Kon Nganong Naangkon ni Noe ang Pabor sa Diyos—Nganong Angay Nato Kining Hatagag Pagtagad?

KADAGHANAN kanato dili malimot sa mga higayon nga kita nakadawat ug maanindot nga balita. Kita mahinumdom sa mga detalye—kon diin kita ug kon unsay atong gibuhat niadtong tungora, ug kon unsay atong gibati pagkadungog niana. Sa walay duhaduha, si Noe wala malimot sa adlaw nga iyang nadawat ang usa ka balita gikan kang Jehova nga Diyos, ang Soberano sa uniberso. Kadto mao ang labing hinungdanong balita nga iyang nadungog. Si Jehova miingon nga iya gayong laglagon ang “tanang unod.” Busa iyang gisugo si Noe sa pagtukod ug usa ka dakong arka aron maluwas siya, ang iyang pamilya, ug ang tanang matang sa mananap.—Genesis 6:9-21.

Unsay gibati ni Noe pagkadungog niya niana? Nalipay ba siya sa maong balita, o mireklamo siya? Giunsa niya kana pagsugilon sa iyang asawa ug sa iyang pamilya? Walay gisulti ang Bibliya bahin niana. Ang gitug-an lamang niini kanato mao kini: “Gibuhat ni Noe ang sumala sa tanan nga gisugo sa Diyos kaniya. Gibuhat niya ang ingon gayod.”—Genesis 6:22.

Hinungdanon gayod kana nga punto, kay gipakita niana ang usa ka rason kon nganong naangkon ni Noe ang pabor sa Diyos; siya andam sa pagbuhat sa gisugo sa Diyos kaniya. (Genesis 6:8) Unsa pay laing rason? Hinungdanon nga masayod kita sa tubag niana tungod kay kinahanglang sundogon nato si Noe aron maluwas sa dihang hinloan na usab sa Diyos ang yuta sa mga daotan. Apan, hisgotan una nato kon unsay kahimtang sa yuta sa wala pa ang Lunop.

 Ang mga Demonyo Nanganhi sa Yuta

Si Noe nabuhi sa sayong bahin sa kasaysayan sa tawo. Siya natawo mga usa ka libo ka tuig human lalanga si Adan. Ang mga tawo niadtong panahona dili sama nianang gihanduraw sa daghan nga nagpuyo kono sa langob, balhiboon, kulang sa kabuot, ug nagdala-dalag puspos. Diha nay mga himan nga gama sa puthaw ug tumbaga, ug lagmit gigamit kini ni Noe sa pagtukod sa arka. May mga instrumento na usab sa musika. Ang mga tawo nanagminyo, nag-atiman ug mga pamilya, nananom, ug nagbuhig kahayopan. Sila namalit ug namaligyag mga butang. Niining mga bahina, ang kinabuhi kaniadto susama gayod karon.—Genesis 4:20-22; Lucas 17:26-28.

Apan sa ubang mga paagi, adunay mga kalainan. Ang usa niana mao nga ang mga tawo kaniadto tag-as ug kinabuhi. Naandan na niadtong panahona nga ang tawo mabuhi ug kapin sa 800 ka tuig. Si Noe nabuhi ug 950 ka tuig; si Adan, 930 ka tuig; ug si Matusalem, nga apohan ni Noe, 969 ka tuig. a—Genesis 5:5, 27; 9:29.

Ang laing kalainan gihubit diha sa Genesis 6:1, 2, nga nag-ingon: “Karon nahitabo nga sa dihang ang mga tawo misugod pagdaghan sa nawong sa yuta ug ang mga anak nga babaye nangatawo kanila, unya ang mga anak sa matuod nga Diyos nakamatikod sa mga anak nga babaye sa mga tawo, nga sila maanyag; ug sila nagkuhag mga asawa alang sa ilang kaugalingon, nga mao, ang tanan nga ilang napili.” Kining gitawag dinhi nga “mga anak sa matuod nga Diyos” maoy mga manulonda nga nagsul-ob ug tawhanong lawas ug mipuyo uban sa mga tawo. Wala sila ipadala sa Diyos dinhi; ni mianhi sila aron maghatag ug kaayohan sa mga tawo. Hinunoa, sila “mitalikod sa ilang nahiangay nga puloy-anang dapit” sa langit aron makigrelasyon sa maanyag nga mga babaye sa yuta. Sila nahimong mga demonyo.—Judas 6.

