Sayop Bang Gamiton ang Ngalan sa Diyos?

SA ORIHINAL nga Hebreohanong Kasulatan, nga sagad gitawag ug “Daang Tugon,” ang ngalan sa Diyos makita sa duolag 7,000 ka beses sa pormang יהוה (basahon gikan sa tuo ngadto sa wala). Sa laing pagkasulti, ang ngalan sa Diyos gihawasan sa upat ka Hebreohanong mga letra nga Yohdh, He, Waw, ug He, nga sagad isulat ingong YHWH.

Dugay na kanhi, ang mga Hudiyo adunay patuotuo nga dili angayng gamiton ang ngalan sa Diyos. Tungod niini, wala na nila kini litoka ug ilang gipulihan ang ngalan sa Diyos ug laing mga pulong diha sa ilang mga sinulat. Apan, daghang maghuhubad sa Bibliya ang naggamit sa ngalang “Yahweh,” o “Jehova.” Ang usa sa mga hubad nga naggamit sa maong ngalan mao Ang Bag-ong Maayong Balita Biblia. Sumala niini nga hubad, sa dihang si Moises nangutana sa Diyos kon unsay iyang itubag kon ang mga Israelitas mangutana kon kinsay nagpadala kaniya ngadto kanila, ang Diyos mitubag: “Kini ang isulti sa mga Israelita, ‘si Yahweh, ang Dios sa inyong mga katigulangan, ang Dios ni Abraham, ni Isaac ug ni Jacob nagpadala kanako nganhi kaninyo.’ Mao kini ang akong ngalan hangtod sa kahangtoran. Kini ang ingalan kanako sa umaabot nga mga kaliwatan.”—Exodo 3:15.

Masabtan nga gigamit ni Jesus ang balaang ngalan samtang nag-ampo: “Gipaila ko ang imong ngalan kanila ug igapaila pa kini.” Diha usab sa pag-ampo nga sagad gitawag ug Amahan Namo, si Jesus miingon: “Amahan namo nga anaa sa mga langit, pagabalaanon unta ang imong ngalan.”—Juan 17:26; Mateo 6:9.

Nan, matingala kita sa giingon ni Papa Benedict XVI diha sa iyang bag-ong libro nga Jesus of Nazareth maylabot sa paggamit sa balaang ngalan: “Ang mga Israelitas . . . husto gayod sa pagdumili nga litokon ang ngalan nga gipili sa Diyos alang sa iyang kaugalingon, nga gihawasan sa YHWH, aron dili kini mahisama kaubos sa mga ngalan sa paganong mga diyos. Sayop usab ang bag-ong mga hubad sa Bibliya tungod sa ilang paggamit sa maong ngalan—nga giisip sa mga Israelitas nga misteryoso ug dili angayng litokon—nga daw usa lamang kini ka karaang ngalan.”

Sa imong hunahuna sayop ba ang paggamit sa ngalan sa Diyos? Si Jehova mismo miingon: “Mao kini ang akong ngalan hangtod sa kahangtoran. Kini ang ingalan kanako sa umaabot nga mga kaliwatan.” Aduna bay usa nga makaingon nga nasayop ang Diyos?

[Hulagway sa panid 30]

Si Jesus naggamit sa balaang ngalan