Mahigugmaon sa Hustisya
Pakigsuod sa Diyos
Mahigugmaon sa Hustisya
NABIKTIMA ka na ba sa inhustisya o mapintas nga pagtratar, nga tingali gihimo sa usa ka tawo nga wala masiloti ug wala magbasol? Lisod gayod kanang dawaton, ilabina kon kana gibuhat sa usa nga angay untang magpakitag gugma ug kahangawa kanimo. Mangutana ka tingali, ‘Nganong gitugotan man sa Diyos nga mahitabo kini?’ a Ang tinuod, gidumtan ni Jehova ang tanang inhustisya. Ang iyang Pulong, ang Bibliya, nagpasalig kanato nga dili gayod makaikyas sa silot ang nagabatasan sa pagpakasala. Atong hisgotan ang mga pulong ni apostol Pablo nga nasulat sa Hebreohanon 10:26-31.
Si Pablo misulat: “Kon kita tinuyo nga magpakasala human makadawat sa tukmang kahibalo sa kamatuoran, wala nay halad nga nahibilin alang sa sala.” (Bersikulo 26) Mas dakog tulubagon ang mga tawo nga tinuyong nagpakasala. Ngano? Una, sila nakasala dili tungod kay nadaog sila sa ilang kahuyangan—ang matang sa sala nga mahimo nato usahay tungod sa atong pagkadili-hingpit. Sila nagbatasan sa pagpakasala. Ikaduha, tinuyo nila kanang gibuhat. Nakagamot na pag-ayo ang pagkadaotan sa ilang kasingkasing. Ikatulo, sila nakasala dili tungod kay wala silay kahibalo. Sila adunay “tukmang kahibalo sa kamatuoran” bahin sa kabubut-on sa Diyos ug sa iyang mga paagi.
Unsay panglantaw sa Diyos sa mga dili mahinulsolon ug tinuyo nga nagpakasala? “Wala nay halad nga nahibilin alang sa sala,” matod ni Pablo. Ang halad ni Kristo—ang gasa sa Diyos ngadto sa katawhan—magtabon sa sala nga atong mahimo tungod sa pagkadili-hingpit. (1 Juan 2:1, 2) Apan kadtong nagbatasan sa pagpakasala ug wala maghinulsol wala magpabili niining gasaha. Sa panglantaw sa Diyos, sila “nagyatak sa Anak sa Diyos ug nag-isip nga ordinaryog bili ang dugo” ni Jesus. (Bersikulo 29) Tungod sa ilang gibuhat, sila nagtamay kang Jesus ug nag-isip sa iyang dugo nga “walay bili,” nga daw sama ra kini sa dugo sa dili-hingpit nga mga tawo. (Ang Bag-ong Maayong Balita Biblia) Ang mga ingrato nga sama kanila dili makapahimulos sa halad ni Kristo.
Unsay madahom sa mga daotan? Ang Diyos sa hustisya nagsaad: “Akoa ang panimalos; ako mobalos.” (Bersikulo 30) Angayng magbantay kadtong padayong nagpahinabog kadaot sa uban. Dili gayod makalingkawas sa silot sa Diyos ang tinuyo nga nagsupak sa iyang mga balaod. Kasagaran, ilang anihon ang sangpotanan sa ilang daotang mga buhat. (Galacia 6:7) Bisag wala pa nila kana aniha karon, sila manubag sa Diyos sa dili madugay sa dihang iya nang wagtangon ang tanang inhustisya dinhi sa yuta. (Proverbio 2:21, 22) Si Pablo nagpasidaan: “Makahahadlok nga mahulog ngadto sa mga kamot sa buhing Diyos.”—Bersikulo 31.
Ang pagkahibalo nga si Jehova nga Diyos dili mokonsentir sa tinuyo nga pagpakasala makapahupay ug makapadasig gayod, ilabina niadtong nabiktima sa usa nga padayong nagabuhat ug daotan. Makasalig kita nga ang Diyos, kinsa nagdumot sa tanang inhustisya, manimalos alang kanato.
[Footnote]
a Alang sa mga detalye kon nganong gitugotan sa Diyos ang pag-antos, tan-awa ang panid 106-114 sa librong Unsay Tinuod nga Gitudlo sa Bibliya? nga gipatik sa mga Saksi ni Jehova.