Nakaila Ka ba sa Imong Langitnong Amahan?

NAKAILA ka ba gayod sa imong amahan? Tingali ikaw motubag nga, ‘Siyempre!’ Ang tinuod, dili na kana angayng ipangutana kon ikaw nagdako diha sa usa ka mahigugmaong pamilya. Kadaghanan kanato nahibalo kon unsay gusto ug dili gusto sa atong amahan, kon unsay iyang reaksiyon sa pipila ka situwasyon, ug kon sa unsang paagi siya nag-atiman sa pamilya.

Bisan pa niana, may mga higayon tingali nga mahingangha ka sa iyang reaksiyon. Pananglitan, ang imo tingaling amahan hilomon ug malumo. Apan sa dihang mameligro na ang inyong pamilya, siya molihok dayon aron sa pagpanalipod kaninyo.

Komosta ang bahin sa atong Maglalalang? Mahitungod kaniya, kita giingnan: “Pinaagi kaniya kita adunay kinabuhi ug naglihok ug naglungtad.” (Buhat 17:28) Utang nato sa Diyos ang atong kinabuhi; niana nga diwa siya mao ang Amahan sa tanan nga may kinabuhi. (Isaias 64:8) Tingali mao kanay imong pagbati sa Diyos, ug angay lamang nga mao kanay atong bation. Apan, daghan pa kitag angayng mahibaloan ug makat-onan bahin kaniya​—nga makahatag kanatog kaayohan ug kalipay.

Mas masuod ka sa imong amahan ug mas molalom ang imong pagtahod kaniya kon ikaw nakaila pag-ayo kaniya. Sa susama, mas masuod ka sa Diyos, kon ikaw nakaila pag-ayo kaniya. Siya makatabang kanimo sa paglahutay sa tanang kalisdanan sa kinabuhi kon ikaw makaila pag-ayo kaniya ug makakat-on sa pagbuhat sa iyang kabubut-on.

Unsang matanga sa persona ang Diyos? Unsay angayng epekto sa iyang mga hiyas diha kanimo? Ang pagkaila ba kaniya nagpasabot nga aduna kitay responsibilidad nga angayng atubangon? Imong masayran ang tubag niining mga pangutanaha sa sunod nga artikulo.

[Blurb sa panid 3]

Mas masuod ka sa uban kon ikaw nakaila pag-ayo kanila