Kon Unsay Atong Makat-onan Kang Jesus

Bahin sa Pagtratar sa Uban

Nganong magmaluloton?

Ikaw ba magmaluloton bisan pag ang uban dili maluloton kanimo? Kon buot natong sundogon si Jesus, kita kinahanglang magmaluloton bisan niadtong nagdumot kanato. Si Jesus miingon: “Kon inyong higugmaon sila nga nahigugma kaninyo, unsay dungog niini kaninyo? Kay bisan ang mga makasasala nahigugma man niadtong nahigugma kanila. . . . Sa kasukwahi, magpadayon sa paghigugma sa inyong mga kaaway . . . , ug kamo mahimong mga anak sa Labing Hataas, tungod kay siya maluloton ngadto sa mga dili-mapasalamaton ug sa daotan.”—Lucas 6:32-36; 10:25-37.

Nganong magmapinasayloon?

Sa dihang kita makasala, buot natong pasayloon kita sa Diyos. Si Jesus nagtudlo nga haom nga mangayo kitag pasaylo sa Diyos diha sa atong pag-ampo. (Mateo 6:12) Apan, si Jesus nag-ingon usab nga pasayloon lamang kita sa Diyos kon andam kitang mopasaylo sa uban. Siya miingon: “Kon kamo magapasaylo sa mga tawo sa ilang kalapasan, pasayloon usab kamo sa inyong langitnong Amahan; apan kon kamo dili magapasaylo sa mga tawo sa ilang kalapasan, dili usab pasayloon sa inyong Amahan ang inyong kalapasan.”—Mateo 6:14, 15.

 Sa unsang paagi magmalipayon ang pamilya?

Bisag si Jesus wala maminyo, daghan kitag makat-onan kaniya kon unsaon nga magmalipayon ang pamilya. Pinaagi sa pulong ug buhat, siya naghatag kanatog sulondan nga angay natong sundogon. Tagda ang mosunod nga tulo ka punto:

1. Ang bana kinahanglang maghigugma sa iyang asawa sama sa iyang kaugalingon. Si Jesus naghatag ug sulondan alang sa mga bana. Iyang giingnan ang iyang mga tinun-an: “Ako magahatag kaninyog bag-ong sugo, nga kamo maghigugmaay sa usag usa.” Sa unsang gilapdon nga ila kanang ipakita? Si Jesus nagtubag: “Ingon sa akong paghigugma kaninyo.” (Juan 13:34) Sa pagpadapat niining prinsipyoha ngadto sa mga bana, ang Bibliya nag-ingon: “Mga bana, magpadayon sa paghigugma sa inyong mga asawa, ingon nga si Kristo nahigugma usab sa kongregasyon ug nagtugyan sa iyang kaugalingon alang niini . . . Sa ingon niini ang mga bana angay nga maghigugma sa ilang mga asawa sama sa ilang kaugalingong mga lawas. Siya nga nahigugma sa iyang asawa nahigugma sa iyang kaugalingon, kay wala gayoy tawo nga nagdumot sa iyang kaugalingong unod; kondili nagapakaon ug nagapangga niini, ingon sa ginahimo usab ni Kristo sa kongregasyon.”—Efeso 5:25, 28, 29.

2. Ang mga magtiayon angayng magmaunongon sa usag usa. Ang pagpanapaw sala batok sa Diyos ug makabungkag sa pamilya. Si Jesus nag-ingon: “Wala ba ninyo [kini] mabasa . . . ‘Tungod niini ang usa ka lalaki mobiya sa iyang amahan ug sa iyang inahan ug moipon sa iyang asawa, ug ang duha mahimong usa ka unod’? Mao nga dili na sila duha, kondili usa ka unod. Busa, kon unsay gihiusa pagyugo sa Diyos ayaw ipabulag ni bisan kinsang tawo. . . . Ako magaingon kaninyo nga bisan kinsa nga makigdiborsiyo sa iyang asawa, gawas kon tungod sa pakighilawas, ug magminyog lain makapanapaw.”—Mateo 19:4-9.

3. Ang mga anak kinahanglang magpasakop sa ilang mga ginikanan. Bisan tuod hingpit si Jesus ug ang iyang mga ginikanan dili, siya nagmasinugtanon kanila. Sa dihang 12 anyos pa si Jesus, ang Bibliya nag-ingon: “Siya milugsong uban kanila [iyang mga ginikanan] ug nahiabot sa Nasaret, ug siya nagpadayon sa pagpasakop kanila.”—Lucas 2:51; Efeso 6:1-3.

Nganong sundon kining mga prinsipyoha?

Maylabot sa mga pagtulon-an nga gitudlo ni Jesus sa iyang mga tinun-an, siya nag-ingon: “Kon nahibalo kamo niining mga butanga, malipayon kamo kon inyo kining buhaton.” (Juan 13:17) Aron mahimong tinuod nga mga Kristohanon, kinahanglan natong sundon ang mga tambag nga gitudlo ni Jesus bahin sa pagtratar sa uban. Siya nag-ingon: “Pinaagi niini ang tanan makaila nga kamo akong mga tinun-an, kon kamo adunay gugma sa inyong taliwala.”—Juan 13:35.

Alang sa dugang kasayoran, tan-awa ang kapitulo 14 sa librong Unsay Tinuod nga Gitudlo sa Bibliya? a

[Footnote]

[Hulagway sa panid 16, 17]

Ang sambingay ni Jesus bahin sa anak nga mausikon nagtudlo kanato kon unsa kahinungdanon ang pagkamaluloton ug pagkamapinasayloon.—Lucas 15:11-32

[Hulagway sa panid 17]

Ang mga magtiayon angayng magmaunongon sa usag usa