Kini nga mga manulonda rebelyoso, mahilayon, ug may talagsaong gahom ug intelihensiya, ug sila daotan kaayog impluwensiya sa mga tawo. Lagmit sila maoy nagdominar sa tawhanong katilingban. Sila wala maglihok nga tinagotago, samag lider sa sindikato nga naglilong sa iyang tinuod nga pagkatawo ug naghimo sa iyang daotang mga buhat diha sa tago. Hinunoa, tataw kaayo ang ilang makauulaw nga pagrebelde sa kahikayan sa Diyos.

Kining maong mga manulonda nakigrelasyon sa mga babaye, ug sila nakabatog mga anak nga may talagsaong kusog. Ang ilang mga anak nailhan sa Hebreohanong pulong nga “Nepilim.” Ang Bibliya nag-ingon: “Ang mga Nepilim diha sa yuta niadtong mga adlawa, ug usab human niana, sa dihang ang mga anak sa matuod nga Diyos nagpadayon sa pagpakigdulog sa mga anak nga babaye sa mga tawo ug sila nagpatunghag mga anak kanila, sila ang mga gamhanan sa kakaraanan, ang mga tawong bantogan.” (Genesis 6:4) Gikaintapan ang mga Nepilim. Ang pulong “Nepilim” nagkahulogang “mga Tigpukan,” o mga indibiduwal nga nagpahinabog pagkapukan sa uban. Sila mga mamumuno kansang mapintas nga mga buhat lagmit nga giasoy usab diha sa mga sugilanon sa katigulangan.

Kasakit nga Giantos sa mga Matarong

Gihubit sa Bibliya kon unsa ka daotan ang maong kaliwatan ug kon unsa ka kaylap ang pagkadaotan. Kini nag-ingon: “Ang pagkadaotan sa tawo dagaya diha sa yuta ug ang matag kiling sa mga hunahuna sa iyang kasingkasing daotan lamang sa tanang panahon. . . . Ang yuta napuno sa kapintasan. . . . Ang tanang unod nagdaot sa dalan niini ibabaw sa yuta.”—Genesis 6:5, 11, 12.

Ingon niana ang kalibotan nga gipuy-an ni Noe. Apan dili sama sa mga tawo sa iyang palibot, “si  Noe maoy usa ka tawong matarong” nga “naglakaw uban sa matuod nga Diyos.” (Genesis 6:9) Dili sayon para sa usa ka tawong matarong ang pagkinabuhi nianang dili-matarong nga katilingban. Lagmit nga nasakit gayod si Noe sa gisulti o gibuhat sa mga tawo sa iyang palibot. Hayan gibati niya ang gibati ni Lot, nga usa usab ka tawong matarong nga nabuhi human sa Lunop. Si Lot, nga nagpuyo taliwala sa daotang mga molupyo sa Sodoma, “naguol pag-ayo gumikan sa pagpatuyang sa mga masupilon-sa-balaod nga katawhan diha sa malaw-ayng panggawi,” ug ang iyang “nakita ug nadungog . . . samtang nagpuyo siya uban kanila sa adlaw-adlaw nakapasakit sa iyang matarong nga kalag tungod sa ilang kalapasan.” (2 Pedro 2:7, 8) Lagmit nga ingon usab niana ang gibati ni Noe.

Nasakit ka ba usab sa daotang mga panghitabo nga imong nadungog o sa dili-diyosnong panggawi sa mga tawo sa imong palibot? Kon mao, masabtan nimo ang gibati ni Noe. Hunahunaa lang kon unsa ka lisod para kaniya nga mabuhi diha sa dili-matarong nga kalibotan sulod sa 600 ka tuig, kay mao kanay iyang edad sa dihang nahitabo ang Lunop. Lagmit gayong nangandoy siya ug kahupayan!—Genesis 7:6.

