduaw ang lagyong mga balay nga nakatag ubay sa utlanan sa Queensland ug New South Wales. May mugbong mga kahoyng eucalyptus dinhi taliwala sa lunhawng kapatagan diin nanibsib ang mga karnero ug baka. Nakakita usab kamig mga kangaroo nga nagpatangkag sa mga dalunggan samtang nagtan-aw sa among paglabay. Gikan sa layo nakita usab namo ang matahom nga mga emu nga magarbohong nagpasopaso diha sa abogon nga kinoralang dapit.

Pagka-Martes sa hapon nakasugat mig dakong panon sa mga baka nga hinayhinayng nanglakaw diha sa karsada. Naandan nang dal-on sa binayrang mga kawboy ang ilang mga hayop niining dapita, ilabina kon tinghulaw. Dayon among nakasugat ang kawboy nga nagkabayo. Gipadaplin ko ang awto, dayon mikanaog ug ako siyang gitimbaya. “Maayong hapon pod,” mitimbaya usab siya. Mihunong ang tigulang nga lalaki, nga may kaubang iro, ug nakigsulti siya kanako.

Human sa mubo nga panaghisgot bahin sa tinghulaw, ako siyang gisangyawan. “Aw, wa gyod intawon koy hanaw anang Bibliya sukad pa sa akong pagkabata!” matod niya. Nagtuo siya nga ang mga lider sa relihiyon maoy nakaingon sa pagkadaot sa moral sa kalibotan. Apan, dako gihapon siyag pagtahod sa Bibliya. Human sa maayong panaghisgot sa Kasulatan, ako siyang gitanyagan ug librong Unsay Tinuod nga Gitudlo sa Bibliya? b Iya dayon kining gidawat ug gibutang sa bulsa sa iyang sinina ug miingon, “Kon makakat-on kon dinhi ug mga pagtulon-an sa Bibliya, ako ning lingkorag basa karong gabii duol sa daob.”

Sa Among Pagpamauli

Nianang gabhiona giasoy namo ang among mga kasinatian ngadto sa mga igsoon sa pagtuo diha sa Kingdom Hall. Sila misaad nga ilang balikan ang mga interesado nga among nasangyawan. Pagkahuman sa tigom, naglisod mi sa pagpanamilit. Nasuod na mi pag-ayo sa mga igsoon. Nadasig ming tanan tungod sa among espirituwal nga pagdinasigay.—Roma 1:12.

Pagkaugma, mibiyahe na mi pauli. Sa paghinumdom sa among bakasyon, kami nakaingon nga dagayang gipanalanginan ni Jehova ang among mga paningkamot. Gibati namong mas nasuod pa kaniya. Pag-abot namo sa balay, akong gipangutana ang mga bata: “Asa ninyo gustong mobakasyon sa sunod? Sa bukid?” “Dili Pa,” sila mitubag, “mamalik tag sangyaw didto.” Miuyon usab ang akong asawa: “Sige, mamalik ta didto. Kadto ang kinanindotang bakasyon sukad!”

[Mga footnote]