Nganong Magmapasalamaton?

“Minahal kong Raquel,

Daghan kaayong salamat sa imong pagdasig kanako. Wala ka lang tingali makamatikod, apan ang imong gihimo ug gisulti nakatabang gayod kanako.”—Jennifer.

NAKADAWAT ka na ba sukad ug sulat-pasalamat? Sa walay duhaduha, natandog gyod ang imong kasingkasing niana. Ang tinuod, gusto natong dayegon ug pasalamatan.—Mateo 25:19-23.

Ang usa nga mapasalamaton masuod niadtong iyang gipasalamatan. Dugang pa, siya nagsunod sa mga tunob ni Jesu-Kristo, nga nagpabili gayod sa maayong mga buhat nga gihimo sa mga tawo.—Marcos 14:3-9; Lucas 21:1-4.

Ikasubo, nagkadaghan karon ang dili mapasalamaton. Ang Bibliya nagpasidaan nga sa “kataposang mga adlaw,” ang mga tawo “dili-mapasalamaton.” (2 Timoteo 3:1, 2) Kon dili kita magbantay, mahimong matakdan kita sa pagkadili-mapasalamaton sa mga tawo nga kaylap sa kalibotan karon.

Unsang praktikal nga mga lakang ang mahimong himoon sa mga ginikanan sa pagtudlo sa ilang mga anak nga magmapasalamaton? Kinsa ang angay natong pasalamatan? Ug nganong angay kitang magmapasalamaton, bisan pag ang uban dili mapasalamaton?

Sulod sa Panimalay

Ang mga ginikanan naghago aron matagan-an ang panginahanglan sa ilang mga anak. Apan, sila mobati usahay nga wala pabilhi ang ilang mga paningkamot. Unsay angay nilang himoon? Dunay tulo ka paagi nga angayng tagdon.

(1) Sulondan. Sama sa ubang paagi sa pagbansay sa mga anak, ang paghatag ug maayong sulondan maoy usa ka epektibong paagi sa pagtudlo kanila. Sa paghisgot bahin sa usa ka kugihang inahan sa karaang Israel, ang Bibliya nag-ingon: “Dinayeg siya sa iyang mga anak.” Diin man makakat-on ang mga anak sa paghatag ug pagdayeg? Ang sumpay sa bersikulo nagtubag: “Dayegon usab siya sa iyang bana.” (Proverbio 31:28, Ang Bag-ong Maayong Balita Biblia) Ang mga ginikanan nga magdayeg ug magpasalamat sa usag usa nagtudlo sa ilang mga anak nga ang pagpasalamat makapalipay sa gipasalamatan, makapasuod sa pamilya, ug usa kini ka timailhan sa pagkahamtong.

Si Stephen nga usa ka amahan nag-ingon, “Naningkamot ako nga makahatag ug maayong sulondan sa akong mga anak pinaagi sa pagpasalamat sa akong asawa sa iyang pag-andam kanamo ug panihapon.” Unsay resulta? “Namatikdan kini sa among duha ka anak nga babaye, ug nakatabang kini kanila nga magmapasalamaton usab,” matod pa ni Stephen. Kon ikaw minyo, kanunay ba nimong pasalamatan ang imong kapikas bisag ang iyang gihimo naandan na nga mga buluhaton sa balay? Pasalamatan ba nimo ang imong mga anak, bisan sa mga butang nga angay nilang buhaton?

(2) Pagbansay. Aron mamulak pag-ayo ang usa ka tanom, kini kinahanglang galmon. Ingon usab niana ang pagkamapasalamaton. Sa unsang paagi matabangan sa mga ginikanan ang ilang mga  anak nga maugmad ang pagkamapasalamaton? Gipasiugda sa maalamong hari nga si Solomon ang usa ka hinungdanong punto sa dihang siya misulat: “Ang kasingkasing sa matarong nagapamalandong aron sa pagtubag.”—Proverbio 15:28.