Si Noe May Kaisog nga Mahimong Lahi

Si Noe “walay-ikasaway taliwala sa iyang mga katalirongan.” (Genesis 6:9) Matikdi nga ang Bibliya nag-ingon nga siya walay-ikasaway taliwala sa iyang mga katalirongan, dili sa ilang panglantaw. Sa ato pa, siya walay-ikasaway atubangan sa Diyos, apan alang sa mga tawo niadtong panahona, si Noe lahi kanila. Makaseguro kita nga siya wala modawat sa opinyon sa kadaghanan, wala moapil sa ilang daotang mga kalingawan, ug wala makighugoyhugoy kanila. Handurawa kon unsay panglantaw sa mga tawo kaniya sa dihang gisugdan niya pagtukod ang arka! Lagmit nga ila siyang gikataw-an ug gibiaybiay. Wala sila maghatag ug pagtagad sa gisulti ni Noe.

Dugang pa, si Noe usa ka relihiyosong tawo ug wala niya itago ang iyang pagtuo. Ang Bibliya nag-ingon nga siya “usa ka magwawali sa pagkamatarong.” (2 Pedro 2:5) Sa walay duhaduha, nahibalo si Noe nga aduna gayoy mosupak sa iyang mensahe. Ang iyang apohan-sa-tuhod nga si Enoc maoy usa ka tawong matarong kinsa nagtagna nga pagahukman sa Diyos ang mga daotan. Dayag nga si Enoc gilutos tungod niini, apan wala itugot sa Diyos nga mapatay si Enoc sa iyang mga magsusupak. (Genesis 5:18, 21-24; Hebreohanon 11:5; 12:1; Judas 14, 15) Si Noe nagkinahanglag kaisog ug pagtuo sa katakos ni Jehova nga panalipdan siya batok kang Satanas, sa mga demonyo, sa mga Nepilim, ug sa mga mabiaybiayon o magsusupak.

Kadtong nag-alagad sa Diyos ginalutos gayod niadtong wala mag-alagad Kaniya. Bisan gani si Jesu-Kristo gidumtan, maingon man usab ang iyang mga sumusunod. (Mateo 10:22; Juan 15:18) Si Noe may kaisog sa pag-alagad sa Diyos, bisan pag ang kadaghanan wala magbuhat niana. Iyang nasabtan nga ang pagbaton sa pabor sa Diyos mas hinungdanon kay sa pagbaton sa pag-uyon niadtong supak Kaniya. Busa, naangkon ni Noe ang pabor sa Diyos.

Si Noe Namati

Sa ato nang nakita, si Noe maisogong nagwali ngadto sa mga tawo. Namati ba sila sa iyang mensahe? Ang Bibliya nag-ingon nga sa wala pa ang Lunop ang mga tawo “nangaon ug nanginom, nagminyo ug ang mga babaye gihatag sa kaminyoon, hangtod sa adlaw nga misulod si Noe sa arka; ug wala sila magtagad hangtod nga miabot ang baha ug gibanlas silang tanan.” Wala sila mamati sa pasidaan.—Mateo 24:38, 39.

Si Jesus nag-ingon nga susama usab niana ang kahimtang sa atong adlaw. Sulod na sa kapig usa ka gatos ka tuig, ang mga Saksi ni Jehova naghatag ug pasidaan nga laglagon ni Jehova ang mga daotan aron tumanon ang iyang gisaad nga bag-ong kalibotan sa pagkamatarong. Bisan tuod milyonmilyon na ang namati sa maong pasidaan, bilyonbilyon sa mga molupyo sa yuta ang wala magtagad niana. “Sumala sa ilang gitinguha,” wala sila manumbaling nga ang Lunop tinuod nga nahitabo ug nga kini adunay kahulogan sa atong adlaw.—2 Pedro 3:5, 13.

