Sulat Gikan sa Nicaragua

“Pag-abot Nimo sa Suba sa Coco, Liko Patuo”

“MAGKINAHANGLAN kag sakyanan nga may duwal, makina nga igbibira, ug reserbang gasolina. Pangandam kay lagmit malubong ang sakyanan. Pag-abot nimo sa Suba sa Coco, liko patuo.”

Sa pagkatinuod, nabalaka gihapon ko bisan pa sa giingon sa kauban nakong misyonaryo. Bisan pa niana, pagka-Martes, ako milarga paingon sa Wamblán, nga usa ka gamayng lungsod sa amihanang Nicaragua, aron motambong sa Kristohanong asembliya.

Kaadlawon pa sa dihang migikan ko sakay sa akong karaan apan lig-on pa nga sakyanan ug akong gisubay ang nindot nga Pan-American Highway. Sa Jinotega, miagi ko sa dili-sementadong karsada nga gitawag sa mga taga-didto ug feo, nga nagkahulogang maot. Sa maong lungsod, nakakita kog duha ka tindahan, ang karatula sa usa Milagro sa Diyos ug ang lain, Pagkabanhaw.

Ang dalan likoon, tungason, ug lugsongon. Misubay ko sa usa ka lugot ug nakaagi sab kog dakong lanaw nga nahimutang sa usa ka walog diha sa bukid nga naputos sa gabon. Bisag adunay gabon, akong nakita ang mga kahoy nga nataptan ug mga tanom ug mga orkid.

Diha sa usa ka hiktin kaayo nga kurbada, hapit ko mabanggai sa bus nga mikawat ug linya. Itom kaayo kinig aso ug nanglagpot ang mga bato pag-agi niini. Dinhi sa Nicaragua, mabasa diha sa samin atubangan sa bus ang mga alyas sa agresibong mga drayber sama sa: Mananaog, Tanga, Sawa, o Mangangayam.

Pagkaudto, nakaabot ko sa Kapatagan sa Pantasma. Nakakita ko didtog payag nga hinlog nataran ug dihay usa ka tigulang nga lalaki nga naglingkod sa bangko, iro nga natulog sa silong sa kahoy, ug duha ka baka nga gitaorag karomata. Sa usa ka gamayng lungsod, dihay grupo sa mga bata nga nanggawas sa eskuylahan. Tungod sa ilang asul nga uniporme, mora silag mga balod nga nagpadulong sa baybayon.

Init kaayo ang adlaw sa dihang duol na ko sa Wiwilí, ug akong nakita ang suba sa Coco. Kining dakong suba mitadlas sa maong lungsod. Nahinumdoman nako ang gisulti sa akong kaubang misyonaryo busa ako miliko patuo ug misubay sa delikado kaayong dalan paingon sa Wamblán, nga mga 37 kilometros pa ang gilay-on.

Ang akong sakyanan miagi sa libaong kaayo nga dalan ug mitabok ug walo o siyam ka sapa. Gilikayan nako ang dagkong lungag diha sa lapok nga mibagtok ug nanglupad ang abog pag-agi nako. Sumala pa sa termino sa mga taga-didto, “Mikaon kog abog.” Sa kataposan, nakaabot ko sa akong destinasyon sa Wamblán​—usa ka landong  nga dapit nga nahimutang sa walog nga punog mga kahoy.

Pagkaugma, alas 4:30 pa lang sa buntag mata na ang mga tawo. Kay nakamata na sa tugaok sa mga manok, mibakod ko aron maglakawlakaw sa karsada. Humot kaayo ang mga tortilya nga giluto diha sa pugon.

Diha sa mga bungbong, adunay nindot kaayong mga hulagway sa paraiso nga gidrowing sa mga pintor didto. Ang mga pulpería, o mga tindahan, may mga karatula sa lainlaing mga softdrink. Duna usay mga poster nga magpahinumdom sa mga tawo sa mga panaad sa miaging tulo ka administrasyon. Ang ilang mga kasilyas hinimo sa sin ug ang salog niini semento.

Ako ang unang mitimbaya gamit ang pulong sa Nicaragua nga Adiós. Ang mga tawo mipahiyom ug miabiabi kanako. Kay saba man kaayo ang tunob sa nanglabay nga mga kabayo ug mga mula panahon sa among pag-estoryahay, kinahanglan namong kusgon ang among tingog.

Sa Biyernes sa gabii, nangabot ang daghang pamilya alang sa duha-ka-adlaw nga asembliya. Ang uban namaktas ug ang uban nanakayg kabayo o trak. Ang pipila ka batang lalaki ug babaye namaktas sulod sa unom ka oras nga nagsinelas ra. Bisan pa sa gitanom nga mga bomba diha sa mga tabokanan sa suba ug sa mga alimatok diha sa mga lim-aw, ila gihapon kanang gitabok. Ang pipila nga naggikan sa lagyong mga komunidad nagdala lamang ug gamayng pagkaon​—kan-on nga gisagolag mantika sa baboy. Nganong nangadto sila didto?

Kana tungod kay buot nilang palig-onon ang ilang paglaom alang sa mas maayong kaugmaon. Buot usab nilang maminaw sa paghisgot sa Bibliya ug pahimut-an ang Diyos.

Miabot ang adlawng Sabado. Diha sa gambalay nga sin ug atop, kapig 300 ka tawo ang nanglingkod sa kahoy ug plastik nga mga lingkoranan. Makita nimo ang mga inahan nga nagpakaon sa ilang mga anak. Madungog usab ang tingog sa mga baboy ug mga manok nga anaa sa duol.

Bisan pa sa naglagiting nga kainit, ang mga tawo naminaw pag-ayo sa mga tambag ug mga giya nga gihatag kanila. Ilang gisundan diha sa ilang Bibliya ang mga tekstong gibasa sa mamumulong. Sila miawit ug mga alawiton ug matinahorong namati sa pag-ampo.

Human sa programa, nakigdula ko sa mga bata ug dakpanay. Dayon among gihisgotan ang mga punto gikan sa programa nga ilang gisulat. Akong gipakita kanila ang hulagway sa mga bituon ug mga galaksiya diha sa akong kompiyuter. Nalingaw ang mga bata ug nalipay usab ang ilang mga ginikanan.

Dali ra kaayong nahuman ang asembliya, ug kinahanglang mamauli na ang tanan. Pagkabuntag, migikan ko uban ang nindot kaayong mga kasinatian. Ang akong kasingkasing napuno sa gugma alang sa akong bag-ong mga higala. Gusto gayod nakong sundogon ang ilang pagkakontento ug pagsalig sa Diyos.

[Mga hulagway sa panid 17]

Mga pamilya nga nagbiyaheg daghang kilometro aron motambong sa asembliya sa Wamblán