Sa dihang makadawat ug regalo ang inyong mga anak, mahimo ba ninyong itudlo kanila nga angay nilang pabilhan ang paningkamot ug pagkamanggihatagon sa naghatag kanilag regalo? Kining paagiha makatabang kanila nga maugmad ang pagkamapasalamaton. Si Maria, nga nagmatuto ug tulo ka anak, nag-ingon: “Nagkinahanglan gayod ug panahon ang pagtudlo ug pagpatin-aw sa inyong mga anak kon nganong gihatagan silag regalo—nga adunay naghunahuna kanimo ug gustong ipakita sa naghatag kon unsa ka niya ka mahal. Apan dili gyod makawang ang imong mga paningkamot.” Ang maong panagsultianay makatabang sa mga anak nga makakat-on dili lamang kon unsay angay nilang isulti sa pagpakita sa ilang apresasyon kondili kon nganong angay nila kanang isulti.

Tabangan sa maalamong mga ginikanan ang ilang mga anak nga dili maghunahuna nga obligado ang ilang mga ginikanan sa paghatag kanila sa tanan nilang gusto. a Ang pasidaan nga mabasa sa Proverbio 29:21 bahin sa pagtratar sa mga sulugoon mapadapat usab sa mga anak: “Kon patuyangan sa usa ka tawo ang gusto sa iyang sulugoon sukad sa pagkabatan-on, siya mahimong ingrato sa ulahing bahin sa iyang kinabuhi.”

Sa unsang paagi matudloan ang mga bata sa pagpasalamat? Si Linda, nga may tulo ka anak, nag-ingon, “Among padrowingon ang among mga anak o pasulaton sa ilang ngalan diha sa thank-you card nga among ipadala.” Tingali ang mga drowing simple ra ug ang ilang agi lisod basahon, apan ang ilang makat-onan gikan niini dili gayod nila malimtan sa tibuok nilang kinabuhi.

(3) Paglahutay. Sukad sa pagkabata, nakagamot na kanato ang pagkahimong hakog, ug kini makapugong kanato sa pagpakitag apresasyon. (Genesis 8:21; Mateo 15:19) Apan, ang Bibliya nag-awhag sa mga alagad sa Diyos: “Magbag-o kamo diha sa puwersa nga nagpalihok sa inyong kaisipan, ug magsul-ob sa bag-ong pagkatawo nga gilalang sumala sa kabubut-on sa Diyos.”—Efeso 4:23, 24.

Apan, ang taas-ug-kasinatian nga mga ginikanan nasayod nga dili gayod sayon ang pagtabang sa mga anak sa ‘pagsul-ob ug bag-ong personalidad.’ Si Stephen, nga gihisgotan sa ibabaw, nag-ingon, “Dugay kaayong nakakat-on ang among mga anak nga babaye sa pagpasalamat nga kinabubut-on, nga dili na kinahanglang sultian pa.” Apan wala mohunong si Stephen ug ang iyang asawa. “Padayon namong gitudloan ang among mga anak hangtod nga sila nakakat-on,” dugang pa ni Stephen. “Karon mapasigarbohon kami nga sila makamao nang mopasalamat.”

Komosta sa Atong mga Higala ug Silingan?

Usahay malimot kita sa pagpasalamat, apan wala kini magpasabot nga kita dili mapasalamaton. Hinungdanon ba gayod nga atong ipahayag ang atong pagkamapasalamaton? Sa pagtubag niining pangutanaha, tagda ang panghitabo bahin kang Jesus ug sa pipila ka sanlahon.

Samtang nagpaingon si Jesus sa Jerusalem, siya nakahibalag ug napulo ka lalaking sanlahon. Ang Bibliya nag-asoy: “Gipatugbaw nila ang ilang mga tingog ug miingon: ‘Jesus, Magtutudlo, kaluy-i kami!’ Ug sa dihang iyang nakita sila, siya miingon kanila: ‘Lakaw ug ipakita ang inyong kaugalingon ngadto sa mga saserdote.’ Unya samtang naglakaw sila, nahitabo ang paghinlo kanila. Usa kanila, sa nakita niya nga siya naayo, mibalik, nga naghimaya sa Diyos uban sa makusog nga tingog. Ug siya mihapa sa tiilan ni Jesus, nga nagpasalamat kaniya; labot pa, siya usa ka Samarianhon.”—Lucas 17:11-16.