Apan si Noe namati sa pasidaan. Siya mituo sa gisulti ni Jehova nga Diyos kaniya. Tungod sa iyang pagkamasinugtanon, siya naluwas. Si apostol Pablo misulat: “Tungod sa pagtuo si Noe, human hatagi sa Diyos ug pasidaan mahitungod sa mga butang nga wala pa makita, nagpakitag diyosnong  kahadlok ug nagtukod ug arka aron sa pagluwas sa iyang panimalay.”—Hebreohanon 11:7.

Ehemplo nga Angayng Sundogon

Ang arka nga gitukod ni Noe dako kaayo—mas dako pa kay sa dulaanag potbol ug sama ka habog sa tres-andanas nga bilding. Mas taas kini ug 30 metros sa barkong Wyoming, nga mao kono ang kinadak-ang barko nga may kaskong gama sa kahoy. Tinuod nga ang arka dili barko; kinahanglan lamang kining molutaw. Bisan pa niana, gikinahanglan ang linaing katakos sa pagtukod niini. Gawas pa, kinahanglang bulitan ug alkitran ang sulod ug gawas niini. Tungod niana, lagmit mikabat ug kapin sa 50 ka tuig ang pagtukod niana.—Genesis 6:14-16.

Lain pa, si Noe kinahanglang magpondo ug usa ka tuig nga suplay sa pagkaon alang sa iyang pamilya ug sa mga mananap. Sa dili pa moabot ang Lunop, ang mga mananap kinahanglang tigomon ug ipasulod sa arka. “Gibuhat ni Noe ang sumala sa tanan nga gisugo ni Jehova kaniya.” Seguradong nakaginhawa siyag luag sa dihang ang tanan naandam na ug gisira na ni Jehova ang pultahan sa arka!—Genesis 6:19-21; 7:5, 16.

Unya nahitabo ang Lunop. Miulan sulod sa 40 ka adlaw ug 40 ka gabii. Ang tanan nagpabilin diha sa arka sulod sa usa ka tuig hangtod mihubas ang tubig. (Genesis 7:11, 12; 8:13-16) Ang tanang daotan nangamatay. Si Noe ug ang iyang pamilya lamang ang nakalabang-buhi ngadto sa usa ka nahinloan nga yuta.

Ang Bibliya nag-ingon nga ang Lunop sa adlaw ni Noe maoy “sumbanan . . . labot sa mga butang nga moabot.” Sa unsang paagi? Atong mabasa: “Ang mga langit ug ang yuta nga naglungtad karon gitagana alang sa kalayo ug gigahin alang sa adlaw sa paghukom ug sa kalaglagan sa mga tawong dili-diyosnon.” Apan, sama sa adlaw ni Noe aduna unyay maluwas. Makasalig ka nga “si Jehova mahibalo kon unsaon pagluwas sa katawhan nga may diyosnong pagkamahinalaron gikan sa pagsulay.”—2 Pedro 2:5, 6, 9; 3:7.

Si Noe usa ka tawo nga may diyosnong pagkamahinalaron, usa ka tawong matarong taliwala sa daotan nga kaliwatan. Siya masinugtanon gayod sa Diyos. Siya may kaisog sa pagbuhat kon unsay matarong bisag nahibalo siya nga tungod niini siya tamayon ug dumtan niadtong dili gustong moalagad sa Diyos. Pinaagi sa pagsundog kang Noe niining mga paagiha, atong maangkon usab ang pabor sa Diyos ug mabatonan ang paglaom nga maluwas ngadto sa usa ka bag-ong kalibotan nga hapit nang moabot.—Salmo 37:9, 10.

[Footnote]

[Blurb sa panid 5]

Ang mapintas nga mga buhat sa mga Nepilim lagmit nga giasoy usab diha sa mga sugilanon sa katigulangan

[Hulagway sa panid 7]

Pinaagi sa pagsundog sa pagtuo ni Noe, atong maangkon ang pabor sa Diyos

[Picture Credit Line sa panid 5]

Alinari/Art Resource, NY