“Batang Israelinhon” sa Modernong Panahon

DUHA ka semana una pa ang Memoryal sa kamatayon ni Jesus, ang matag usa sa pamilyang Sales sa Praia Grande, Brazil, naglista sa mga tawo nga ilang dapiton. Ang sayis-anyos nga si Abigayl gihatagan ug usa ka imbitasyon ug gipangutana siya kon kinsay iyang dapiton.

“Kadtong tawo nga kanunayng mopahiyom nako,” mitubag siya.

“Kinsa siya?” nangutana ang mga ginikanan.

“Kadtong nag-wheelchair,” siya mitubag.

Upat ka adlaw sa ulahi, gitudlo ni Abigayl sa iyang mga ginikanan kon kinsa ang maong tawo. Siya si Walter nga nagpuyo duol ra sa Kingdom Hall. Kapin sa 15 ka tuig na ang milabay, sa dihang 28 anyos pa lang si Walter, ang iyang duha ka tiil naparalisar tungod sa aksidente sa sakyanan. Aduna siyay duha ka guwardiya tungod kay siya arangan man. Ang mga ginikanan nananghid nga makigsulti si Abigayl kang Walter, ug sa dihang sila gitugtan, ilang gisaysay nga ang ilang anak gustong mohatag ug imbitasyon kaniya.

Sa hinapos sa iyang presentasyon, si Abigayl miingon: “Ang among mga kauban sa Kingdom Hall daghag imbitasyon, apan ang ako usa ra. Busa ikaw ra ang akong giimbitar. Kon dili ka motambong, wala koy bisita. Apan kon motambong ka, malipay kaayo ko, labaw na gyod si Jehova.”

Sa adlaw sa Memoryal, ang mga Saksi, apil na si Abigayl, nanglimpiyo sa Kingdom Hall agig pagpangandam sa programa sa Memoryal pagkagabii. Sa hapon na, milabay si Walter, ug sa pagkakita niya kang Abigayl, iyang giingnan ang iyang drayber nga ihunong ang sakyanan. Iyang giablihan ang bentana ug gipangutana si Abigayl kon nag-unsa siya. Giingnan siya ni Abigayl nga nanglimpiyo sila sa Kingdom Hall aron mahimo kining hapsay inigtambong niya.

Panahon sa Memoryal, si Abigayl wala mahimutang. Sa dihang nagsugod na ang pakigpulong, nagsige siyag lingi aron susihon kon miabot na si Walter. Dayon, siya miabot kauban ang iyang mga guwardiya. Nalipay pag-ayo si Abigayl. Human sa pakigpulong, si Walter miadmitir nga nagplano unta siyang mobiyahe sa laing siyudad apan tungod kang Abigayl nausab ang iyang hunahuna ug mitambong siya sa Memoryal. Dayon siya midugang: “Nadasig kaayo ko sa pakigpulong.” Mihangyo siyag kopya sa Bibliya ug misugod siya sa pagtuon ug sa pagtambong sa mga tigom.

Sa laing bahin, ang manghod nga babaye ni Walter miingon nga gusto niyang mahimamat si Abigayl, nga kanunayng hisgotan sa iyang igsoon kaniya. Sa dihang nagkahimamat na sila, siya nalipay kay buotan gayod diay nga bata si Abigayl. “Karon nahibalo na ko kon nganong malipayon kaayo ang akong igsoon,” matod pa niya.

Si Walter nagpadayon sa pagtuon ug sa pagtambong sa mga tigom. Siya mokomento na usab diha sa tigom ug iya nang ginapaambit sa uban ang iyang nakat-onan. Ang gibuhat sa batang si Abigayl magpahinumdom gayod kanato sa Israelinhon nga batang babaye nga mitabang kang Naaman nga makaila sa matuod nga Diyos, si Jehova.—2 Hari 5:2-14.