Wala lang ba magpakabana si Jesus sa dihang ang uban napakyas sa pagpahayag ug pasalamat? Ang asoy nagpadayon: “Sa pagtubag si Jesus miingon: ‘Ang napulo nahinloan, dili ba? Nan, hain ba ang siyam? Wala bay nakaplagan nga mibalik aron sa paghatag ug himaya sa Diyos gawas niining tawo sa laing nasod?’”—Lucas 17:17, 18.

Ang siyam ka sanlahon dili daotan. Di pa dugay nga ilang gipahayag nga sila nagtuo kang Jesus ug  kinabubut-ong misunod sa iyang giingon kanila, sa pag-adto sa Jerusalem aron magpakita sa mga saserdote. Sa ilang kasingkasing, sila mapasalamaton gayod sa gihimo ni Jesus, apan sila napakyas sa pagpahayag niana ngadto kaniya. Ang ilang gibuhat nakapahigawad kang Kristo. Komosta kita? Kon kita pakitaag kaayo, magpasalamat ba dayon kita?

Ang Bibliya nag-ingon nga “ang gugma dili bastos o hakog.” (1 Corinto 13:5, Today’s English Version) Busa, ang kinasingkasing nga pagpahayag ug pasalamat dili lang pagpakita ug maayong pamatasan kondili usa usab kini ka pamatuod sa gugma. Sama sa pagtulon-an nga atong makat-onan bahin sa mga sanlahon, kadtong gustong pahimut-an si Kristo kinahanglang magpakitag gugma ug apresasyon sa tanan, bisan unsa pay ilang nasyonalidad, rasa, o relihiyon.

Pangutan-a ang imong kaugalingon, ‘Kanus-a ang kataposang higayon nga akong gipasalamatan ang usa ka silingan, kauban sa trabaho, eskolmet, empleyado sa ospital, tindera, o ang uban nga mitabang kanako?’ Sulayi paglista sulod sa usa o duha ka adlaw kon kapila ka nagpasalamat sa uban. Kini makatabang kanimo nga makita kon angay ba nimong pauswagon ang paghatag ug pasalamat.

Siyempre, ang usa nga takos gayod sa atong mga pasalamat mao si Jehova nga Diyos. Siya ang Maghahatag sa “matag maayong gasa ug matag hingpit nga regalo.” (Santiago 1:17) Kanus-a ang ulahing higayon nga ikaw kinasingkasing nga nagpasalamat sa Diyos tungod sa usa ka butang nga iyang gihimo kanimo?—1 Tesalonica 5:17, 18.

Nganong Magmapasalamaton Bisan pag ang Uban Dili Mapasalamaton?

Ang uban basin dili magpasalamat sa kaayo nga atong gipakita kanila. Nan, nganong angay man kitang magpasalamat bisan pag ang uban dili mapasalamaton? Hunahunaa ang usa ka rason.

Pinaagi sa pagpakitag kaayo ngadto sa usa nga dili mapasalamaton, kita nagsundog sa atong mapuangorong Maglalalang, si Jehova nga Diyos. Bisan pag ang kadaghanan wala magpabili sa gugma nga Iyang gipakita, siya padayong nagbuhat ug maayo kanila. (Roma 5:8; 1 Juan 4:9, 10) Siya ‘nagapasubang sa iyang adlaw diha sa mga tawong daotan ug sa mga maayo ug nagapaulan diha sa mga tawong matarong ug sa mga dili-matarong.’ Kon kita maningkamot sa pagpakitag apresasyon ug sa pagpahayag sa atong pasalamat bisan pag nagkinabuhi kita sa kalibotan nga kaylap ang pagkadili-mapasalamaton, atong mapamatud-an nga kita “mga anak sa [atong] Amahan nga anaa sa mga langit.”—Mateo 5:45.

[Footnote]

[Blurb sa panid 15]

Sulayi paglista sulod sa usa o duha ka adlaw kon kapila ka nagpasalamat

[Hulagway sa panid 15]

Paghatag ug maayong sulondan sa inyong mga anak bahin sa pagkamapasalamaton

[Hulagway sa panid 15]

Bisan ang mga bata mahimong matudloan sa pagpasalamat